Suna inuuninni pingaarnerpaava?
„Aqqutigisassannik ajoqersunnga.“ — TUSSIAAT 143:8.
1. Inuit anguniagarisartagaat suliarisartagaallu pillugit kunngi Salomon qanoq isummersimava?
QULARNANNGITSUMIK nalunngilluarpat inuuneq sammisassanik isumagisassanillu ulikkaartoq. Tamanna eqqarsaatigigukku paasissavat tamakkua ilaat allanit pingaarnerusut. Sammisassat isumagisassallu allat pingaannginnerupput allaalluunniit asuliinnaallutik. Taamaannera akuerigukku inuit inuusimasut ilisimanerpaartaasa ilaat, kunngi Salomon, isumaqatigissavat. Inuunermi sammisassat eqqarsaatigeqqissaareeramigit taanna ima isummerpoq: „Guuti mianeruuk inatsisaalu maleruarlugit, tamanna inunni ileqqussaammat.“ (Nalunaajaasup oqaasii 2:4-9, 11; 12:13) Tamanna ullumikkut uatsinnut qanoq pingaaruteqarpa?
2. Inuit Guutimik mianerinnittut imminnut qanoq tunngaviusumik aperisariaqarpat, suullu allat apeqqutaalerpat?
2 Illit ’Guuti mianeralugulu inatsisai maleruarumagukkit’ imminut ima aperigit: ’Inuuninni suna pingaarnerpaava?’ Soorunami ulluinnarni apeqqut tamanna eqqarsaatigineq ajoraluarpat, maannali eqqarsaatigilaarusunngiliuk? Tamatumunngalu assingusut apeqqutaalerputtaaq: ’Suliffiga imaluunniit nunap pii pingaartippallaarpakka? Angerlarsimaffiga, ilaquttakka asasakkalu sumi inissisimaffeqarpat?’ Inuusuttut imminnut ima aperisinnaapput: ’Piffissaq soqutiginninnerlu qanoq annertutigisut ilinniagaqarnermut atorpakka? Sukisaarsaatit, timersorneq, aliikkusersuutit teknikkikkulluunniit atortorisaarutit pingaarnerutillugit soqutigaakka?’ Qanorluunniit utoqqaassuseqaraluarutta atugaqaraluaruttaluunniit immitsinnut aperisariaqarpugut: ’Guutimut kiffartorneq inuuninni qanoq pingaartitsigaara?’ Qularnanngitsumik paasisinnaavat tulleriiaarinissaq pisariaqartoq. Qanorli ililluta silatuumik tulleriiaarinissatsinnut ikiorneqarsinnaavugut?
3. Kristumiutut tulleriiaarineq sumik nassataqarpa?
3 „Pingaarnerpaaq“ ima paasisariaqarpoq allanit salliutinneqartariaqartoq eqqarsaatigineqaqqaartariaqartorluunniit. Jehovamut nalunaajaasuuguit imaluunniit allat millionillit assigalugit taakku ilagalugit Guutip oqaasianik atuaqqissaartartuuguit ilumoortoq manna eqqarsaatigiuk: „Qilaap ataani pisartut suut tamarmik aalajangersimasumik piffissaligaapput.“ (Nalunaajaasup oqaasii 3:1) Tamakkua ilagaat ilaquttanik asannittumik isumaginninneq. (Kulorsamiut 3:18-21) Sulisarlutit inoqutitit inuussutissaannik isumagisariaqarpatit. (2 Tásalûníkamiut 3:10-12; 1 Timûtiuse 5:8) Ilaannikkut allamik sammisaqalaarniarlutit sukisaarsaatinut aalajangersimasunut aliikkutassanulluunniit piffissaqarsinnaasassaatit. (Naleqqiuguk Mákorse 6:31.) Eqqarsaatigeqqissaarukkuli paasisinnaannginnerpiuk tamakku inuunermi pingaarnerpaanngitsut? Pingaarnerpaaq allaavoq.
4. Filípimiut 1:9, 10-mi allassimasoq qanoq tulleriiaariniarnermut attuumassuteqarpa?
4 Qularnanngitsumik nalunngilat najoqqutassiat Biibilimiittut tulleriiaarissagaanni silatuumillu aalajangiissagaanni iluaqutaasorujussuusut. Assersuutigalugu, Filípimiut 1:9, 10-mi kristumiut kajumissaarneqarput ’ilisarsinermik sianinernillu tamanik ilaqangaaleriartuinnaqqullugit’. Suna siunertaralugu? ’Sorliit [pingaarnerunersut, NV] misilittarsinnaaqqullugit.’ Tassa kristumiup siuneqassusillip eqqorluartumik ilisimasaqarnini tunngavigalugu inuunermini suna pingaarnerpaasariaqartoq aalajangersinnaavaa.
Pingaarnerutitamigut maligassaalluartoq
5. Kristumiunut maligassaalluartoq allaatigalugu Biibilip qanoq takutippaa Jesusip inuunerani suna pingaarnerpaasoq?
5 Apustili Peterip oqaasiisa makkua pingaartumik paasitippaatigut: ’Tamatumunngami qaaqqusimavusi, Kristusissaaq anniarmimmat ilissi pillusi maligassaqartillusi, tumini atuaqqullusigik.’ (1 Pîtruse 2:21) Aap, paasiniarlugu inuunermi suna pingaarnerpaajusariaqarnersoq Jesus Kristusip tamanna pillugu isumaa misissorsinnaavarput. Tussiaat 40:9-mi taanna pillugu ima siulittuuteqarpoq: „Guuti, piumasat malillugu iliornissaq tassa kajungerisara; inatsisitit ilunni ipput.“ Nammineq tamanna ima oqaatigaa: ’Neqissara tassa aallartitsisima peqqusaa malillugu suliareqqusaalu naammassillugu.’ — Juánase 4:34; Eprîarit 12:2.
6. Guutip piumasaatut iliornermik pingaarnerpaatitsinitsigut qanoq ililluta Jesusitut angusaqarsinnaavugut?
6 Pingaarneq manna malugissavarput: Guutip piumasaatut iliorneq. Jesusip maligassiaata erseqqissarpaa suna ajoqersukkat inuuneranni pingaarnerpaasariaqartoq, oqarmat ’kinaluunniit naammattoq ajoqersortimisut ikkumaartoq’. (Lúkarse 6:40) Jesus Ataatami siunertaa malillugu saqigami ’nuannaarneq qaarsillaatigaa’ Guutip piumasaa pingaarnerpaatillugu. (Tussiaat 16:11; apustilit suliait 2:28) Paasisinnaaviuk tamanna sumik nassataqartoq? Jesusip malinnittaasa inuunerminni Guutip piumasaatut iliorneq pingaarnerutikkamikku ’nuannaarneq qaarsillaatigisinnaavaat’ inuunerlu piviusoq nuannaarutigisinnaallugu. (1 Timûtiuse 6:19) Taamaattumik ataasiinnaanngitsumik pissutissaqarpugut inuunitsinni Guutip piumasaatut iliorneq pingaarnerpaatissallugu.
7, 8. Jesus qanoq ililluni misilinneqarsimava, uagullu tamakku qanoq ilinniutigisinnaavavut?
7 Jesusip Guutip piumasaatut iliornissamut tunniulluinnarnini ersersereermagu Diaavulup ingerlaannaq tammartinnialerpaa. Qanoq ililluni? Pingasoriarluni assigiinngitsutigut usserniarpaa. Jesusip tamatigut ersarilluinnartumik Allakkat atorlugit itigartippaa. (Matîuse 4:1-10) Kingornali amerlanerusunik misilinneqarpoq — malersorneqarluni, mitaatigineqarluni, Judasimit killuutigineqarluni, sallusumik unnerluutigineqarluni naggataatigullu nappakkami anniartitsivimmi toqunneqarluni. Taamaattoq misilinneqaraluarluni Guutip ernera aalajaalluni ingerlavissaminit nigunngilaq. Ilaanni artornartunik atugaqarnermini Jesus ima qinuvoq: ’Uanga peqqusattut pinnani illit peqqussattut pili. . . . Peqqussat pili.’ (Matîuse 26:39, 42) Tamatta immikkut taassuma maligassiaanit killinneqarluta ’qasusuilluta qinusariaqarpugut’. — Rûmamiut 12:12.
8 Aap, inuunermi suut pingaarnerunersut aalajangissagutsigu Guutimit siulersorneqarneq pisariaqarpoq, ingammik sallusuissummut akeraasut imaluunniit Guutip piumasaanik assortuisut naammattooraangatsigik. Eqqaamajuk kunngip Davidip aalajaatsup akeqqaminit assortorneqaraangami qanoq Guuti siulersorneqarnissaminik qinnuigisarsimagaa. Tussiaat 143-p ilaa misissorutsigu tamanna paasissavarput. Paasissavarput qanoq ililluta Jehovamut attaveqarnerput nakussatsissinnaallugu Guutip piumasaatut iliorneq inuunitsinni pingaarnerpaatittuarumallugu.
Jehovap qinnutivut tusartarlugillu akisarpai
9. (a) Naak David ajortiliugaluarluni oqaasii qisuariarnerilu sumut ersiutaappat? (b) Sooq eqqortuliorniarnitsinni nakkaannartariaqanngilagut?
9 Naak inuinnaagaluarluni ajortiliullunilu toqusussaagaluarluni Davidip tatigilluinnarpaa Jehovap qinnutini tusassagai. Maniguulluni ima qinuvoq: „[Jehova], tusaruk qinnutiga, tusaaniannga torlulaffigisaraangakkit, akinnga unneqqarissutsinni iluarsutsinnilu. Kiffat eqqartuutitassanngorteqinagu, inoqanngimmat illit takkunni iluartuusumik.“ (Tussiaat 143:1, 2) Davidip naammalluinnanngissutsini nalunngilluarpaa, taamaattorli uummatini Jehovamut sammitilluinnarlugu. Taamaattumik Jehovap naapertuilluarluni akissagaani tatigaa. Tamanna qiimmaallaatiginnginnerparput? Naak Guutip naapertuilluassusia malillugu inuuniarnitsinni kukkusaraluarluta tatigisinnaavarput uummatikkut taassumunnga tunaarinnikkutta tusassagaatigut. (Nalunaajaasup oqaasii 7:20; 1 Juánase 5:14) Qasusuilluta qinujuartilluta ulluni ajortuni makkunani aalajangiusimasariaqarparput ’ajunngitsoq sakkugalugu ajortumut ajugaanissarput’. — Rûmamiut 12:20, 21; Jâko 4:7.
10. Sooq David ilaannikkut annilaangasarsimava?
10 David akeraqarsimavoq soorlu uaguttaaq akeraqartugut. Inuilaamut pallissaanngitsumut Saulimit qimaasariaqarnermini, imaluunniit kunngitut akeqqaminit erloqisinneqarnermini David annilaangasinnaasarsimavoq. Nammineq allaatigaa qanoq misigaluni: „Akeqqama malersorpaannga . . . ungoorlungalu taartup tungaanut . . . Anersaara qasoqaaq, uummatiga aalariassaarpoq sakissanni.“ (Tussiaat 143:3, 4) Illittaaq tamatumunnga assingusumik misigisarpit?
11. Ullumikkut Guutip kiffai sunik isumakuluuteqartarsimappat?
11 Akeqqanit tatineqarneq, aningaasarsiornikkut ajornartorsiutit, sualuttumik nappaateqarneq imaluunniit ajornartorsiutit isumakulunnartut allat pissutigalugit Guutip kiffaasa ilaat isumatsassimasarput. Ilaannikkut misigisinnaapput soorlu uummatertik unittoq. Imatullusooq nilliasimapput: „Atugaqartissimavarma annikilliornartunik angeqisunik oqimaaqisunillu. Inuunermik kingumut tuninnga . . . qiviannga tuppallersarlungalu!“ (Tussiaat 71:20, 21) Qanoq ikiorneqarsimappat?
Akeqqanit tatineqarnermi
12. Kunngi Davidip navianartorsiornini misilinneqarninilu qanoq qisuariarfigisarsimavai?
12 Tussiaat 143:5-imi takutinneqarpoq David qanoq iliortarsimasoq navianartorsioraangami misilinneqaraangamilu: „Ullut itsarsuarnitsat eqqaavakka, naammassisatit tamaasa eqqarsaatigaakka isumaliutigeqqissaarlugillu assappit suliaat.“ Davidip eqqaamavaa Guutip kiffani qanoq iliorfigisarsimagai namminerlu qanoq aniguisinneqarsimalluni. Jehovap aqqi angisooq pissutigalugu iliuuserisimasai eqqarsaatigeqqissaartarpai. Aap, Davidip Guutip suliai eqqaamajuarpai.
13. Misilinneqaraangatta itsaq ullumikkullu kiffaasut aalajaatsut maligassiaat eqqarsaatigisarutsigu nikallujuinissatsinnut qanoq iluaqutigissavarput?
13 Uaguttaaq Guutip kiffaminut iliuuserisimasai eqqarsaatigisarsimannginnerpavut? Ilaana! Tamakkununnga ilaapput ’nalunaajaasut eqimasut’ Kristus sioqqullugu inuusimasut misilittagaat. (Eprîarit 11:32-38; 12:1) Kristumiut tanitat ukiuni hundredelinni siullerni inuusut aamma kajumissaarneqarsimapput ’ullut qaangiuttut eqqaaniaqqullugit’ atorsimasatik eqqaamallugit. (Eprîarit 10:32-34) Aamma Guutip kiffaasa ukiuni nutaanerusuni misigisarsimasaat eqqarsaatigisinnaavavut — soorlu Jehovas Vidner — Forkyndere af Guds rige-mi oqaluttuarineqartut.a Oqaluttuat taamaattut eqqaasissavaatigut qanoq Jehovap innuttani ikiortarsimagai inerteqquteqarfigineqarnerit, parnaarussaanerit, inupalaanit saassunneqarnerit pinngitsaaliissummillu sulisitaanerit nikallujuillutik atorsinnaaqqullugit. Nunani sorsuffiusuni, soorlu Burundimi, Liberiami, Rwandami Jugoslaviaasimasumilu, misilinneqangaarsimapput. Qinugisaaleraangamik Guutip kiffai nikallujuissinnaasimapput Jehovamut qanimut attaveqartuaramik. Taassuma piumasamisut iliornermik inuunerminni pingaarnerutitsisut sernissortarpai.
14. (a) Guutip uagut atortakkatsinnut assingusumik atugaqarsimasumik tapersersuisimaneranut assersuummik taasaqarit. (b) Assersuut tamanna sumik ilinniarfigisinnaavarput?
14 Immaqali oqarumassaatit nammineq peqqarniitsumik qinugisaaneq taama ittoq misigisimanagu misigiumaarnissaalu ilimaginagu. Guutilli innuttani ilungersunartunik atugaqarnerinnaanniunngitsoq tapersersortarpai. Aamma inuit ’nalinginnaat’ pissutsit ’ulluinnarpaluttut’ ataanni tapersersortarpai. Tamatumunnga assersuutissarpassuit ilaat ataasiinnaq mannaavoq: Asseq qulaaniittoq ilisaraajuk, tamatumalu Guutip innuttaminut iliuuserisaanik eqqaasippaatit? Asseq tamanna Vagttårnet-imi 1. decembari 1996-imoortumi atorneqarpoq. Penelope Makrisip oqaluttuaa atuareerpiuk? Tassa kristumiutut assuarnaassutsikkut maligassaq pitsak! Eqqaamavigit saniliminit qanoq pineqartarsimaneri sualuttumillu nappaatit atorsimasai tamakkiisumillu kiffartortuarsinnaajumalluni ilungersorsimaneri? Eqqaamajuk Mytilenemiitilluni misigisimasaa nuannersoq. Misigisartakkat taama ittut tulleriiaarinitsinni tamatsinnut iluaqutaasussatut isigaagit, tassa Guutip piumasaatut iliornerup salliutinnissaanut?
15. Jehovap iliuuserisimasaasa ilaat suut eqqarsaatigeqqissaartariaqarpavut?
15 Daviditut Jehovap suliai eqqarsaatigisarutsigik nakussatsinneqartassaagut. Jehovap siunertani naammassiniarlugu ernermi toqunissaa, makinnissaa naalannarsisitaanissaalu aqqutigalugit annattoqarnissaa isumagaa. (1 Timûtiuse 3:16) Qilammi naalagaaffini pilersissimavaa, Satan inngilipiluilu qilammit anisissimallugit maanilu nunarsuarmi ilumoortumik pallorfiginninneq pilersissimallugu. (sarĸúmersitat 12:7-12) Paratiisi anersaakkut ittoq ineriartortissimavaa innuttanilu amerliartornermik pilluaqqusimallugit. (Jesaja 35:1-10; 60:22) Innuttai maannakkut naggataarutaasumik nalunaajaasarput annikilliornartussaq angisooq nalliutsinnagu. (sarĸúmersitat 14:6, 7) Aap, tamakku tamaasa eqqarsaatigeqqissaarsinnaavavut.
16. Suut sammineroqqullugit kajumissaarneqarpugut, taamaalioruttalu qanoq sunnerneqassaagut?
16 Inuit suliniutaat aalluppallaarnagit Guutip suliai samminerugutsigik paasissavarput pissaanera akiugassaanngitsuusoq. Suliai tassaannaanngillat avataarsuani nunarsuarmilu pinngortitai tupinnartut. (Job 37:14; Tussiaat 19:2; 104:24) Aamma innuttani akeqqanit qunutitsisunit aniguisinniarlugit iliuuseqangaarsimavoq, soorlu itsaq innuttaminut qinikkaminut iliuuserisimasaanit takuneqarsinnaasoq. — 2 Moses 14:31; 15:6.
Ingerlavissarput nalunngilarput
17. Davidip Jehova qanoq piviusutut isigitigaa, tamannalu sumik qularutiginninngissutigisinnaavarput?
17 David nukissaaruttutut misigaluni ima qinusimavoq: „Assakka ilinnut isaappakka, nunatut imissaaleqisutut imeruffigaatit tarnima. Pinasuarit, akinnga [Jehova], anersaara nungujartuinnarpoq. Kiinnat uannut isertoqinagu ilivermut aqqareersimasutut ileqqunanga.“ (Tussiaat 143:6, 7) Davidip naak ajortiliugaluarluni nalunngilaa pissutsit atortariaqakkani Guutip eqqumaffigigai. (Tussiaat 31:8) Ilaannikkut misigisarpugut anersaakkut nukissaarulluta. Taamaattorli neriuutissaaruttariaqanngilagut. Jehovap qinnutivut tusartaramigit utoqqaanertat asannittut, Napasuliaq Alapernaarsuiffik-mi ilanngutassiat ataatsimiinnerilluunniit pisariaqartitatsinnut naleqqulluartuusut aqqutigalugit nakussatsissinnaavaatigut. — Jesaja 32:1, 2.
18, 19. (a) Jehova ilumoorluta qanoq qinnuigisariaqarparput? (b) Suna qulakkeerluinnarsinnaavarput?
18 Jehova tatigalugu ima qinnuigisinnaavarput: „Nallittuinerit misiginaara ullaat tamaasa, tunaarigakkit illit. Aqqutigisassannik ajoqersunnga, eriniffigigakkit.“ (Tussiaat 143:8) Qatanngut arnaq Makris Grækenlandip qeqertaasa ilaanni avinngarusimasumiittoq qimaannarneqarsimavaa? Illit Guutip piumasaatut iliorneq inuuninni pingaarnerutikkakku taassuma qimaannassanerpaatit? Diaavulup ikiortaasalu kissaatigaat Guutip naalagaaffianik oqaluussissutiginninnerput unitsissallugu akornusersussalluguluunniit. Nunami ilumoortumik pallorfiginninnermut kiffaanngissuseqarfiusumi imaluunniit inerteqqutaaffiusumi kiffartoraluarutta qinnutivut Davidip qinnutigisimasaanut naapertuupput: „Aniguisinnga akeqqannit, [Jehova], ilinni isertorumagama.“ (Tussiaat 143:9) Guuti qimarnguigigutsigu aatsaat ajunaarnernut anersaakkut ittunut sernissorneqarsinnaassaagut. — Tussiaat 91:1.
19 Suup pingaarnerpaaneranik qularutiginninnginnerput tunngavissaqarluarpoq. (Rûmamiut 12:1, 2) Taamaattumik silarsuup inuit isaanni pingaarnerusunik uppertinnialeraangatit assortortariaqarpat. Pingaarnerpaasoq nalunnginnakku — Guutip piumasaatut iliorneq — tamanna inuuninni pingaarnerpaatittuaruk. — Matîuse 6:10; 7:21.
20. (a) Tussiaat 143:1-9 naapertorlugu David pillugu suna ilikkarparput? (b) Ullumikkut kristumiut qanoq Daviditut isumaqarsinnaappat?
20 Tussiaat 143-mi versit qulingiluat siulliit erseqqissarpaat Davidip Jehovamut qanimut attaveqarnera. Akeqqaminit unguneqaraangami Guuti siulersoqqulluni saaffigisarpaa. Uummammiugisani aniatittarpai ingerlavissaminillu qinulluni. Ullumikkut anersaamik tanitaasut sinneri nunarsuarmiittut suleqataallu aamma taamaaliortarput. Jehovamut attaveqarnertik erlinnartutut isigaat siulersoqqullutillu saaffigisarlugu. Guutip piumasaatut iliorneq pingaarnerutippaat naak Diaavulumit silarsuarmillu assortorneqartaraluarlutik.
21. Sooq nammineq maligassaalluarnissarput pingaaruteqarpa allat ilinniartissagutsigik inuuneranni suna pingaarnerpaasariaqartoq?
21 Inuit millionilikkuutaat Jehovap nalunaajaasui ilagalugit Biibilimik atuaqqissaartartut paasisariaqarpaat Guutip piumasaatut iliorneq pingaarnerpaasoq. Tamatuminnga paasinninnissaannik ikiorsinnaavavut atuakkami Ilisarsineq inuunermut naassaanngitsumut sammisoq-mi kapitali 13-imik atuaqqissaaqatigigutsigik, tassani oqaatsip naammassineqarnissaanut tunngatillugit najoqqutassiat sammineqarmata.b Soorunami takusinnaasariaqarpaat uagut ajoqersuutigisavut malillugit inuusugut. Namminneq qanoq ingerlasariaqarnertik erniinnaq paasilissavaat. Inuit millionilikkuutaat taakkua inuunerminni suna pingaarnerpaasariaqartoq paasiartortillugu ilaat amerlasuut tunniulluinnarnissaminnut kuisinnissaminnullu killinneqassapput. Taava aqqummi inuunartumi ingerlajuarnissaannut ilagiit ikiorsinnaavaat.
22. Ilanngutassiami tulliuttumi suut sammineqassappat?
22 Inuppassuit akuerisimavaat Guutip piumasaatut iliorneq inuunerminni pingaarnerpaasariaqartoq. Qanorli ililluni Jehovap kiffani ajoqersortarpai piumasamisut iliortuarnissaannik? Taamaaliornertillu qanoq iluaqutigisarpaat? Ilanngutassiami tulliuttumi apeqqutit tamakku sammineqassapput Tussiaat 143:10 tunngavigalugu. (wE 15/12 96)
[Quppernerup ataani ilanngussat]
a 1992-imi Napasuliaq Alapernaarsuiffiup Peqatigiiffianit naqiterneqartoq (kalaallisuunngortitaanngitsoq).
b 1995-imi Napasuliaq Alapernaarsuiffiup Peqatigiiffianit naqiterneqartoq.
Qanoq akissavigit?
□ Filípimiut 1:9, 10-mi allassimasoq atorlugu qanoq tulleriiaarisinnaavugut?
□ Jesusip qanoq ililluni takutissimavaa inuunermini suna pingaarnerpaasoq?
□ Misilinneqarnitsinni qanoq Davidip iliuuserisimasai ilinniutigisinnaavavut?
□ Tussiaat 143:1-9-mi allassimasut ullumikkut qanoq iluaqutigisinnaavavut?
□ Sunarpiaq uagut inuunitsinni pingaarnerpaasariaqarpa?
[Qupp. 10-mi assiliartaq]
Davidip iliuuserisimasamigut takutippaa Jehova tatigilluinnarini
[Suminngaanneernera]
Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s-mit