Kiffartornerit illernartoq pingaartiguk
SUMILLUUNNIIT anguniagaqaraanni pilliuteqarnissamut piumassuseqartariaqarpoq. Nakorsanngorniaraanni ukiorpassuarni atuarnissaq kiisalu aalajangeriataallaqqissuseq aningaasallu pisariaqarput. Eqaarsaartartup pikkorissup pikkorinnerpaaffissani anguniarlugu ukiut inuusuttuuffimmi amerlanersaat ajornakusoornerujartuinnartunik sungiusarnermut imminut naalliutsilluni atortarpai. Taamatuttaaq noqartilimmik pattallammassuup ukiut ilungersorluni sungiusarfigisimasani kingumut qiviarsinnaavai.
Sulili annermik anguniagassaqarpoq, pilluaqqussutinik annerungaartunik nassatalimmik pilliuteqarfigissallugulu imminut akilerluarsinnaanerungaartumik. Sumik? Tassa Qutsinnerpaamut, Jehova Guutimut, kiffartornermik immikkut pisinnaatitaaffimmik. Pinngortitsisumut illernartumik kiffartorneq piffissamik, aningaasanik nukinnillu qanorluunniit atsigisunik pilliuteqarfigigaluarutsigu pilluaqqussutissanik nalissaqanngitsunik kinguneqassaaq. Apustili Paulus ilumoorpoq ima oqarami: ’Timitsigummi sungiusarnerput imma iluaqutaavoq, Guutimilli mianerinninneq sunut tamanut iluaqutaavoq inuunermut matumunnga piumaartussamullu atasumik unnersuummik ilaqarami.’ (1 Timûtiuse 4:8) Qanoq ililluni tamanna ilumoortoq misissoriartigu.
Guuti ilikkaleqqaaratsigu
Nutaarsiassamut nuannersumut ajunngitsumik qisuariarlutik Biibilimik atuaqqissaartalertut amerlanersaasa tamatuma inuunerminni allanngornernik qanoq atsigisunik kinguneqarnissaa siumut ilisimasinnaasimanngilaat. Biibilimik atuaqqissaartalerlaap ikinngutimi ilai, siornatigut sammisartakkaminik maannakkulli Guutimik ataqqinaataajaasutut isigilikkaminik sooq sammisaqassaarnerminik paasinnissinnaanngitsut, immaqa annaassavai. (1 Pîtruse 4:4) Atuaqqissaartalersut ilaat immaqa ilaquttaminnit akerlilersorneqartarput asasamillu Jehovamik nuannarinninnginnerannik, immaqaluunniit uumissuinerannik, aliasuutiginnittarlutik. (Matîuse 10:36) Tamakku pilliutaasinnaapput artornartut.
Aamma suliffimmi atuarfimmiluunniit pilliuteqartoqarsinnaasarpoq. Biibilimik atuaqqissaartalersup festernerit nalliuttorsuarnillu nalliussinerit qimakkiartuaartarpai. Suleqatimi atuaqatimiluunniit oqaasii kusanaatsut tusarnaarumajunnaartarpai, namminerlu quiasaarnipalaat atorunnaarlugit. Evfisumiut 5:3, 4-mili oqaassut maleruarnialersarpaa: ’Uersaanerli mingunnartullu nalinginnaat piumatuunerlu taaneqassanngillalluunniit ilissinni, iluartut taama ileqqussaqarmata, kanngunartullu oqaatsillu sianiitsorpallattut quiasaarnipalaallu tamakku atugassaanngitsut; qujallusili pigitsi.’
Allanngornerit taama ittut atuaqqissaartalersumik immikkoortunngortitsisarput. Tamanna ingammik inuusuttunut suli atuartuusunut ajornakusoorsinnaavoq. Kristumiut inuusuttut uppernikkut misilinneqaqattaartuartarput nalliuttorsuarfissiorfippassuartigut isummanillu guuteqanngitsorpaluttunik, soorlu pinngoriartuaarsimanermik isumaliutersuummik, atuarfimmi ilinniartinneqartarnermikkut. Aammalu ilagisartakkanit tatineqartuarneq akiortariaqartarpaat. Guutip unnersuussutaanik maleruaasoq imminut immikkoortittarpoq, atuaqatiminit ilinniartitsisuminillu quiassuaatigineqarnermik kinguneqarsinnaasumik. Tamanna ingammik inuusuttuaraanermi, malussarisseruttorfimmi, akueriuminaassinnaasarpoq. Tamannali tassaavoq pilliutissaq pilliutigisariaqagaq.
Ilumut pilliutaappat?
Aallaqqaammut pilliutitut misinnarsinnaasut ilaat naggataatigut pilluaqqussutinngorsinnaasarput. Ilaat pujortartarunnaartariaqartarput. (2 Korintumiut 7:1) Tamanna artornarsinnaasorujussuuvoq, ueripilunnartorli tamanna ajugaaffigigaanni pilluaqqussutisiaasarpoq annertooq! Aamma ikiaroortarunnaarneq imerajuttuujunnaarnerlu taama oqaatigineqarsinnaapput. Ueripiluutit aserornartut tamakku qimallugit inuuneq nuannerneroqaaq. Allat aappariinnerminni iluarsartuussisariaqartarput. Allagartaqaratik inooqatigiittut katittariaqartarput imaluunniit qimattariaqartarlutik. (Eprîarit 13:4) Arlalinnik nuliaqartut inuusuttuunerminni nuliariligartik kisiat naammagisariaqalersarpaat. (Ussatit 5:18) Iluarsartuussineq tamanna unamminiarnartuuvoq akeqarlunilu, tassaavorli pilliut angerlarsimaffimmi eqqissinermik pilersitsisussaq.
Iluaqutit eqqarsaatigikkit
Jehovap inassutaanik maleruaaneq ilumut iluaqutaalluinnarpoq. Biibilimik atuaqqissaartalersoq inuunermini aatsaat siullermeerluni Pinngortitsisumut qinusinnaavoq aqqalu, Jehova, atulerlugu. (Tussiaat 83:19) Atuaqqissaartalersup Jehova asalersarpaa inuiannut iliuuserisimasai iliuuseriumaagaalu nuannersut tusaraangamigit. Nunani toqumik ersiginniffiusuni atuaqqissaartalersoq upperisapalaalittut ersinermit tamatumannga aniguisinneqartarpoq, ilikkaramiuk toqusut sinittutut sianigisaaruttartut makititaaffissaq utaqqillugu. (Nalunaajaasup oqaasii 9:5, 10) Aammalu oqiliallannassaqaaq paasillugu Jehovap inuit anniarfimmi ikualasumi naassaanngitsumik anniartinneq ajorai. Aap, sallusuissut kiffaajunnaarsitsisarpoq. — Juánase 8:32.
Atuaqqissaartartoq inuunini Jehovap najoqqutassiaanut naapertuuttunngorsarnerujartuinnartillugu ilerasuutaarukkiartortarpoq imminullu ataqqilersarluni. Kristumiutut ilumoortutut inuunissani ilikkartarpaa taamaattumillu ilaquttaminik isumaginnilluarsinnaanerulersarluni. Tamanna nalerisimaarnermik nuannaarnermillu annertuumik nassataqartarpoq. Aammalu naalagaaffilersaartarfimmi ataatsimiittarnernut najuuttarneq immini misigisaavoq nuannersoq. Tamaaniittarpummi inuit kissalaarnermik asanninnermillu Guutip innuttaasa ilisarnaatissaattut Biibilimi saqqummiunneqartunik ilumut ersersitsisartut. (Tussiaat 133:1; Juánase 13:35) ’Guutip malunnangaartuliai’ oqaluussissutigisaramikkik oqaatsimikkut minguillutillu ineriartornarput. (apustilit suliait 2:11) Aap, ’qatanngutigiinnik’ tamanik attaveqarfiginnilerneq nuannaarnermik nassataqartarpoq. (1 Pîtruse 2:17) Katerisimaarnerit ineriartornartut ikiortigalugit Biibilimik atuaqqissaartup ’inuttaaq Guuti assilillugu pinngortitaq atisarpaa iluartillugu illernartillugulu ilumoornikkut’. — Evfisumiut 4:24.
Tunniulluinnarnerup suut nassatarigai
Atuaqqissaartartoq ilisimasaqarnerujartortillugu Guutimut asanninnerata taassumunnga tunniulluinnarnissaanut tamannalu takutinniarlugu imermi kuisinnissaanut killikkiartuaartarpaa. (Matîuse 28:19, 20) Jesusip ajoqersukkani siunnersorsimavai alloriarnerup tamatuma naammassinnginnerani pilliutigisassanik naatsorsueqqaarnissaannik. (Lúkarse 14:28) Eqqaamasariaqarpoq kristumiup tunniulluinnarsimasup Jehovap piumasaa salliutittarmagu ’uinngup suliaasa’ taamaatinnissaat ’anersaallu inerititaasa’ ineriartortinnissaat ilungersorluni sulissutigisarlugit. (Galâsiamiut 5:19-24) Kajumissaarut Rûmamiunut agdlagkat 12:2-miittoq inuunermini pingaartilersarpaa: ’Silap matuma inui ileqqoqatigeqinasigik, allanngoritsili isumassigut nutaanngorlusi, sianigileqqullusiuk sunaasoq Guutip peqqusaa ajunngitsoq iluarisassarlu naammalluinnartorlu.’ Taamaattumik kristumiu tunniulluinnarsimasoq inuunermini nutaamik anguniagaqalersimavoq.
Tamatumunngali taartitut qanoq pissarsisartoq eqqarsaatigeriaruk. Qilammik nunamillu Pingortitsisumut inuttut attaveqalersimavoq. Naapertuilluartutut nalunaarutigisaasimavoq Guutimut ikinngutitut. (Jâko 2:23) Qinnutimini oqaraangami „Ataatarput qilammiusutit“ itinerusumik isumaqartilersimavaa. (Matîuse 6:9) Pilluaqqusaaneruvortaaq paasillugu inuuneq siunertaqarfigineqartoq kuiserlaarlu siunertaq tamanna naapertorlugu inuusoq. (Nalunaajaasup oqaasii 12:13) Jesusip tumaasa atuarnerisigut aalajaattuarnermigullu Diaavulup sallutuujunera uppernarsassavaa. Jehovallu uummataanik nuannaartitsissaqaaq! — Ussatit 27:11.
Sorunamili kristumiu aalajaallunilu qasujuitsoq suli pilliuteqarnerusariaqarpoq. Guutip oqaasianik nammineq inerititaqarnartumik atuaqqissaarneq ilagiillu ataatsimiittarnerinut piareersartarneq piffissamik naleqarput. (Tussiaat 1:1-3; Eprîarit 10:25) Piffissaq sammisassanut allanut atugassaagaluaq oqaluussinermut atorneqartariaqarpoq. (Evfisumiut 5:16) Aamma Jehovap Nalunaajaasuisa ataatsimiittarnerinut ataatsimeersuartarnerinullu najuuttarneq piffissamik nukinnillu naleqarpoq. Aammalu naalagaaffilersaartarfimmut nunarsuarlu tamakkerlugu oqaluussinermut tapiisarneq aningaasanik naleqarpoq. Kisianni soorlu kristumiut millionilikkuutaat uppernarsarsinnaagaat tamakkununnga tamanut tamakkiisumik uummateqarluni tapersersuineq nuannaarnermik nassataqartarpoq. Jesus ima oqarsimavoq: ’Tunisineq tigusinermit pilluarnarneruvoq.’ — apustilit suliait 20:35.
Jehovap suliaanik tapersersuinikkut pilluaqqussutit pilliutinit annerujussuussapput. Inersimanerujartortilluta kiffartornerput kinguneqarluarnerujartuinnarlunilu nuannaarutissarsinarnerujartussaaq. Inunnik allanik Biibilimik ilinniartitsinermit taakkualu Jehovamik pallorfiginnilernerannik takunnittuunermit allamik nalerisimaarnarnerusoqanngilaq. Ingammillu soqutiginnilerlaaq ilaqutaappat, immaqa meeraq ’Jehovamit perorsagaallunilu inertertagaasimasoq’, annermik nuannaarnartarpoq. (Evfisumiut 6:4) Guutimut ’suleqataaniarluta’ ilungersuuteqaraangatta Guutip pilluaqqusingaarnera misigisarparput. — 1 Korintumiut 3:9.
Aalajaalluni kiffartornerup iluaqutissartai allat
Pissutsit aaqqissuussaaneranni matumani inuutilluta ajornartorsiutinik naapitaqartuartassaagut. Qularnanngitsumik ajornartorsiutit artornarsiartussapput Diaavulup suujunnaarsitaanissaa qanilliartortillugu. Immaqa usserniarneqartassaagut qinugisaasarlutalu. Guutilli uagutsinnik najuineranik ilisimanninnerput tuppallersaatigalugulu nakussatsissutigisassavarput. (1 Korintumiut 10:13; 2 Timûtiuse 3:12) Kristumioqatit ilaat ukiorpassuarni peqqarniitsumik iliorfigineqartarsimapput, Guutimilli asanninnertik pissutigalugu nikallujuissinnaasimapput. Misilinneqarnerminni assigiinngitsuni nikallujuillutik aalajaattuaannarsimasut apustilitut, iperartorneqareerlutik iperagaasutut, misigisimapput: ’Taakku killisiuisoqatigiit saannit aallarput tipaatsullutik, aqqa pillugu mitaatigineqaqqusaagamik.’ — apustilit suliait 5:41.
Aap, nikallujuissutsimut akissarsiaq pilliutigisimasanik matussutissiilereerpoq. Eqqaamajulli Guutimik mianerinninneq ’inuunermut matumunngaannaanngitsoq’ aammali ’piumaartussamut’ neriorsuummik ilaqartoq. Nikallujuitsut siunissaat tupinnaannarpoq! Aalajaattuaannaruit annikilliornartussami angisuumi, pissutsit aaqqissuussaanerata matuma naaneranut ilisarnaataasumi, aniguiumaarputit. Pisussaq immikkut ittoq tamanna pitinnagu toqussagaluaruit silarsuassami nutaami makititaajumaarputit. (Daniel 12:1; Juánase 11:23-25) Takorlooriaruk ima oqarsinnaaleruit nuannaarneq ajugaasimaarnermik ilalik misigiumaakkat: „Jehovamit ikiorneqarlunga nikallujuittuaannarsimavunga!“ Nuannissaqaaq inuulerluni nunarsuarmi ’Jehovamik ilisarsinermik ermit immap naqqanik matoqqasinerattut ulikkaartumi’. — Jesaja 11:9.
Aap, Guutimut kiffartorneq akeqarpoq. Pilliutilli pilluaqqussutinut sanilliullugit suunngillat. (Filípimiut 3:7, 8) Guutip kiffaminut maannakkut iliuusii siunissamilu iliuusissai eqqarsaatigalugit tussiaasiortutut oqarsinnaavugut: „Qanoq ilillunga akiniassavara [Jehova] uannut ajunngitsuliornerpassui pillugit?“ — Tussiaat 116:12.