Guutip naalagaaffiata ilinnut kingunerisinnaasai

JESUS KRISTUSIP ajoqersukkani ilinniartippai ima qinoqqullugit: ’Naalagaaffiit tikiulli.’ (Matîuse 6:10) Ila, qassinimmitaava Guuti Jesusimut malittaanerartunit taama qinnuigineqarsimava!

Jesusilli ajoqersukkani Guutip naalagaaffia pillugu qinusarnissaannik ajoqersuinnanngilai. Guutip naalagaaffia oqaluussissutigisaasa pingaarnerpaartaraat. Tassami, Encyclopædia Britannica-mi allassimavoq Guutip naalagaaffia ’Jesusip ajoqersuinerani tamatigut ersersinneqartartutut akuerineqartartoq’.

Kristusip malittaasa naalagaaffik qinnutigigaangamikku sunarpiaq qinnutigisarpaat? Guutip naalagaaffia taakkununnga ilinnullu qanoq isumaqarsinnaava? Jesusillu qanoq isigaa?

Jesusip naalagaaffimmik isiginninnera

Jesus imminut ’Inuup ernera’-nik taasarsimavoq. (Matîuse 10:23; 11:19; 16:28; 20:18, 28) Tamatuma Danielip „Inuup Ernera“-nik eqqartuineranik eqqaasippaatigut. Qilammi siunissami piumaartussaq pillugu Daniel ima allassimavoq: „Kingumut takusaqarpunga unnuami takorluuinikkut. Takuara qilaap nuiaasigut tikiuttoq Inuup Erneratut isikkoqartoq. Taassuma Ittuinnartup ornippaa taassumunngalu sassartitaalluni. Pissaanermik naalannaammillu naalagaassutsimillu tunineqarpoq; inuiaat, naggueqatigiit immikkullu oqaasillit tamarmik kiffartorfigissavaat.“ — Daniel 7:13, 14.

Nammineq naalakkersuinermik tunineqarfissani pillugu Jesusip apustilini ima oqarfigai: ’Ilissi uannik malinnittusi, pinngoqqiffimmi inuup ernera issiavissaarsuarmini naalannassutsimi piani issiappat ilississaaq issiassaasi issiavissaarsuarni aqqaneq-marlunni.’ Jesus aamma oqarsimavoq: ’Inuup Ernera naalannassutsi atisimallugu tikiukkuni, . . . inuiaat tamarsuarmik saanut katersorneqassapput, inuillu immikkoortitissavai, soorlu nersutaatinik paarsisup savat savaasanit immikkoortitertarai. . . . Aallarumaarpullu taakku naassaanngitsumik uternaveersitaassallutik, iluartulli naassaanngitsumik inuussallutik.’ — Matîuse 19:28; 25:31, 32, 46, NV.

Issiavissaarsuit naggueqatigiillu pillugit innersuussinerit siulittuutaasut tamakkua takutippaat Naalagaaffik tassaasoq naalakkersuineq Jesusimik taassumalu malittaasa ilaannik inuiannut naalakkersuisulik. Naalagaaffik tamanna naapertuilluanngitsut nungutinnissaannut pissaaneqassaaq. Aammali Naalagaaffiup ataani naapertuilluartumik isumallit Guutip inuunermik naassaanngitsumik tunissutaanik tunineqarumaarput.

Taamaammat Guutip naalagaaffia tassaavoq naalagaaffik qilammiusoq Guutimit pilersitaq. Tassaanngilaq ilagiit, silamiorpaluttumillu nassuiarneqarnera Bibelimi nassaarineqarsinnaanngilaq. Aammattaaq naalagaaffik Guutimeersoq tassaannaasinnaanngilaq inuup uummamiugisaa. Guutip naalagaaffia naalagaaffiugami tassaanngilaq kristumiunngornitsinni uummamiugiligarput. Soormitaava ilaat isumaqarpat Naalagaaffik tassaasoq uummammi pissuseq?

Naalagaaffik ilutsinniippa?

Ilaat isumaqarput Naalagaaffik uummamiugigipput Bibelimik nutserisut ilaasa Lúkarse 17:21-mik nutserisimanerat pissutigalugu. Bibeli kalaallisuunngortitaq atortussaatitaq naapertorlugu Jesus ima oqarpoq: ’Guutip naalagaaffia ilussinniippoq.’

Tamanna pillugu The Interpreter’s Dictionary of the Bible ima nassuiaavoq: „Jesusip ’nalunassusianik’ imaluunniit ’ilorlikkut pissusianik’ uppernarsaatitut tamanna issuarneqartaraluarpoq, kisianni nassuiaaneq tamanna eqqunngitsumik tunngaveqarpoq. . . . Jesusip tassani farisiiarit oqaluffigai — versi 20) . . . Isumaliuutip tamatuma, Guutip naalagaaffia tassaasoq isumap qanoq issusia imaluunniit inuup annaanneqarneranik pissusia, versimi tamatumani allassimasunut aammalu Testamentitaap tamanna pillugu ajoqersuutaanut akerliulluinnarpoq.“

New International Version-imi Lúkarse 17:21 pillugu quppernerup ataani nassuiaatip takutippaa Jesusip oqaasii ima nutserneqarsinnaasut: „Guutip naalagaaffia akornassinniippoq.“ Bibelimik nutsikkani allani ima allassimavoq: „Guutip naalagaaffia akornassinniippoq“ imaluunniit „akunnerpiassinniippoq“. (The New English Bible; The Jerusalem Bible; Revised Standard Version) Ny Verden-nutsigaq naapertussagaanni Jesus ima oqarsimavoq: „Guutip naalagaaffia akornassinniippoq.“ Jesus isumaqanngilaq farisiiarit pingaarniartut oqaluffigisami Naalagaaffik uummamiugigaat. Kisianni Jesus, Messias qangali utaqqisaasoq kunnginngortussaq, akunnerpiaanniippoq. Guutilli naalagaaffiata tikiuffissaanut suli piffissanngorsimanngikkallarpoq.

Qaqugu tikiutissava?

Jesus Kristusip malittaasa ilaat taassumunnga Naalagaaffimmi qilammiusumi Messiasikkoortumi naalakkersueqataasussatut qinigaapput. Jesusitut toqu tikillugu Guutimut aalajaapput qilammilu anersaakkut inuunissaminnut makititaallutik. (1 Pîtruse 3:18) Amerlavallaanngikkaluartut kunngit palasillu taakku 144.000-iusut inuiannit pisiarineqarsimapput. (sarĸúmersitat 14:1-4; 20:6) Jesusip naalakkersueqataanut taakkununnga apustilit ilapput. (Lúkarse 12:32)

Ilaanni Jesus malitsini ima neriorsorpai: ’Ukua maaniittut ilaasa inuup erneranik naalagaalluni aggersumik takutinnatik toqu misigissanngilaat.’ (Matîuse 16:28) Soqutiginartumik versip tulliuttup takutippaa Jesusip neriorsuutaa ullut ikittut tamatuma kingorna eqquussimasut. Ajoqersukkami ilaat pingasut qaqqamukaqatigai tassanilu taakkua isigitillugit allatut isikkoqalerpoq, taamaalillutik Naalagaaffimmi naalannassusissaanik takorruuipput. (Matîuse 17:1-9) Taamanikkulli Naalagaaffik pilersinneqanngikkallarpoq. Qaqugumitaava pissava?

Jesusip assersuusiaasa ilaata takutippaa erniinnarluinnaanngitsoq Messiasiulluni kunnginngussalluni. Lúkarse 19:11-15-imi ima atuarpugut: ’Aammattaaq assersuut oqaatigaa, tassa Jerusalem pallileramiuk isumaqarmatalu Guutip naalagaaffia [erniinnaq] ersersitaassasoq. Taamaattumik oqarpoq: „Inuk pingaartoq nunamut ungasissumut aallarpoq naalagaaffik pigilissallugu utissallunilu. Kiffamili ilaat qulit qaaqquai tunillugillu miininik qulinik oqarfigalugillu: ’Niuerniutigisigik tikitserlunga.’ . . . Pivorlu naalagaaffik pigilersimallugu tikikkami kiffani taakku aningaasanik tunisani qaaqqoqquai niuerniarnermikkut iluanaarutaat ilisimajumallugit.“’

Taamani angummut Romaliarneq, tassanilu kunngitut pissaanissaminik pinissaminut utaqqineq nunagisamullu uterneq piffissami sivisuumi ingerlasinnaavoq. Jesus tassaavoq ’inuk pingaartoq’. Ataataminit qilammiusumit kunngitut pissaanermik tunineqarpoq ingerlaannarli kunnginngunngilaq Messiasiusoq. Sivisungaatsiartumik malittai sulisariaqarput Naalagaaffik pillugu tusagassaq nuannersoq oqaluussissutigalugu, Kunngitut utertinnagu.

Naalagaaffik qanoq ililluni tikiutissasoq

Guutimik asannittut Naalagaaffiata tikiunnissaa qinnutigigaangamikku suna qinnutigisarpaat? Qinnutigisarpiaat tassa Naalagaaffiup qilammiusup inaarutaasumik iliornissaa naalagaaffiit inuit sanasimasaat eqqissinissamik atugarissaarnermillu piviusunik neriorsuutigisimasaminnik naammassinnissinnaanngitsut aserorlugit. Piumaartussat tamakku eqqarsaatigalugit pruffiiti Daniel ima allassimavoq: „Naalagaaffinnguit taakkua kunngii inuutillugit Guutip qilammiusup naalagaaffik qaqugumulluunniit atasussaq pilersikkumaarpaa, kingornalu inuiaat allat naalagaaffimmik pilersitsisinnaassanngillat. Guutip naalagaaffiata naalagaaffiit taakku tamaasa aserussavai sequmisillugit, namminerli soraajuitsumik atassaaq.“ (Daniel 2:44) Qaqugu pissava?

Jesusip siulittuutigaa kinguaariit nunarsuarmi allanngornermik immikkut ittumik misiginnittussat ulluini tamanna piumaartoq. ’Najuunnissaminut’ Jesusip ’nalunaaqut’ eqqartorpaa, nalunaaqut sorsunnernit siornagut asseqarsimanngitsunit, nunap sajuttarnerinit, kaannernit, nappaatinillu — aammalu nuna tamakkerlugu Guutip naalagaaffia pillugu tusagassamik nuannersumik oqaluussisarnermit — katitersimasoq. — Matîuse kapitalit 24, 25-lu; Mákorse kapitali 13; Lúkarse kapitali 21.

Jesusip siulittuutaata ullumikkut — ukiuni 1900-kkunni inuuffigisatsinni — pisartut ilannguppai. Taamaattumik Guutip naalagaaffiata qanittukkut inuiannut pilluaqqussuterpassuit pilersissavai. Illittaaq Naalagaaffiup naalakkersuineratigut pilluaqquneqarsinnaassaatit. Kisianni ilinnut asasannullu Guutip naalagaaffia qanorpiaq kinguneqarsinnaava?

Naalagaaffiup ataani pilluaqqussutissat

Nuannaarneq nunarsuaq tamakkerlugu ajugaassaaq. ’Qilaap nutaap’ — tassa Naalagaaffiup qilammiusup — ataani ’nutaamik nunaqassaaq’, tassa nunarsuaq tamakkerlugu inuiaqatigiit Naalagaaffimmut naalattut. ’Guutip nammineq najorumaarpai’, apustili Johannes taama allassimavoq. ’Qulliillu tamaasa isaannit allarterumaarpai.’ Taamanikkussaq nuannaarneq kisimi atuutissaaq, tassami ’aliasuttoqarunnaarlunilu nilliasoqarunnaarlunilu anniartoqarunnaassaaq.’ — sarĸúmersitat 21:1-4.

Toqu atorunnaassaaq. Aliasunnermut pissutip annilaarnartup tamatuma taamanikkussaq ikinngutitsinnik asasatsinnillu piiaaffigiunnaassavaatigut. ’Qinngarsuisut suujunnaarsitassat nunngutissaat tassa toqu.’ (1 Korintumiut 15:26) Ila, ilisinerit Guutip eqqaamasaasa makinnissaannik taarserneqarpata nuannissusissaa! — Juánase 5:28, 29.

Peqqilluinnassutsip nappaatit qajannaassuserlu taarsissavai. Taamanikkussaq napparsimmaviit timikkut isumakkullu nappaatilinnik ulikkaartut peqarunnaassapput. Jesus Kristusip, Ajorunnaarsitsisorsuup, utertitsissutitut pilliutimi nalinga ’inuiaqatigiit katsorsarnissaannut’ atussavaa. (sarĸúmersitat 22:1, 2; Matîuse 20:28; 1 Juánase 2:1, 2) Nunamiikkallarami ajorunnaarsitsisimaneri tassaannaapput Naalagaaffik aqqutigalugu iliuusissaanik siumut assersuutit. — Naleqqiukkit Jesaja 33:24; Matîuse 14:14.

Nerisassanik pilersuineq naammalluinnassaaq. Tussiaasiortup oqarsimaneratut, ’karrit naammangaartut nunami naasimassapput, qaqqat qaani aalataarumaarput’. (Tussiaat 72:16) Esajasip siulittuutaa ima ilaqarpoq: „Katersaarsuit Naalagaat [Jehova] qaqqami Sionimi inuiannik tamanik neriartortitsissaaq sassarlugit nerisassat pikkunartut viinnilu kimittooq, nerisassat patermik orsuarnequtillit viinnilu kimittooq pitsaalluinnartoq.“ (Jesaja 25:6) Aap, Naalagaaffiup ataani nunarsuarmiut kaannermit eqqorneqassanngillat.

Nunarsuaq tamarmi paratiisinngussaaq. Taamaalilluni Jesusip ajortuliortumut peqqissimisumut neriorsuutaa manna eqquutissaaq: „Paratiisimeeqatigiumaarparma.“ (Lúkarse 23:43, NV) Illittaaq nunarsuarmi matumani, ajussuseq piiarneqarsimalluni naatsiiviliarsuanngortumi atugarissaarfiusumi, inuuneq naassaanngitsoq nuannaarutigisinnaassavat. — Juánase 17:3.

Inuit naalattut tamarmik neriulluarsaarutinik tupinnartunik tamakkuninnga neqeroorfigineqarput. Jehovap oqaasia isumassarsiarititaasoq taama neriorsueqqissaarpoq. Tamakkuninnga tamanik Guutip naalagaaffia ilinnut kinguneqarsinnaassaaq. (wD 15/3 92)

[Qupp. 7-mi assiliartaq]

Jesusip Guutip naalagaaffia pillugu oqaasii upperaagit?