Iivangkiiliu — ilisimasallit naapertorlugit
’INUIT kinaanerarpaannga?’ (Lúkarse 9:18) Ukiut 2000-ngajaat matuma siorna Jesusip ajoqersukkani taama aperai. Taamanikkut apeqqut tamanna isumaqatigiinngissutaavoq. Ullumikkuttaaq isumaqatigiinngissutigineqartarpoq, ingammik juullip nalaani, nalliuttorsiorfik tamanna Jesusimik qiteqarnerarneqartarmat. Inuit amerlasuut upperaat Jesus qilammit nunarsuarmut aallartitaasimasoq inuiaat annaanniarlugit. Illittaaq tamanna upperaajuk?
Ilisimasallit ilaat allamik isumaqarput. „Oqartarneq Jesusip ajoqersuutigigaa nammineq Guutip ernerigaani silamiut ajortuliaat pillugit toqusussaq, oqaluttuarisaanikkut ilumuunngilaq,“ Marcus J. Borg, upperisarsiornermi kulturimilu professoriusoq taama oqarsimavoq.
Ilisimasallit allat oqartarput Jesus Biibilimi allaatigineqartutut issimanngitsoq. Ilaat isumaqarput iivangkiiliut minnerpaamik ukiut 40-t Jesusip toqunerata kingorna allanneqarsimasut oqaluttuallu taamani Jesusip kinaanera eqqarsaatigalugu kusassarneqarsimasut. Iivangkiiliunik allattut eqqaamasinnaanerat apeqqusinngikkaluarlugu nassuiaanerat ilisimatuut apeqquserniarpaat. Jesus toqoreermat ajoqersukkat allaanerusumik isigilersimavaat — Guutip erneratut, annaassisutut Messiasitullu isigilerlugu. Ilaasa Jesus tassaanerarpaat ilisimasoq angalaannartoq, innuttaaqatigiinnik mumisitsiniartoq. Tamannagooq tassaavoq iivangkiiliunut tunngatillugu ilumoortoq, ilisimatuut oqarnerattut.
Jesus ’ilisimasallit’ isaanni
’Ilisimasalittut’ taamaanneraaneq tamanna illersorniarlugu isornartorsiuisut Jesusimut atatillugu tupinnartuliat saqqummiunneqartut tamaasa upperiumanngilluinnarpaat. Assersuutigalugu, ilaat oqartarput niviarsissamit meerartaarineqarneranik oqaluttuaq Jesusip uersagaanerata toqqortorneqarnissaanik siunertaqartoq. Allat Jesusip Jerusalemip aserornissaa pillugu siulittuutai upperiumanagit oqartarput siulittuutit tamakku ’eqquutereermata’ aatsaat iivangkiiliunut ilanngunneqarsimasut. Ilaat allaat oqartarput Jesusip ajorunnaarsitsineri tassaannaasut nappaatinik eqqarsartaatsikkut pissuteqartunik ajorunnaarsitsinerit — eqqarsaatit timip piinit sakkortunerusarmata. Taama isummerneq ilumoorsoraajuk imaluunniit ingasappallaarsoraajuk?
Ilisimasallit ilaat isumaqarput Jesusip ajoqersugai ataatsimoornertik aserorneqaqqunnginnermik makinneranik sallullutik oqaluttualiorsimasut. Tassami Jesusip malinnittai taannaqanngippat namminneq iliuuseqarsinnaanngillat, taamaattuminngooq Naalagartik pillugu sallullutik oqaluttualiorsimapput. Taamaalillunigooq kristumiussuseq — Kristusiunngitsoq — makitinneqarpoq. Isummat tamakku ilisimasallit ajornannginaagaattut isigigukkit taava qanoq isumaqarfigissaviuk upperisarsiornermik ilisimatooq Barbara Thiering oqarmat Jesus toqutaasimanngitsoq? Taanna oqarpoq Jesusip kikiattugaanini anigorsimagaa kingusinnerusukkullu marloriarluni katissimalluni meeqqanullu pingasunut ataatanngorluni.
Taamaanneraanerit pissutigalugit ilisimasallit amerlasuut akuerisinnaasatuaannik Jesus inissisimaffeqalersinneqarpoq: tassaannaasoq angut ilisimasalik, juuteq immikkukajaaq ittoq, innuttaaqatigiinnik allanngortitsiniartoq — tassaanani Guutip ernera ’kiffartussalluni inuuninilu akissatut tunniussallugu amerlasuut utertinneqaatissaannik’ tikiussimasoq. — Matîuse 20:28.
Immaqa ungasinngitsukkut, juullip nalaani, iivangkiiliut ilaat, soorlu Jesusip nersutaatit nerrivianni innanganeranik oqaluttuaq, atuarsimavat. Imaluunniit oqaluffimmi tamatuma atuffassissutigineqarnera tusarsimavat. Iivangkiiliuni oqaluttuarineqartut akueralugillu upperaagit? Taava tupaallannartoq manna eqqarsaatigissavat. Jesus pillugu Seminarimik taaneqartoq tassaavoq ilisimasalippaaluit Jesus oqaloqatigiissutiginiarlugu ataatsimiittarnerat. 1985-imiilli ukiumut marloriarlutik ataatsimiittarput Jesusip oqaaserisimasai ilumoorsinnaanersut paasiniarlugu. Biibili naapertorlugu oqaaserisai ilumut oqaaserisimanerlugit? Ataatsimiittut igalaamininnguit assigiinngitsunik qalipaatillit atorlugit oqaatsit tamaasa immikkoortitertarpaat. Igalaamineq aappaluttoq isumaqarpoq Jesus qularnanngitsumik taama oqarsimasoq; aappaluartoq isumaqarpoq Jesus immaqa taama oqarsimasoq; qasertoq isumaqarpoq immaqa taama oqarsimanngitsoq; qernertorlu isumaqarpoq taama oqarsimanngitsoq.
Immaqa tupigusuutigissavat paasigukku Jesus pillugu isumasioqatigiit nalunaarsimasut Jesusip Biibili naapertorlugu oqaaserisimasaasa 82 procentii taassuma oqaaserisimagunanngikkai. îvangkîliu Mákorsip agdlagâ-ni issuagaq ataasiinnaq akuerisinnaavaat. îvangkîliu Lúkarsip agdlagâ-nigooq allassimasut taama ilissarsiornermik ulikkaartigigamik ’sussaanngilluinnarput’. îvangkîliu Juánasip agdlagâ-ni oqaaseqatigiit pingasuinnaat qularingaaramikkik igalaaminermik qasertumik nalilerpaat, sinnerilu tamarmik qernertumik nalilerneqarput ilumuunnginnerarneqarlutik.
Ilisimatuussutsimit annerusoq pineqarpoq
Ilisimasallit isumaqatigaagit? Jesus pillugu Biibilimi allassimasumit eqqornerusumik taakkua paasitippaatigut? Apeqqutit tamakku ilisimatuussutsikkuinnaq akineqartussaanngillat. Immaqa juullip nalaani eqqaasinneqartarpugut Guutip Jesus aallartissimagaa ’kinaluunniit taassumunnga uppertoq tammaqqunagu, naassaanngitsumilli inuussuteqaqqullugu’. — Juánase 3:16.
Jesus tassaannaasimappat ilisimasalik angalaannartoq ilisimasaqarfigivallaanngisarput, ’taassumunnga upperneq’ asuliinnaasimassaaq. Akerlianilli Biibilimi Jesus pillugu allassimasut ilumoorpata naassaanngitsumik inuusinnaanissarput pineqarsimassaaq. Taamaattumik manna nalunngittariaqarparput: Jesusimut tunngasut ilumoortut Biibilimi allanneqarsimappat?