Qitornat annaaguk!

MICHAEL Alphinalu Afrika-Kujallermi KwaZulu-Natalip qaqqartaasa qorsooqqissut qoorortaanni najugaqarput. Qitornamik arfineq-marluusut perorsarneranni unamminiarnartorpassuarnik naapitaqartarsimapput. Nuliaminit tapersersorneqarluarluni Michaelip Biibilip ataatanut peqqussutaa sapinngisaminik naalanniarsimavaa: ’Ilissi angajoqqaat, qitornasi narrutsatseqinasigik, paariniarsigilli perorsarlugit inertertarlugillu Jehovamit.’ (Evfisumiut 6:4) Ilaannikkulli ajornartorsiutit takkuttarput.

Assersuutigalugu Afrikami nukappiaqqat nersutaatinik paarsisut ilaquttamik nersutaataannik ataatsimoortitsisarnerat nalinginnaavoq taamaalillutik pinnguaqatigiinnissaminnut piffissaqarnerulerumallutik. Ilaannikkut ajortumut saattarput eqqartugassaanngitsunillu eqqartuilerlutik. Michaelip ernini ilaqutariit nersutaataannik paarsiartortikkaangamigit meeqqat aalajangersimasut tamatigut sukannerluni ilageqquneq ajorpai. (Jâko 4:4) Sulereerlunili angerlaraangami ilaannikkut paasisarpaa ilagisarsimagaat. Taamaattumillu naveertariaqartarpai. — Ussatit 23:13, 14.

Isumaqarpit Michael qitornaminut sukannerpallaartoq? Taamatut isumaqartoqarsinnaavoq, Jesusili oqarsimavoq ’ilisimassut suliamigut iluartuutitaasartoq’. (Matîuse 11:19, NV) Michaelip Alphinallu qitornamik piffissaqarfigisarneratigut, Biibilip sallusuissutaanik oqaluttuanillu Biibilimeersunik ilinniartittarneratigut angerlarsimaffimmi pissutsit asannipaluttut atuutitittarpaat.

Michael Alphinalu sisamanik paneqarput — Thembekile, Siphiwe, Tholakele Thembekanilu — tamarmik Guutip naalagaaffia pillugu nutaarsiassamik nuannersumik piffissartik tamaat oqaluussisartuupput. Ernerisa ilaat marluk Jehovap nalunaajaasuisa ilagiivini nakkutilliisuupput siulittaasut. Ernerisa pingajuat, nulia aamma piffissani tamaat oqaluussisartuusoq, ilagiinni kiffartortuuvoq.

Angajoqqaarpassuit kristumiuusut ilaqutakkaat qitornaminnik perorsaanerminni pilluaqquneqarsimapput. Taamaattorli meeraqarpoq perorsarneqarluarsimagaluarlutik sallusuissummik tunussisunik. Taamaattoqaraangat qularutissaanngilaq angajoqqaavisa Jesusip ernermik tammaraluartumik assersuusiaa eqqaamajuaraat neriuutigalugulu ernermik panimmilluunniit peqqissiminissaa naggataatigullu annaqataanissaa. — Lúkarse 15:21-24.

Ajoraluartumik angajoqqaat kristumiut ilaasa qitornatik tamaasa silarsuarmut annaasimavaat. Tamanna ingammik Afrikap ilaani isumakuluutaavoq, tamaani meeqqat inuusuttuaranngornissartik tikillugu ajunngitsumik ingerlasorinarsinnaapput. Inuusuttuaranngoraangamik Satanip silarsuaanit kanngunartuliornermut usserneqartarput. (1 Juánase 5:19) Tamatuma kingunerisaanik ataatarpassuit ilagiinni utoqqaanertatut kiffartornissaminnut piukkunnarsineq ajorput. (1 Timûtiuse 3:1, 4, 5) Soorunami ataataasup kristumiup inoqutimi annannissaat pingaartingaartariaqarpaa. Angajoqqaat qitornamik inuunerat annaanniarlugu qanoq iliorsinnaappat?

Qitornannut qanimut ikinngutaagit

Jesus naammalluinnartuuginnarani inunnit allanit ilisimasaqarnerungaarsimavoq misilittagaqarnerungaarsimallunilu. Taamaakkaluartoq ajoqersukkani qanimut ikinngutimisut pisarsimavai. (Juánase 15:15) Taamaattumik najussallugu nuannarisimavaat ilaginissaalu kissaatigisimallugu. (Juánase 1:14, 16, 39-42; 21:7, 15-17) Angajoqqaat tamanna ilinniarfigisinnaavaat. Naasunnguatut pilutaminnik seqinermut saatsitsisutut meeqqat angerlarsimaffik asannippaluttoq ikinngutinnerpaluttorlu nuannaarutigisarpaat.

Angajoqqaat, qitornassi isumakuluutigisinnaasatik tamaasa pillugit saaffigeriaannaavaasi? Tusarnaartarpisigik? Aajalangiitinnasi tamakkiisumik paasisaqarumallusi eqqarsaataat misigissusiilu paasiniartarpisigik? Apeqqutit aalajangersimasut akissutissarsiorlugit atuagassiani Biibililersaarutini ujarleqatigalugit ikiorniartarpisigik?

Anaanaq Afrika-Kujallermiu oqaluttuarpoq: „Panipput atualeqqaarneraniilli kajumissaartarparput ullormut pisimasunik oqaluttuartaqqullugu. Assersuutigalugu aperisinnaavara: ’Kina anitsiarfissuarmi ilagaajuk? Ilinniartitsisortaarsi oqaluttuarilaaruk. Qanoq isikkoqarpa? Sapaatip-akunneranut suut pilersaarutaappat?’ Ilaanni panipput angerlarami oqaluttuarpoq ilinniartitsisumik filmimik isiginnaartinniaraatik kingusinnerusukkut oqaluttuareqqitassaminnik. Filmip aqqa pasinakujuppaluppoq. Paasiniaanerugatta paasivarput kristumiunut naleqqutinngitsoq. Ilaqutariittut oqaloqatigiissutigaarput. Aqaguani panipput ilinniartitsisumut saaffiginnippoq, nassuiaappaalu filmi takujumanagu filmimi ileqqorineqartut kristumiutut upperisaminut naapertuutinngimmata. Pissutigisaa ilinniartitsisup eqqarsaatigaa kingusinnerusukkullu panipput qutsavigaa oqarluni peqqissimissutigisinnaasaminik klassi isiginnaartikkumanagu.“ Angajoqqaat taakkua panimmik annannissaanik asannittumik soqutiginnittuarnerat inerititaqarluarpoq. Paniat nuannaartuuvoq isumalluartuullunilu, maannalu Napasuliaq Alapernaarsuiffiup Peqatigiiffiata Afrika-Kujallermi immikkoortortaqarfiani nammineq piumassutsiminik kiffartorluni.

Jesus allat qitornaannut pissuserisamigut maligassaalluarpoq. Ilagisarnerat nuannaraa. (Mákorse 10:13-16) Angajoqqaat qitornatik ilagalugit assigiinngitsunik iliuuseqartarneq nuannarisariaqarpaat! Afrikap ilaani ataataasut qitornamik arsaattut allanilluunniit pinnguaateqartut akornanni takuneqarnissartik kanngusuutigisarpaat. Ataataasoq kristumiu imminut ima pingaartitsiginngisaannassaaq qitornani ilagalugit arlaannik iliuuseqartilluni allanik takuneqarusunnani. Inuusuttut pisariaqartippaat angajoqqaamik nuannaarlutik ilaginninnissaat. Taamaakkaangat suna uummammiuginerlugu oqaatigissallugu inuusuttut ajornannginnerutittarpaat. Meeqqat misigissutsikkut pisariaqartitatik matuneqanngikkaangata kamassutigisinnaavaat matoqqasunngorlutilluunniit, ingammik naveerneqartuaannarunik.

Ilaqutariinni pissutsit pillugit Paulusip Kulorsamiunut allakkamini ima allappoq: ’Angajoqqaat ukorsii, qitornasi uumitsatseqinasigik anusinngoqqunagit.’ (Kulorsamiut 3:21) Imaassinnaavoq angajoqqaat ilaannikkut naveersineq pivallaartaraat meeqqat ikinngutiginissaat pinngippallaarlugu. Meeqqat inuusuttuaqqallu asaneqartutut pingaartinneqartutullu misigisut naveersinneq pisariaqartoq tigujumanerusarpaat.

Guutimut asanninneq

Angajoqqaat qitornaminnut pingaarnerpaatut kingornussaritissinnaasaat tassaavoq asanninnermik nittaasarnermik maligassiulluarneq. Meeqqat angajoqqaamik Guutimut asanninnermik ilumoortumik nittaasarnerat takussallugu tusassallugulu pisariaqartippaat. Angut inuusuttoq Afrika-Kujallermi Napasuliaq Alapernaarsuiffiup immikkoortortaqarfiani kiffartortoq oqaluttuarpoq: „Nukappiaraallunga ataataga illumi suliassanik ikiortarpara. Ikiorlugu nuannaraara, suliarisinnaasamininnguakkami ilumut pingaartippai. Jehova pillugu oqaluttuullunga piffissaq atorluarniartarpaa. Assersuutigalugu eqqaamavara arfininngornikkut ualikkut ivikkat killorlugit sulerululluta. Kiaqaaq. Ataata kiaguppoq taamaattumillu imermik sikutalimmik immiartorfinnut marlunnut aallerpunga. Ataata oqarpoq: ’Ernera, takusinnaaviuk Jehovap qanoq silatutigisumik aaqqissorsimagai? Siku imermi puttavoq. Kivigaluarpat tatsini masarsunnilu uumassusillit tamarmik toqussagaluarput. Sikuli ussissaatitut atorpoq! Ilaa, tassuunakkut Jehova pillugu ilikkagaqarpugut!’a Kingusinnerusukkut sakkutuujujumannginnera pissutigalugu parnaarussivimmiitillunga pissutsit eqqarsaatiginissaannut piffissaqarsimavunga. Unnuit ilaanni ineeqqanni nikallungallunga ataatama oqaasii eqqaalerpakka. Ila ilumuussusii! Aalajangerpunga pisinnaaguma naassaanngitsussamut Jehova kiffartuukkumallugu.“

Pingaartuuvoq meeqqat angajoqqaamik iliuutsiminni tamani Guutimut asanninnermik ersersitsinerannik takusaqartarnissaat. Takuneqarsinnaasariaqarpoq angajoqqaat kristumiut ataatsimiinnerinut peqataanerat, oqaluussisarnerat ilaqutariittullu Biibilimik atuaqqissaartarnerat Guutimut asanninnermik naalakkusunnermillu pissuteqartut. (1 Korintumiut 13:3) Pingaarnerpaarpaatut Guutimut asanninneq ilaqutariittut uummammik tamakkiisumik qinunerni ersittariaqarpoq. Qitornanut taamaattumik kingornussititsinissap pingaaruteqarneranik erseqqissaaqattaarneq ajoqutaanngisaannarpoq. Taamaattumik Israelikkut ima peqquneqarput: „[Jehova] Guutit asassavat uummatikkut iluunngarlutit tarnikkullu iluunngarlutit nukitillu tamakkerlugit. Oqaatsit taakku peqqussutillu ullumi ilinnut tunniussakka uummammiugiuassavatit. Qitornannut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.“ — 5 Moses 6:5-7; naleqqiuguk Matîuse 22:37-40.

Inunnguuseralugu ajortiliunerput Guutimut asanninnermut naalannermullu akornutaasaqaaq. (Rûmamiut 5:12) Taamaattumik Biibilimi peqquneqarpugut: „Ilissi Jehovamik asannittusi, ajortoq uumigisiuk.“ (Tussiaat 97:10, NV) Eqqarsaatit eqqunngitsut eqqunngitsunik iliortitsigajupput. Taamaattut pinngitsoorniarlugit inuunermut pingaarutilik alla meeqqap ineriartortittariaqarpaa.

Guutimik mianerinninneq

Asanninneq Jehovamik iluarisaannginnissamik ataqqinnittumik mianerinninnermik ilaqartoq kissaatiginartorujussuuvoq. ’Jehovamik mianerinninnermik’ nuannarisaqartutut Jesus Kristusip naammalluinnartumik maligassissimavaatigut. (Jesaja 11:1-3) Mianerinninneq taamaattoq inuunermut pingaartorujussuuvoq inuusuttuaranngornermi kinguaassiuutitigullu nukit sakkortuut atuutileraangata. Guutimut mianerinninnerup silarsuup tatisineranit kanngunartuliornermik kinguneqarsinnaasumit inuusuttut ikiorsinnaavai. (Ussatit 8:13) Inuiaqatigiit ilaanni angajoqqaat qitornatik atoqatigiinnerup tungaatigut usserniarneqaraangamik qanoq iliuuseqartarnissaat ilinniartitsissutigineq ajorpaat. Amerlasuullumi isumaqarput tamakku pillugit qitornanik oqaloqateqarneq eqqunngitsuusoq. Angajoqqaat taamatut iliuuseqanngitsoornerat sumik kinguneqarsimava?

Nakorsat immikkut ilisimasallit pingasut — Buga, Amoko Ncayiyanalu — Afrika-Kujallermi Transkeimi niviarsiaqqanik 1702-nik nukappiaqqanillu 903-nik apersuisimapput. South African Medical Journal-ip nalunaarutigaa „misissuinermi tamatumani niviarsiaqqat 76 procentii nukappiaqqallu 90,1 procentii atoqateqartarnikkut misilittagaqareersimasut“. Niviarsiaqqat agguaqatigiissillugu ukiui 15-iupput, amerlasuullu pinngitsaalineqarlutik atoqatigineqarsimapput. 250-it sinnerlugit ataasiarlutik arlaleriarlutilluunniit naartoreersimapput. Taamatut ileqqoqarnerup nassatarigajugaa alla tassaavoq kinguaassiuutitigut tunillaattartunik nappaateqarneq.

Angajoqqaarpassuit paasisimagunanngilaat qitornatik katissimanatik kinguaassiuutitigut atoqateqartannginnissaannik ilinniartittariaqarlugit. Atuagassiami siuliani taaneqartumi allassimavoq: „Transkeimi innuttaaqatigiinni naartuneq anaananngornerlu arnaassutsimut ersiutitut pingaartinneqaqaaq, tamannalu niviarsiaqqanit inersimalerlaanit malugineqapallattarpoq.“ Silarsuarmi sumiiffinni allanissaaq ajornartorsiut taamaattoq atuuppoq.

Afrikami inuusuttorpassuit angajoqqaatik isornartorsiortarpaat kinguaassiuutinut tunngasunik paasitissimanngimmatik. Angajoqqaat kristumiut ilaat tamakku sammissallugit ima peqqusiileqitigisimapput atuagaq Hvordan du kan får det bedste ud af din ungdom atorumasimanagu.b Atuakkami quppernerni 20-23-mi inersimasunngoriartornermi allanngornerit qanorlu kinguaassiuutitigut pisatat ataqqinnittumik atorneqarsinnaanerat nassuiarneqarput.

Angajoqqaat kristumiut unamminiarnartumik tigusisut kinguaassiuutinullu tunngasut pillugit Guutip isiginnittaasianik qitornaminnik oqaloqateqartartut nersortariaqarput. Siumukariartortumik taamaaliortarneq pitsaaneruvoq ilinniartitsinerlu meeqqap paasinnissinnaaneranut naleqqussartariaqarluni. Meeqqat ukiui apeqqutaatillugit timip pisataanut assigiinngitsunut atorfiinullu innersuussigaangamik angajoqqaat toqqaannartumik oqaatiginnittariaqarsinnaapput. Taamaanngippat ernip paniulluunniit inuusuttup misilittagakitsullu suna pineqarnersoq immaqa paasisinnaassanngilaa. — 1 Korintumiut 14:8, 9.

Angut Afrika Kujallermiu marlunnik panilik ataatsimillu ernilik oqaluttuarpoq: „Kinguaassiuutinut tunngasut malussariffiusut qitornannut oqaloqatigiissutiginissaannut periarfissaqartarsimavunga. Aamma niviarsiaqqat eqqarsaatigalugit taamaappoq. Nuliama atuagaq Hvordan du får det bedste ud af din ungdom atorlugu soorunami immikkut sammisimavai. (Quppernerit 26-31 takukkit.) Ernera aqqaneq-marluliimmat aalajangerpunga sivisuumik qaqqamut pisuttuaqatiginiarlugu. Piffissami tassani nukappiaqqap timaata allanngoriartarnera sukumiisumik eqqartorparput ineriartornerlu immikkut ittoq tamanna kingusinnerusukkut katissagaanni sumut atorfissaqarnersoq eqqortorlugu. Aammattaaq oqaloqatigiissutigaavut ileqqut minguttuut soorlu imminut inertittarnerup ingalassimanissaata pingaassusia niviarsiaqqallu ataqqinnittumik isigisariaqarnerat — anaanatut qatanngutitullu.“

Akissarsiaq nuannersoq

Angajoqqaat uani eqqartorsimasavut eqiasuitsuusimapput qitornaminnillu pingasuusunik perorsaasimanermik kinguneqarluarsimanera nuannaarutigaat. Qitornaat pingasut maanna inersimasuupput kristumiunillu aalajaatsunik aappaqarlutik. Ernerat ningaavilu kristumiut ilagiivini utoqqaanertaapput, aappariillu arlariit marluk ukiorpassuarni piffissartik tamaat oqaluussisartuusimapput.

Angajoqqaat inoqutimik annannissaannik sulissutiginnilluartut meeqqat Biibilimik ilinniartitaanerminnut ajunngitsumik qisuariarnerannik nuannersumik akissarsinissartik ilimagisinnaavaat. Ussatit 23:24, 25-mi allassimavoq: „Silatuumik ernilik nuannaarutissaqarpoq. Ataatannut anaanannullu nuannaarutaaniarit.“ Allaaserisap aallaqqaataani ilaqutakkaat eqqaasavut eqqaamavigit? Alphina oqarpoq: „Qitornama anersaakkut siumukarsimanerat eqqarsaatigigaangakku nuannaartaqaanga.“ Qanortoq angajoqqaat kristumiut tamarmik akissarsiamik nuannersumik taamaattumik piniarlutik sulissuteqarlik. (wE 15/7 97)

[Quppernerup ataani ilanngussat]

[Qupp. 32-mi assiliartaq]

Ataataasoq periarfissarsiorsinnaavoq avatangiisini eqqortuni inuunerup piviusortai pillugit qitornaminik oqaloqateqarnissaminut