Jehovap savaataasa asannittumik isumassorneqarnissartik atorfissaqartippaat

„Misiginiaritsi [Jehova] Guutiummat. . . . Tassaavugut innuttai, savaatit paarisai.“ — TUSSIAAT 100:3.

1. Jehovap kiffani qanoq iliorfigisarpai?

JEHOVA tassaavoq Paarsisoq angisooq. Taassumunnga kiffaagutta savaatimisut isigisarpaatigut asannittumillu isumassortarluta. Ataatatta qilammiusup tuppallersartarpaatigut, nutaamik nukissaqalersittarluta ’aqqilu pillugu aqqutaalluartukkut’ siulersortarluta. (Tussiaat 23:1-4) Paarsisup ajunngitsup, Jesus Kristusip, ima asatigaatigut allaat pilluta inuunini tunniussimallugu. — Juánase 10:7-15.

2. Guutip innuttai qanoq atugaqarpat?

² Jehovap asannittumik isumassormatigut tussiaasiortutut ima oqarsinnaavugut: „[Jehova] kiffartorfigisiuk tipaatsuummik erinalersorlusi, sassaritsi kiinaata saanut. Misiginiaritsi [Jehova] Guutiummat. Taassuma pinngortippaatigut, taassumalu pigaatigut. Tassaavugut innuttai, savaatit paarisai.“ (Tussiaat 100:2, 3) Aap, nuannaarlutalu toqqissisimavugut. Soorlumi uumasunut qaasuttunut navianartunut sernissorneqarluta savanut isertitsivimmiittugut isumannaalluinnartumik ungalusami. — 4 Moses 32:16; 1 Samuel 24:3; Sefanja 2:6.

Savaatinut paarsisut kajumittut

3. Kristumiut utoqqaanertat toqqakkat Guutip savaataanik qanoq iliorfiginnittarpat?

³ Guutip savaataasut nuannaarnissatsinnut pissutissaqaqaagut. Utoqqaanertat toqqakkat akornatsinni siuttuupput. Uagutsinnut naalagaaniartuunngillat, uppernitsigullu aamma naalagaaniarfigineq ajorpaatigut. (4 Moses 16:13; Matîuse 20:25-28; 2 Korintumiut 1:24; Eprîarit 13:7) Paarsisuuppulli asannittut apustilip Peterip unnersuussutaanik matuminnga malinnittut: ’Guutip savaatai ilissinniittut paarisigik, misissuisuullusi pinngitsaalinermit pinnasi piaarinermilli, assuarnartumik akissarsiniarnasi kajumillusili, paarisassanulluunniit naalagaaniartutut pinnasi savaatinulli maligassanngorlusi.’ (1 Pîtruse 5:2, 3) Apustili Paulus utoqqaanertaqatimi ilaannut ima oqarsimavoq: ’Immissinnik taava misissoritsi savarpaallu iluunngaasa misissorlugit, taakkununnga anersaap illernartup ivertikkaasi takusaasartooqqullusi, Guutip ilagiissai [ernermi aavanik, NV] pissarsiai paareqqullugit.’ Angutit anersaap illernartup siulersuineratigut toqqarneqarsimasut taakkua ’savarpannik qajassuussisuunerat’ savaatit qujamasuutigeqaat. — apustilit suliait 20:28-30.

4. Charles T. Russell savaatinut qanoq attaveqarsimava?

⁴ Jesusip ilagiit ’inunnik tunissutaasunik tunisimavai’, „pastorinik“ imaluunniit ’paarsisunik’, Jehovap savaataanik asannittumik iliorfiginnittunik. (Evfisumiut 4:8, 11; Schindler) Taakkua ilagaat Charles T. Russell, Napasuliaq Alapernaarsuiffiup Peqatigiiffiata præsidentia siulleq. Taanna pastor Russellimik taaneqartarsimavoq paarsisuunerup Jesus Kristusip ataani asannilluni misiginneqataallunilu paarsisuunini pillugu. Ullumikkut kristumiut utoqqaanertat Jehovap Nalunaajaasuisa Siulersuisoqatigiivinit toqqarneqartarput, taaguutillu „pastor“, „utoqqaanertaq“ imaluunniit „ajoqersuisoq“ taaguutitut atorneqarnaveersaartarput. (Matîuse 23:8-12) Ullumikkulli utoqqaanertat assingusumik paarsisutut suliaqarput savanut Jehovap ivigartorfiutaaniittunut iluaqutaasumik.

5. Sooq nutaat ilagiinni kristumiuni utoqqaanertanik toqqakkanik ilisarisimannilerniartariaqarpat?

⁵ Nutaat anersaakkut siumukarnissaannut utoqqaanertat paarsisutut annertuumik sunniuteqartarput. Atuakkami nutaami Ilisarsineq inuunermut naassaanngitsumut sammisoq-mi quppernermi 168-imi ima allassimasoqarpoq: „Ilagiinni utoqqaanertat ilisarisimalerniakkit. Guuti pillugu ilisimasaminnik maleruaanermikkut annertuumik misilittagaqarput, nakkutilliisunut Biibilimi piumasaqaatinik eqqortitsillutik. (1 Timûtiuse 3:1-7; Títuse 1:5-9) Ileqqumut pissutsimulluunniit Guutip piumasaqaataanut akerliusumut akiuunninni anersaakkut ikiorneqarnissannik atorfissaqartitsigaangavit nangaanak taakkununnga saaffiginnittarit. Paasilissavat utoqqaanertat Paulusip kajumissaarutaanik uuminnga malinnittuusut: ’Nikallortut tuppallersarsigik, sanngiitsut illersorsigik, tamanullu kamajuillusi.’ — 1 Tásalûníkamiut 2:7, 8; 5:14.“

Nutaat oqaluussisartunngorusuppata

6. Biibilimik atuaqqissaaqatigineqartoq oqaluussisartunngorusuleraangat qanoq iliortoqartarpa?

⁶ Biibilimik atuaqqissaaqatigineqartartoq sivisungaatsiartumik ilinniareerluni ataatsimiittunullu najuuttareerluni qularnanngitsumik Naalagaaffik pillugu nutaarsiassamik nuannersumik oqaluussisartunngorusulissaaq. (Mákorse 13:10) Taamaappat oqaluussisartup taassuminnga atuaqqissaaqatiginnittartup nakkutilliisoq siulittaasuusoq atassuteqarfigissavaa, taassumalu isumagissavaa utoqqaanertat ilaata ilagiinni kiffartornermut ataatsimiititamut ilaasortaasup utoqqaanertamik allamik peqateqarluni atuaqqissaaqatigineqartartumik atuaqqissaaqatiginnittartumillu oqaloqateqarnissaat. Oqaloqatigiinnermi atuakkami Organiseret til at fuldføre vor tjeneste-mi quppernerit 94-96 aallaavigineqassapput. Utoqqaanertat taakkua marluk erseqqissumik paasisinnaagunikku nutaap Biibilimi ajoqersuutit tunngaviusut upperigai inuuninilu Guutip najoqqutassiaanut naapertuuttungorsarsimagaa, taava nalunaarfigissavaat tamanut oqaluussinermut peqataasinnaalersoq.a Oqaluussisimanerminik nalunaarummik tunniussippat allagartamik „Oqaluussisartup nalunaarsugai“-mik allassimasumik taassuma aqqanik atsiorneqarsimasumik pilersitsisoqassaaq. Taamaalilluni oqaluussisartup nutaap allat millionilikkuutaat nuannaarlutik ’Guutip oqaasianik oqaluutiginnittut’ peqatigalugit oqaluussisarnini nalunaarutigisalissavaa. (apustilit suliait 13:5) Taava kuisimanngitsutut oqaluussisartunngornera ilagiinnut nalunaarutigineqassaaq.

7, 8. Oqaluussisartoq kuisimanngitsoq oqaluussinermi qanoq pisariaqartumik ikiorneqarsinnaava?

⁷ Oqaluussisartup kuisimanngitsup utoqqaanertanit kristumiunillu inersimalluartunit allanit ikiorneqarnissani atorfissaqartippaa. Assersuutigalugu, ilagiit atuakkamik atuaqqissaarneranni taassuma najuuffigisartagaani aqutsisartup taassuma anersaakkut siumukarnissaa soqutigisariaqarpaa. Immaqa oqaluussisartup nutaap illumiit illumut oqaluussinissani ajornakusoortippaa. (apustilit suliait 20:20) Taamaattumik qularnanngitsumik ikiorneqarusussaaq, ingammik ’Ilisarsineq’ ikiortigalugu Biibilimik imminik atuaqqissaaqatiginnittarsimasumit. Taamatut ikiuineq pissusissamisoorluinnarpoq, tassami aamma Jesus Kristusip ajoqersukkani oqaluussiartornissaannut piareersartittarsimavai. — Mákorse 6:7-13; Lúkarse 10:1-22.

⁸ Oqaluussillaqqissunngorusukkutta piareersartarnissarput pingaaruteqarpoq. Taamaattumik oqaluussisartut marluk taakku oqaluussiartunnginnerminni naapeqatigiikkumassapput, Naalagaaffimmik Kiffartuuteqarneq-mi siunnersuutit sungiusarniarlugit. Oqaluussillutik aallartikkunik immaqa oqaluussisartoq misilittagaqarnerusoq matuni siullerni marlussunni aallarniissaaq. Inussiarnersumik aallarneereerpat immaqa marluullutik oqaloqatigiinnermut peqataasinnaapput. Sapaatit-akunnialunni taamatut oqaluussinermi suleqatigiikkunik qularnanngitsumik isumalluarnartumik pulaaqqitassaqalissapput, immaqalu allaat Ilisarsineq inuunermut naassaanngitsumut sammisoq ikiortigalugu angerlarsimaffimmi Biibilimik atuaqqissaaqateqalersinnaallutik. Immaqa oqaluussisartup misilittagaqarnerusup atuaqqissaarneq aqungaatsiareeruniuk oqaluussisartumut nutaamut tunniussinnaassavaa. Biibilimik atuaqqissaaqatigineqartoq Guuti pillugu ilisimalikkaminik pingaartitsinermik ersersitsippat oqaluussisartunut taakkununnga nuannaarutaassaqaaq.

9. Oqaluussisartoq kuisimanngitsoq kuisikkusuleraangat qanoq iliortoqartarpa?

⁹ Oqaluussisartoq kuisimanngitsoq anersaakkut siumukareeruni qularnanngitsumik qinunikkut Guutimut tunniulluinnassaaq kuisikkusulerlunilu. (Naleqqiuguk Mákorse 1:9-11.) Taamaappat ilagiinni nakkutilliisoq siulittaasuusoq kuisikkusunnerminik nalunaarfigissavaa, taassumalu isumagissavaa oqaluussisartup utoqqaanertallu atuakkami Organiseret til at fuldføre vor tjeneste-mi quppernerni 169-213-imi apeqqutinik sammisaqaqatigiinnissaat. Apeqqutit sisamanngorlugit immikkoortitigaapput pingasunulli avillugit sammineqarsinnaallutik, ajornanngippat utoqqaanertat assigiinngitsut pingasut peqatigalugit. Utoqqaanertat isumaqatigiikkunik oqaluussisartup kuisimanngitsup Biibilimi ajoqersuutit naammattumik paasisimagai allatigullu piukkunnarsisimalluni, taava nalunaarfigisinnaavaat kuisissinnaalersoq. Tunniulluinnarnermi kuisinnermilu kingunerisaannik ’nalunaaqutserneqassaaq’ annassinnaaqqulluni. — Hesekiel 9:4-6.

Immikkut pisariaqartitsinerit

10. Biibilimik atuaqqissaaqatigineqartup ’Ilisarsineq’ atuareeruniuk kuisereerunilu qanoq ililluni Biibilimik ilisimasani annertusarsinnaavai?

¹⁰ Biibilimik atuaqqissaaqatigineqartoq ’Ilisarsinermik’ atuaqqissaaqatigineqareeruni kuisereerlunilu, immaqa pisariaqassanngilaq atuakkamik allamik, soorlu Ataasiussuseqarlutik Guutimik ilumoortutuamik pallorfiginnittut-mik, aalajangersimasumik atuaqqissaaqatigiuaannarnissaa.b Kuiserlaaq kristumiut ataatsimiinnerinut piareersartarnermini ataatsimiinnernullu najuuttuartarnermini soorunami annertuumik ilikkagaqartassaaq. Aamma sallusuissummik ’qilalernerminit’ killinneqarluni kristumiut atuagassiaataannik atuartarnermini uppeqatiminillu Biibilimut tunngasunik oqaloqateqartarnermini ilikkagaqarnerujartuinnassaaq. Taavami immikkut pisariaqartitsilerpat?

11. (a) Apollos qanoq ililluni Priskillamit Akvilamillu ikiorneqarsimava? (b) Oqaluussisartoq kuiserlaaq katikkusulersoq qanoq ikiorneqarsinnaava?

¹¹ Allaat Apollos, ’Allakkani allassimasunik ilisimasaqangaartoq’ peqqissaartumillu Jesus pillugu ajoqersuisartoq, kristumiut misilittagaqarluartut Priskillap Akvilallu ’ilaserimmanni Guutillu aqqutigeqqusaanik nassuiaateqqissaarmanni’ ilikkagaqarsimavoq. (apustilit suliait 18:24-26; naleqqiuguk apustilit suliáinik agdlagkat 19:1-7.) Oqarta angut inuusuttoq kuiserlaaq aappassiartaarusulersoq katikkusulerlunilu. Kristumiup misilittagaqarnerusup ikiorsinnaavaa Napasuliaq Alapernaarsuiffiup Peqatigiiffiata naqitigaani paasissutissanik tamatumunnga tunngasunik ujarliullugu. Assersuutigalugu atuakkami Unge spørger — Svar der duer-imi, immikkoortumi 7-imi kapitaleqarpoq pitsaasunik tamatumunnga tunngasunik.c Oqaluussisartup taassuminnga atuaqqissaaqatiginnissimasup immaqa paasissutissat tamakku pillugit oqaloqatigiumassavaa, aalajangersimasumik atuaqqissaaqatiginngikkaluarlugu.

12. Aappariit kuiserlaat ajornartorsiuteqartut qanoq ikiorneqarsinnaappat?

¹² Imaassinnaavorluunniit aappariit kuiserlaat aappariinnerminni Guutip najoqqutassiaanik atuiuminaatsitsisut. Immaqa utoqqaanertamut saaffiginnissapput, taassumalu unnuppaaluit atorlugit Biibili pillugu oqaloqatigisinnaavai tamannalu pillugu Napasuliaq Alapernaarsuiffiup Peqatigiiffiata atuagassiaataani allaaserisat sammillugit. Utoqqaanertalli aappariit aalajangersimasumik Biibilimik atuaqqissaaqatigissanngilai.

Kuiserlaaq unioqqutitsippat

13. Sooq ilagiinni utoqqaanertat kuiserlaamut unioqqutitsisumut isumataartumullu naakkinnittumik iliortariaqarpat?

¹³ Utoqqaanertat Paarsisoq angisooq, Jehova, malippaat, ima oqartoq: „Savaatikka uanga nammineq paariumavakka . . . ikiligaasut mattuserlugit, sanngiitsut nakussatsillugit.“ (Hesekiel 34:15, 16; Evfisumiut 5:1) Ajoqersugaq Judas assingusumik anersaaqarluni kajumissaarivoq kristumiut tanitat qulalersut ajortuliorsimasulluunniit naakkinninnermik ersersitsivigineqartassasut. (Jûtarse 22, 23) Kristumiut misilittagaqarnerusut eqqortumik pilluta annerujussuarmik ilimasuffigisaratsigik, kuiserlaaq eqqunngitsuliortoq allamik isumataartoq suli naakkinnittuliorfiginerussavarput, savaaqqatut immat. (Lúkarse 12:48; 15:1-7) Taamaattumik utoqqaanertat, ’Jehovamik eqqartuussissussisut’, savanik taama ittunik qamannga pisumik isumassuisariaqarput saamallutillu ajunngitsumik ingerlaqqilernissaanik ikiorlugu. — 2 Israelikkut 19:6; apustilit suliait 20:28, 29; Galâsiamiut 6:1.d

14. Oqaluussisartoq kuiserlaaq annertuumik unioqqutitsippat qanoq iliortoqartariaqarpa, qanorlu ikiorneqarsinnaava?

¹⁴ Oqarta oqaluussisartoq qanittukkut kuisittoq siornatigut imigassamik ajornartorsiuteqarsimasoq ataasiarlunilu marloriarluniluunniit ’nakkarsimasoq’. Immaqaluunniit ukiorpassuarni pujortartarsimanini ajugaaffigisimavaa, ataasiarlunili marloriarluniluunniit kisimiitilluni pujortagunnerminut nakkaannartoorsimalluni. Naak qatannguterput nutaaq Guutimut isumakkeerfigeqqusimagaluarluni utoqqaanertanut ikiortissarsiortariaqarpoq, nakkaannartarneq ileqquliutiinnaqqunagu. (Tussiaat 32:1-5; Jâko 5:14, 15) Eqqunngitsuliorsimanini utoqqaanertamut eqqaappagu taassuma naakkinnilluni ikiorniartariaqarpaa ajunngitsumik ingerlaleqqinniassammat. (Tussiaat 130:3) Immaqa Biibili tunngavigalugu unnersuunneqarnerinnaq ajunngitsumik ingerlaleqqinnissaminut iluaqutigissavaa. (Eprîarit 12:12, 13) Utoqqaanertap ilagiinni nakkutilliisoq siulittaasuusoq tamanna pillugu oqaloqatigissavaa qanoq ikiorneqaqqissinnaanissaa aalajangiiffigineqarniassammat.

15. Kuiserlaamik ajortuliortoqaraangat ilaannikkut suna pisariaqartarpa?

¹⁵ Iliuuseqarnerunissaq ilaannikkut pisariaqarsinnaasarpoq. Tamanit ilisimaneqalersimappat, savaatit ulorianartorsiortinneqarpata imaluunniit ajornartorsiutit annertuut allat pineqarpata utoqqaanertaqatigiit utoqqaanertanik marlunnik misissuisussanik toqqaasinnaapput. Utoqqaanertat misissuisitat taakkua paasigunikku ajornartorsiut ima ilungersornartigisoq eqqartuussisussanik ataatsimiititaliortoqartariaqarluni, taava utoqqaanertaqatigiit nalunaarfigissavaat. Utoqqaanertaqatigiillu eqqartuussisussanik ataatsimititaliussapput unioqqutitsisoq ikiorniarlugu. Eqqartuussisutut ataatsimiititat unioqqutitsisoq qajassuussisumik iliorfigisariaqarpaat. Biibili atorlugu ajunngitsumik ingerlaleqqinnissaanik ikiornissaa ilungersuutigisariaqarpaat. Eqqartuussisutut ataatsimiititat inussiarnersumik ikiuiniarnerat unioqqutitsisup ajunngitsumik qisuariarfigippagu utoqqaanertat taakkua aalajangerniarsinnaavaat iluaqutaassanersoq naalagaaffilersaarfimmi ataatsimiinnerni saqqummiussisarunnaarsitaagallarpat, aammalu ataatsimiinnerni oqaaseqarsinnaajunnaarsitaagallassanersoq.

16. Unioqqutitsisoq ikiorniarlugu utoqqaanertat qanoq iliorsinnaappat?

¹⁶ Unioqqutitsisoq ajunngitsumik qisuariarpat utoqqaanertat marluk eqqartuussisutut ataatsimiititamut ilaasut paarsisutut pulaarsinnaavaat uppernermigut Guutillu maleruaqqusaanik naapertuilluartunik paasinninnermigut nakussatsinneqarnissaa siunertaralugu. Immaqa ilaannikkut oqaluussiartoqatigisarsinnaavaat. Biibili tunngavigalugu oqaloqatigisarsinnaavaat, immaqalu Napasuliaq Alapernaarsuiffik-mi aammalu Iteritsi!-mi ilanngutassianik naleqquttunik sammisaqaqatigalugu, aalajangersimasumik Biibilimik atuaqqissaaqatiginngikkaluarlugu. Unioqqutitsisoq taamatut asannittumik isumassorneqaruni qularnanngitsumik timip sanngiissutaanut akiuunnissaminut nakussatsissutigissavaa.

17. Kuisimasoq unioqqutitsisoq allamik isumataanngikkaangat ajortumillu iliorunnaanngikkaangat qanoq iliortoqartarpa?

¹⁷ Soorunami kuiserlaajuneq isumataarumanani ajortuliornissamut patsisiginiagassaanngilaq. (Eprîarit 10:26, 27; Jûtarse 4) Kuisimasoq unioqqutitsisoq isumataanngikkuni ajortuliortuaannarunilu ilagiinnut ilaasortaajunnaarsinneqassaaq. (1 Korintumiut 5:6, 11-13; 2 Tásalûníkamiut 2:11, 12; 2 Juánase 9-11) Tamatuma pisariaqalernera nalunarunnaarpat utoqqaanertat eqqartuussisussanik ataatsimiititaliussapput. Unioqqutitsisoq ilagiinnut ilaasortaajunnaarsitaappat ima nalunaarutigineqassaaq: „[Atia] anisitaavoq.“e

’Inersimassummut ingerlagasuarnissaannik’ ikiorsigik

18. Sooq kristumiut kuiserlaat allallu tamarmik Jehova taassumalu piumasaa pillugit ilikkagassaqartuaannassappat?

¹⁸ Guutip kiffaasa amerlanerpaartaat savaatiniiginnassapput. Aammalu nuannaarnartuuvoq tamatta Ataatatsinnut qilammiusumut qaninnerujartuinnartumik attaveqaleriartuaarsinnaagatta taanna taassumalu piumasaa pillugit ilikkagaqarnerujartuinnarsinnaanerput pissutigalugu. (Nalunaajaasup oqaasii 3:11; Jâko 4:8) Ukiumi 33-mi piinsip ulluani kuisittut tuusintilikkuutaat ilinniagassaqarsimaqaat. (apustilit suliait 2:5, 37-41; 4:4) Aamma juutiunngitsut, Allakkanik ilisimasaqanngitsut, soorlu Paulusip Areopagusimi Athenimiittumi oqalugiaataanik tusarnaareerlutik kuisittut, assut ilinniagassaqarsimapput. (apustilit suliait 17:33, 34) Ullumikkuttaaq kuiserlaat suli ilinniagassaqarput, Guutillu isaani eqqortumik iliortuaannarniarlutik aalajangernertik nakussatsinniarlugu piffissaq ikiorneqarnissarlu pisariaqartippaat. — Galâsiamiut 6:9; 2 Tásalûníkamiut 3:13.

19. Kuisittut ’inersimassummut ingerlagasuarsinnaaqqullugit’ qanoq ikiorneqarsinnaappat?

¹⁹ Ukiut tamaasa tuusintilikkuutaat kuisittarput, ’inersimassummullu ingerlagasuarnissaminnut’ ikiorneqarnissartik pisariaqartittarpaat. (Eprîarit 6:1-3, NV) Tamatta immikkut oqaatsivut, maligassiuinerput oqaluussinermilu ikiuinerput immaqa ilaasa inuttaamik atisinissaminnut ’sallusuissullu eqqorlugu saqiuarnissaminnut’ iluaqutigissavaat. (3 Juánase 4; Kulorsamiut 3:9, 10) Oqaluussisartuuguit misilittagaqartoq immaqa utoqqaanertat qinnuigissavaatsit uppeqaterput nutaaq oqaluussinermi ikiulaaqqullugu imaluunniit sapaatit-akunnerini arlalinni Biibilimut tunngasunik oqaloqatigilaartaqqullugu Guutimut uppernermigut, kristumiut ataatsimiinnerinik allatigullu pingaartitsinermigut nakussatsinneqarsinnaaqqullugu. Paarsisut savaatinut attaveqarnerata assigaa ataatap meeqqaminik kajumissaarisarnera imaluunniit anaanap naalungiarsuutiminik qajassuartumik isumassuinera. (1 Tásalûníkamiut 2:7, 8, 11) Kisianni utoqqaanertarpaaluit ilagiinnilu kiffartortorpaaluit kisimik ilagiinni pisariaqartitsinerit tamaasa isumagisinnaanngilaat. Tamatta ilaqutariittut ikioqatigiittariaqartutut ippugut. Uppeqativut ikiorniarlugit tamatta immikkut iliuuseqarsinnaavugut. Immaqa nikallungasut qiimmassarlugillu tuppallersartarsinnaavatit imaluunniit sanngiitsut annertoqqusersortarlugit. — 1 Tásalûníkamiut 5:14, 15.

20. Guutimik ilisarsineq siaruarterniarlugu Jehovallu savaataanut asannittumik isumassuiniarlutit qanoq iliorsinnaavit?

²⁰ Kikkut tamarmik Guutimik ilisarsinissartik pisariaqartippaat, Jehovamullu nalunaajaasutut nuannaarlutit ilisarsinermik tamatuminnga siaruartereqataavutit. Jehovap savaataasa qamannga pisumik isumassorneqarnissartik pisariaqartippaat, illillu taamatut isumassuinermut asannillutit peqataasinnaavutit. Qanortoq kiffartornerit Jehovap pilluaqquliuk, qanortorlu savaataanik ikiuiniarlutit ilungersornitit annertuut pilluaqqugiligit. (wE 15/1 96)

[Quppernerup ataani ilanngussat]

Qanoq akissavit?

□ Jehovap savaatini qanoq iliorfigisarpai?

□ Nutaat oqaluussisartunngorusuleraangata qanoq pisoqartarpa?

□ Uppeqatit nutaanik immikkut pisariaqartitsisunik qanoq ikiuisinnaappat?

□ Ajortuliortut allamilli isumataartut utoqqaanertanit qanoq ikiorneqarsinnaappat?

□ Kuiserlaaq ’inersimassummut ingerlagasuarnissaanik’ qanoq ikiorneqarsinnaava?

[Qupp. 10-mi assiliartaq]

Charles T. Russell savaatinut paarsisutut asannittutut ilisimaneqarsimavoq

[Qupp. 12-mi assiliartaq]

Paarsisut misiginneqataasut Guutip savaataanik qajassuussisuupput