Pallorfiginnittut katersorneqarput

APUSTILI Johannes ’Naalakkap ulluani’ silarsuarmi piumaartussanik aalassannartunik takorluuisimavoq. Naalagaq Jesus Kristus qilammiittoq qimuttuarsummi qaqortumi — naapertuilluartumik sorsunnissamut assersuutaasumi — ’ajugaalluni ajugaassallunilu’ aallartoq takuaa. Siullermik Guutip akeraanera, Satan, qilammit nunarsuup eqqaanut igippaa. Akiniaalluni Satanip toqoraanersuakkut naleqanngitsukkut, kaannersuakkut nappaatikkullu inuiaat naalliutsippai, soorlu qimussersunik qimuttuarsunnillu — aappaluttumik, qernertumik sungaarpalaartumillu qalipaatillinnik — assersuutigineqartut. (sarĸúmersitat 1:10; 6:1-8; 12:9-12) Anniarnerit tamakku 1914-imi aallartipput ullumikkullu sakkortusiartuinnarlutik. Erniinnaq sakkortunerpaaffissartik angussavaat soorlu Jesusip ima allaatigigaa: ’Naalliunnartoqangaassaaq silarsuaqaleqqaarneranit mannalu tikillugu naleqanngisaannartumik kingornaluunniit naleqassanngitsumik.’ — Matîuse 24:3-8, 21.

Taamanikkussaq Jehovamik pallorfiginnittut qanoq issappat? sarĸúmersitat kapitali 7, versit 1-10-mi allaatigineqarput inngilit pissaaneqangaartut anorinik aserornartunik ’tigumiartut’ pallorfiginnittut taakku katersorneqareerserlugit. 1914-miilli Israelikkut anersaakkut ittut 144.000-iusut nunamiittortaat kingulliit katersorneqarput. Taavalu ’ata, amerlangaartut kisinneqarsinnaanngitsut, inuiaqatigiit immikkullu naggueqatigiissut immikkullu inuiaasut immikkullu oqaasillit tamarmik ilaat.’ Amerlangaartut taakku arlalinnik millionilinngoreerput. Jesusip, savaaqqatut pisuunngitsutut toqutaasup, aavanut utertitaasumut upperlutik sulillutik Guutip issiavissaarsuata saani qeqarput Guutimit iluarisaallutik. ’Nipituumillu torlulapput oqarlutik: „annaassut Guutitta issiavissaarsuarmi issiasup savaaqqallu pigaat.“’ Pallorfiginnittut ilungersortut taakkua allanut oqarput: ’Aggerna!’ Taakkuattaarlu katersorneqariartorput ’annikilliornartussamit angisuumit’ aniguisinnaaqqullugit. — sarĸúmersitat 7:14-17; 22:17.

’Nunarsuarmut tamarmut’

Pallorfiginnittut tunniulluinnarsimasut taakku ima allaatigineqarsinnaapput: ’Nipaat nunarsuarmut tamarmut oqaasiilu inuit najugaata isuinut tutsiupput.’ (Rûmamiut 10:18) Sulerulunnerat malunnartunik kinguneqarpoq. Assersuutigalugu:

Mexicomi Jehovamik pallorfiginnittut 335.965-t maanna sulipput, tassa ukiuni pingasuni kingullerni 100.000-nik amerlisimallutik! Sooq taama amerliartortigippat? Nalunaarutip matuma nassuiarsinnaavaa. Angut inuusuttoq Aureliomik atilik katuullit oqaluffianni kiffaavoq. Jehovap nalunaajaasui nunaqarfimmut takkukkaangata oqaluffiup siarnanik sianertarpoq inuit nalunaajaaffigineqarnissaannik akornusersorniarlugit. Kingorna pisiaraa Bibelimik nutsigaq katuullisooq Jerusalem Bible, atualerlugulu, paasinaguli. Ullut ilaanni ikinngunni Ny Verden-nutsikkamik nassartoq takuaa. Aureliop ikinngunni avoqqaaraa oqarfigalugu Bibeliutaa eqqunngitsuusoq, ilagalugulu angerlarpoq Bibelimik ’eqqortumik’ takutinniarlugu. Ikinngutaa oqarpoq: „2 Moses kapitali 20 atuarniariuk,“ anillunilu.

Oqaluffimmi kiffaasoq atualerpoq, 2 Mosesimik allakkat kapitali 1-mingaaniit kapitali 20-mi, versit 4 5-ilu tikillugit. Bibeliutimi katuullisuujusup assilissat pillugit oqaasertai atuaramigit uissuummeqaaq. Sapaammi tullermi naalagiareerami assilissat oqaasertai palasimut takutippai. Siullermik palasi oqarpoq nammineq assilissat ataqqinartiinnarlugit, pallorfiginagilli. Paasileramiuk Aureliup akissutini naammaginngikkaa palasip pasillerpaa Jehovap nalunaajaasui atuaqqissaaqatiginerarlugit. Aurelio naaggaarpoq nangillunilu oqarpoq: „Maannakkut taamaaliussaanga!“

Nalunaajaasut nunaqarfimmut tikeqqimmata, Aureliop atassuteqarfigai Bibelimillu atuaqqissaaqatigilerlugit. Oqaluffimmi suliunnaarpoq qaammatillu pingasut tamatuma kingorna Jehovap nalunaajaasui oqaluusseqatigisinnaalerpai. Illu pulaarfigisaa siulleq tassaavoq palasip illua, taassumalu takullugu oqaluffimmi kiffaasimagaluartoq Naalagaaffimmik oqaluussisartunngorsimasoq upperisinnaannginngajappaa. Ilagiinnit ilaasortaajunnaarnissaanik palasip sioorasaarpaa, Aureliolli oqarfigaa tamanna pisariaqanngitsoq nammineq ilagiinnit anereersimagami. Qunusuissusia nunaqarfimmiut arlallit Jehovap nalunaajaasuinik atuaqqissaaqateqartareersut kajumississutigaat. Aurelio nunaqarfimmiullu allat 21-t aasakkut ataatsimeersuarnermi tulliuttumi kuisipput. Nunami tassani amerliartorneq ima sukkatigaaq utoqqaanertaq kuisittussanik kuisinnissamut apeqqutissanik uteqqeeqatiginnissinnaasoq ataasiinnaq naammakkunnaavilluni.

’Nipaat tutsiuppoq’

Naalagaaffimmik oqaluussinermit qimaaffissaqanngilaq. Italiamiu katuuliusoq Jehovap nalunaajaasuinit pulaarfigineqaraangami uumitsattaqaaq. Taava suliffiminit Singaporemut nuutsinneqarami isumaqarpoq pulaarfigineqaqqinnaviarani. Tupigusullunili paasivaa tassanissaaq nalunaajaasoqartoq. Taamaattumik qimmit marluk kiisortut nalunaajaasunik saassussissutissani pissarsiarai. Nalunaajaasut marluk taassuma angerlarsimaffianut aggermata qimmit taakku pangalillutik tungaannut aallarput. Annilaarlutik arnat qimaapput aqqusernit paarlangaffiinut tamarmik immikkut qimaallutik. Qimmit ilaata angummani nalunaajaasup aappaata annilaangaarluni pooqattaminit atuagassiaaqqat marluk tigunasuarpai qimmillu qarnanut ammasumut mangullugit. Taava qimmip malersorunnaarpaa uterlunilu angerlarluni.

Sapaatip-akunnerata tulliani nalunaajaasut marluk taakku aqqusernup tamatuma illua-tungaani pulaarfigisaqarput. Qimminik piginnittup illup silataaniilluni tupaallannartumik arnat kutaarpai illuminullu qaaqqullugit. Oqaluttuuppai Jehovap nalunaajaasui oqaloqatigisimanngisaannarlugit naqitigaataallu atuarsimanagit. Qimmimili aappaata atuagassiaaqqat kimmiai nanigamigit tupigusussimavoq. Unnukkut atuagassiaaqqat atuarsimavai killitsissutigisimallugillu. Naak inuunini tamaat katuuliusimagaluarluni Jehovap nalunaajaasui Bibelimik atuaqqissaaqatigerusulerpai.

Kingorna angut taanna Italiamut nuutseqqinneqarmat tassani Jehovap nalunaajaasuinik atuaqqissaaqatigineqarnissaa aaqqissorneqarpoq. Taanna nulialu ataatsimiinnernut najuuttalermata najugaqarfianni palasip kamangaarluni sioorasaarpai. Naatsiivitsik ikuallatinneqarmat oqaluffik atassuteqarfigiunnaavippaat. Angut maanna oqarpoq: „Ilaquttama ilaat amerlasuut oqaluussiffigereersimavakka paasitikkusukkakkit Jehova tassaasoq Guuti ilumoortutuaq.“

’Inuit najugaata isuinut’

Nunap isuisa ilaannit misigisimasap allap takutippaa Naalagaaffimmik tusagassaq qanoq pingaartinneqartigisoq inuillu inuunerat allanngortissinnaallugu. Nalunaajaasup Australiamiup erninissamut piareersaqatigiinnut ilaasup naapippaa arnaq arlalinnik ileqqupilulik, allaat naartutilluni pujortartarunnaarumanngitsoq. Arnap taassuma pissusia nalunaajaasup ernummatigaa. Ataatsikkut napparsimmavimmi ineqatigiillutik ernigamik oqaloqatigiissinnaapput. Paasinarpoq arnaq meeraanerminit ajornartorsiuteqartorujussuusoq, maannakkullu uinilu avinnialersaartut. Taamaattumik napparsimmavimmit angerlarmat nalunaajaasup arnaq taanna pulaarpaa Bibelimillu atuaqqissaaqatigilerlugu, atuagaq Ilaqutariilluni inuuneq pilluarnartoq qanoq anguneqarsinnaasoq atorlugu.

Arnap taassuma uiata Guuti qinnuigisimavaa eqqortumik upperisarsiorneq naniteqqullugu, ima nangaassuteqaraluarluni: „Qanortoq tassaanngikkilit Jehovap Nalunaajaasui“! Taamaattorli paasigamiuk nuliani nalunaajaasut atuaqqissaaqatigisarai apersortalerpoq, atuaqqissaaqataanissaminullu kajumissaarneqarluni. Taamaaliorpoq, erniinnarlu ilagiit ataatsimiinneri najuuffigisalerlugit. Maannakkut tamarmik kuisissimapput, aappariinnerallu pitsaanerujussuuvoq.

Atuakkat taamaattut atorlugit angerlarsimaffinni atuaqqissaaqatigiittarneq ikiortigalugu pallorfiginnittut nutaat amerlasuut katersorneqartarput. Nunat ilaanni Jehovap nalunaajaasuisa mumisitsinerit, nunap inuisa imminnut sorsuunnerat, imaluunniit naalakkersuisunit inerteqqutit atugassarisariaqartarpaat, taamaattorli Bibelimik atuaqqissaaqatigiinnermik sulinerat siumukarsimavoq. Angolami innuttat ukiorpassuarni imminnut sorsuussimapput, nalunaajaasullu malersorneqaqalutik annikilliortitaasarsimaqaat. 1991-ip aallartilernerani oqaluussisartut 14.000-t sinneqartut Bibelimik atuaqqissaaqatigiinnerit 40.000-init amerlanerusut nalunaarutigisimavaat, atuagassialli Bibelilersaarutaasut amigaataapput. Nakkutilliisut angalasartut ullut tamaasa oqaluussisartualuit pulaartarpaat, ullukkut oqaluusseqatigisarlugit unnukkullu ataatsimeeqatigisarlugit! Akeqqersimaarnerit naammata Sydafrikamillu atuagassiat Bibelilersaarutaasut tonsit 42-t pisariaqavissut nassiunneqarmata nuannissusia! Qularnanngitsumik qatanngutit taakkua asanninnerat ’ilisarsinermik sianinernillu tamanik ilaqangaaleriartuinnassaaq’ maanna ’soorliit iluarnersut misilittarsinnaagamikkik.’ (Filípimiut 1:9, 10) Ila, naammanngaartunik Bibelimik atuaqqissaarnissamut ikiuutissallit kajumissaarneqarput Jehovap tukkorluni pilersitai atorluarniaqqullugit! — 1 Timûtiuse 4:15, 16.

Pallorfiginnittut aalajaatsut taakkua nuannaarnerata Jesusip Qaqqami oqaluutsimini oqaasiinik eqqaasippaatigut: ’[Pilluarput anersaakkut ittunik pisariaqartitaqarnerminnik miserratiginninngitsut, NV] qilammiup naalagaaffia pigigamikku. . . . Pilluarput iluarneq pissutigalugu qinugineqartut, qilammiup naalagaaffia pigigamikku. . . . Tipaatsullusi qiimmattaritsi, akissarsiassarsi angeqimmat qilammi.’ (Matîuse 5:3-12) Ila, Angolami katersorneqareersut amerlammata!

Nunanilu allani Jehovap Nalunaajaasuisa sulinerannik killilersuinerit oqinnerulerput imaluunniit kipitinneqarlutik. Jesus taamanikkut ima oqarpoq: ’Katersugassat amerlaqaat, sulisussalli ikeqaat.’ (Matîuse 9:37) Ullumikkut tamanna ilumoorpoq! Tamatigut sulisussat amerlanerusut pisariaqartarput. Nuannaarutigaarput katersugassanik katersuineq pallorfiginninnitsinnut ilaammat. Ullumikkut tunniulluinnarluni Jehova Guuti kinguneqarluartumik kiffartorfigalugu tassa nunarsuarmi nuannaarutaasoq annerpaaq.

Suulli Jehovamik pallorfiginnittut nuannaarnermut ilungersornermullu taama ittunut killittarpaat? Paasiumaarparput. (wD 1/1 92)