Jesusimut uppernerartut amerlaqaat
„JESUSINNGUAQ! Ilumut Jesusinnguup ajunngingaassusia!“ Arnaq uppertoq Brasiliamiu taama oqarpoq. Jesusip aqqata inunnut sunniuteqartarnera assortorneqarsinnaanngilaq. Oqaluttuarisaanerup ingerlanerani inuppassuit Jesus pillugu naalliunnissaminnut toqunissaminnullu piumassuseqarsimapput.
Apustilit Peter aamma Johannes Jerusalemimi ’Jesusip aqqani’ oqaluussisimapput, taamaaliornertillu pillugu tigusaallutillu iperartorneqarlutik. Taamaakkaluartorli ’killisiuisoqatigiit saannit aallarsimapput tipaatsullutik, aqqa pillugu mitaatigineqaqqusaagamik’. — apustilit suliait 5:28, 41.
Antipas tassaavoq ukiuni hundredelinni siullerni kristumiu Jesusip aqqanik pingaartitsingaartoq alla. Biibilip atuagartaasa kingullersaanni, sarĸúmersitat-ni, taanna pillugu Jesus ima oqarpoq: ’Nalunaajaasiga ilissinni toqutaasoq Satanip ineqarfiani’. (sarĸúmersitat 2:13) Taassuma kristumioqatini Pergamumimiittut peqatigalugit Kristusimut uppernini miserratigiumasimanngilaa. Allaat toqumik kingunilimmik Jesusip aqqa aalajangiusimavaa!
Ukiut hundredellit affaasa missingi qaangiuttut, ukiumi 155-imi, kristumiuunerartoq Polycarpimik atilik tamatumunnga assingusumik misilinneqarpoq Kristusimik perloqquseqquneqarami. Ima akisimavoq: „Ukiuni 86-ini taassumunnga kiffartorsimavunga, eqqunngitsumillu iliorfiginngisaannarsimavaanga. Qanoq ilillunga kunngiga uannik annaassisoq mitaatigisinnaassavara?“ Polycarp Kristusimik miserratiginneqquneqarnerminut itigartitsimmat qisummut qilersorlugu ikuallanneqarpoq.
Apustilit, Antipas allallu Kristus pillugu nalunaajaatertik toqukkut naqissusersimavaat! Ullumikkummi?
Ullumikkut Jesusip aqqa
Jesusip aqqa misigissutsinik sakkortuunik qaffatsitsisartuarsinnarpoq. Latinamerikami ukiuni qulikkaani kingullerni upperisarsioqatigiit Jesusimut uppernerartut aatsaat taama amerlatigilersimapput. Allaat nunaqarfiit minnerpaat piinsisiortunik ilageeqartiterput. Tamannalu ilutigalugu upperisarsiortut taama ittut naalakkersuinermut sunniuteqarnerujartorput. Assersuutigalugu Brasiliap naalakkersuisuini inatsisartuinilu issiaviit 31-it upperisarsioqatigiinnut tamakkununnga ilaasortaasunit issiavigineqarput.
USA-missaaq upperisarsioqatigiinni nutaani Jesus assut pingaartinneqarpoq. Upperisarsioqatigiinnut taakkununnga ilaasortat imminnut Promise Keepersimik (nersiorsuummik eqqortitsisut-mik) taagorput. Atuagassiami Time-mi 1997-imi nalunaarutigineqarpoq upperisarsioqatigiinnut taakkununnga orniguttartut 1991-imi 4200-mit 1996-imi 1,1 millionimut amerleriarsimasut. Tussiutaasa ilaat ilaatigut ima oqaasertaqarpoq: „Oh, Jesusimi, naassaanngitsumik Annaassisinni, ippoq ajugaassut.“
Misigissutsilli Jesusip aqqanut atanerarneqartut pitsaasuinnaanngillat. Taassuma aqqani sorsuuttoqakulavoq. Juutit nungusarniarneqarsimapput, juutiunngitsut toqorarneqartarsimapput, allamik upperisallit naalliutsinneqartarsimapput, aqqunartiterneqartarsimallutik qisummullu qilersorlugit ikuallanneqartarsimallutik — tamarmik Jesusip aqqani. Ukiunilu nutaanerusuni iivangkiiliu aningaasarsiutaagaluttuinnalersimavoq. Tamakkua tamarmik Jesusip aqqanik tamatumalu isumaanik atornerluinerupput ajorluinnarlutillu maajunnarluinnartut.
Tamakkua tunngavigalugit ima aperisoqarsinnaavoq: Jesusip aqqanut uppernerup suut nassatarai? Tamannalu pillugu Jehovap Nalunaajaasui qanoq isumaqarpat? Apeqqutit tamakku allaaserisami tulliuttumi akineqassapput.