Atuartartut apeqqutaat
Harmagedonip qaqugu pinissaa maanna Jesusip ilisimavaa?
Aap, ilisimagaa upperissallugu silatusaarneruvoq.
Apeqqut tamanna pilersinnaammat immaqa ilaasa tupigusuutigissavaat, Matîuse 24:36-mi Jesusip oqaasii pissutigalugit: ’Ullussamik taassuminnga ullulluunniit qanoq ilinissaanik ilisimasoqanngilaq, inngililluunniit qilammiittut Ernerulluunniimmi ilisimanngilaat; Ataatama kisimi nalunngilaa.’ Malugiuk ’Ernerup’ aamma ilisimanngikkaa.
Versi taanna Jesusip apustilimi apeqqutaannut uunga akissutaanut ilaavoq: „Qaqugu tamakku taamaalissappat, sunalu najuunnissannut pissutsillu aaqqissuussaanerata naggatissaanut nalunaaqutaassava?“ (Matîuse 24:3, NV) Pisussat ’nalunaaqutaasussat’ pillugit siulittuutimini maannakkut tusaamasaasumi Jesusip sorsunnerit, kaannersuit, nunap sajuttarneri, kristumiunik ilumoortunik qinuginninnerit nunamilu pissutsit allat najuunnerminut nalunaaqutaasussat siulittuutigai. Nalunaaqutitigut taakkunatigut ajoqersugaasa paasissavaat naggatissaq qanillisoq. Fiigequtilik pilutanikkaangat aasaq qanillisartoq assersuutigaa. Nangipporlu: ’Taamattaaq tamakku tamaasa takulerussigik taanna qanillisoq ilisimassavarsi.’ — Matîuse 24:33.
Naggatissarli qaqugorpiaq takkutissasoq Jesusip oqaatiginngilaa. Matîuse 24:36-mili atuagakkatsitut oqarpoq. Oqaasertai biibilimit kalaallisuunngortitamit pisoqqamit issuagaapput, nutsikkallu nutaanerusut aamma taamatut oqaasertaqarput. Nutsikkalli nutaannginnerusut ilaasa ’Erneq’ taanngilaat.
Soorlu, katuullit Douay Version-anni allassimavoq: „Ullussamik tamatuminnga ullulluunniit qanoq ilinissaanik ilisimannittoqanngilaq, inngililluunniit qilammiittut ilisimanngilaat, Ataatalli kisimi.“ King James-nutsikkami oqaasertai tamatumunnga assigingupput. Sooq ’Ernerulluunniit’ peerneqarsimava, naak Mákorse 13:32-mi ilanngunneqarsimagaluarluni? Pissutaavoq nutserisut, 1600-kkut aallartilaarneranni, nutsikkat taakkua marluk suliarineqarmata, allakkat nutsigaasa oqaatsinik taakkuninnga imaqannginnerat. Kingorna allakkanik nutaannginnerusunik amerlasuunik nassaartoqarpoq. Taakkunani, Mattæusip allaqqaagaanit nutaajunerorujussuanngitsuni, Matîuse 24:36-mi oqaaseq ’Ernerulluunniit’ ilaavoq.
Soqutiginarpoq katuullit Jerusalem-Biibiliat oqaatsimik taassuminnga ilaqarmat, aammalu quppernerup ataani nassuiarneqarmat latinerit Vulgata-taanni oqaaseq peerneqarsimasoq „upperisamut ilisimatusaatit pissutigigunarlugit“. Aap, soorunami! Nutserisut allaqqiisullu ataasiullunilu pingasuussutsimik upperisallit oqaatsit Jesusip Ataatap ilisimasaanik ilisimanninnginneranik takutitsisut peernissaannut ussernartorsiorsimassapput. Ilami Jesus Ataatarlu ataasiullunilu pingasuulluni Guutiusumut ilaappata qanoq ililluni Jesus pissutsinik ilisimanngisaqassagami?
A Textual Commentary on the Greek New Testament-imi, B. M. Metzgerimit allagaasumi, ima allassimavoq: „Oqaaseq „ernerulluunniit“ Matîusemut [oqaasertaanut] nalunaajaatit amerlanersaanni amigaataapput, byzantinimiut oqaasertaanni kingusinnerusuni aamma. Aappaatigulli Alexandrinimiut allagaanni, kitaamiut allagaanni Kæsareamiullu allagaanni pitsaanerusuni oqaatsit ilaapput. Ilimanarneruvoq ajoqersuiniarnerup ajornakusuulernissaa pissutigalugu oqaatsit peerneqarsimanissaat [Mákorse 13:32-mut] naleqqussaaniarluni ilanngussisoqarsimanani“. — Uagut allanneri uingasunngorlugit erseqqissarpavut.
’Allakkat pitsaanerusut’ taakkua allaqqitat siusinnerusut akornanni aaqqissuussamik tulleriiaarineq pillugu atuariaatsimik ilisarsineruneq tapersersorpaat. Naggatissap qaqugu pinissaa inngilit ilisimanngilaat; ernerulluunniit ilisimanngilaa, Ataatap kisimi. Aammattaaq tamanna Matîuse 20:23-mi Jesusip oqaasiinut naapertuuppoq, tassani Guutip naalagaaffiani inissanik nuimanerusunik neriorsuisinnaannginnini, Ataatalli taamaaliortussaanera, miserratiginagu oqaatigaa.
Jesusip nammineq oqaasiisa takutippaat nunamiikkallarami ’silarsuup naggatissaata’ qaqugu pinissaa nalusimagaa. Maannakkummi piffissaq ilisimavaa?
sarĸúmersitat 6:2-mi Jesus hestimi qaqortumi issiasutut allaatigineqarpoq, ’aallartorlu ajugaalluni ajugaassallunilu’. Taava hestersut sorsunnermut, kaannersuarmut nappaalanersuarmullu, sorsunnersuaq siulleq 1914-imi aallartimmalli misigisarsimasatsinnut, ilisarnaataasut takkupput. Jehovap nalunaajaasuisa upperaat 1914-imi Guutip qilammi naalagaaffiani Jesus kunnginngortitaasimasoq, nunarsuarmilu ajussusermut sorsunnissami siuttuussasoq. (sarĸúmersitat 6:3-8; 19:11-16) Maanna Jesus Guutip aqqani ajugaanissaminut pissaaneqartitaalersimagami, ilimanarpoq naggatissap, ’ajugaaffissaata’, qaqugu pinissaanik Ataataata oqaluttuussimassagaa.
Uagut maani nunamiittut qaquguunissaa paasisimanngilarput, Jesusillu oqaasii uagutsinnut suli atuupput: ’Misissoritsi, eqqumaniarlusilu qinugitsi, taamaaffissaa qaqugu nalliussasoq nalugassiuk. . . . ilissinnulli oqaaserisara tamanut oqaaseraara: eqqumagitsi.’ — Mákorse 13:33-37. (wE 1/8 96)