Atuartartut apeqqutaat
Ukiuni aningaasatigut ajornartorsiorfiusuni makkunani suliffeqarfiit inuillu ataasiakkaat amerliartuinnartut akiliisinnaajunnaarnermik qinnuteqartarput. Kristumiu Biibili naapertorlugu taamaaliorsinnaava?
Apeqqummut tamatumunnga akissut Guutip oqaasiata ullumikkut atorsinnaasatsinnik atoriaannaasunik unnersuussisinnaassusianut assersuutissaalluarpoq. Nunat ilarpassui akiliisinnaajunnaarneq pillugu inatsisitigut aalajangersagaqarput. Inatsisit nunamiit nunamut assigiinngillat, aalajangersimasumillu inatsisitigut siunnersuinissaq ilagiit kristumiut suliassarinngilaat, taamaakkaluartorli akiliisinnaajunnaarnermut inatsisitigut nalinginnaasutigut siunertaasoq sammilaariartigu.
Inuit ataasiakkaat suliffeqarfiillu akiliisinnaajunnaartutut nalunaarutigineqarsinnaalernerannik oqartussaasut ammaassinerata siunertaanut ilaavoq akiligassaqartup pisussaaffimminik naammassinninngitsoornerani akiligassaqarfiup pisassaminik qulakkeerinissaa. Akiligassaqarfiup immaqa periarfissatuaraa eqqartuussivik qinnuigissallugu akiligassaqartoq akiliisinnaajunnaartutut nalunaarutigissagaa, pissarsiai akiligassaqarfiinut agguaanneqarsinnaaqqullugit taamaalillunilu akiitsut ilaannaasumik akilerneqarsinnaaqqullugit.
Akiliisinnaajunnaarnermik aaqqissuussaq aamma akiligassalinnut nammineq pisuussutiginngisaminnik pisussaaffimminnik naammassinnissinnaajunnaariataarnissamut sillimmatitut atuuppoq. Akiligassalik akiliisinnaajunnaarnissaminik qinnuteqarsinnaavoq taamaalilluni pissarsiani akiligassaqarfimminut tunniunneqartillugit; immaqa angerlarsimaffimmini najugaqaannarnissaminik nalilinnillu aalajangersimasunik tigumminniinnarnissaminik inatsisitigut akuerineqassaaq akiligassaqarfimminit piumaffigineqaqattaarnissani aarlerigisariaqarnagu.
Tassa tamakkunuunatigut inatsisitigut nalunanngitsumik siunertaavoq illua’tungeriit tamaasa aningaasatigut niuernikkullu illersorneqarnissaat. Biibililli unnersuussutaa saariartigu.
Biibilimik peqqissaarluni atuartartup nalunngilluinnarunarpaa akiitsugaqarnissaq Biibilimi siunnersuutigineqanngitsoq. Assersuutigalugu takusinnaavarput Ussatit 22:7: „Pisooq piitsunut naalagaasarpoq, taarsigassarsialik taarsigassarsisitsisumut inussiaataalersarpoq.“
Aamma Matîuse 18:23-34-mi Jesus assersuusiaqarpoq kiffaq naalakkaminut, kunngimut, annertoorujussuarmik akiligassalik pillugu. Kunngi peqqusivoq ’taanna nulialu qitornaallu pigisaalu tamaasa tunineqassasut’, taavali naakkinnilluni akiligassaanik isumakkeerfigaa. Kingorna kiffaq kiffaqatiminut taamaaliorumanngimmat kunngi peqqusivoq ’anniartitsisunut pisinneqassasoq akiligassani tamaasa akilerserlugit’. Tassa pitsaanerpaaq siunnersuutiginarnerpaarlu tassa aningaasanik atornaveersaarnissaq.
Itsaq Israelimi Guutip kiffai niuernikkut isumannaagassaqartarsimapput ilaatigut aningaasanik atornermik ilalimmik. Tamatumunnga atatillugu Jehovap qanoq peqqusimavai? Angut suliffimmik aallarnigaqarniarluni imaluunniit alliliiniarluni aningaasanik atorpat nalinginnaasimavoq, aamma Inatsisinut naapertuussimavoq, atukkiisup erniaqartitsinissamik piumasaqartarnera. Guutilli innuttani kajumissaarsimavai Israelikkuusumik pissaaleqisumik atukkiigaangamik namminissarsiunnginnissaannik; erniaqartitsinissamik piumasaqarnikkut allap atugarliulissutigisaanik iluanaarniartoqaqqusaanngilaq. (2 Moses 22:25) Mosesimik allakkat tallimaat 15:7, 8-mi ima allassimavoq: „Nunaqqatissi ilaannik . . . piitsunngortoqarpat . . . assasi taassumunnga mappissavasi atukkillugulu amigaataanik pisariaqagaanillu.“
Taamatut inussiarnersumik isumassuineq erserpoq inerteqqutigineqarmat akiligassaqarfigineqartup akiligassallip inuunermi pisariaqartitaanik, soorlu aserorteriviup ujarattaanik atisamilluunniit unnukkut oqorutissatut pisariaqagaanik, tigusinissaa. — 5 Moses 24:6, 10-13; Hesekiel 18:5-9.
Soorunami juutit tamakkeratik inatsisit asannittut Eqqartuussisorsuarminneersut Inatsisiliortorsuarminneersullu tamakku anersaavannik maleruaasimapput. (Jesaja 33:22) Juutit piumatuut qatanngutiminnik naakkinnittuliorfiginnittarsimapput. Aamma ullumikkut akiligassaqarfigineqartut sukannersunik ingasattajaartunillu piumasaqarsinnaasarput, allaat kristumiunut unneqqarissunut pissutsit siumut naatsorsorneqarsinnaanngitsut pissutigalugit maannakkorpiaq akiliisinnaanngitsunut. (Nalunaajaasup oqaasii 9:11) Akiligassaqarfigisamit silamiumit malartitassaanngitsumit piumasaqarpallaartumillu tatineqarnermini akiligassaqartoq misigisinnaavoq allatut ajornartumik nammineq soqutigisani illersortariaqarlugit, akiliisinnaajunnaartutullu nalunaarutigineqarnissamik piumasaqarnissamut taamaallaat ilaatigut akiligassaqarfigisaq akuerseqataasarpoq. Kristumiu, piumatuunani akiitsugaqarnerminiluunniit pisussaaffimminik sumiginnaasimanani, akiliisinnaajunnaarnissamut maleruutiinnartariaqalersinnaavoq.
Aammali suliassap illua’tungaa eqqarsaatigisariaqarpoq. Kristumiu imminut naalakkersinnaanermik ersersitsinissani sumiginnarsimagamiuk imaluunniit aaqqissuussinermini siumut naatsorsuinerliorsimagami atortariaqalersimasinnaavoq. Taava akiitsukkani suusupagisariaqarpaa akiliisinnaajunnaartutullu nalunaarutigineqarniapallalluni, taamaalilluni nammineq naliliinerlussimanerminut allat annaasaqartillugit? Aningaasatigut akisussaassuseqanngitsumik iliorneq Biibilimi iluarinanngitsutut eqqartorneqarpoq. Biibilimi Guutimut kiffaasoq kinaluunniit kajumissaarneqarpoq aap aappimik isumaqartissagaa. (Matîuse 5:37) Jesus oqarsimavoq qaqiffilialiunnginnermi aningaasartuutissat naatsorsorneqaqqaartassasut. (Lúkarse 14:28-30) Tamatumunnga naapertuuttumik kristumiu akiligassarsitinnani tamatuma nassatarisinnaasai kissaatiginanngitsut eqqarsaatigeqqaartariaqarpai. Akiitsugaqaleruni inunnut suliffeqarfinnulluunniit akiitsugaqarfimminut akiliisussaanini naammassisariaqarpaa. Kristumiu akisussaassuseqanngitsumik tatigisassaanngitsutulluunniit iliortutut allanit nalinginnaasumik isigineqalerpat apeqqutinngussaaq tusaamasaallunarnini suli pigineraa, aammalu ’ilaginngisatsinnit allaat unnersiutigisaanersoq’. — 1 Timûtiuse 3:2, 7.
Jehovap iluarisaa Tussiaat 15:4-mi tassaanerarneqarpoq: „Ajunaarutigissagaluaruniulluunniit uppernarsaamminik aalajangiussiinnartoq.“ Aap, Guutip naatsorsuutigaa kristumiut akiligassaqarfitik nammineq iliorfigineqarusussutsimittut pissagaat. — Matîuse 7:12.
Ataatsimut eqikkarlugu oqartoqarsinnaavoq Biibilimi mattunneqanngimmat kristumiut akiliisinnaajunnaarneq pillugu ’kaasarip’ inatsisiliaasa illersuisinnaassusiannik ajornartoorluinnarnerminni atuisinnaanerat. Unneqqarissuunissartilli tatigisassaanissartillu pingaarnerpaatittariaqarpaat, taamaattumillu aningaasatigut pisussaaffimminnik eqqortitsinissamik ilungersuutiginninnikkut maligassiuisuusariaqarlutik. (wD 15/9 94)