„Kristumiut ilumoortut taamaattussaapput“

ATUAKKIAMINI 1990-imi saqqummersumi, Arbeit macht tot — Eine Jugend in Auschwitz-imi (Sulineq toqussutaasoq — Auscwitzimi inuusuttuuneq), Auschwitzimit aniguisimasup Tibor Wohlip parnaarussaaqatimi ilaasa marluk oqaloqatigiinnerat terlingannit tusarnaarsimasani oqaluttuaraa. Aappaa, Østrigimiu, ’uppinngitsuunerarpoq’. Nersorpaali tigusat pingasunik teqeqqulimmik tunguusamik ilisarnaatillit — Biibilimik Atuaqqissaartartut, tassa Jehovap nalunaajaasui parnaarussivimmi tamaani taama taaneqartartut.

„Sorsoqataaneq ajorput,“ Østrigimiu aapparminut oqarpoq. „Allamik toqutsinissaminnut taarsiullugu namminneq toqutaarusunnerupput. Uanga isumaga naapertorlugu kristumiut ilumoortut taamaattussaapput. Taakkunannga misigisimasannik nuannersumik oqaluttuukkusuppakkit. Juutit Biibilimillu Atuaqqissaartartut inissiami Stutthofimiittumi najugaqatiginikuugatsigik. Ulluni tamakkunani Biibilimik Atuaqqissaartartut silami nilleqisumi assut suleruloortitaasarput. Paasisinnaanngilarput qanoq ilillutik aniguinersut. Oqartarput Jehovap nakussatsittaraatik. Iffiaatitik pisariaqartittartorujussuuaat, perlimoortitaagamimmi. Qanorli iliortarpat? Iffiaatitik tamaasa ataatsimut katersortarpaat, affaallu qatanngutiminnut, anersaakkut qatanngutiminnut, inissianit allanit kaaqalutik aggersunut tunniuttarlugit. Qatanngutitik takkukkaangata tikilluaqqusaqaat eqitaartarlugit. Nerinnginnerminni qinoqatigiittarput, taamaalioreeraangamillu kiinaat nuannaarpasittorujussuanngortarput. Oqartarput perlilersuerullutik. Takuuk, taava eqqarsartarpunga: ’Taakku tassaapput kristumiut ilumoortut’. Kristumiut taamaattussaasut takorloortuaannarsimavara. Maani Auschwitzimi kammalaatit perlimoortut taamatut tikilluaqqusinnaallugit nuannersimassaqaaq!“