Upperisarsiorneq pillugu oqaloqatigiinneq qanoq iluaqutaasinnaava?

ANGAJOQQAAT pissangallutik meeraaraatimik perngaammik oqarnissaa utaqqisarpaat. Meeraaraq oqalungussarluni uteqattaarileraangat, soorlu oqartarluni ’Naana’ imaluunniit ’Taata’, nuannaarluinnaleraraat. Tamannalu ikinngutiminnut sanilimminnullu oqaluttuaripallattarpaat. Ilami meeraaqqap oqaasii siulliit tassaapput nutaarsiassat nuannersut.

Meeraaqqap tusaasani, isigisani malugisanilu tamaasa qisuariarfigisarpai. Soorunami meeqqat assigiimmik qisuariarneq ajorput. Meeqqalli sunnertinnini qisuariarfigineq ajorpagit angajoqqaavi pissutissaqarluarlutik isumakululissapput eqqarsarlutik meeraq pissusissamisut ineriartunnginnersoq.

Naalungiarsuit inuit ilisarisimasatik qisuariarfiginerusarpaat. Anaanaasup eqippani naalungiarsuk qungujussaaq. Qanigisaasulli pulaartup attorpani immaqa qialissaaq taassumanngalu tigoqqunngivilluni. Qanigisaasut tamanna misigereeraluarlugu qularnanngitsumik kingusinnerusukkut misileqqissavaat. Naalungiarsuup qanigisaasut ittooriunnaariartortillugit toqqissinerujartussaaq, qungujulaffiginerujartussavaalu.

Taamatuttaaq inersimasut amerlasuut upperisartik inummut ilisarisimalluanngisaminnut oqaloqatigiissutigissallugu nangaassutigisarpaat. Paasisinnaasanngilaat sooq namminneq kisimik susassarisartik — upperisarsiorneq — pillugu takornartap oqaloqatiginiassagaatik. Taamaattumik Pinngortitsisoq pillugu oqaluussiniartut oqaloqatigiumasanngilaat. Allaat inuiaat tamarmik inunnguutsiminni pissuserisaat, pallorfiginnerusussuseq, oqaloqatigiissutigerusuttanngilaat.

Kisianni Pinngortitsiserput pillugu ilinniarusussuseqartariaqarpugut, aatsaallu allat oqaloqatigigutsigik ilinniarsinnaanissatsinnut periarfissaqassaagut. Taamaappoq Guutip attaveqatigiinneq atortoriuarsimammagu. Tamanna paasiniariartigu.

’Tusarlisigit ilikkarsinnaaqqullugu’

Inuk siulleq Guutip attaveqatigisimasaa tassaavoq Adam Edenip naatsiiviani. Ajortulioreerlutilli Guutip oqaloqatigiumallutik qaaqqummatik Adam Evalu toqqorsimapput. (1 Moses 3:8-13) Aammali angutit arnallu Guutimit attaveqatigineqarusussusillit Biibilimi oqaluttuarineqarput.

Guutip Noa attaveqatigisimavaa silarsuup ajortup taamanikkut ittup aserornissaa pillugu, Noalu taamaalilluni tassaalersimavoq ’iluarnermik oqaluussisoq’. (2 Pîtruse 2:5) Guutip oqaaseqartitaatut Noap takutissimavaa Guutip qanoq iliornissaa upperalugu aammalu inunnut takutissimavaa Jehovamut illiuttuulluni. Inuilli qanoq qisuariarpat? Ajoraluartumik inoqataasa amerlanersaasa ’paasiumanngilaat, aatsaalli ulersuaq nalliummat tamaasa nungutillugit’. (Matîuse 24:37-39) Uagulli qujamasuutigisinnaavarput Noap ilaqutai arfineq-marluk tusarnaarlutik Guutip iliuusereqqusai naalallugit ulersuaq anigorsimammassuk. Ullumikkummi inuusut tamarmik taakku siuaasaraat.

Kingusinnerusukkut Guutip inuiaat Israelikkut attaveqarfigilerpai. Taakku Moses aqqutigalugu Guutip inatsisinut qulinut ilanngullugit inatsisinik 600-t missaanniittunik maleruartariaqagaannik tunivai. Jehovap Israelikkut inatsisinik taakkuninnga tamanik maleruaanissaat naatsorsuutigaa. Moses nalunaarpoq ukiut arfineq-aappassaat tamaasa tupiusaliorfiup nalliussineqarfiani Guutip inatsisai atuffassissutigineqartassasut. „Inuit, tassa angutit arnallu meeqqallu nunasisullu illoqarfissinni najugaqartut, katersortissigit,“ taama peqqusivoq. Sooq? „Inatsisit tusarlisigit ilikkarsinnaaqqullugu Jehovap Guutimik mianerinissaa pingaartissinnaaqqullugulu peqqussutit inatsisini makkunaniittut tamarmik maleruarnissaat.“ Tamarmik tusarlutillu ilikkartariaqarput. Takorlooriaruk tusarsimasamik oqaloqatigiissutiginissaat qanoq nuannaarutigisimatigissagaat! — 5 Moses 31:10-12.

Ukiut 500-t sinnerlugit tamatuma kingorna Judakkut kunngiata Josafatip Levikkuusut atorfilittamilu ilaat aaqqissuussiffigai Jehovamik pallorfiginninneq minguitsoq atuutilerseqqinniarlugu. Angutit taakkua Judakkut illoqarfii tamaasa tikeraarpaat inuit Jehovap inatsisaanik ajoqersorlugit. Inatsisit tamakku inuit tutsaanni oqaloqatigiissutigineratigut kunngip takutippaa pallorfiginninneq ilumoortoq qunusuilluni tapersersorlugu. Innuttaasullu tusarnaartariaqarlutillu ilikkartariaqarput. — 2 Israelikkut 17:1-6, 9.

Oqaloqatigiinnikkut nalunaajaaneq

Guutip ernitui Jesus oqaaseqartitamisut nunarsuarmut aallartissimavaa. (Juánase 1:14) Ajoqersukkat ilaat pingasut takorruuinikkut Jesusimik allatut isikkoqalersumik takunninnerminni Guuti ima oqartoq tusarpaat: ’Tassa ernera asanartoq nuannarisara; taanna tusarsiuk.’ (Matîuse 17:5) Pitseriarlutik naalappaat.

Taamatuttaaq Jesusip ajoqersukkani Guutip siunertaanik allanut oqaluusseqquai. Toqunini qaammatit arfinillit missaannik sioqqullugu Jesus nalunaarpoq qilammiup naalagaaffianik oqaluussissutiginninnissaq annertoqimmat ajoqersukkat amerlanerusut pisariaqartut. Taakkua ilaat 70-it Guutip naalagaaffia pillugu allanut oqaluussinissaannik ajoqersorpai taavalu oqaluussiartoqqullugit aallartillugit. (Lúkarse 10:1, 2, 9) Qilammut Ataataminut uternissami siuninnguagut Jesusip malinnitsini kajumissaarpai tusarliussaq tamanna pillugu allat oqaluussiffigeqqullugit, ima peqqusilluni: „Taamaattumik aallaritsi inunnillu inuiannit tamaneersunik ajoqersuganngortitsigitsi, . . . ajoqersorsigillu ilissinnut peqqusakka tamaasa maleruaqqullugit.“ (Matîuse 28:19, 20, NV) Ullumikkut silarsuaq tamakkerlugu kristumiut ilumoortut Guutip naalagaaffianik nutaarsiassaq nuannersoq inoqatiminnut oqaloqatigiissutigalugu peqqussut tamanna maleruarpaat. Taamaalillutik Pinngortitsisoq Jehova pillugu sallusuissut nalunaajaatigisarpaat. — Matîuse 24:14.

Eqqissinartumik ineriartornartumillu oqaloqatigiinnerit

Jesusip ajoqersugaasa qanoq ilillutik upperisartik allanut oqaloqatigiissutigisartussaasimavaat? Akerlilersuisunik puffassaarisussaanatillu oqqateqateqartussaasimanngillat. Nutaarsiassamilli nuannersumik ilassinnikkumasut ujartussaavaat, taavalu Allakkat tunngavigalugit tusarliussamut uppernarsaatit takutillugit. Soorunami Guutip maluginiassavaa inuit qanoq ernermi ajoqersugaanut qisuariassanersut, soorluttaaq Jesus oqarsimasoq: ’Ilissinnik ilassisup uanga ilassivaanga, uannillu ilassisup aallartitsisiga ilassivaa.’ (Matîuse 10:40) Jesusip nalaani inuusut amerlanersaasa taassuma tusarliussaa itigartissimammassuk ingasak!

’Naalakkamut kiffaasoq assuarisassarsiorajussanngilaq,’ apustili Paulus taama unnersuussivoq. ’Tamanulli inussiarnersuussaaq ajoqersuineq sapinngitsuulluni, ilalaarsinnaallunilu naalliukkuni; oqaatseriitsullu qanilaarluni ajoqersorniassavai Guutip qaqugu allamik isumataartikkumaarnerai sallusuissummik ilisarsilersillugit.’ (2 Timûtiuse 2:24, 25) Paulusip Grækenlandimi Athenimiunut nutaarsiassamik nuannersumik oqaluusseriaasia maligassaalluarpoq. Juutit naalagiartarfianni taakku eqqarsalersinniarlugit oqaloqatigisarsimavai. Ullut tamaasa tuniniaasarfimmi ’naapitani oqaloqatigisarsimavai’. Qularnanngitsumik taakkua ilaat sumik nutaamik tusarusuinnaraluarput, Paulusilli ersarissumik inussiarnersumillu oqaluffigisarsimavai. Guutip tusarliussaa isumataarnissamut kajumissaarutaasoq tusarnaartiminut oqaloqatigiissutigisarsimavaa. Taamanikkut inuit ullumikkut amerlanersaattut qisuariartarsimapput. ’Ilaasa tissigaat, ilaalli oqarput: „Tamatuminnga tusaqqikkumaarpatsigit.“’ Paulusip oqaloqatigiissutertik nanginniarlugu kimigiiserfiginngilai. Tusarliussassani tusarliutereeramiuk ’akornannit aallarsimavoq’. — apustilit suliait 17:16-34.

Kingusinnerusukkut Paulusip kristumiut ilagiissaanni Efesusimiittuni ilaasortaasut ilaat oqaluttuuppai ’qanoq sumik iluaqutaasumik nipangiussaqarnani, tamaasali taakkununnga oqaatigigini ajoqersorlugillu inuit tutsaanni [illumiillu illumut, NV]’. Aamma ’juutit griikerillu nalunaajaaffigisimavai Guutimut allamik isumataarnissamik uppernissamillu naalakkamut Jesus Kristusimut’. — apustilit suliait 20:20, 21.

Assersuutit tamakkua Biibilimeersut takutippaat Guutip kiffaasa aalajaatsut taamani inuusut upperisarsiorneq oqaloqatigiissutigisarsimagaat. Ullumikkuttaaq Jehovap nalunaajaasuisa peqqussummut naalallutik inoqatitik upperisarsiorneq pillugu oqaloqatigisarpaat.

Oqaloqatigiinnerit kinguneqarluartut

’Guutip oqaasii tusarsigik.’ ’Peqqussutai tusarniarsigik.’ Biibilimi taamatut kajumissaaruterpassuaqarpoq! Kajumissaarutit tamakku maleruarsinnaavatit Jehovap nalunaajaasuisa tullianik saaffigippatsit. Ilinnut tusarliussaat Biibilimeersoq tusarnaarniariuk. Tusarliussaq tamanna naalakkersuinermut tunnganngilaq Guutilli naalagaaffia qilammeersoq pingaarnerutinneqarpoq. Guutip Naalagaaffik tamanna sakkugalugu ullumikkut assortuunnernut pissutaasut tamaasa piiassavai. (Daniel 2:44) Taava Guutip qilammit naalakkersuineratigut nunarsuaq tamarmi paratiisinngortinneqassaaq, soorlu itsaq Edenip naatsiivia taamaassimasoq.

Politiitut pinerluttorsiortutut atorfeqarsimasoq Jehovap nalunaajaasuinik Biibili pillugu oqaloqateqarusunneq ajorsimavoq. Pinerluttuliornerilli amerliartuinnarmata inuuneq pillugu isumakuluttalersimavoq. Taamaattumik tullianik nalunaajaasunit pulaarneqarami oqarsimavoq Biibilimi tusarliussamut uppernarsaatissanik misissuerusulluni. Akuttunngitsumik oqaloqatigisalerpai. Naak politeeq arlaleriarluni allamut nuuttaraluartoq nalunaajaasut ujarlugu nanisarpaat oqaloqatigisartuarlugulu. Kiisamilu politeeq ima nassuerpoq: „Uppernarsaatit ujakkakka tamatigut Biibilimi nassaassaapput. Nalunaajaasut qasujuillutik oqaloqatiginiartarsimanngippannga suli nalussagaluarpara inuuneq sumik siunertaqarnersoq. Sallusuissut ilikkarpara inuunermalu sinnera atorniarpara inuit uanga iliorsimanittut Guutimik ujarlersut naniniarlugit.“

Inuit soqutiginnittut paasisaqarnerorusuttarput. Eqqortumik iliorlutik isummanut saqqummiunneqartunut uppernarsaatinik takorusuttarput. (1 Pîtruse 3:15) Soorlu meeraaqqap angajoqqaani apersortarai akineqarnissani ilimagalugu, illittaaq ilimagisinnaavat nalunaajaasut akilluassagaatsit. Aap, qularissanngilat nuannaarutigalugu uteqqikkumaartut Biibilimilu tusarliussaq ilinnut oqaloqatigiissutigeqqillugu.

Immaqa Biibili pillugu paasisaqalaareeraluarputit. Immaqa paasereersimavat Guutip piumasaatut iliussaguit inuunerit allanngortittariaqarlugu. Paasisaqarnerunissannulli nangaassuteqassanngilatit isumaqarlutit Guutip piumasaqaatai annertuallaartut. Pilluarnissamik piviusumik nassataqaannassapput. Siumukariartortillutit tamanna paasilissavat.

Siullermik eqqarsaatigissavatit Jehova kinaanersoq, sumik piumasaqarfigigaatit aammalu neqeroorutigisai suusut. Nalunaajaasut apereriakkit Biibilimi tamakku pillugit qanoq allassimasoqartoq. Akissutaallu nammineq biibiliutinni allassimasunut naleqqiuttakkit. Paasilerukku nalunaajaasut upperisarsiorneq pillugu sallusuissutitut saqqummiussaat ingasaassinianngitsuusoq qularnanngitsumik kissaatigilissavat nuannersorpassuit ilinnut Allakkanit takutissinnaasaasa misissornerunissaat. — Ussatit 27:17.

Nalunaajaasut najukkanniittut ataatsimiittarfianni, Naalagaaffilersaartarfianni, nammineq isinnik qimerlooriartornissaannut tikilluaqqusaavutit. Tassani Guutip oqaasii pillugit oqaloqatigiinnerit ineriartornartut tusarnaarsinnaavatit. Takujumaarpat najuuttut Guutip siunertai pillugit oqaloqatigiinneq qanoq nuannaarutigisaraat. Nalunaajaasut taakku Guutip ullumikkut uatsinnut piumasaa pillugu sallusuissummik ilinniarnissannik ikiuinissaannik akuerikkit. Pallorfiginninnerup ilumoortup oqaloqatigiissutigineqarnissaanik Guutip kajumissaarutaa ilassiuk taassumunnga iluarisaaqqullutit allaallu nunarsuarmi paratiisissami naassaanngitsumik inuusinnaaqqullutit. — Malaki 3:16; Juánase 17:3. (wE 1/4 1995)

[Qupp. 5-mi assiliartaq]

Noa Guutip siunertaa pillugu ammasumik oqaluttarpoq

[Qupp. 7-mi assiliartat]

Soorlu Paulus Athenitoqqami iliorsimasoq Jehovap nalunaajaasuisa sallusuissut Biibilimeersoq allanut oqaluussissutigisarpaat