Inuusuttut aperipput:

Qanoq ilillunga Guutimut ikinngutaalersinnaavunga?

„ILUMOORFIGINNISSUSEQ“. „Inuttut tunniusimaneq“. Oqaatsit taamaattut atorneqarajupput inuit qanimut ikinngutiminnut attaveqarnertik oqaluttuariniaraangamikku. Nalunngiliuk oqaatsit taamaattut silarsuup ataqqinangaartup Pinngortitsisuata ikinngutigineranut atorsinnaagakkit — tassa Guuti illit nammineq ikinngutigilersinnaagit? Aap, Biibilip eqqartorpai inuit Guutimut tunniusimasuusinnaasut, tamannalu Guutimut naalannerinnaanngilaq tassaavortaaq namminerisamik attaveqarneq qujamasuttumik uummateqarnermit aallaaveqartoq.

Siusinnerusukkut atuagassiaatitsinni allaatigineqarsimavoq Guutimut ikinngutaaneq ajornanngitsuusoq iluaqutaasorlu.a Qanorliuna ililluni taamaalisoqarsinnaasoq? Attaveqarneq taamaattoq inunnguusaanngilaq imaluunniit angajoqqaat Guutimut mianerinnittuunerat pissutigalugu pilersimasuunani. Ikinngutigiinneq taamaattoq pilersinniarneqassappat nammineerluni iliuuseqartariaqarpoq. Apustili Paulus Timoteusimut oqarsimavoq ’Guutimut mianerinninneq sungiusassagaa’. Aap, sungiusarnini ilungersuutigisariaqarpaa soorlu timersortartoq sungiusarluni ilungersuussisarneratut. (1 Timûtiuse 4:7, 8, 10) Aamma illit taamaaliortariaqarputit Guutimut ikinngutaalerumaguit. Guutimulli ikinngutitut isigineqalerumagaanni ’sungiusarneq’ qanoq aallartinneqarsinnaava?

Guutimik ilisarsineq

Guutimut tunniusimaneq uummammit aallaaveqarpoq, taamaattumillu uummatit Guuti pillugu ilisimasaqarnermik immertariaqarpoq. Inuusuttut 500-nit amerlanerusut aperineqaramik qanoq akulikitsigisumik Biibilimik nammineerlutik atuartarnersut ajoraluartumik 87 procentii akisimapput „ilaannikkut“, „qaqutigut“ imaluunniit „atuanngisaannarpara“. Inuusuttut amerlanerit isumaqarunarput Biibilimik atuarneq pikkunaalluinnartuusoq. Kisianni taamaattariaqanngilaq! Eqqarsaatiginikuuiuk sooq inuusuttorpassuit timersornermi angusarpassuit eqqaamasinnaasaraat, imaluunniit sooq erinarsuutit tusaamasat nuannarineqartut taalliat alanngaarsinnaaneraat? Tamanna soqutiginninnermik pissuteqarpoq. Biibilimik atuarneq aamma taamatut soqutigisarilersinnaavat atuakkatit eqqarsaatigeqqissaartarukkit. (1 Timûtiuse 4:15) Apustili Peter ima kajumissaarivoq: ’Inoorlaannguatut immuk piviusoq oqaasiusoq kajungerisiuk.’ (1 Pîtruse 2:2) Aap, Biibilimut soqutiginninnerit allisittariaqarpat imaluunniit ineriartortittariaqarpat. Immaqa imminut piumaffigisariaqaraluarlutit suliniutigissallugu imminut akilersinnaavoq.b

Guutip oqaasianik atuagassianillu Biibililersaarutinik atuarnerup atuaqqissaarnerullu iluaqutaasa ilagaat ’Jehovap alutornassusia’ ersersitsinissaa. (Tussiaat 27:4) Kristumiu inuusuttoq Amberimik atilik Biibili tamaat atuarniarlugu aalajangersimavoq. Tamanna ukiumik ataasingajammik sivisussuseqarsimavoq. „Inuuninni allamik taama piffissaqanngingajappoq taamalu nukinik atuinartigisoqanngingajalluni kisianni pissarsiaqarnaqaaq,“ Amber nassuiaavoq. „Atuarnerma nalaani allaannginnami Jehovap seeqquminut ingitikkaanga ataatatullu asannittutut ilinniartillunga. Jehova pillugu annertoorujussuarmik ilikkagaqarpunga. Ilikkakkama Jehovamut qaninnerulersippaanga inuunermalu sinnera mianeralugu inuunissamik kissaateqalersillunga.“

Biibilip atuarneratigut ilikkassavat Guutip ikinngutini ilumoorfiginnilluni amerlasuutigut isumagisarai. (Tussiaat 18:26; 27:10) Paasilissavattaaq najoqqutassiai pitsaanerujuaannartut, maleruarutsigillu ataavartumik iluaqutaasussaasut. (Jesaja 48:17) Guutip pissusii nalissaqanngitsut, soorlu asanninnera ilisimassusialu, pillugit atuarukkit pissusii ilaarnialerumassavatit. (Evfisumiut 5:1) Paasissutissalli tamakkua uummappit killissutigissappagit eqqarsaatigeqqissaaqqaartariaqarpatit. Taamaattumik atuaraangavit imminut ima aperisarit: ’Jehova pillugu sumik oqaluttuuppaanga? Tamanna eqqarsariaatsinnut ilioriaatsinnullu tunngatillugu qanoq atorsinnaavara? Tamatuma qanoq takutippaa Guuti tassaasoq ikinngutigisinnaasama pitsaanersaat?’

Illit namminerisannik Biibilimik atuaqqissaartarnikkut ataatsimiigiartarnikkullu Guuti pillugu ilisimasaqalernerpit tassunga allatut qaninnerulersissavaatit. Franskit ussataasa ilaat imaappoq: „Ilumoortumik ikinngutigiit assigiimmik eqqarsartarput.“ Illilli qanoq ilillutit Guutitut eqqarsarsinnaavit? Niviarsiaraq Denisemik atilik ima nassuiaavoq:“Eqqarsaat aalajangersimasoq itinerusumik ilinniaraanni misissoraannilu Jehovap tassunga isumaa paasisimanerulissavat. Isiginnittaasianut ilisimasaqarneq iluaqutaavoq.“

Ileqqorissuuneq pingaaruteqarpoq

Guutip najoqqutassiaminut naalattut kisiisa ikinngutigilersarpai. Ussatit 3:32-mi ima allassimasoqarpoq: „Peqqusersuitsut [Jehovap] ilagiiffigaat.“ Inuusuttup ileqqorissuuniartup ’Jehovap inatsisaasa maleruarnissaat uummammigut’ ilungersuutigissavaa. (2 Kunngit 10:31) Taamatut naalattuugaanni taamaattoq Guutimut qanoq qanitsigisoqalersinnaava? Jesus Kristus oqarsimavoq: ’Ataatama asassavaa, ornikkumaarparpullu inissivigalugu.’ (Juánase 14:21-24) Jesusip assersuusia kusarnarluinnartuuvoq. Eqqarsaatigeriaruk! Silarsuarmi avataaniittunilu kinaassusillit qutsinnersaat marluk inuk soqutigissallugu ikiussallugulu piareersimapput! Illit aamma taamatut isumagineqarsinnaavutit Jehovap inatsisai maleruarniarukkit.

Tamanna naammalluinnartuusariaqarnermik isumaqarpa? Naamerluinnaq! Sanngiilliffiup nalaani kukkugaanni isumaqanngilaq ’aqqutikkut atuaqqusakkut’ ingerlajunnaarsimalluni. (Tussiaat 119:35) Assersuutitut eqqaasinnaavarput Biibilimi oqaluttuaq kunngimut Davidimut tunngasoq. Naak Guutip ikinngutigigaluaraani ilumoortoq sanngiissuteqarnini pissutigalugu sualuttumik kukkussuteqartarsimavoq. Taamaakkaluartorli Jehova oqarsimavoq ’peqqusersuitsumik uummateqarsimasoq assuarnaatsuusimasorlu’. (1 Kunngit 9:4) Kunngi Davidip tamatigut kukkussutini pillugit ilumoortumik peqqissiminini nalunaarutigisarsimavaa Guutillu iluarisaanik iliornissamut ilungersuuteqartarsimalluni. — Tussiaat 51:3-6.

Naak Davidip Guuti asagaluarlugu nalunngilaa eqqortuliortuaannarneq ajornakusoorsinnaasoq. Tamanna pillugu Guutimut ima qinuvoq: „Sallusuissutikkut ilitsersunnga ajoqersunngalu.“ Aap, Guutimut mianerinninneq piviusoq ineriartortippaa. Tamannalu pillugu David ima oqarsinnaasimavoq: „[Jehovamik] mianerinnittut Guuti peqatigalugu inuusarput.“ (Tussiaat 25:5, 14) Mianerinninneq tamanna ingasaassinerunngilaq ilumoortumilli pinngortitsisumut ataqqinningaarnerulluni ajuallatsinnissaannullu peqqinnartumik minerinninnerulluni. Guutimik mianerinninneq taamaattoq tassaavoq ajunngitsuliornissamut tunngaviusoq. Assersuut tulliuttoq kristumiumut inuusuttumut Joshuamut tunngavoq.

Joshua niviarsiaqqamit atuaqatiminit allagarsivoq allassimasumik inequgigaani aamma peerarilerusukkaluaraani. Joshuap niviarsiaraq kajungernartippaa, kisianni paasilerpaa uppinngitsumik ilaqarpallaarneq kanngunartuliornermik kinguneqarsinnaasoq taamaalillunilu Jehovamik ikinnguteqarnini aserorsinnaallugu. Taamaattumik erseqqissumik paasitippaa nammineq soqutiginninnani. Tamatuma kingorna anaanani pisimasumik oqaluttuummagu anaanaa eqqarsariaqqaanngivilluni akisimavaa: „Ila, Joshua, qularnanngitsumik ajuallatsissimassavat!“ Joshuap akivaa: „Kisianni anaana, uanga taanna ajuallatsikkusunneruavara Jehovap ajuallatsinnissaanninngarnit.“ Guutimut mianerinninnermigut, ikinngummi qilammiusup ajortuliorfiginissaanut mianerinninnermigut, ileqqorissutsiminik pigisaqaannarpoq.

Ajunngitsunik ilagisartagaqalerit

Niviarsiaqqap Lynnimik atillip ilagisartakkani ileqqorluttut pissutigalugit ajornartorsiutinik naammattoorsiuartarsimavoq. (2 Moses 23:2; 1 Korintumiut 15:33) Aaqqiissutissaasutuaq tassaasimavoq nutaanik ikinngutitaarneq. Lynn ima oqaluttuarpoq: „Jehovamik asannittunik ikinngutitaaraanni nalunaatsumik nalunngeqatiginnissuseqarnerup pigiinnarnissaanut iluaqutaavoq ajornartorsiutiniillu ingalassimatitsisarluni. Iliuutsinut eqqunngitsunut uumiginnikkaangatta nammineq aamma taamatut misiginartarpoq.“

Illit ikinngutinik ajortunik qinersisimanerit Guutimut ikinngutaanissannut akornutaasinnaavoq annerpaaq. Ann 18-nik ukiulik nassuerpoq: „Ilagisat imminermut sunniuteqartupilussuusarput. Siusinnerusukkut kingusinnerusukkulluunniit taakkunatulli ileqqoqalissaatit. Namminneq isummaminnik sunnerniassavaatsit. Oqallisigineqarnerpaasartut immaqa tassaasarput atoqatigiinneq, tamatumalu alapernaalersissinnaavaatit. Immaqa atoqatigiinnermut tunngasut eqqarsaatigiinnalertoorneqarsinnaapput.“ Tamakkua ataqatigiinnerat Annip misillerfigipilussimavai. Oqaluttuarpoq: „Nalunngilara taamatut pisoqartartoq. Kanngunartuliorsimavunga 15-iinnarnillu ukioqarlunga naartulersimallunga.“

Annip naggataatigut Biibilimi allaasimasup ilumoortuunera paasilersimavaa: ’Silap piinik asannikkumaannartoq Guutimut akerartortigitittaraaq.’ (Jâko 4:4) Annip kissaatigisimavaa, aap, aalajangersimavoq, silamiut ikinngutiginiarlugit. Tamatumali annertuumik uummatikkut aliasuuteqalersiinnarsimavaa. Qujanartumilli Ann sianissuseqalersimavoq qanorlu iliorsimanini peqqissimissutigingaarlugit, angajoqqaaminullu ilagiinnilu utoqqaanertanut ikiortissarsiorsimalluni. Aamma nutaanik ikinngutitaarpoq. (Tussiaat 111:1) Ilungersuuteqangaareerluni Ann Guutimit ikinngutaaqqilersinnaasimavoq. Maanna ukiualuit qaangiutereersut oqarsinnaalerpoq: „Jehovamut qaninnerujussuanngorsimavunga.“

Biibilimik atuartarnikkut atuakkavillu eqqarsaatigilluaqqissaartarnerisigut ileqqorissuunikkullu ajunngitsunillu ilagisartagaqarnikkut illittaaq Guutimut qanittumik ikinngutaalersinnaavutit. Naak ajornartorsiuteqartaraluarluni sanngiissuteqartaraluarlunilu Guutimik ikinnguteqarnerup qanoq attatiinnarneqarsinnaanera kingusinnerusukkut sammineqassaaq. (gE 22/2 97)

[Quppernerup ataani ilanngussat]

[Qupp. 13-mi assiliartaq]

Ikinngutima Guutimut ikinngutaalernissannut ikiussavaannga?