Naalagaaffimmik oqaluussissutiginninnermit nutaarsiassat

Guuti Alaskami naajartortitsivoq

APUMMIT sermimillu qallerneqarsimalluni naasussaq mikisuarannguaq naalernissaminut periarfissamik utaqqiinnartarpoq. Alaskap aasaani sivikitsumi qaammatinik pingasunik sivisussusilimmi kålip naasussartaa sanimut napillugu 3 millimeterinik silissuseqartoq naasinnaasarpoq 40 kiilungajannik oqimaassuseqalerluni. Aap, nuna tamanna naggorluttutut sermiinnaasutullu qanga isigineqartarsimagaluartoq naggorissorsuuvoq.

Minnerunngitsumik Alaskap narsartai anersaakkut ittut taamaapput. Nunami sivisuumik ukiuusartumi tamaani Jehovap nalunaajaasui Guutip naalagaaffiata naasussartaanik nakkalatseriuarsinnarput. Silarsuup ilaanisut allatulli tamaani Guutip naasussat tamakku uummatini naggorissuni naajartortittarpai. — 1 Korintumiut 3:6, 7.

• Vanessap, Jehovap nalunaajaasuisa ilaata inuusukaap, atuarfiup bussiinut ilaagaangami malugisarpaa atuaqatini Ann immikkoorluni issiajuaannartoq. Nikallungarpasittarpoq, taamaattumik ilaanni Vanessap aperaa sanianut ingissinnaanerluni. Tupinnanngilaq Ann aliasuppasimmat, anaanaami uummallulluni toqusimavoq, tamatumalu kingunitsianngua ataataa kræfterluni toqusimalluni. Taamaattumik Alaskami qanigisamini najugaqalersimavoq.

Vanessap arfininngornermi ullaap-tungaa oqaluussitilluni Ann atuagassiaaqqamik Guutip ilumut soqutigaatigut?-mik pajuppaa. Ataasinngornermi atuarfimmi Annip Vanessa ornippaa. Biibilimut tunngasunik apeqqutissarpassuaqarpoq Vannessap akisinnaasaanik. „Sumi naalagiartarpisi?“ Ann aperivoq. Unnuk taanna Ann siullermeerluni naalagaaffilersaartarfimmi ataatsimiinnermut najuuppoq.

Sivitsunngitsoq niviaaluk iliarsuk 17-inik ukiulik taanna Jesusip neriorsuisimaneratut ’ataatarpassuaqalerlunilu’ ’anaanarpassuaqalerpoq’. (Matîuse 19:29) Nuanneqaarlu takullugu Ann Jehovamut tunniulluinnarsimanini takutinniarlugu nuannaaqaluni qungujulaqalunilu ataatsimeersuarnermi „Eqqissinermik Guutip pianik tusarliisut“-mik qulequtalimmi imermi kuisittoq.

• Alaskap nunatarujussuata issittup avinngarusimasortaani — inuilaamik kilometerisut hundredelippassuartut isorartutigisumik akunnilinnik illoqarfilimmi — Napasuliaq Alapernaarsuiffiup Peqatigiiffiata timmisartua marlunnik motoorilik atorlugu inoqarfinni 150-init amerlanerusuni Guutip naalagaaffiata naasussartaa siaruarterneqartarpoq. Pulaagarli aalajangersimasumik Biibilimik atuaqqissaarneq aqqutigalugu anersaakkut ineriartussappat allakkatigut pisariaqarpoq. Allakkanik allannissaq inuit ilarpassuinut unamminiarnartuummat Biibilimik allanik ilinniartitsisoq isumassarsiullaqqissuusariaqarpoq ilinniartitami soqutiginninnera ataannartinniarlugu. Qanoq iliortoqarsinnaava?

Kathyp Edna siuariartortumik Biibilimik atuaqqissaaqatigisarpaa imminnit 600 kilometerisut ungasitsigigaluarlutik. Kathyp atuaqqissaaqatigiissutigisaminni apeqqutit kopiiginnartanngilai tamaasali pappialamut nammineq allattortarlugit akissutissai inissalerlugit. Apeqqutit Ednap akereeraangagit Kathyp misissortarpai pisariaqaraangallu aalajangersimasumik erseqqissaalluni allattarluni. Kathy oqarpoq: „Pingasunngornerup unnua ’atuaqqissaartarnitsinnut’ immikkoortissimavara, tamannalu aalajangiusimaniartarpara atuaqqissaaqatittulli allatut pillugu. Ednamut allakkannut allakkat puussaat frimærkiligaq ilannguttarpara. Allakkat ulluni 14-ini anngunniaasaartarmata allakkatigut atuaqqissaaqateqarneq arriitsutut issinnaavoq.“

Kathy Ednalu qaammatini qulini allakkatigut atuaqqissaaqatigeereerlutik Anchoragemi ataatsimeersuarnermi naapikkamik nuannaaqaat. Aamma nuanneqaaq takullugit Biibilimik atuaqqissaaqatigineqartartut soqutiginnittullu allat Alaskap avinngarusimasortaanit tamaneersut ataatsimeersuarnermut najuuttut.

Naak naajartorneq ilaannikkut arriiginarsinnaasaraluartoq ’naasussaqartarpoq’ sallusuissutip qaamarnanit qinngorfigineqariarlutik naajartupallattartunik. Alaskami ukiut tamaasa agguaqatigiissillugu 100-nit amerlanerusut Jehovamik unnersiutiginnittutut kuisittarput. Qujamasoqaagut Jehova naajartortitsisarmat! (wE 1/3 98)