Inuiaat assuarnaassutsiminnik attassiuartut

„Isaaffii ammarsigit isaasinnaaqqullugit inuiaat iluartut, ilumoornermik aalajangiussisut.“ — JESAJA 26:2.

1. „Inuiaat iluartut“ pillugit Esajasip nalunaarutaa sooq tupaallannarsinnaava?

ULLUMIKKUT inuiaat assigiinngitsorpassuupput. Ilaat inuit kikkulluunniit oqartussaaqataaffigisinnaasaannik naalakkersuisoqarput, ilaalli kisermaassilluni naakkittaatsumik naalakkersuisoqarlutik. Ilaat pisuujupput, ilaalli piitsuullutik. Tamarmilli ataatsimik assigiissuteqarput: Tamarmik silarsuarmut Satanimik guuteqartumut ilaapput. (2 Korintumiut 4:4) Tamanna eqqarsaatigalugu inuit ilaasa Esajasip oqaasii uku immaqa tupaallaatigissavaat: „Isaaffiit ammarsigit isaasinnaaqqullugit inuiaat iluartut, ilumoornermik aalajangiussisut.“ (Jesaja 26:2) Inuiaat iluartut, imaluunniit naapertuilluartut? Aap, inuiaat iluartut taama ittut piunerat siulittuummi tikkuarneqarpoq. Inuiaat nalinginnaanngitsut taakku qanoq ililluni kinaassusersineqarsinnaappat?

2. Inuiaat iluartut kikkunuku? Qanoq ililluta kinaassusersisinnaavavut?

² Ny Verden-nutsikkami Jesaja 26:2-mi oqaatigineqarpoq „aalajaatsumik pissuseqarnerminnik attassiinnartut“. King James Version-imi nutserneqarsimavoq „inuiaat naapertuilluartut ilumoornermik aalajangiussisut“. Nutserneri taakku tamarmik naleqqupput. Tassa inuiaat iluartut kinaassusersiuminarput inuiattut kisimik kunngimut Kristusimut naalatsigitikkamik, taamatullu Satanip silarsuaanut ilaanatik. (Juánase 17:16) Inuiannut taakkununnga ilaasut ’Guutimik nalusut akornanni iluartumik saqisutut’ ilisimaneqarput. Guutimut nersornaataasumik inooriaaseqarput. (1 Pîtruse 2:12) Aammalu nunarsuarmi sumiikkaluarunilluunniit ’Guutip uumasup ilagiissaanut, ilumoornerup sukaralugulu tunngavigisaanut’ ilaapput. (1 Timûtiuse 3:15) Sallusuissut tapersersoramikku isumaliutersuutit Biibilimut naapertuutinngitsut kristumiuunerartunit ajoqersuutigisaasut ajattorpaat, aammalu ’inoorlaannguatut immuk piviusoq oqaasiusoq’ — Guutip oqaasia, Biibili, illersugaraat. (1 Pîtruse 2:2) Kiisalu suliniarluarlutik Guutip naalagaaffianik nutaarsiassaq nuannersoq ’pinngortitani tamani qilaap ataaniittuni oqaluussissutigaat’. (Kulorsamiut 1:23) Inuiaat taakkua ’Israelip Guutip pigisaanut’ ilaasunik sinneruttunik, kristumiut tanitaasut ilagiissaannik, tungaveqarnerannut qularutissaqarnerpa? Naamerluinnaq! — Galâsiamiut 6:16.

Inuiaat erniupput

3. Inuiaat iluartut qanoq ilillutik pilersimanerat nassuiaruk.

³ „Inuiaat iluartut“ qanga erniuppat? Inuiaat taakkua aallaaviat erninermut allamut Jesajap allagaani siulittuutigineqartumut attuumassuteqarpoq. Jesaja 66:7, 8-mi ima allassimavoq: „Sion suli ernisulernani ernivoq, suli nallisitsinani ernertaarpoq. . . . Massami Sion ernisuliinnarluni qitornartaareerpoq.“ Tupinnarnerpaaq tassa Sion, Guutip qilammi peqatigiissortai, nallisitsinaniluunniit ’ernertaarmat’. Ernertaarneq tamanna ’qitornartaarnerup’ siorna pivoq. 1914-imi Naalagaaffik Messiasikkoortoq qilammi pilersinneqarpoq. (Naleqqiuguk sarĸúmersitat 12:5.) Tamanna pereermat inuiaat amerliartuinnartut sorsunnersuarmut siullermut ilaaqqussortillugit kristumiut tanitat ’nallisitsinernit’ annikilliornerup qinugisaanerullu piinit misilinneqaatit atortalerpaat. Taavalu 1919-imi inuiaat anersaakkut ittut nunarsuarmi pilersinneqarput. Taamaalilluni Zion ’qitornartaarpoq’, taakkulu aaqqissuunneqarput nalunaajaanermik annertusiartuinnartumik suliaqartutut. — Matîuse 24:3, 7, 8, 14; 1 Pîtruse 2:9.

4. Sooq inuiaat iluartut assuarnaassusertik attattuaannarniarlugu ilungersortariaqarsimappat?

⁴ Inuiaat taakku aallartinnerminniilli assuarnaassutsimikkut sakkortuumik misilinneqartarsimapput. Sooq? Qilammi naalagaaffik erniummat Satan inngilipiluilu qilammit nunarsuarmut iginneqarsimammata. Nipituumik manna nalunaarutigineqarpoq: ’Maanna annaassut pissaanerlu naalagaaffillu Guutitta pigilerpai, piginnaanerlu tanitaata pigilerpaa, qatanngutitta unnerluutiginnittaat igitaammat, ullukkullu unnuakkullu Guutitta saani unnerluutiginnittartoq. Taakkualu savaaqqap aavagut oqaatsikkullu nalunaajaatigisamikkut ajugaaffigaat; inuunertillu asanngilaat toqumut allaat.’ Pissutsit allanngornerat tamanna Satanip kamaatigeqaa ’aallarlunilu kinguaassaasa amiakkui taakku Guutip inassutaanik maleruaasut Jesusillu nalunaajaataanik piginnittut sorsukkumallugit’. Satanimit sakkortuumik saassunneqarnerminni kristumiut tanitat aalajaattuaannarput. Ulloq manna tikillugu inuiannut iluartunut Guutip pigisaanut ilaasut ilungersuussisut Jesusip aavanut utertitsissutaasumut uppernerminnik ersersitsiuartarput ’toqumullu allaat’ assuarnaattuarnermikkut Jehova mamarliisorsuarmut akissutissaqartittarlugu. — sarĸúmersitat 12:1, 5, 9-12, 17; Ussatit 27:11.

5. Nalitsinni nalunaajaasut suna iluaqutigalugu assuarnaassutsiminnik attassiinnarsinnaasimappat?

⁵ 1919-imi Guutip naalagaaffianik nalunaajaaneq nutaanerusoq aallartimmat Biibilimik atuaqqissaartartut, Jehovap Nalunaajaasui taamanikkut taama taaneqartaramik, ikittuinnannguupput uppernikkulli nakuullutik. Tassaalerput ’illoqarfimmut qajannaatsumut annaffissatut sananeqarsimasutut qarmalimmut’ tunngaviusut. ’Jehovah qaarsuusoq ataavartumik’ tatigaat. (Jesaja 26:1, 3, 4) Mosesip itsaq iliorsimaneratut nalunaarput: „Nalunaajaatiginiarpara [Jehovap] aqqa, ilissilu Guuterput naalannartissavarsi! Qaarsuuvoq [Jehova], assuarnaatsuupput suliai, naapertuilluartuupput aqqutigisai tamarmik. Guutiuvoq aalajaatsoq, peqqusersuitsoq; iluartuuvoq naapertuilluartuullunilu.“ — 5 Moses 32:3, 4.

6. Ulluni kingullerni makkunani Jehovap innuttani sutigut pilluaqqusaatissimavai?

⁶ Taamanimiilli Guutip naalagaaffiata isaaffii tamarmik ammarneqarput siullermik kristumiut tanitat 144.000-it sinneri katersorneqalermata kingornalu amerlangaartut ’savanut allanut’ ilaasut tanitanut Jehovap naalagaaffiata siunertaanik oqaluusseqatiginnilermata. (Juánase 10:16) Taamaalilluni nuannaarluni manna tamanut nalunaarutigineqarpoq: „Innuttatit amerlisarsimavatit, [Jehova], naalannassutsit takutissimavat, nunatta killingi tamaasa ungavarpatit allisillugu.“ (Jesaja 26:15) Nunarsuaq oqaluussiffiusoq tamaat qimerloorutsigu oqaatsit taakku ilumuussusiat takussavarput. Anersaap illernartup pissaanera ikiortigalugu Kristusip naalagaaffia pilersinneqarsimasoq nalunaajaatigineqarpoq ’nunap isuanut allaat’. (apustilit suliait 1:8) Alliartornerup tamatuma annertussusia Jehovap Nalunaajaasuisa 1994-imut nalunaarusiaanni, quppernerni 12-miit 15-imiittuni, takuneqarsinnaavoq.

Oqaluussisartut amerliartuinnartut

7, 8. (a) Guutip innuttaasa ’tupimik noqarutaannik tallisitsisimanerannut’ sunik takussutissaqarpa? (b) 1994-imut nalunaarusiaq qimerlooraanni qanoq annertugisumik ’tupeq inittortinneqarsimava’?

⁷ Nalunaarusiap nuannersortai qimerlooriartigik. Naalagaaffimmik oqaluussissutiginnittartut amerlanerpaaffitsik qaangerlugu 4.914.094-inngorsimapput! ’Amerlangaartunik inuiaqatigiinnit immikkullu naggueqatigiissunit immikkullu oqaasilinnit tamaneersunik, issiavissaarsuup saani savaaqqallu saani qeqartunik takisuunillu qaqortunik atisalinnik’ katersuiuarneq takullugu nuanneqaaq! Aap, katersorneqartut taakku aamma assuarnaassutsiminnik ersersitsisimapput. ’Atisatik takisuut savaaqqap aavanik errorsimavaat qaqorsarlugillu’, Jesusip pilliutaanut utertitsissutaasumut uppernerminnik ersersitsinertik pissutigalugu iluartutut nalunaarutigineqarsimallutik. — sarĸúmersitat 7:9, 14.

⁸ Ingammik 1919-miit Jehovap peqatigiissortai ima peqquneqarsimapput: „Toqqit inittoruk, ineqarfiit qaleralersoruk naammattunik. Tupivit noqarutai tallisikkit paagutaallu aalajangerluarlugit.“ (Jesaja 54:2) Peqqussummut tamatumunnga naalallutik oqaluussinertik millisinnagu ingerlattuarsimavaat, allaat Yukonimi sermituumi, Alaskap killeqarfiata eqqaaniittumi, pioneerit sapiitsut eqimattat 50-60-inik issittoq sapaatit-akunnerini arlalinni nikallujuillutik oqaluussisarsimapput. Ukiuni kingulliunerusuni Jehovap innuttai assuarnaassutsiminnik attassiinnartut amerliartuinnartunit ilaaqquffigiortorneqarput. Asiap nunataani kristumiuunerartuuffiunngitsuneersut, kommunisteqarfivissuusimasuneersut, Afrikami nunat ilarpassuineersut nunanillu katuuleqarfivissuarneersut, soorlu Italiameersut, Spaniameersut, Portugalimeersut Afrikamillu kujallermeersut tikilluaqquniarlugit isaaffiit ammarluarneqarnerusimapput. Qimaasut oqaluussiffissanik nutaanik periarfissaqartitsilersimapput. Assersuutigalugu Tuluit Nunaanni nalunaajaasut assigiinngitsunik 13-inik oqaasillit pisariaqartitaannik pilersuipput.

’Taamaaliortuaritsi’

9. (a) 1994-imi eqqaaniaanermut najuussimasut amerlassusiat sumik ersersitsiva? (b) Nunani suni eqqaaniaanermut najuuttut amerlalluinnarsimappat?

⁹ Nalunaarusiami ukiumoortumi nuannersut ilagaat eqqaaniaanermi najuussimasut amerlassusiat. Toqunissani sioqqutitsiarlugu Jesusip toquminik eqqaaniaaneq pilersillugu malinnitsini ima oqarfigai: ’Taamaaliortaritsi eqqaallunga.’ (1 Korintumiut 11:24) Nuanneqaaq takullugit 1994-imi 12.288.917-it — oqaluussisartut marloriaataannit amerlaneroqisut — ilangeeqataasutut isiginnaartutulluunniit katersuussimasut peqqussut tamanna naalallugu. Nunat ilaanni eqqaaniaanermut najuuttut oqaluussisartut amerlassusiat suli qaangernerujussuusimavaat. Estlandimi, Letlandimi Litauenimilu oqaluussisartut 3799-iusut nuannaarutigeqaat 12.876-it, oqaluussisartut pingasoriaataannit amerlanerusut, eqqaaniaanermut najuussimammata. Beninimilu eqqaaniaanermut ilaasut 16.786-iusut oqaluussisartut tallimariaatingajagaat. Ilami ilagiinni ataatsini 45-nik oqaluussisartulinni 831-it najuussimapput!

10. (a) Eqqaaniaanermut najuussimasut amerlalluinnassusiat qanoq ililluni uagutsinnik akisussaaffimmik tunisiva? (b) Eqqaaniaanermut najuussimasup ikioqqinneqarnera qanoq kinguneqarsinnaasoq nassuiaruk.

¹⁰ Jehovap nalunaajaasuisa pisumi pingaartumi tamatumani soqutiginnittunit taama amerlatigisunit peqatigineqarnertik nuannaarutigisorujussuuaat. Kissaatigaat soqutiginnittut tamakku sallusuissummik paasinninnikkut asanninnikkullu ineriartornissaannik ikiuinissartik. Ilaat Allatut Ruslandimeersutut immaqa qisuariassapput. Alla specialpioneerimit atuaqqissaaqatigineqartarsimavoq, siumukarpianngimmalli atuaqqissaarneq unitsiinnarneqarsimalluni. Taamaakkaluartorli eqqaaniaanermut qaaqqusaanini Allap ilassivaa. Katersuunneq tamanna pingaaruteqartorujussuaq assut killinneqaatigaa. Angerlarami assiliaatini upperisarsiorpalaartut tamaasa eqqarpai Jehovamullu ikioqqulluni qinulluni. Ullut marluk qaangiummata qatanngutip arnap pioneerip Alla pulaarpaa aperalugulu eqqaaniaaneq qanoq igisimaneraa. Oqaloqatigeersuataalerput. Alla atuaqqissaaqatigineqaqqittalerpoq. Sivitsunngitsoq oqaluussiartoqataasalerpoq. Tamatuma ersersippaa qanoq pingaartigisoq eqqaaniaanermut najuussimasut attaveqarfigeqqissallugit. Amerlasuut qularnanngitsumik Allatut qisuariassapput.

’Katisimasarfippput qimannaveertigu’

11-13. (a) Inuiaat iluartut aalajaatsumik inooriaaseqarnerannut suna ilaava? (b) Sooq kristumiut ilumoortut ataatsimiinnernut najuuttariaqarpat?

¹¹ Jesusip toquanik eqqaaniaalluni katersuunneq Jehovap nalunaajaasuinut katersuunneruvoq pingaarnerpaaq, katersuuttarneralli tamanna kisiartaanngilluinnarpoq. Sapaatit-akunneri tamaasa Jehovap nalunaajaasui katersuuttarput apustilip Paulusip oqasii makku naalallugit: ’Misissoqatigiinniarta asanninnermut ajunngitsuliornermullu kajumissaaqatigiilluta, katisimasarfippullu qimannaveertigu, ilaat taamaattarmata; kisianni oqaaqqissaaqatigiilluta pisa; annerusumilli taamaassaagut ullussaq qanillilersoq malugilerassiuk.’ (Eprîarit 10:24, 25) Inuiannut iluartunut Jehovap pigisaanut aalajaatsumik inooriaaseqarnermikkut kinaassusersineqarsimasunut ilaapput. Aalajaatsumik inooriaaseqarnermut ilaavoq ataatsimiinnernut aalajaalluni orniguttarneq.

¹² Tamanna Filippinerini paasilluarneqarsimagunarpoq, tamaanimi nuna tamakkerlugu sapaatikkut ataatsimiinnernut najuuttartut oqaluussisartut 125 procenteraat. Aamma Argentinami nalunaajaasorpaalunnit soqutiginnittunillu tamanna paasilluarneqarsimavoq. Taakku Naalagaaffilersaartarfimmit 20 km-isut ungasitsigisumi najugaqarput. Taamaakkaluartorli angalalluni nakkutilliisup nalunaarutigaa napparsimanngikkaangamik ataatsimiigianngitsoortoqarneq ajortut. Hestimik qimuttulerlutik hesterlutilluunniit nalunaaquttap-akunnerini sisamani angalasarput, ukiukkullu unnukkut taartorsuaq ataatsimiigiareerlutik angerlamut angalasarlutik.

¹³ Naggatissaq qanilliartortillugu inuuneq artornarsiartuinnarpoq, ajornartorsiutit amerliartuinnarlutik, tamatigullu ataatsimiigiarnissaq ilaatigut unamminiarnartuusinnaasarluni. Pissutsinili inuuffigisatsinni taama ittuni anersaakkut nerisarneq asaqatigiillunilu najortigiinneq, taamaallaat ataatsimiinnerni taama ittuni pissarsiarineqarsinnaasut, aatsaat taama pisariaqartitsigaavut.

’Suliuarit’

14. Sooq Jehovap nalunaajaasui oqaluussinermikkut ilungersuutiginnittuarpat, inernerillu suut tamanna ersersippaat?

¹⁴ Siorna Italiami ilagiit katuullit Jehovap nalunaajaasuisa sulinerat ’sukannerniakujulluni ilassarsiornermik’ taasimavaat. Jehovalli nalunaajaasui oqaluusseriaatsimikkut sukannerniakujussuseqanngillat. Oqaluussineralli tulliminnut piviusumik asannissuseqarnerannut ersiutaavoq. Aamma Paulusip oqaasiinut naalannerannut takussutissaavoq: ’Oqaaseq oqaluussissutiguuk, iluarisaasukkulluunniit iluarisaanngitsukkulluunniit suliuarit.’ (2 Timûtiuse 4:2) Suliuarusussutsip Jehovap nalunaajaasui oqalussinerminni ilungersuussisuunissaannut killittarpai, tamannalu erserpoq tullerminnut oqaluussinermut, pulaaqqiisarnermut sapaatillu akunneranoortumik Biibilimik atuaqqissaarnermik aqutsinernut 4.701.357-iusunut nalunaaquttap-akunneri 1.096.065.354-it 1994-imi atorsimammatigik. Amerlasuut pioneerinngorarsimapput, ersersillugu pioneeriorusussuseqarluartoqartoq. Nunarsuaq tamakkerlugu agguaqatigiissillugu pioneerit 636.202-iusut tamanna ersersippaat.

15, 16. (a) Inuusuttut utoqqaallu qanoq ilillutik pioneeritut anersaamik ersersitsisimappat? (b) Ukiumut nalunaarusiaq 1994-imoortoq qimerloorukku sumi pioneereqarfiunerpaava?

¹⁵ Pioneerit tamakkua ilarpassui inusuttunnguupput. Ilaat USA-miittut meeqqat atuarfianni annerusuni atuartuullutik pioneeriupput, pingaarnerpaamik oqaluussiffigisartagaralugit atuaqatitik. Inuusuttut tamakkua paasisimavaat taamaaliorneq ikiaroornartunut, kanngunartuliornermut nakuusernermullu nunami tamatumani atuarfinni atugaaqisunut illersuutissaasoq pitsaanerpaaq. Inuusuttuararpassuit allat atuarfimmit naammassigunik pioneerinngornissartik anguniagaraat. Irina Ukrainemiu meeqqat atuarfianni annerusumi atuarnini tamaat ikiorti-pioneeriusimavoq, soraarummeernermi kingorna nalinginnaasumik pioneerinngornissaminut piareersaatigalugu. Atuarfimmit naammassimmat suliffittaarnissaata tungaanut ilaqutaasa aningaasatigut tapersersorpaat pioneerertariniassagamikku. Aningaasaqarniarneq Ukrainemi oqitsuunngilaq. Irinali oqarpoq: „Nalunngilara uannuinnaanngitsoq aammali oqalussiffigisannut inuunermik naleqartumik suliaqarlunga.“ Nuanneqaaq ullumikkut inuusuttorpassuit Irinatut eqqarsartarmata. ’Inuusuttuunerup ulluini Pinngortitsisumik eqqarsaatiginninnermit’ allamik taakkununnga pitsaanerusoqarnerpa? — Nalunaajaasup oqaasii 12:1.

¹⁶ Pioneerit ilarpassui utoqqalisimapput. Taakkua ilaat oqaluttuarpoq sorsunnersuarmi kingullermi ataatani qatanngutinilu angut sorsoqataanerminni toqutaasimasut, aammalu anaanani qatanngutinilu arnaq juutit najugaqarfianni aallaaneqarlutik toqutaasimasut. Kingorna ernerminik toqusoorsimavoq. Ullumikkut utoqqaliartortilluni peqqiilliartortillunilu Jehovap ilagiinni kristumiuni ilaquttaminit annaasimasaminit amerlanerungaartunik ilaqutassaqartilersimavaa, nalinginnaasumillu pioneeriunermigut allanik ikiuisarnini nuannaarutigeqaa.

17, 18. Qanoq ililluta pioneeriugaluarutta pioneeriunngikkaluaruttaluunniit pioneerit anersaavannik ersersitsisinnaavugut?

¹⁷ Soorunami tamakkerluta pioneeriusinnaanngilagut. ’Pissarsiatta qulinginik’, anersaakkut pilliutigisinnaasatsinnik pitsaanerpaanik, Jehova nuannaarluni ilassinnittarpoq. (Malaki 3:10) Tamavittali pioneeritut ilungersuussisutut anersaaqarsinnaavugut pissutsillu atukkavut naapertorlugit nutaarsiassamik nuannersumik oqaluussissutiginninnerput annertusisinnaallugu.

¹⁸ Assersuutigalugu Australiami apriilip 16-ia aqqusinermi oqaluussinermut immikkoortinneqarsimavoq. Oqaluussisartunit pioneerinillu assigiimmik peqataaffigilluarneqarpoq, tamannalu takuneqarsinnaavoq qaammammi tassani oqaluussisartut amerlanerpaaffitsik qaangerlugu 58.780-it nalunaaruteqarsimammata. Aammalu atuagassiat siorna qaammammut tamatumunnga naleqqiullugu 90.000-inik amerlanerusut agguaanneqarsimapput. Ullormi immikkut ittumi tamatumani qatanngutip arnap angut pisartagaqalersinniarlugu atia najugaalu allattortillugit paasilerpaa ilaqutariillutik! Paasilerpaat illoriillutik, ukiuni 30-ni imminnut takusimanatik. Tamanna pulaaqqiinissamut qilanaarnartumut periarfissiuussivoq!

Naggatissamut assuarnaattuaritsi

19. Sooq inuiaat iluartut Jehovap pigisaasa naggatissaq tikillugu assuarnaattuarnissaat taama pisariaqartigaa?

¹⁹ Satanip silarsuaata naggatissaa qanilliartortillugu inuiannut iluartunut Guutip pigisaanut ilaasut tamarmik assuarnaassutsiminnik attassiuaannarnissaat pingaartorujussuuvoq. Inuiaat illernartut Jehovap pigisai qanittukkut ima nalunaarfigineqassapput: „Inuiaqatikka, ininnguassinnut toqqoritsi matuilu matullugit; toqqorsimalaarniarallaritsi [Jehovap] kamannera qaangiutserlugu.“ Silarsuup aammik kuisinermigut pisuutitassaasup matuma Guutimit eqqartuunneqarnissani qanilliartorpaa. „[Jehova] ineqarfimminit ani[ssammat] nunamiut pillariartorlugit toqutsinermikkut pisuussutaat pillugu. Nunarsuup saqqummersikkumaarpaa aak imminut kuisaq toqutallu isertorunnaarlugit.“ (Jesaja 26:20, 21) Inuiannut iluartunut Jehovap pigisaanut ilaalluta kristumiutut assuarnaassuserput attattuaannartigu. Taamaaliorutta Kristusip naalagaaffiata ataani inuuneq naassaanngitsoq nuannaarutigisinnaalissavarput.

Eqqaamaviuk?

□ Inuiaat iluartut“ qanga pilersimappat?

□ Sooq ulluni kingullerni makkunani Guutip innuttai nikallujuissuseqartariaqarpat?

□ 1994-imut nalunaarusiami takuneqarsinnaasutut oqaluussisartut nalunaaquttallu akunneri oqaluussinermut atorneqartartut amerliartorsimaneratigut suna takutinneqarpa?

□ Sooq silarsuup matuma naggatissaa qanilliartuinnartillugu ataatsimiinnernut ilaasarnissaq taama pingaartigaa?

□ Sooq Guutip innuttaanut iluartunut ilaasut tamarmik assuarnaassutsiminnik attassisariaqarpat?

[Qupp. 20-23-mi nalunaarsugaq]

UKIUMI OQALUUSSIFFIUSUMI 1994-IMI JEHOVAP NALUNAAJAASUISA SILARSUARMI TAMARMI SULINERANNIK NALUNAARUSIAQ

(Naqitaq takuuk)

[Qupp. 25-mi assiliartaq]

Inuiannut iluartunut Jehovap pigisaanut ilaasut assuarnaassutsiminnik attassisut naammalluinnarluni inuuneq naassaanngitsoq angussavaat