’Guutimit tamanik tuppallersaasumit’ tuppallersaatissaq
’Unnersiutigineqarli Guuti Naalakkatta Jesusip Kristusip Ataataa, Ataataq nallittuisoq Guutilu tamanik tuppallersaasoq, taassuma annikilliutivut tamaasa pillugit tuppallersarpaatigut.’ — 2 KORINTUMIUT 1:3, 4.
1, 2. Inuit aliasuttut sumik tuppallersarneqartariaqarpat?
INUIT ALIASUTTUT piviusumik tupallersarneqarnissartik pisariaqartippaat, oqaatsit atorneqakulasut isumaqangaanngitsullu pisariaqartinnagit. Tamatta tusarnikuuarput ’piffissap ingerlanerani ikit tamarmik mamikkiartussasut’, toqusooqqammerlutilli aliasuttut oqaatsit taakku tuppallersaatigivallaassanngilaat. Kristumiut nalunngilaat Guuti makinnissamik neriorsuisoq, taamaattorli tassanngaannartumik annaasaqaraanni tamanna aliasuutaasarpoq. Ingammillu meeqqamik annaasaqaruit meeraqaraannilu allanik taakku toqungasoq taarsersinnaanngilaat.
2 Annaasaqarutta tuppallersaat piviusoq, tassa Guutip neriorsuutai tunngavigalugit tuppallersaat, iluaqutigissavarput. Aamma allat misiginneqataanerat pisariaqartipparput. Rwandami inuit tamanna misigisimavaat, ilaatigut ilaqutariit Jehovap nalunaajaasuusut hundredelikkuutaat inuit naggueqatiginngisanik toqoraapilunneranni asasaminnik annaasaqartut. Aliasuttut tamarmik suna tuppalliutigisinnaavaat?
Jehova — Guuti tuppallersaasoq
3. Jehova qanoq ililluni tuppallersaanikkut maligassaalluarpa?
3 Jehova tuppallersaanikkut maligassaalluarpoq. Ernitui Jesus Kristus nunarsuarmut aallartissimavaa tuppallersaammik neriuummillu ataavartumik tuniumalluta. Jesus ima oqarsimavoq: ’Guutip silamiut ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ (Juánase 3:16) Aamma malinnitsini ima oqaluttuuppai: ’Asanninneq tamanit anneq tassa ikinngutini pillugit inuunini iperaraanni.’ (Juánase 15:13) Ilaannilu ima oqarsimavoq: ’Soorlumi inuup ernera tikiutinngitsoq kiffartorfigeqqulluni, kisianni kiffartussalluni inuuninilu akissatut tunniussallugu amerlasuut utertinneqaatissaannik.’ (Matîuse 20:28) Paulusilu ima nalunaarsimavoq: ’Guutip asannissutsi uatsinnut nalunarunnaarsippaa, suli ajortuliortilluta Kristusip toqussutigimmatigut.’ (Rûmamiut 5:8) Allassimaffiit taakku allallu ikiortigalugit Guutip Jesusillu asanninnerat paasivarput.
4. Apustili Paulusi qanoq ililluni Jehovamit pisassarinngisaraluaminik ajunngitsuliorfigineqarsimava?
4 Apustili Paulusip Jehovap ajunngissusia pisassarinngisaraluaq malugisimavaa. Anersaakkut toqungasutut pissuseqarsimagaluarluni, Kristusip malinnittaanik ingasattumik malersuisuusimalluni, nammineq kristumiunngorsimavoq malersugaasoq. (Evfisumiut 2:1-5) Misigisimasani ima allaatigai: ’Uangami apustilini nikanarnersaavunga apustilimik taaneqarneq qinngaqqukkaluarlunga Guutip ilagiissai qinugisimagakkit. Guutilli saammaanneragut taamaappunga soorlu ittunga, saammaanneralu uannut pilussinnanngilaq; taakkunanngali tamanit annermik sulisarpunga; naalli uanga pinngitsunga, kisianni Guutip saammaannera najortigisara.’ — 1 Korintumiut 15:9, 10.
5. Paulusip tuppallersaat Guutimeersoq qanoq allaatigisimavaa?
5 Taamaattumik naleqqulluarpoq Paulus ima allassimammat: ’Unnersiutigineqarli Guuti Naalakkatta Jesusip Kristusip Ataataa, Ataataq nallittuisoq Guutilu tamanik tuppallersaasoq, taassuma annikilliutivut tamaasa pillugit tuppallersarpaatigut, nalinginnarnik annikilliuutillit uatsinnut tuppallersaammik Guutip uatsinnut tuppallersaatigisaanik tuppallersarsinnaanngortillugit. Soorlumi anniaatit Kristusip atugai uatsinnut nalliungaartartut, taamattaaq Kristusikkut tuppallersarneqangaarpugut. Annikillisaraangattali taamaalisarpoq ilissi tuppalliutissassinnik annassutissassinnillu, aamma tuppallersarneqaraangatta taamaalisarpoq ilissi tuppalliutissassinnik ima sunniisartumik anniaatit anniaatigisatsitut ittut artornarunnaarsillugit. Ilissilu pillusi neriunnerput aalajaappoq, ilisimagatta soorlu anniartut ilagigaasi, taamattaaq tuppallersarneqartut ilagissagaasi.’ — 2 Korintumiut 1:3-7.
6. Griikerit oqaasiat „tuppallersaat“-mik nutserneqartartoq qanoq isumaqarpa?
6 Oqaatsit ilumut uppernikkut nakussatsinnarput! Griikerit oqaasiat manna ’tuppallersarneqarneq’-mik nutserneqarsimasoq isumaqarsinnaavoq ’ilaaqqusineq’. Tassa imaappoq, „alla misilinneqangaartillugu kajumissaarniarlugu saniani qeqarneq“. (A Linguistic Key to the Greek New Testament) Biibilimik ilisimatooq ima allassimavoq: „Oqaaseq misiginneqataanermit isumaqarnerungaarpoq. . . . Kristumiutut tuppallersaaneq tassaavoq sapiillisitsineq, inuunermi ajornartorsiutinik tamanik atugaqarsinnaatitsineq.“ Tassaavortaaq neriuutissaq piviusoq — tassa toqusimasut makinnissaannik neriuutissaq — tunngavigalugu oqaaseqarneq.
Jesus Paulusilu — tuppallersaasut misiginneqataasut
7. Paulusip qatanngutini kristumiuusut qanoq tuppallersartarsimavai?
7 Paulus tuppallersaanermini maligassaalluarsimavoq! Qatanngutit Thessalonikamiittut ima allaffigisinnaasimavai: ’Kisianni saamalluta akornassinniippugut; soorlu arnap qitornani milutsittarai, taama asangaarlusi nuannarisaqarpugut aviffigiumallusi, Guutip iivangkiiliuinnaanik pinnata, inuunitsinnilli allaat, tassa uatsinnut asanarsigassi. Taamattaaq ilisimavatsigut qanoq tamassi immikkut oqaaqqissaartarissi tuppallersartarlusilu, soorlu ataataasup qitornani pisarai.’ Soorlu angajoqqaat asannillutillu isumassuisartut tamatta pisariaqaraangat allat paasinninnermik misiginneqataanermillu iliorfigisinnaavavut. — 1 Tásalûníkamiut 2:7, 8, 11.
8. Sooq aliasuttut Jesusip ajoqersuutai tuppallersaatigisinnaavaat?
8 Paulusip taama isumassuitiginermigut misiginneqataanermigullu maligassani Jesus malinniaannarsimavaa. Eqqaamajuk Jesusip kikkunnut tamanut misiginneqataalluni qaaqqusinera Matîuse 11:28-30-mi allassimasoq: ’Ornissinga tamassi erloqisusi nanertugaasusilu, qasuersissavassi. Nammaatara ilissinnut pisissiuk ilinniarfigalungalu, qanilaarama uummatikkullu makitajuikkama; taava tarnissinnut qasuerfissarsiumaarpusi. Nammaatarami iluaqaaq, nammakkiussaralu oqeqaluni.’ Aap, Jesusip ajoqersuutai nutaannguallatsitsisuupput neriuutissamik imaqaramik — makinnissamik neriuummik. Inuit taama neriuutissaqalersissinnaavavut, assersuutigalugu atuagassiaaqqamik Asasamik toqusoqaraangat . . .-mik tunigaangatsigik. Neriuut tamanna tamatta iluaqutigisinnaavarput, allaat sivisuumik aliasukkaluarutta.
Aliasuttut qanoq tuppallersarneqarsinnaasut
9. Aliasuttut sooq erinitsaffigissanngilavut?
9 Asasamik toqusoornerup kinguninnguatiguinnaanngitsoq aliasuttoqartarpoq. Inuit ilaat inuunertik naallugu aliasuttarput, ingammik meeqqamik annaasaqarsimasut. Spaniami aappariit kristumiut aalajaatsut 1963-imi ernertik 11-nik ukiulik meningitis pissutigalugu annaasimavaat. Ulloq manna tikillugu ernertik Paquito eqqartoraangamikku qullilisarput. Ullorsiorfiit, assilissat tammajuitsullu alianartunik eqqaamasaqalersitsisinnaapput. Taamaattumik erinitsalluta isumaqassanngilagut allat aliasunnertik qaangertariaqaleraluaraat. Nakorsaanermik ilisimasalik ima nassuiaavoq: „Isumatsangaarsimaneq misigissutsikkullu patajaneq ukiuni arlalinni atasinnaapput.“ Aap, soorlu timimi qileqqut inuuneq naallugu atasinnaasut misigissutsikkut qileqqut aamma taamaassinnaapput.
10. Aliasuttut ikiorniarlugit qanoq iliortariaqarpugut?
10 Kristumiut ilagiissaanni aliasuttut tuppallersarniarlugit atoriaannaasunik sunik iliuuseqarsinnaavugut? Immaqa ikiuerusulluta qatanngut tuppallersarneqartariaqartoq oqarfigaarput: „Arlaannik ikiortariaqaruit oqaannassaatit.“ Ilimanarpali qimagaasup uagutsinnut sianernissaa oqarlunilu: „Ikioqqugaluarpunga“? Tassa uagut siulliulluta iliuuseqartariaqarpugut aliasuttumik ikiuillutalu tuppallersaassagutta. Qanoq iliorsinnaavugut? Siunnersuutit atoriaannaasut ilaat matuma kingulianiipput:
11. Uagut tusarnaarutta allat qanoq tuppallersaatigisinnaavaat?
11 Tusarnaarit: Aliasuttumut iluaqutaanerpaasunut ilaavoq tusarnaarnikkut aliasoqatiginninneq. Taamaattumik aperigit: „Oqaluusererusuppiuk?“ Aliasuttoq aalajangiisiguk. Angut kristumiu ataatami toqunera pillugu ima oqaluttuarpoq: „Iluaqutigisimaqaara qanoq pisoqarsimanera allat apeqqutigigaangassuk akissutinnullu tusarnaaqqissaaraangata.“ ’Tusarasuarlutit pigit,’ Jakob taama siunnersuivoq. (Jâko 1:19) Taamaattumik naammagittarlutit misiginneqataallutillu tusarnaarit. ’Qiasut qiaqatigisigik,’ Biibilimi Rûmamiut 12:15-imi taama allassimavoq. Eqqaamajullu Jesusip Marta Marialu qiaqatigigai. — Juánase 11:35.
12. Aliasuttut sumik tuppallersarsinnaavavut?
12 Imminut avoqqaarinerit assortukkit: Eqqaamajuk aliasuttoq immaqa imminut pisuutilluni misigisoq, eqqarsaatigalugulu iliuuseqarnerusinnaasimagaluarluni. Qularnaatsumik paasitiguk sapinngisani tamaat iliuuseqarsimasoq (imaluunniit arlaannik ajunngitsumik ilumoortumillu nalunngisannik oqarfigiuk). Oqarfigiuk misigissusii pissusissamisoortuusut. Assingusumik annaasaqarsimalluni qaangiisimasumik nalunngisannik oqaluttuuguk. Allatut oqaatigalugu misigissuseqarluarlutit misiginneqataaniarit. Inussiarnersumik ikiuinerput pingaaruteqangaarsinnaavoq! Salomon ima allassimavoq: „Puugutaasat sølviusut iipiliusartaattut kuultiusut ipput oqaatsit oqaaserineqarfissamikkut oqaaserisat.“ — Ussatit 16:24; 25:11; 1 Tásalûníkamiut 5:11, 14.
13. Ikiuinissatsinnut piareersimagutta qanoq iluaqutaasinnaava?
13 Ikiuinissannut piareersimajuaannarit: Ulluni siullerni marlussunni ikinngutit qanigisallu amerlasuut najuuffigisaanniinnaanngitsoq, aammali qaammatini tulliuttuni allat ulluinnarni sammisartakkaminnut utereerneranni ikiuinissannut piareersimajuaannarit. Inunnut assigiinngitsunut aliasunneq assigiinngitsumik sivisussuseqartarpoq. Pisariaqartinneqaraangat kristumiutut soqutiginninnerput ikiuinerpullu pingaaruteqartorujussuusinnaapput. Biibilimi allassimavoq „ikinngutaasoqartartoq qatanngummit tatiginarnerusunik“. Taamaattumik ussat manna „annikilliulerfimmi kikkut ikinngutaalluartuusut aatsaat nalunarunnaartarput“ eqqarsaatigalugu uagut taamaattariaqarpugut. — Ussatit 18:24; naleqqiuguk apustilit suliait 28:15.
14. Aliasuttut tuppallersarniarlugit suut oqaloqatigiissutigineqarsinnaappat?
14 Aamma piffissami naleqqulluartumi iluaqutaasorujussuusinnaavoq toqusimasup inuttut ajunngitsumik pissusii eqqartoraanni. Misigisimasat nuannersut taanna pillugu eqqaamasatit oqaluttuarikkit. Nangaanatit toqusimasup atia atortaruk. Asasaq toqusimasoq inuusimanngisaannartutut ilersillugu qisuariaqinak. Harvard Medical Schoolimiit naqitikkami tuppallernartumik ima allassimavoq: „Qimagaasup toqungasoq aliasuppallaarnani eqqarsaatigisinnaanngoraangagu pitsanngoriartoqartarpoq . . . Piviusut akuerineqaleriartortillugit aliasunneq eqqaamasanit erlinnartunit taarserneqartarpoq.“ „Eqqaamasat erlinnartut“ — ila, tuppallernarmat asasamik najortiginninneq eqqarsaatigigaanni! Nalunaajaasoq ukiualuit matuma siornatigut ataataminik annaasaqarsimasoq ima oqarpoq: „Pingaartumik eqqaamavara ataataga ilagalugu Biibilimik atuartarnera taassuma sallusuissut atuaqqissaaleqqaarmagu. Aamma eqqaamavara kuup sinaaniilluta ajornartorsiutima ilaat oqaloqatigiissutigalugit. Ukiut pingasut sisamalluunniit allortarlugit aatsaat takusarakku piffissat tamakku erlinnartuupput.“
15. Ikiuiniarluta nammineq qanoq iliuuseqarsinnaavugut?
15 Naleqquttumik nammineq iliuuseqarit: Aliasuttut ilaat allanit iluatsitsinerusarput. Taamaattumik pisariaqartitsineq malillugu ikiuunniarlutit nammineq iliuuseqarit. Nalunaajaasoq aliasuttoq ima oqaluttuarpoq: „Amerlasuut ima oqartarput: ’Arlaannik ikiortariaqaruit oqaannassaatit.’ Qatanngulli arnaq kristumiu aperinngilarluunniit. Oqarfigineqanngivilluni sinittarfimmut iserpoq oqorutillu qalii siniffimmit peerlugit, errorneqarnissaallu isumagalugu. Allap ipertaajaassutissaminik piareersaariarluni natersuaq uima meriarfigisimasaa asappaa. Taakkuupput ikinngutit ilumoortut, puiunngisaannassavakka.“ Pisariaqartitsinivimmik takusaqaruit iliuuseqarit — igallutit, asaallutit kiffartuussillutilluunniit. Soorunami aliasuttoq ilaginnarneqarusuppat akornusersussanngilarput. Paulusip oqaasii maleruaqqissaartariaqarpavut: ’Taava Guutip qinigaasut iluartutut asanartutut atiniarsigik imaattut: nallittuingaarneq avaaginninnerlu nikanartinnerlu qanilaarnerlu kamajuinnerlu.’ Inussiarnissuseq, kamagittarneq asanninnerlu soraarnavianngillat. — Kulorsamiut 3:12; 1 Korintumiut 13:4-8.
16. Allakkat qanoq ilillutik tuppallernarsinnaappat?
16 Allagit: Misiginneqataalluni allagaqarnerup naleqassusia arajutsineqarajuttarpoq. Qiimmassaataasumik allagaqarneq qanoq iluaqutaasarpa? Atuaqqittuarneqarsinnaapput. Allakkat takisuujusariaqanngillat, allakkalli misiginneqataanermut ersiutaasariaqarput. Anersaakkut ittunik imaqartariaqarput oqaluusserpaluppallaarnatilli. Tunngaviusumik ima nipeqarpata: „Maaniippugut ikiuinissatsinnullu piareersimavugut“ tuppallernarsinnaaqaat.
17. Qinuneq qanoq tuppallernarsinnaava?
17 Aliasuttoq qinoqatigisaruk: Aliasuttumik qinnussinerit qinoqateqarnerillu naleqassusiat suusupagineqassanngilaq. Biibilimi Jâko 5:16-imi allassimavoq: ’Iluartup qinnutaa ilungersoruni kimittoqaaq.’ Immaqa qinnukkit tusaruniuk misigissutsit nuanniitsut soorlu imminut pisuutinneq ajugaaffigiuminartinnerussavai. Sanngiikkaangatta Satanip ’qoqassiiniarluni’ imaluunniit peqqusersiorluni ajoquserniartarpaatigut. Taamaattoqartillugu qinunikkut tuppallersarneqarnissarput pisariaqartittarparput, soorlu Paulusip eqqartoraa: ’Torlulasaraangassi qinusaraangassilu tamatigut anersaakkut qinuttuinnarlusi, eqqumaniarlusilu tamannarpiaq pissutigalugu, tamatigut qasusuillusi iluartullu tamaasa qinnullugit.’ — Evfisumiut 6:11, 18. Naleqqiuguk Jâko 5:13-15.
Qanoq iliussanngitsugut
18, 19. Oqaloqatigiinnikkut qanoq ililluta pissuserissaarsinnaavugut?
18 Aliasuttoqaraangat aamma qanoq iliortariaqanngitsugut eqqumaffigisariaqarparput. Ussatit 12:18-imi ima mianersoqqussuteqarpoq: „Eqqarsariaqqaarnani oqaaserisat panatut kapisisarput, sianisuulli oqaasii katsorsaataasarput.“ Ilaannikkut nalugaluarlugu pissuserissaanngitsoortarpugut. Immaqa ima oqarpugut: ’Paasisinnaavara qanoq misigisutit.’ Ilumulli paasivarput? Taassumatut annaasaqarsimanerpugut? Inuillu assigiinngitsumik qisuariaaseqartarput. Immaqa allat illit misigisimanittorluinnaq misiginngillat. Pitsaaneruvoq ima oqaruit: „Misigeqatigaakkit, uangattaaq asasannik annaasaqarsimagama.“
19 Qajassuussissagutta toqusimasoq makitinneqassanersoq makitinneqarsinnaassannginnersorluunniit oqaaseqarfigissanngilarput. Qatanngutit ilaat narrujuummisinneqangaarsimapput aapparmik uppinngitsup makitinneqarsinnaanissaanik ajorisaasumik oqaaseqartoqarmat. Uagut kikkut makissanersut makissannginnersulluunniit aalajangissanngilarput. Tatigisinnaavarput Jehova uummatinik misissuisoq amerlanersatsinnit naakkinninnerungaassasoq. — Tussiaat 86:15; Lúkarse 6:35-37.
Allassimaffiit tuppallernartut
20, 21. Allassimaffiit suut aliasuttut tuppallersaatigisinnaavaat?
20 Piffissamut naleqqulluartumut Jehovap toqusimasut pillugit neriorsuutaasa eqqarsaatigineqarnissaannik kajumissaarut iluaqutaasorujussuussaaq. Aliasuttoq nalunaajaasooreerpat oqaluussinermiluunniit naammattuugaappat eqqarsaatit tamakku Biibilimi allassimasut atorluarsinnaavavut. Allassimaffiit suut assersuutigisinnaavavut? Nalunngilarput Jehova Guutiusoq tuppallersaasoq, ima oqarmat: „Uanga kisima tuppallersaasigaassinga“ aamma „Soorlu anaanaasup qitornani tuppallersartaraa, taamatut uanga tuppallersassavassi“. — Jesaja 51:12; 66:13.
21 Tussiaasiortoq ima allassimavoq: „Tuppallersaatigaara atugarliorninni oqaatsivit inuuinnartimmannga. Eqqaamavakka itsarsuarmit inassutitit tuppallersaatigisarlugillu, [Jehova]. Ilumoorsutsit tuppallersaatiginaara uannut oqaatsit malillugu.“ Malugiuk allassimaffinni tamakkunani oqaaseq ’tuppallersaat’ arlaleriarluni atorneqarmat. Aap, piffissani atugarliorfiusuni maanna inuuffigissatsinni uagut allallu Jehovap oqaasii tuppallersaatigilluarsinnaavavut. Tamakku aamma qatanngutitta misiginneqataanerat ikiortigalugit annaasaqarsimanerput aliasuutivullu naammagalugit atorsinnaavavut kristumiutullu kiffartuussineq peqataaffigilluarlugu inuunerput imaqartissinnaallugu. — Tussiaat 119:50, 52, 76.
22. Sumik neriuutissaqarpugut?
22 Aliasunneq qaangeriartortillugu allat ikiorlugit ulapikkaanni iluaqutaassaqaaq. Allat tuppallersarniarlugit iliuuseqaraangatta, pilluarneq piviusoq anersaakkut tunisinerup nassataanik misigisarparput. (apustilit suliait 20:35) Makinnissaq pillugu neriuut inunnut allanut oqaluttuariniartigu. Taamanikkussamut inuit inuiaqatigiinnit tamaneersut kinguaariikkuutaarlutik asasatik toqusimasunit silarsuassami nutaami inuunissamut tikilluaqqussavaat. Ila, neriuut nuanningaarmat! Aap, taamanikkussamut nuannaarnermit qullilissaagut, Jehova tassaammat Guuti „nikallortunik tuppallersitsisoq“! — 2 Korintumiut 7:6. (wE 1/6 95)
Eqqaamavigit?
□ Jehova qanoq ililluni Guutiua ’tamanik tuppallersaasoq’?
□ Jesusip Paulusillu qanoq ilillutik aliasuttut tuppallersartarsimavaat?
□ Aliasuttut tuppallersarniarlugit qanoq iliorsinnaavugut?
□ Aliasuttoqaraangat qanoq iliortariaqanngilagut?
□ Annaasaqarnermi allassimaffiit suut pitsaanerutippigit?
[Qupp. 16-mi assiliartaq]
Aliasuttut ikiorniarlugit naleqquttumik nammineq iliuuseqarit