Qimaasuugaluarlutik Guutimut kiffartornerminni pilluartut
SORSUNNERIT, kaannersuit, ajunaarnersuit eqqissiviilliornerillu. Tamakku inuit ilaasa tusagassiuutitiguinnaq nalunngilaat. Inuilli ilarpassuisa ulluinnarni misigisartagaraat. Jehovap Nalunaajaasui tassaagamik nunarsuaq tamakkerlugu qatanngutigiissuit kristumiuusut nalunngilluinnarpaat sukkulluunniit sorsunneqaleraangat ajunaarnersuaqaraangalluunniit qatanngutimik ilaat eqqorneqarsinnaasartut. Inuillu annakkumallutik qimaasariaqartaraangata aamma qatanngutivut allatut ajornartumik taamaaliortariaqartarput.
Jehovap nalunaajaasui nunani arlalinni Afrikamiittuni pissutsini taama ittuni ukiorpassuarni inuusariaqarsimapput. Amerlasuut tigummisinnaasannguatik poortorlugit allamut qimaasariaqartarsimapput. Ilaat ikittuinnaat arlaannik angallateqarsimapput, immaqa sikkilimik. Amerlanerpaartaalli pisuinnartariaqarsimapput — pisullutik, pisullutik, ullorpassuarni, aap, allaat sapaatit-akunnerpassuini — ornitaminnut apuunniarlutik.
Ornitanut ilaasimavoq Afrikami Qiterlermi Kunngiitsuuffimmi illoqarfeerannguaq Mbokimik taaguutilik. Ukiut ingerlaneranni angutit, arnat, meeqqat utoqqaallu tuusintilikkuutaat tamaanngakaasarsimapput, ilaatigut qatanngutit angutit arnallu, uppernerminnut soqutiginninnermik ersersitsisimasunik ingiallorneqarlutik. Uppeqataasa Napasuliaq Alapernaarsuiffiup Peqatigiiffiata Banguimi, Afrikami Qiterlermi Kunngiitsuffiup illoqarfiisa pingaarnersaanni, immikkoortortaqarfianiittut qimaasut tamakku ikiorniarlugit naapinnissaat assut soqutigisaraat. Aningaasanik, inuussutissanik, atisanik nakorsaatinillu, Banguimi 1100 kilometerit missaanni ungasitsigisumiittumi oqaluussisartut tukkorlutik tunissutaannik, nassartumik tallimariarluni aallartitsisoqarsimavoq. Naak tukkorlutik ikiuisut pissarissaartuunngikkaluarlutik sapinngisaminnik iliuuseqarnertik nuannaarutigaat.
Mbokiliarneq
Qatanngutit immikkoortortaqarfimmiittut aamma kissaatigaat qanoq iliuuseqartoqarsinnaanersoq qimaasullu qanoq ililluni anersaakkut ikiorneqarsinnaanersut paasissallugu. Taamaattumik uanga nuliaralu, Symphorien specialpioneeriusoq nulialu ilagalugit, biilimik assakaasunik sisamanik nusutsilimmik aallarpugut. Aqqutaa Symphorienip nalunngilluarpaa, Mbokimilu qimaasut oqaasii zandemik taaguutillit sapinngilai. Ullut sisamarsuit ornitatsinnut ingerlaarpugut.
Kilometerit 400-t kingulliit maniitsukkoorpugut, aqquterpulli alianaaqaaq baobabinik taaguutilinnik orpissuaqarluni. Sukkut tamaana illoqarfeeqqat aqqusaartarpavut. Nuliama kisitsinera naapertorlugu ikaartarfiit 50-erluinnaat aqqusaarpavut, ilarpassui qajannarsivissimasut ilaallu aqqutigineqarsinnaanngilluinnartut. Ilaat qisuminernik iluarsaateriarlugit qinoriarluta mianersoqqissaarluta aqqutigisarpavut. Eqqaani illoqarfeeraqaraangat meeqqat ussagartarput ikiorniarluta — suunngitsunnguamik akissarsillutik. Tupaallaatigisarparput ivigarsuit qanittumilu orpikkat akornini qisuminernik ikaartarfiullu ilakuinik tamatigut aallertarmata. Eqqarsaatigaarput immaqa ikaartarfimmit peerneqartartut ikaarnianik takkuttoqaraangat akissarsiutaalaarniassammata.
Pingasoriarluta meeqqanik ikiorneqarnissatsinnut naaggaarpugut ikaartarfiit ikaarfigissallugit navianarpasippallaaqimmata. Taamaattumik aqqusineq nigorlugu kuukkoorluta illua’tungaanut ikaarpugut. Panernerup nalaaniinnera nuannaarutigeqaarput, taamaanngippammi qulimiguulimmik angalanngikkutta angalanissarput ajornarluinnassagaluarmat!
Mbokimimita qanoq ippa? Taamatut eqqarsaqqajaajuarpugut „piste“-kkut naassaanngitsuusaakkut ingerlaartilluta, „piste“ Afrika Qiterlermi Kunngiitsuuffimmi aqqusinermut qamutilluunniit aqqutaannut taama ittumut franskit oqaaseraat — aqqusineq tuusintilippassuarnik itersartalik sioqqanik, qaarsunik qarmasissiakunilluunniit ilalik.
Ullut sisamassaanni, ullup qeqqa qaangilaaraa, Symphorienip ivikkanik illuikkiat orpinnik papajanik narsaatinillu kassavanik avatangerneqarsimasut tikkuarpai. „Voila! Mbokimut pivugut,“ suaarpoq. Takusavut tupaallaatigingaatsiarpavut. „Tassa Mboki? Naak qimaasut inaat?“ aperivugut, qimaasunummi inissiat pinnagit illut siamasissut kisiisa takusinnaagatsigik. Illuikkiat mikisut ipiitsulli ivikkanik qaliallit. Aamma sumi tamaani orpeqarlunilu orpigaqarpoq, inuillu illumik silataanni naatitsiveqartiterput. Mbokimi qimaasunut inissiap taamatut isikkoqarnissaa takorloorsimanngilarput; 35 kilometerit missaannisut isorartutigaaq illoqarfeerangaatsiarsuullunilu.
Qatanngutit naapippavut
Mbokimi qatanngutit takkunnissarput nalusimanngilaat, ilimagisimagaluarpaalli ulluni tallimani angalassasugut. Biilerput tusaaleramikku arpallutik ornippaatigut. Angutit, arnat meeqqallu illuikkaminnit, ungaluukkaminnit narsaatiminnillu ussagarput ilassiartorluta. Tamarmik qungujulallutillu illarasaarput assammittarlutalu, ajornanngippat arlaleriarlutik. Anaanat naalungiarsuutitik nittarterlugit tikilluaqqusarpaatigut. Tamarmik kissaatigaat ilassinissarput qamanngalu pisumik tikilluaqqulluta.
Taamaalinerani nuliaralu iliuuseqarpiarsinnaanngilagut, oqaatsit pissutaallutik. Franskisuullattaalluta, sangosuullattaalluta, tuluttuullattaalluta arabiamiusuullattaallutalu pivugut. Qatanngutitta amerlanersaat zandesut oqalullutillu, atuartarlutillu allattarput. Symphorienip nutseruttariaqarpaanga tikeraarnitsinni susoqarnissaa nassuiaatigalugu.
Kilometerialuit ingerlaqqikkatta naalagaaffilersaartarfimmut apuuppugut. Taanna tassaavoq „oqaluffik“ siulleq Mbokimi qimaasunit sananeqarsimasoq. Qatanngutit amerlanerusut meeqqatik soqutiginnittullu ilagalugit tikilluaqqujartorluta tamaanga aggiapput. Aamma meerarpassuit allat ilassiniarluta ussagarput.
Illuaqqani marlunni tikeraamissut ineqarnissarput qatanngutitta isumagisimavaat. Ipiitsorujussuupput qattaqarporlu marlunnik imermik minguitsumik imalinnik atugassatsinnik. Nammineq taquaqarpugut imigassatsinnillu imilisarluta, pissutsit ajortorujussuunissaat ilimagigatsigu qatanngutitsinnullu nanertuutaajumannginnatta. Biilili usingialerippullu niviarsiaraq takkuppoq aperalutalu kukkukuuaraq qanoq ilillugu piumaneruneripput, siallugu imaluunniit miseqqamik qajulerlugu. Kukkukuuarallerfigineqarnissarput ilimagisimanngilarput, aperivugullu qanoq ilillugu namminneq neriniarneraat. Akissut tassa kassava imaluunniit maniok. Taamaattumik miseqqamik akuukkamik qajulerlugu piumavarput. Perliliivinnitsinni unnuk tamanna qaarsillartinneqarluarpugut. Ullulli tamaasa, ullup qeqqanut unnukkullu, nerisassittuarpaatigut. Upperisinnaanngingajapparput — qimaasut nerisassaqartillutalu isumassoraatigut, naak suuteqarpianngikkaluarlutik.
Ilagiinnguit nuannaartut
Tamaani avinngarusimasumi qatanngutitta 21-t akornanniippugut. Taakkunannga marluinnaat kuisimallutik tamaanga pisimapput. Sinneri soqutiginnittuinnaasimapput. Atuaqqissaartuaannarsimapput, ukiullu marluk kingulliit ingerlaneranni kuisissimallutik. Sisamat tikeraarnitsinni kuussuarmi qanittumiittumi kuisipput.
Faustinop maligassiaa immikkut malugisariaqartuuvoq. Mbokimut pinnginnermini Biibilimi sallusuissutsit tunngaviusut ikinngummit ilikkarsimavai. Faustinop ilikkakkani pingaartissimavai. Sivitsunngitsoq ikinngutinilu allanut oqaluussisalersimapput, akerlilersorneqarpulli parnaarunneqarlutillu, pissutiginiarneqarluni upperisartik atorlugu ’innuttaasut akornanni eqqissiviilliortitsilersimanerat’. Parnaarussivimmiitsillutik Faustinop ikinngutaa siooranini pissutigalugu nakkaannarsimavoq iperagaallunilu. Qaammatit marluk qaangiummata Faustinomik suliassaq eqqartuussisunit suliarineqalersimavoq. Paasinarsisimavorlu taassumunnga unnerluutiginnissutit pissutissaqanngitsuusut, taamaattumillu iperagaasimavoq. Najugarisamini sorsunneqalermat Faustino Afrikami Qiterlermi Kunngiitsuuffimmut qimaasimavoq, tassanilu qatanngutit naapillugit Biibilimillu atuaqqissaartaqqilerluni. Juulimi 1991-imi kuisissimavoq 1992-imilu pioneerinngorsimalluni.
Mbokimi ilagiinnguit pilluarlutillu ilassiortut maannakkut specialpioneerimik ataatsimik oqaluussisartunillu 21-nik ilaasortaqarput. Qatanngutit angutit marluk tuluttut oqaluttut utoqqaanertatut kiffartorput, Banguimilu immikkoortortaqarfimmut attaveqarluarput. Ilimagisimagaluarparput qatanngutivut qimaasut atugarliortorujussuusut, taamaanngillalli. Naak pigisatigut piitsuugaluarlutik naammagittaalliortoqanngillat, isumakuluttoqaratik massuasoqaratillu. Tikikkamik illuikkiortiterlutillu illuliortitersimapput inuussutissanillu naatitsisalerlutik kukkukuunillu kinguaassiortitsillutik. Siornagornit pigisakinnerupput, inuuppulli kristumioqatitillu ilagalugit.
Mbokimi qimaasut 17.000-it 20.000-illu akornanniimmata, qaammatillu tamaasa nutaanik takkussuuttoqartuarluni, qatanngutivut oqaluussiffissarpassuaqarput. Oqaluussiartoqatigaavut, assullu pissanganarpoq. Biibili zandesoortoq amerlasuutigut atortarpaat, nutsikkamilu tassani Allakkat Epriiarisuut-ni tamani aamma Kristumiut Allagaataat Griikerisuut-ni arlalinni Guutip aqqa atorneqarpoq. Inunnummi taakkununnga Guuti tassaannaanngilaq „Mboli“ („Guuti“ zandesoorlugu) kisianni „Yekova“, taamatut Guutip nammineq aqqa taasaramikku. „Mboli Yekova“ oqariartaasiuvoq nalinginnaasoq. Naaggaartut Afrikamiut oqaasiinut allarpassuarnut nutsigaanni nutsigaq eqqortoq tamanna atorneqanngilaq, kisianni „Jehova“-mut taarsiullugu „Nzapa“, „Nzambe“ Afrikamiulluunniit oqaasii allat Guutimik isumallit atorneqarput.
Jesusip siulittuutaa naapertorlugu Naalagaaffik pillugu nutaarsiassaq nuannersoq nunarsuarmi sumi tamaani, allaat Mbokimi, oqaluussissutigineqarpoq. (Matîuse 24:14) Ilagiit tassaniittut maanna biibilinik, atuakkanik, atuagassianik, atuagassiaaqqanik naqitaaqqanillu oqaatsini pisariaqartinneqartuni tamani pilersorluarneqarput. Immaqa siunissami atuagassiat amerlanerusut zandesoortut pineqarsinnaalerumaarput.
Angerlarsimaffivissartik utaqqitillugu
Unnuk siulleq isiginnaartitsissutigaarput Peqatigiiffiup assitigut seqersittakkatigut oqalugiaataa „Europap kangiani ataatsimeersuartut nuannaartut Jehova unnersiutigaat“, aqaguanilu unnukkut oqalugiaat „Naggatissap nalaani amerlasuut naapertuilluassutsimut siulersorneqarput“. Assit seqersittakkat unnukkut qaammatigissuarmi naalagaaffilersaartarfiup silataani isiginnaartinneqarput. Misigisaq immikkorluinnaq ittoq. Inuit hundredelikkuutaat isiginnaariarlutik ussagarput, qatanngutittalu nuannaarutigalugulu tulluusimaarutigaat innuttaasut immikkut ittumik isiginnaartissinnaagamikkik.
Ataasinngornermi angerlamut aallarnissatsinnut piareerpugut. Aamma ullunik sisamanik sivisussuseqassaaq — aqqut taanna 50-inik ikaartarfilik atorlugu. Qatanngutip arnap taquassatsinnik nerisassiuunniartorujussuuaatigut — kukkukuuaqqanik marlunnik siatanik uanitsumik qaqortumik akuukkanik. Ullaakkut aallalernitsinni kukkukuuaqqat biilitsinnik tipigitsitseqaat. Ullup qeqqarnerani orpikkat akorninut unilluta kukkukuuaqqanik siatartorpugut qatanngutivut Mbokimiittut eqqarsaatigiitigalugit. Taakku naak qimaasutut inuusariaqaraluarlutik aalajaallutik Jehovamut kiffartortuarput ’nunassami nutaami’ Guutip neriorsuutigisaani eqqissinartunik avatangiiseqarlutik angerlarsimaffivissartik utaqqiitigalugu. (2 Pîtruse 3:13) — Nassiussaq. (wD 15/10 94)