Suut ulapputigaavut — suliat toqungasut imaluunniit Jehovamut kiffartorneq?
„UTOQQATSERALUARPUNGA, ulapikkama.“ Jehovap Nalunaajaasuisa Guutip naalagaaffianik tusagassaq nuannersoq tamanut oqaluussisutigitillugu taamatut oqartut naapikulasarpaat. (Matîuse 24:14) Naak taama oqarneq, „Ulapikkama“, amerlasuutigut patsisissarsiutaannaasaraluartoq, taamaattoq ilumoorpoq inuppassuit ulapeqimmata. ’Isumakuluutit silap matuma pii’ kiserluinnaasa sammivaat — inuussutissaqarumallutik, akiligassat akilerumallugit, suliartortarlutik suliffimminniit angerlartarlutik, meeqqanik perorsaallutik kiisalu angerlarsimaffimminnik, biiliminnik pigisaminnillu allanik nakkutiginnillutik ulapittorujussuupput. — Matîuse 13:22.
Naak inuit ulappukkaluaqisut, taamaattoq ikittuinnaat iluaqutissarsiffiusumik pilersitsiffiusumillu ulapputeqartarput. Angutip ilisimatuup Salomonip oqarneratut ippoq: „Inuummi suleruloornini ilungersorninilu tamaasa seqernup ataani imminut erloqissutissiuutini suallaatigissanerpai? Ulluimi tamarmik naalliuffiupput suliaalu aliasunnermik nassataqartarlutik; unnuakkulluunniimmi qasuerserfissaqanngilaq. Tamakku aamma asuliinnaapput suiallannerinnartut illutik.“ — Nalunaajaasup oqaasii 2:22, 23.
Suliniutit kinguneqanngitsut tamakku Biibilimi taaneqarput ’suliat inuussutaanngitsut’, imaluunniit NV-nutsigaq naapertorlugu „suliat toqungasut“. (Eprîarit 9:14) Illit inuuninni suliat taamaattut annerpaamik sammivigit? Apeqqut tamanna kristumiumut pingaartorujussuuvoq, tassami Guutip ’kikkulluunniit akiniartarpai suliaat naapertorlugit’. (Tussiaat 62:12 3) Ingammillu ’ullussat sivikimmata’ piffissap sulianut toqungasunut atulussinnannginnissaa pingaaruteqartorujussuuvoq. (1 Korintumiut 7:29) Sulialli toqungasut suuppat? Qanoq isigisariaqarpavut? Qanorlu ililluta qulakkeersinnaavarput piviusumik nalilinnik ulapputeqarnerluta?
Suliat toqungasut suuppat?
Eprîarinut agdlagkat 6:1, 2-mi Paulus ima allassimavoq: ’Taamaattumik Kristusimik ajoqersuutaasut aallaqqaataat qaangiinnarlugit inersimassummut ingerlaniarta, kingumut tunngaviliornata suliat inuussutaanngitsut allamik isumataarutigisariaqarnerannik Guutimullu uppernermik, kuisinnerillu pillugit ajoqersuutaasunik, assannillu patissinermik, toqusullu makinnissaannik, eqqartuussummillu naassaanngitsumik.’ Malugiuk ’ajoqersuutaasut aallaqqaataannut’ ilaammat ’suliat inuussutaanngitsut allamik isumataarutigisariaqarnerat’. Paulusip allaffigisai sulianit taamaattunit kristumiutut isumataareersimapput. Qanoq ilillutik?
Ukiuni hundredelinni siullerni inuusut ilaat Kristusimik ilassinninngikkallaramik ’uinngup suliaanik’ aallussisuusimapput, tassa ’uersaanermik, mingunnartuliornermik, kanngunartuliornermik, guutipilussiornermik, ilisiinnermik’ iliuutsinillu ajortunik allanik. (Galâsiamiut 5:19-21) Suliat taamaattut taamaatissimanngitsuugunikkik anersaakkut toqumik kinguneqarsimassagaluarpoq. Qujanartumilli kristumiut taakku ileqqutik aserorsaataasut qimassimavaat, isumataarsimallutik ’uffarsimallutillu’, taamaalillutik Jehovami minguitsuulerlutik. — 1 Korintumiut 6:9-11.
Kristumiulli tamakkeratik sulianit ajortunit kanngunartunilluunniit isumataarnissaminnut pisariaqartitsisimapput. Paulusip allagai kristumiunut juutiusunut, Kristusimik ilassinninngikkallaramik Mosesip inatsisaanik maleruaaqissaarsimasunik ilalinnut, pingaarnerusumik allagaapput. Taavami sulianit toqungasunit sunit isumataartariaqarsimappat? Mosesip inatsisaasa ileqqulersuutigeqqusaanik nerisassatigullu najoqqutareqqusaanik maleruaaneq soorunami taamani kukkunerunngilaq, inatsisimmi tamakku tamarmik ’illernarlutillu iluarlutillu ajunngitsuupput’. (Rûmamiut 7:12) Kisianni Rûmamiunut agdlagkat 10:2, 3-mi Paulus juutit pillugit ima allassimavoq: ’Nalunaajaassutigaakkami Guuti ilungersuutigigaat, siuneqarluaratilli. Iluarnermi Guutip pia ilisarinnginnamikku, iluarnerli namminneq pigisartik atortinniaramikku iluarneq Guutip pia naalanngiinnarpaat.’
Aap, juutit kukkullutik isumaqarsimapput Inatsisit tamarluinnaasa maleruarnerisigut annannissaminnut imminnut naleqquttunngortissinnaallutik. Paulusili nassuiaavoq ’inatsisit suliareqqusaasigut inuk iluartuutinneqarsinnaanngitsoq, kisianni uppernikkut Jesus Kristusimut’. (Galâsiamiut 2:16) Inatsisitigut suliat — qanorluunniit upperluarniartigaluni ajunngitsuliorniartigalunilu suliaagaluarunik — Kristusip saammaannartitsissutissamik pilliutiginninnerata kingorna tassaannaalerput suliat toqungasut annassutaasinnaanngitsut. Juutit eqqortuliorusuttut sulianit toqungasunit tamakkunannga isumataarnermikkut isumataarsimanerminnullu takussutissatut kuisinnermikkut Guutimit iluarisaanissartik ujartorsimavaat. — apustilit suliait 2:38.
Tamanna qanoq ilinniarfigisinnaavarput? Suliat toqungasut tassaaginnanngitsut iliuutsit ajortut kanngunartullu. Suliat toqungasut aamma tassaasinnaapput iliuutsit nalinginnaasut anersaakkut toqungallutillu imaqaratillu inerititaqanngitsut. Kristumiulli kuisinnginnerminni sulianit toqungasunit tamakkunannga isumataartanngillat? Ilumut, isumataartarput, ukiunili hundredelinni siullerni kristumiut ilaasa inooriaaserisimasartik kanngunartoq uterfigeqqissimavaat. (1 Korintumiut 5:1) Kristumiullu juutiusut akornanni Mosesip inatsisaasigut sulianut toqungasunut uteqqajaasoqartarsimavoq. Taakku Paulusip toqungasunik suliaqaqqilinnginnissaannik mainersoqqusimavai. — Galâsiamiut 4:21; 5:1.
Suliat toqungasut mianersorfigikkit
Ullumikkut Jehovap innuttaasa suliat toqungasut nakkarfissiaannut nakkartuunnginnissartik mianersorfigisariaqarpaat. Sammivinnit tamanit saassunneqartarpugut ileqqussatigut unioqqutitsinissamut, unneqqaserluttuliornissamut kinguaassiuutitigullu kanngunartuliornissamut tatiniarneqartarluta. Ajoraluartumik kristumiut tuusintilikkuutaat ukiut tamaasa tatiniarneqarnermut tamatumunnga nakkaannartarput, isumataanngitsullu kristumiut ilagiivinit anisitaasarlutik. Taamaattumik kristumiut Paulusip Evfisumiunut agdlagkat 4:22-24-mi unnersuussutaa aatsaat taama eqqumaffiginiartariaqarpaat: ’Inutoqaq siornagut angalaaserisarsi iperarsiuk, taanna pileritsannernik salloqittaataasunik imminik aserorniartoq; nutaanngortissasusili anersaassigut isumaqaatissigut, inuttaarlu Guuti assilillugu pinngortitaq atissagissi iluartillugu illernartillugulu ilumoornikkut.’
Soorunami Efesusimiut Paulusip allaffigisaasa annertungaatsiartumik inuttaaq atereersimavaat. Paulusilli ikiorpai paasitillugit tamanna ataavartumik ingerlasussaasoq! Kristumiut aalajangersimasumik siunertaqarlutik suliniuteqanngikkunik sulianut toqungasunut utertooqqissinnaapput, kissaatit tammarnartut sunniiniartuartut pissutigalugit. Ullumikkuttaaq taamaappoq. Inuttaamik atortuarnissarput suliniutigiuartariaqarparput inooriaaserisimasatsinnit mingutsinnaveersaarluta. Uinngup suliai ajortut tamaasa nigorniartuartariaqarpavut, aap umigisariaqarpavut. ’Jehovamik asannittusiaa, ajortoq uumigisiuk,’ tussiaasiortoq oqaaqqissaarisimavoq. — tugsiaut 97:10.
Nersortariaqarpoq ullumikkut Jehovap innuttaasa amerlanersaasa unnersuussut tamanna maleruarmassuk ileqqussatigullu minguitsuujuaannarlutik. Ilaalli sulianit imminni kukkusuunngikkaluartunit, imaqanngitsunilli iluaqutaanngitsunillu, allamut saatsitaasimapput. Ilaasa ajornanngitsumik aningaasarsiorneq pisuussutillu sammivallaalersimavaat. Biibilimili ima mianersoqqussuteqarpoq: ’Pisuunngorumasut usserneqarlutillu napititaasarput silaqanngitsorpallattunillu ajoqutaasunillu pilerigisarpassuaqalersarlutik; tamakkua inuit aserornermut tammarnermullu kiviartortittarpaat.’ (1 Timûtiuse 6:9) Ilaannut silamiutut ilinniagaqarneq napitissutinngorsimavoq. Immaqa suliffissarsisinnaajumalluni ilinniagaqarnissaq pisariaqartarpoq. Ilaalli silamiutut annerusumik ilinniagaqarnermut piffissarujussuartik atorsimavaat taamaalillutillu anersaakkut imminnut ajoquserlutik.
Suliat ilarpassui immaqa imminni ileqqussatigut kukkusuunngikkaluarput. Massakkulli inuunitsinnut pisuunngorsaasuunngikkunik Jehova Guutimillu iluarisaanissatsinnut ikiuutaanngikkunik toqungasuupput. Piffissatsinnik nukitsinnillu arsaarisuupput, uagutsinnillu anersaakkut iluaqutaanatik ataavartumillu naleqaratik. — Naleqqiuguk Nalunaajaasup oqaasii 2:11.
Qularnanngitsumik anersaakkut suliniutinik ineriartornartunik ulapputeqarniarsarivutit. Iluaqutigissavalli aalajangersimasumik akuttunngitsumik imminut misissortarnissat. Soorlu imminut ima aperisinnaavutit: ’Oqaluussinermut ataatsimiinnernullu peqataasarnera pissusissamisuunngitsumik ingerlava, pisariaqanngitsumik silamiutut suliffeqarnera pissutigalugu?’ ’Sukisaarsaatinut piffissaqartarpunga, namminerli atuaqqissaarnissannut ilaqutariilluunniit atuaqqissaarnissaannut piffissaqarneq ajorlunga?’ ’Piffissarujussuaq nukippassuillu pigisanut atortarpakka, ilagiinnili ikiortariallit, soorlu napparsimasut utoqqaallu, ikiornissaannut piffissaqartarnanga?’ Apeqqutit taamaattut immaqa paasinarsisissavaat anersaakkut suliassat salliutinnerusariaqarivut.
Jehovamut kiffartorninni ulapputeqarluarit
Soorlu Korintumiunut agdlagkat sujugdlît 15:58-imi oqaatigineqartoq ’Naalakkap suliaanik naammassisassarpassuaqarpoq’. Guutip naalagaaffianik oqaluussissutiginninneq ajoqersuganngortitsiortornerlu tamanit pingaarnerpaajupput. Timûtiusimut agdlagkat áipait 4:5-imi Paulus ima kajumissaarivoq: „Tusagassamik nuannersumik oqaluussissutiginninneq inuuninni suliassavit pingaarnerpaartarilissuk, kiffartornerit peqqissaarlutit naammassillugu.“ (The Jerusalem Bible) Aamma utoqqaanertat ilagiinnilu kiffartortut savaatit pisariaqartitaannik isumassuinissaminnut suliassalerujussuupput. (1 Timûtiuse 3:1, 5, 13; 1 Pîtruse 5:2) Angajoqqaanullu — amerlasuutigut kisimiittuusunut — ilaqutariinnik isumaginninnissaq meeqqanillu Guutimut qanimut attaveqalernissaannik ikiuinissaq akisussaaffiuvoq annertoorujussuaq. Suliassat tamakku ilungersunarsinnaapput, ilaannikkullu allaat sapernartorujussuartut misinnartarlutik. Suliaanngillalli toqungasut, tassaallutilli suliat nalerisimaarnermik piviusumik tunisisartut.
Apeqqutaalerporlu akisussaafinnut pisariaqartunut tamakkununnga qanoq ililluni piffissaqarniarnissaq. Imminut naalakkertarneq pilersaarusiornerlu assorsuaq aalajangiisuupput. Korintumiunut agdlagkat sujugdlît 9:26, 27-mi Paulus ima allassimavoq: ’Taamaattumik uanga arpappunga maangaannaq pinnanga; tilluivunga silaannarmut pinnanga; kisianni timiga artorsartippara kiffaasutut ilillugu, allanut oqaluussisartunga nammineq angiluttoqqunanga.’ Najoqqutassaq allassimaffimmi tassaniittoq naapertorlugu pitsaassaaq ulluinnarni iliuuserisartakkavut inooriaaserpullu misissortassallugit paasiniarlugu pisariaqanngitsunik piffissatsinnik nukitsinnillu atulussinnaasunik peqarnersoq.
Assersuutigalugu, tv-mik isiginnaarnermut, sukisaarsaatinut, aliikkutanut silamiullu atuagassiaannut atuarnermut piffissaq nukiillu qanoq annertutigisut atortarpigit? Berlingske Tidende-mi (8. aprili 1989) ilanngutassiaq naapertorlugu qallunaat 13-it qaangerlugit ukiullit sapaatip-akunneranut agguaqatigiissillugu „11-12 tiimit“ tv-mik isiginnaarnermut atortarpaat. Piffissaq tamanna pitsaanerujussuarmik atorneqarsinnaagaluarpoq! Angalalluni nakkutilliiumut nuliaasoq ima oqaluttuarpoq: „Piffissaajaataasut tamaasa, ilaatigut tv, tamakkiilluinnangajattumik ingalassimaniarsimavakka.“ Qanoq kingunilimmik? Ujarlerfissiaq Biibilimut tunngasoq Insight on the Scriptures marlunnik atuagartalik tamaat naallugu atuarsimavaa.
Aamma illit eqqarsaatiginiaruk ulluinnarni pilimannginnerusumik inooriaaseqarsinnaanerlutit. Salomon ima oqarsimavoq: „Sulisartoq sinilluartarpoq nerilluarsimagaangami nerisakilaarsimagaluaraangamiluunniit. Angulli pisooq pisuussutaasa sinitsaaliortarpaat.“ (Nalunaajaasup oqaasii 5:11) Atortorissaarutit pisariaqanngitsut iluarsartuunnissaannut piffissaq qanoq atsigisoq atortarpiuk? Peqarnerujartortilluta iluarsartuussassavut, qularnaveeqqusigassavut paaqqutarisassavullu amerliartortarput. Pitsaanerussannginnerpa perpasuavit ilaat pigiunnaaginnarukkit?
Piffissaq piviusorsiortumik pilersaarusioraanni pitsaanerusumik atorneqarsinnaavoq. Taamatut piffissamik pilersaarusiornermi qasuersaarnissaq sukisaarsarnissarlu puiorneqassanngillat, anersaakkulli suliassat salliutinneqartariaqarlutik. Ilagiit ataatsimiinnerinut tamanut peqataanissamut piffissamik immikkoortitsisoqartariaqarpoq. Siumut aalajangereerneqarsinnaavoq ullut unnuillu suut oqaluussinissamut atorneqassasut. Peqqissaarlutit pilersaarusiornikkut immaqa oqaluussinermut peqataanerit annertusisissinnaavat immaqalu ilaannikkut ikiorti-pioneriusinnaasassallutit. Namminerli atuaqqissaarnissannut, ilaqutariit atuaqqissaaqatigiinnissaannut ataatsimiinnernullu piareersarnissamut piffissamik immikkoortitsinissat puiussanngilat. Piareersarsimaguit ataatsimiinneq pissarsiaqarfigineruinnarnagu aamma akisarnikkut ’asanninnermut ajunngitsuliornermullu kajumissaarinissannut’ sapinnginnerulissaatit. — Eprîarit 10:24.
Atuaqqissaarnissamut piffissaqartinniarneq immaqa pilliuteqarfiusariaqartarpoq. Assersuutigalugu, Betelini ilaqutariit nunarsuarmi sumi tamaaniittut ullormut allassimaffik oqaloqatigiissutiginiarlugu makiaartarput. Aamma illit atuaqqissaarniarlutit ullaakkut makiaartarsinnaanngilatit? Tussiaasiortoq ima oqarsimavoq: „Ullaannguakkut makittarpunga torlulallungalu ikioqqullunga, oqaatsisit tunaartaraakka.“ (Tussiaat 119:147) Ullaakkut makiaarsinnaajumalluni soorunami unnukkut kingusinaarnani innartariaqarpoq, ullup sinnerani qasuerluarsimalluni suliassat naammassisinnaajumallugit.
Jehovamut kiffartornermi ulapputeqarneq qanoq kinguneqartoq
’Naalakkami naammassisaqangaartuinnarneq’ pilersaarusiornermik, imminut aqussinnaanermik imminullu pilliutigeriaannaanermik pisariaqartitsivoq. Tamatumunngali taartitut pilluaqqussutisiassarpassuaqarpoq. Taamaattumik sulianik toqungasunik iluaqutaanngitsunillu imaqanngitsunik isumakulutsitsisartunillu pinnak, Jehovamut kiffartornermik ulapputeqarluarit. Taamaalioruit uppernerit ersersissavat, Guutimit iluarisaassallutit naggataatigullu inuuneq naassaanngitsoq angussallugu! (wD 1/7 92)
[Qupp. 30-mi assiliartaq]
Kristumiup piffissani isumatusaartumik pilersaarusioruniuk pitsaanerusumik atussavaa