Pioneeritut kiffartornermi pilluaqqusaanerit
’Jehovap pilluaqqusinera pisuunngortitsisaraaq, erloqinartumillu ilasarinngilaa.’ — ÚSSATIT 10:22.
1, 2. (a) Piffissaq tamaat kiffartorneq pillugu pioneeri ataaseq qanoq oqarsimava? (b) Sooq pioneerit ajoqersuganngortitsiortornerup nuannaarnartui annerusumik misigisinnaasarpaat?
„ATUAQQISSAAQATIGISARTAGAQ iliuuseqalerluni Jehovamik unnersiutiginnittunngoraangat nuannaarneq allamit nallernissaqarnerpa? Tupinnarlunilu uppernikkut nakussatsinnartaqaaq takullugu qanoq sakkortutigisumik Guutip oqaasiata inuit Jehovamut iluarisaasinnaaqqullutik inuunerminni allannguinissaannut kajumissisissinnaagai.“ Taamatut allassimavoq pioneeri Canadameersoq ukiut 32-t sinnerlugit piffissaq tamaat oqaluussisartuusimasoq. Pioneeritut kiffartornini pillugu taanna ima allappoq: „Allamik suliaqarnissara takorloorsinnaanngilara. Takorloorsinnaanngilluinnarparalu allamik taamatut nuannaarutissarsinartigisumik nassaassaqarsinnaanersoq.“
2 Aamma illit isumaqarpit inuunerup aqqutaatigut ingerlalernissamik allanik ikiuineq annertuumik nuannaarutissarsinartuusoq? Soorunami pioneeriinnaanngitsut nuannaarnermik tamatuminnga misigisaqartarput. Jehovap kiffai tamarmik ’ajoqersuganngortitsinissaminnik’ peqquneqarsimapput, taamaaliornissartillu ilungersuutigisarpaat. (Matîuse 28:19) Pioneerilli nalunaaquttap-akunnerpassui oqaluussinermut atortaramikkik ajoqersuganngortitsiortorluni suliap nuannaarnartui annertunerusumik misigigajuppaat. Pioneeriuneq aamma allatigut iluaqutissartaqarpoq. Pioneerit oqaloqatigisarniakkit, taava oqaluttuussinnaassavaatsit pioneeritut kiffartornermi ’Jehovap pilluaqqusinerata pisuunngortitsisarnera’ immikkut ittumik malunnartartoq. — ússatit 10:22.
3. Jehovamut kiffartortilluta suna kajumississutigisinnaavarput?
3 Pioneerit nunarsuarmi sumi tamaaniittut qanittukkut qinnuigineqarsimapput piffissaq tamaat kiffartornerminni pilluaqqusaanerit misigisimasatik allaasereqqullugit. Atagu qanoq allassimasut tusariartigik. Nikallorniaqinalli peqqiilliorneq, utoqqalineq allalluunniit oqaluussinermi naammassisinnaasannik killiliigaluarpata. Eqqaamassavat pingaarneq tassaammat tarnikkut iluunngarluni Jehovamut kiffartornissaq, naammassisinnaasat qanorluunniit annikitsigigaluarpata annertutigigaluarpataluunniit. Immaqa pioneerit taakkua oqaasiisa kiffartornerup nuannaarutissarsinartup tamatuma isumaliutigeqqinnissaanut soqutiginninnerit annertusisissavaat.
Nalerisimaarneq nuannaarnerlu annertuut
4, 5. (a) Sooq nutaarsiassamik nuannersumik allanut oqaluussissutiginninneq assut pisuunngornartuua? (b) Piffissaq tamaat oqaluussisarneq pillugu pioneerit ilaat qanoq oqarsimappat?
4 ’Tunisineq tigusinermit pilluarnarneruvoq,’ Jesus oqarsimavoq. (apustilit suliait 20:35) Aap, namminissarsiunngitsumik tunisineq immini akissarsinartuuvoq. (Ussatit 11:25) Ingammik nutaarsiassamik nuannersumik allanut oqaluussissutiginninneq eqqarsaatigalugu taamaappoq. Inoqativut Guutimik ilisarsinermik inuunermut naassaanngitsumut sammisumik pigisaqalernissaannik ikiuinermit annerusumik tunisinnaanerpavut? — Juánase 17:3.
5 Taamaattumik tupinnanngilaq piffissaq tamaat oqaluussisartut nuannaarneq nalerisimaarnerlu kiffartornerminni misigisartakkatik eqqartorajummatigik. „Nalunngilara suliamik allamik allanik sallusuissummik ilinniartitsinermit nalerisimaarnarnerusumik nassaassaqanngitsoq,“ pioneeri 64-inik ukiulik Tuluit Nunaanneersoq oqarpoq. Uillarneq Congomeersoq pioneeritut kiffartornermi imminut pingaarutaa ima oqaatigaa: „Uinnik asasannik annaasaqarninni pioneeritut kiffartornera uannut assut tuppallersaataasimavoq. Allat ikiorniarlugit oqaluussiartoqattaarnerujartortillunga annaasaqarnera artorsaatigiunnaariartorpara. Jehovap neriorsuutai tunaaraakka eqqarsaatiginerpaasarlugulu qanoq iliorlunga atuaqqissaaqatigisartakkakka inuunerminni allannguinissaannik ikiorsinnaanerlugit. Ulloq naagaangat sinilluartarpunga, uummatigalu nuannaarnermik ulikkaartarpoq.“
6. Pioneerit ilaat qanoq immikkut ittumik nuannaarutissarsisimappat?
6 Ukiuni qulikkuutaani pioneeriusimasut ilaat immikkut nuannaarutigisaminnik sumiiffinni ungasissuni kiffartorsimapput, tamaani ilagiinnik, kingorna ilagiippassuanngortunik, pilersitsinermut peqataasimallutik. Assersuutigalugu, Hokkaidomi (Japanimi qeqertat avannarlersaanni) illoqarfimmi Abashirimi najugaqarpoq qatanngut arnaq ukiuni 33-ni pioneeriusimasoq. Taassuma eqqaamavaa Hokkaidomi ataatsimeersuaararnermut najuuffigisaminut siullermut 70-iinnaat najuussimasut. Ullumikkummi qanoq ippa? Ullumikkut qeqertami tassani ilagiinnik eqimattat 12-iupput 12.000-init amerlanerusunik oqaluussisartullit. Takorlooruk uummammigut nuannaangaartarnera qeqertami tassani oqaluussisartoqaterpassuani ilagalugit ataatsimeersuaararnernut ataatsimeersuarnernullu najuukkaangami!
7, 8. Pioneerit ukiorpassuarni kiffartorsimasut amerlanersaasa nuannaarneq suna misigisimavaat?
7 Ukiorpassuarni pioneeriusimasut allat nuannaarnermik misigisaqartarsimapput atuaqqissaaqatigisartakkatik kuisittut kingornalu kiffartornermi immikkut pisinnaatitaaffinnik annerusunik anguniagaqalersut takullugit. Japanimi qatanngutip arnap 1957-imiilli sumiiffinni assigiinngitsuni qulingiluani pioneeritut kiffartorsimasup eqqaamavaa ilaanni arnaq inuusuttoq aningaaserivimmi sulisoq Iteritsi!-mik tunisimallugu. Qaammatit qulingiluat qaangiuttut arnaq kuisippoq. Kingorna katippoq, kingornalu uinilu specialpioneerinngorput. Pioneerimut taassumunnga nuannaarneq angisimaqaaq ilagiinni pioneeriuffimmi pingajussaanniitilluni nakkutilliisumit angalasartumit nulianillu tikeraarneqaramik. Tassami nulia tassaavoq Biibilimik atuaqqissaaqatigisarsimasaa!
8 Tupinnanngilaq pioneeritut kiffartornermik inooriaaseqalersimasut kiffartornertik tamanna qatanngutip angutip ukiuni 22-ni pioneeriusimasup oqarneratut ’immikkut pisinnaatitaaffittut nallernissaqanngitsutut pingaartingaartariaqakkatut’ isigimmassuk.
Jehovap isumassuineranut takussutissat
9. Jehovap Pilersuisorsuartut kiffani qanoq neriorsorsimavai, tamannalu uagutsinnut qanoq isumaqarpa?
9 Jehovap, Pilersuisorsuup, neriorsuutigaa kiffani anersaakkut timikkullu isumassornerisigut napatissallugit. Taamaattumik itsaq kunngi David eqqortumik ima oqarsinnaasimavoq: „Inuusuttuusimavunga utoqqalisimallungalu maanna, takusimanngisaannarpungali iluartumik qimagaasumik kinguaavinilluunniit nerisassaminnik qinnuuloortunik.“ (Tussiaat 37:25) Soorunami Guutip qularnaveeqqusiinera tamanna isumaqanngilaq ilaquttatsinnik timikkut pilersuisariaqanngitsugut, aamma pisussaaffilinngilaatigut qatanngutitta kristumiut tukkussusiannut isumalluarfiginnittuaannarnissatsinnut. (1 Tásalûníkamiut 4:11, 12; 1 Timûtiuse 5:8) Jehovali annerusumik kiffartorfigisinnaajumallugu pilliuteqartarnissatsinnut piumassuseqarutta qimanngisaannassavaatigut. — Matîuse 6:33.
10, 11. Jehovap isumassuisinnaassusia eqqarsaatigalugu pioneererpassuit qanoq misigisaqarsimappat?
10 Pioneerit nunarsuarmi tamarmiittut misilittakkatik tunngavigalugit nalunngilaat Jehova assamminut isumassuiumatuunut inuunerminnik isumagisassanngortitsisunik isumaginnittartoq. Pioneerit aappariit illoqarfeeqqamut oqaluussisartunik pisariaqartitsiffiunerusumut nuuttut assersuutigisinnaavavut. Qaammatialuit qaangiuttut suliffissaalatsilerput, aningaasallu katersorsimasatik nunguppaat. Taava biilimut sillimmasiissummut akiligassaq 81 dollarsinik annertussusilik takkuppoq. „Akilersinnaanngilarput,“ qatanngut angut oqaluttuarpoq. „Unnuk taanna immikkut ilungersorluta qinuvugut.“ Aqaguani ilaqutariinnit aamma aningaasakilliortunit allagarsipput. Ilaqutariit allapput akileraarutinik utertoorsimallutik, ilimagisaminnillu annertunerummata aningaasat ilaat pioneerinut aappariinnut tunissutigerusullugit. Checki 81 dollarsinik nalilik ilanngullugu nassiussimavaat! „Ulloq taanna puiunngisaannarpara — soorlumi tassa pukusunni nutsakka tikkorpallattut!“ qatanngut angut oqaluttuarpoq. „Ilaqutariit taakkua tukkussusiat qujamasuutigisorujussuuarput.“ Jehovattaaq ajunngitsuliorneq taama ittoq pingaartippaa, kiffanilu tukkussusermik taamatorpiaq ittumik ersersitsinissaanik kajumissaarpai. — Ussatit 19:17; Eprîarit 13:16.
11 Pioneererpassuit assingusunik oqaluttuassaqassapput. Apersortarniakkit, oqaluttuussinnaassavaatsillu ’qimagaasimanngisaannarlutik’. 72-inik ukiulik ukiuni 55-init amerlanerusuni piffissaq tamaat kiffartorsimanerminut kingumut qiviarsinnaasoq ima oqarpoq: „Jehovap pakatsisissimanngisaannarpaanga.“ — Eprîarit 13:5, 6.
’Jehovamut qanillissutissaqqilluinnartoq’
12. Sooq nutaarsiassamik nuannersumik oqaluussissutiginnilluni suliaq immikkut pisinnaatitaaffiua?
12 Jehovap naalagaaffini pillugu nutaarsiassamik nuannersumik oqaluussissutiginninnissamik uagutsinnik peqqusinera immini immikkut pisinnaatitaaffiuvoq. Naak naammalluinnanngitsuugaluartugut annaassiniarluni suliami tamatumani ’suleqatimisut’ isigaatigut. (1 Korintumiut 3:9; 1 Timûtiuse 4:16) Guutip naalagaaffia pillugu allanut oqaluussigaangatta, ajussutsip piiagaanissaa oqaluttuarigaangatsigu, asanninneq naliitsoq Guutip utertitsissummik pilersitsinermigut ersersissimasaa inunnut nassuiaraangatsigu, oqaasialu uumassusilik qupperlugu imai inunnut peqqusersuitsunut ilinniartitsissutigigaangatsigik pinngitsoornata Pinngortitsisitsinnut, Jehovamut, qaninnerulersarpugut. — Tussiaat 145:11; Juánase 3:16; Eprîarit 4:12.
13. Pioneeritut kiffartornerup Jehovamut attaveqarnerminnut sunniuteqarnera pillugu ilaat qanoq oqarsimappat?
13 Pioneerit qaammammut nalunaaquttap-akunnerpassui Jehova pillugu ilinniarnermut allanillu taanna pillugu ilinniartitsinermut atorsinnaavaat. Tamanna Guutimut attaveqarnerannut qanoq sunniuteqartarpa? „Pioneeritut kiffartorneq Jehovamut qanillissutissaqqilluinnartuuvoq,“ Frankrigimi utoqqaanertaq ukiuni qulinit amerlanerusuni pioneeriusimasoq akivoq. Pioneeri Frankrigimeersoq alla, ukiuni 18-ini piffissaq tamaat kiffartorsimasoq, oqarpoq: „Pioneeritut kiffartorneq ’Jehovap ajunngissusianik misigisaqarnissamut’ iluaqutaasarpoq; ullut tamaasa Pinngortitsisumut qanilliartornartarpoq.“ (Tussiaat 34:9) Tuluit Nunaanni qatanngut arnaq ukiuni 30-ni pioneeriusimasoq assingusumik misigivoq. „Kiffartorninni Jehovamik annertoqquteqartariaqarnera taassumunnga qaninnerulissutigaara,“ taanna oqarpoq. „Misigilluinnartarpunga arlalippassuartigut Jehovap anersaavata angerlarsimaffimmut aalajangersimasumut piffissakkut eqqortukkut siulersortaraanga.“ — Naleqqiuguk apustilit suliait 16:6-10.
14. Biibili atuagassiallu Biibililersaarutit atorlugit ullut tamaasa allanik ilinniartitsineq qanoq pioneerinut iluaqutaava?
14 Pioneererpassuit misigisimapput sallusuissummik allanut nassuiaassillutillu ilinniartitsinerminni Biibilimik atuagassianillu Biibililersaarutinik ullut tamaasa atuisarnertik Biibili pillugu ilisimasaqarnerulissutigisarlugu. Qatanngut angut 85-inik ukiulik Spaniamiu ukiuni 31-ni pioneeriusimasoq ima nassuiaavoq: „Pioneeritut kiffartornera Biibilimik itinerusumik ilisimasaqalissutigisimavara, ilisimasassanik inuppassuit Jehovamik taassumalu siunertaanik ilisimasaqalersinnissaannut iluaqutigisimasannik.“ Qatanngut arnaq Tuluit Nunaanneersoq ukiuni 23-ni pioneeriusimasoq oqarpoq: „Piffissaq tamaat kiffartornerup anersaakkut nererusussutsimik annertuumik ineriartortitsinissannut ikiorsimavaanga.“ ’Neriuummik uatsinniittumik’ allanut nassuiaasarnitta pingaartingaakkatsinnut nammineq upperinninnerput nakussatsittarpaa. (1 Pîtruse 3:15) Pioneeri Australiameersoq ima oqarpoq: „Pioneeritut kiffartornerma uppernera nakussatsittarpaa, tassami upperisara allanut nassuiartuartarakku.“
15. Pioneerinngorsinnaajumallutik pioneeriujuaannarsinnaajumallutillu amerlasuut sunissaminnut piumassuseqarsimappat — sooq?
15 Ersareqaaq pioneerit taakkua qularinngilluinnaraat kiffartorneq Jehovamit pilluaqqusaanernik amerlangaartunik nassataqartoq qinersimallugu. Taamaammat tupinnanngilaq amerlasuut pioneerinngorsinnaajumallutik pioneeriujuaannarsinnaajumallutillu inuunerminni allannguinissaminnut allaallu silarsuarmi suliffimminnik nuimasumik timikkullu pisuussutinik tunussinissaminnut piumassuseqarsimammata! — Ussatit 28:20.
Iliuuseqarnerunissat uummatikkut kissaatigaajuk?
16, 17. (a) Pioneerinngorsinnaaneq isumaliutigigaanni qanoq iliortoqarsinnaava? (b) Ilaat pioneeriusinnaannginnertik pillugu qanoq misigisarpat?
16 Pioneeritut kiffartornermi pilluaqqussaassutissat pillugit pioneerit oqaasii tusareerlugit immaqa isumaliutigilerpat pioneeritut kiffartulersinnaaneq anguniassallugu ilinnut piviusorsiornerussanersoq. Taamaappat immaqa pioneeri kiffartornermini tamatumani ingerlalluartoq oqaloqatigisinnaavat. Aamma iluaqutigisinnaavat ilagiinni utoqqaanertamik, ilinnik ilisarisimannittumik, peqqissutsinnik, pisinnaasannik ilaqutariittullu pisussaaffinnik ilisimannittumik, oqaloqateqassallutit. (Ussatit 15:22) Allat ilisimasaat piviusunik tunngavillit iluaqutigalugit nalilersinnaavat pioneeritut kiffartulernissamut periarfissaqarnerlutit. (Naleqqiuguk Lúkarse 14:28.) Pioneerinngornissat ajornanngippat, taava pilluaqqusaanissat annertuut ilimagisinnaassavatit. — Malaki 3:10.
17 Oqaluussisartorpassuimmi aalajaatsut pioneeriunissaminnut periarfissaqanngitsut, immaqa oqaluussinermi iliuuseqarnerusinnaalernissartik kissaatigingaaraluarlugu? Assersuutigalugu, qatanngut arnaq kisimiittoq sisamanik meeralik ima oqarsimavoq: „Ugguaqaanga. Siornatigut pioneeriusimagaluarpunga, pissutsilli atukkakka pissutigalugit oqaluussinermi siornatigutut iliuuseqartigisinnaajunnaarnikuuvunga.“ Qatanngutip arnap taassuma meeqqani asaqai pilersorusullugillu. Tamannali ilutigalugu kissaatigigaluaqaa oqaluussinermi iliuuseqarnerusinnaanissani. „Oqaluussineq nuannareqaara,“ oqarpoq. Kristumiut ilungersuussilluartut allat Guutimut asanninnertik pissutigalugu ’uummatikkut iluunngarlutik’ Jehovamut kiffartorusuttut taassumatut misigisimapput. — Tussiaat 86:12.
18. (a) Jehovap sumik ilimasuffigaatigut? (b) Sooq nikallortariaqanngilagut pissutsit atukkavut pisinnaasatsinnik killiliigaluarpata?
18 Eqqaamassavat Jehovap uatsinnit ilimasuutaa tassaammat tarnikkut iluunngarluta kiffartorfigissagitsinni. Annertussusia inummit inummut assut assigiinngissinnaavoq. Ilaat inuunerminnik aaqqissuussisimapput pioneerinngorsinnaalerlutik. Allarpassuillu ilaannikkut aalajangersimasumilluunniit ikiorti-pioneeritut kiffartortarput, qaammammut nalunaaquttap-akunneri 60-it oqaluussinermut atortarlugit. Jehovap innuttaasa amerlanerpaartaat uummatikkut iluunngarlutik ilagiinni oqaluussisartutut kiffartornermikkut oqaluussilluni ilinniartitsillunilu suliamut tunniusimalluinnarput. Taamaattumik nikallussanngilatit peqqiilliorneq, utoqqalilerneq, ilaqutariittut pisussaaffiit allalluunniit pissutigalugit pisinnaasatit killeqarpata. Sapinngisannguannik iliuuseqartuartillutit kiffartornerit Guutip isaani naleqartuassaaq, soorlu piffissaq tamaat oqaluussisartut kiffartornerat taamaattoq.
Kikkut tamarmik pioneeritut anersaaqarnermik ersersitsisinnaapput
19. Pioneeritut anersaaqarneq qanoq paasisariaqarpa?
19 Naak immaqa pioneeriusinnaanngikkaluarluni pioneeritut anersaaqarneq ersersinneqarsinnaavoq. Pioneeritut anersaaqarneq sunaagami? Naalagaaffimmut Kiffartorneq-mi juuli 1988-imoortumi ima nassuiarneqarpoq: „Imatut nassuiarneqarsinnaavoq: oqaluussinissamik ajoqersuganngortitsinissamillu peqqussummut ajunngitsumik isumaqarfiginninneq, allanut asannittumik isumassuisumillu ulapputeqarneq, imminut pilliutigeriaannaassuseqarneq, Naalakkap tumaanik atuaaqqissaarnermik nuannaarutiginninneq anersaakkullu nalilinnik timikkut nalilinnit pingaarnerutitsineq.“ Pioneeritut anersaaqarneq qanoq ililluni ersersinneqarsinnaava?
20. Angajoqqaat qanoq ersersissinnaavaat pioneeritut anersaaqarlutik?
20 Meeraqaruit uummatikkut iluunngarlutit kajumissaarsinnaavatit pioneerinngornissamik anguniagaqarnissaannik. Oqaluussinermut ajunngitsumik isiginninnerpit paasitissinnaavai Jehovamut kiffartornerup inuunermi pingaarnerpaatinnissaata pisariaqassusianik. Pioneerit nakkutilliisullu angalasartut nuliaallu angerlarsimaffissinnut qaaqqusarsinnaavasi piffissaq tamaat kiffartornermik nuannaarutiginnittut maligassiaat meeqqassinnut iluaqutaaqqullugit. (Naleqqiuguk Eprîarinut agdlagkat 13:7.) Allaat inoqutigiinni upperisarsiornikkut avissimasuni aappaasup uppertup oqaatsimigut iliuutsimigullu meeqqat piffissaq tamaat kiffartornermik anguniagaqarusulersissinnaavai. — 2 Timûtiuse 1:5; 3:15.
21. (a) Tamatta qanoq ililluta pioneerit tapersersorsinnaavavut? (b) Pioneerit qiimmassarniarlugit utoqqaanertat qanoq iliorsinnaappat?
21 Pioneeriusinnaasut ilagiinni tamatta uummatikkut iluunngarluta tapersersorsinnaavavut. Assersuutigalugu, piffissakkut kisimiilluni angalaarfissaraluani pioneeri oqaluussiartoqatigisinnaajumallugu immikkut iliuuseqarsinnaavit? Qularnanngitsumik paasissavat taamaalillusi ’kajumissaaqatigiissinnaasusi’. (Rûmamiut 1:11, 12) Utoqqaanertaaguit pioneerit qiimmassarniarlugit iliuuseqarnerusinnaavutit. Utoqqaanertat ataatsimiikkaangamik pioneerit pisariaqartitaat aalajangersimasumik eqqartortariaqarpaat. Pioneeri nikallungagaangat imaluunniit ajornartorsioraangat pioneeriujunnaarnissaa siunnersuutigipallattariaqanngilaq. Naak tamanna ilaatigut pisariaqarsinnaagaluartoq puiortariaqanngilaq pioneeritut kiffartorneq immikkut pisinnaatitaaffiummat erlinnangaartoq piffissaq tamaat kiffartortup qularnanngitsumik pingaartilluinnagaa. Immaqa qiimmassarneqalaarnissaq aammalu siunnersorneqalaarnissaq ikiorneqalaarnissarlu kisimik pisariaqartinneqarput. Peqatigiiffiup Spaniami immikkoortortaqarfia ima allagaqarsimavoq: „Utoqqaanertat pioneeritut kiffartornermik ajunngitsumik eqqartuisarpata, oqaluussinermi pioneerinik tapersersuisarlutik taakkununngalu paarsisutut aalajangersimasumik pulaartarlutik, pioneerit nuannaarnerussapput misigissallutillu atorfissaqartinneqarlutik, sumilluunniillu akornutissaqaraluarunik ingerlaannarnissartik kissaatigissallugu.“
22. Inuiaat oqaluttuarisaaneranni piffissami ajornakusoortumi matumani suna aalajangiusimasariaqarparput?
22 Inuiaat oqaluttuarisaaneranni piffissami ajornakusoortumi inuuvugut. Jehovap annaassiniarluni suliamik suliassissimavaatigut. (Rûmamiut 10:13, 14) Suliamut tamatumunnga pioneeritut piffissaq tamaat peqataasinnaagaluarutta peqataasinnaanngikkaluaruttaluunniit, tamatta takutinniartigu pioneeritut anersaaqartugut, imminut pilliutigeriaannaasugut suliallu nukinginnassusia paasigipput. Jehovap uagutsinnut piumasarisaanik tuninissaa aalajangiusimaniartigu, tassa tarnikkut iluunngarluta kiffartorfigalugu. Puiunngisaannassavarput sapinngisarput tamaat tunissuteqaraangatta, uillarnerup aningaasaaraataatut imaluunniit Mariap uuliaataatut akisuutut atsiginera apeqqutaatinnagu, Jehova tarnikkut iluunngarluta kiffartorfigisaripput uummatikkullu iluunngarluta kiffartornerput Jehovap pingaartikkaa! (wE 15/10 97)
Qanoq akissavit?
□ Sooq piffissaq tamaat kiffartorneq nuannaarutissarsinarlunilu nalerisimaarnartuua?
□ Jehovap kiffaminik isumaginnissinnaassusia pillugu pioneererpassuit misigisimasatik naapertorlugit sumik ilisimasaqarpat?
□ Pioneerit kiffartornerat Jehovamut attaveqarnerannut qanoq sunniuteqartarpa?
□ Pioneeritut anersaaqarneq qanoq ililluni ersersinneqarsinnaava?
[Qupp. 23-imi assiliartaq]
Pioneerit ajoqersuganngortitsiortornermikkut nuannaarutissarsisaqaat
[Qupp. 23-imi assiliartaq]
Meeqqavit piffissaq tamaat oqaluussisartunik peqateqartarneq assut iluaqutigisinnaavaat
[Qupp. 23-imi assiliartaq]
Utoqqaanertat oqaluussinermi pioneerinik qiimmassaasinnaapput