Tarrarsuutip suna qulaarpaa?

ATAGU tarrarsoriarit. Suna takuiuk? Tarrarsoraangatta ilaannikkut ippinnartumik takusaqartarpugut, nuannaarutigisarparpullu allanit malugineqannginnerani iluarsisinnaagaangatsigu.

Biibili amerlasuutigut tarrarsuummut assinguvoq. Pissusivitsinnik takunninnissatsinnut ikiortarpaatigut, tamannalu uagut nammineq Guutip isaani naleqassutsitsinnik eqqarsaatiginnippallaarnissatsinnut, imaluunniit eqqarsaatiginninngippallaarnissatsinnut, iluaqutigisarparput. (Matîuse 10:29-31; Rûmamiut 12:3) Aammalu Biibilip oqaatsitsinni, iliuutsitsinni isummatsinnilu ippinnartoqarpat iluarsineqartariaqartumik qulaarsinnaavaa. Taamaakkaangat tarrarsuummi takusatit sumiginnartarpigit?

Biibilimik allaqataasoq Jakob ima allassimavoq: ’Oqaaseq naammassinagu tusaaginnartoqarpat, taassuma angut kiinnaminik inuuserisaminik tarrarsuutikkut qimerluuisoq assigeqqajarpaa; qimerloorsimallunimi aallararaaq qanoq-issutsilu erniinnaq puiorlugu.’ — Jâko 1:23, 24.

Tamatumunnga akerliusutut Jakobip eqqaavaa angut ’inatsisinut naammalluartunut kiffaanngissutsip piinut soraarani itsuartoq’. (Jâko 1:25) Oqaaseq griikerisooq tassani ’itsuartumik’ nutserneqarsimasoq isumaqarpoq takusaqarniarluni sikittumut imaluunniit siumut alakkartertumut. Theological Dictionary of the New Testament-imi ima allassimavoq: „Qiviallatsiarnerinnaq pineqanngilaq.“ Oqaatsimi pineqarpoq arlaannik toqqorsimasumik qinaaseqqissaarneq. „Inuk sumik pingaartumik takusaqarusuppoq, naak imaaliallaannaq takujuminaallunilu paasiuminaakkaluartoq,“ Biibilimik oqaaseqarfiginnittartoq R. V. G. Tasker taama allappoq.

Illit Guutip oqaasiini tarrarsuutitut ittuni imminut sukumiisumik misissorusuppit, pisariaqarpallu arlaatigut allannguillutit? Taamaappat Jakobip oqaasii misigissavatit: ’Tusartaalluni puiutunngitsoq suliassamillu naammassinnittoq taanna qanoq iliornermini pilluarumaarpoq.’ — Jâko 1:25. (wD 15/7 95)