„Ilisimassavaat uanga tassaasunga Jehova“
„Atera illernartoq illernassusiiagaajunnaarsissavara; inuiaqatigiillu ilisimassavaat uanga tassaasunga Jehova.“ — Hisi̇̃kiale 39:7, NV.
1, 2. Qanoq nalunngissinnaavarput Jehovap atimi illernartup illernassusiiagaanera ilaginnaannassanngikkaa?
JEHOVAP aqqa illernartoq Israelikkunnit itsaq inuusimasunit illernassusiiagaavoq. Tamanna Hisĩkialip agdlagai-nit erseqqissarneqarpoq. Aammattaarli kristumiuuneraqatigiinnut ilaasortat Guutip pallorfiginerakkamik aqqa illernassusiiarpaat.
2 Qilammi nunamilu Kisimi Oqartussaasup atimi illernassusiiagaanera ilaginnaannassavaa? Naagga, imami nalunaarsimavoq: „Atera illernartoq illernassusiiagaajunnaarsissavara; inuiaqatigiillu ilisimassavaat uanga tassaasunga Jehova.“ (Hisĩkiale 39:7, NV; aamma takuuk Hisĩkiale 38:23.) Tamanna qanoq kinguneqassava? Aamma Hisĩkialip agdlagai-sa kapitalii kingulliit sumik ilinniarfigineqarsinnaappat?
Siulittuutit allanut tunngasut
3. (a) Judakkut naalliungaarmata inuiaqatigiit allat qanoq qisuariarpat? (b) Qanoq anersaaqarnini pissutigalugu Tyrusip ’kunngia’ peerneqarpa, tamatumalu uagut qanoq isumaqalersissavaatigut?
3 Jerusalemip aserorneqarnerata kingornagut Ammonikkut avoqqaarineqarput Judakkut naalliunneri pillugit nuannaarnertik ersersissimagamikku, Moabikkullu avoqqaarineqarput Juda asissorsimagamikku. Edomikkut naakkittaatsuunerarneqarput, filisterillu akiniaajumatuugamik Guutimit ’kamannersuup piinik’ inerterneqarput. (Hisĩkiale 25:1-17; ússatit 24:17, 18) Jerusalemip atugarliungaarnera tipaatsuutigisimagamiuk illoqarfik Tyrus Nebukadnezarimit imaluunniit Nebukadrezarimit (aqqata taama allanneqarnera Babylonimiorpalunneruvoq) piuneerunneqarumaarpoq. (Hisĩkiale 26:1-21) Assigaa umiarsuaq kiveqqajaasoq. (Hisĩkiale 27:1-36) Tyrusip ’kunngia’ (tassaannguatsiarpoq kunngit kinguaariiusut) Satanisut pingaarniarnermik anersaaqarnini pissutigalugu peersinneqarpoq. (Hisĩkiale 28:1-26) Uagut mianersortariaqarpugut ajortuliorluta makitanaveersaarluta, Jehovap aqqa illernassusiiagaatinnaveersaarlugu. — Tussiaat 138:6; ússatit 21:4.
4. Faraop Ægyptenillu suna atugassaraat?
4 Ezekielip siulittuutigaa Ægyptenip ukiuni 40-ni piuneerussaaqqanissaa. Jehovap Tyrusimut eqqartuussutaanik sakkutooqarnikkut naammassinneqataagami Ægyptenip pisuussutai Nebukadrezarip akissarsiarissavai. (Hisĩkiale 29:1-21) Ægyptenimiut siammartinneqarnerat Jehovap isumagimmagu, ’ilisimassavaat taannaasoq Jehova’. (Hisĩkiale 30:1-26) Ægyptenimut sinniisuulluni Farao pingaarniartoq orpimmut siterimut portusuumut killorneqarumaartussamut assersuunneqarpoq. (Hisĩkiale 31:1-18) Naggataatigut Farao kiisalu Ægyptenip Sheolimiilernissaa Ezekielip upputigai. — Hisĩkiale 32:1-32.
Alapernaarsuisup pisussaaffia
5. (a) Qanoq iliorpat aatsaat anersaakkut alapernaarsuisoq Guutip iluarissavaa? (b) ’Ileqqussanik inuussutaasunik ingerlaviginninneq’ qanoq paasisariaqarpa?
5 Ezekiel alapernaarsuisutut pisussaaffimminik eqqaasinneqarpoq. (Hisĩkiale 33:1-7) Anersaakkut alapernaarsuisup pisussaaffini eqqortippagu iluaatsullu mianersoqquppagit soorunami aatsaat Guutip taanna iluarissavaa. (Hisĩkiale 33:8, 9 atuakkit.) Ezekielitut katersat ’alapernaarsuisutut’ ittut tanitaasut Guutip mianersoqqussutai nakimaatsumik nalunaarutigisarpaat. Iluaatsut toqussappata Guutip iluarinnginnamiuk, mianersoqqussutit naalappatigik ’ileqqussallu inuussutaasut ingerlavigippatigik’ ajortuliarisimasaat taakkununnga naatsorsuutigissanngilai. Ezekielip nalaani ileqqussanik tamakkuninnga ingerlaviginninneq tassaavoq Mosesip inatsisaanik maleruaaneq, ullumikkulli tassaavoq Kristusip utertitsissutaanik ilassinninneq taassuminngalu malinninneq. (1 Pîtruse 2:21) Guuti eqqartuusseriaatsimigut akileeriaatsimigullu naapertuilluanngitsumik iliorneq ajorpoq, taassumalu inassutaanik maleruaagutta aatsaat ’annikilliornartussamit angisuumit’ aniguisinneqarumaarpugut. — Hisĩkiale 33:10-20; Matîuse 24:21; sarĸúmersitat 7:14.
6. Ullumikkut inuppassuit Ezekielip nalaani juutitut aallarussaasutut qanoq isumaqartarpat?
6 607 u.n.a.s. naalersoq Jerusalemip aserornera qimaasup oqariartuutigaa, taavalu Jehovap tusarliuteqqusaa Ezekielip oqaatigeqqippaa. (Hisĩkiale 33:21-29) Aallarussaasut qanoq qisuariarpat? (Hisĩkiale 33:30-33 atuakkit.) Ullumikkut inuppassuit assigaat juutit aallarussaasut Ezekielimik „erinniukkamik asanninnilersaarutaasumik“ (NV) erinarsortutut isiginnittut. Tanitat ilagisaallu illumiit illumut angalaarlutik takkukkaangata, inuit taama isumaqartut Naalagaaffik pillugu tusarliussaq tusarnersutut isigaat ilassinaguli. Erinniukkatut asanninnilersaarutaasutut isigaat, Jehovamulli tunniulluinnarumanngillat, aammalu ’annikilliornartussami angisuumi’ aniguinaviarnatik.
Jehovap ’paarsisunngortitaa ataasiusoq’
7. Jehovap ullumikkut iliuuserisimasai suut Ezekielip ulluini savaatiminut iliuuserisimasaanut assinguppat?
7 ’Israelip paarisai’ naalakkersuinikkut pisortaasut, aterminik illernartumik illernassusiiaasut, Jerusalemip aserornerata kingornagut Ezekielimut tusarliussamigut Jehovap avoqqaarai. Oqaatsit taakku kristumiuuneraqatigiinni pisortanut naleqqulluaqaat! (Hisĩkiale 34:1-6 atuakkit.) ’Paarsisoq ajunngitsoq,’ Jesus Kristus, assiginagu kristumiuuneraqatigiit iluini naalakkersuinikkut pisortaasut ’savat’ nunap piisigut iluanaarniapiluffigaat. (Juánase 10:9-15) Soorluli Judap aserorneqarneragut paarsisut namminissarsiortut pissaaneerukkamigit Guutip savaatini aniguisissimagai, taamattaaq savaatini aniguiseqqikkumaarpai ’annikilliornartussami angisuumi’ kristumiuuneraqatigiinni naalakkersuinikkut pisortat oqartussaaffeerukkunigit. (sarĸúmersitat 16:14-16; 19:11-21) Jehovap innuttaminik savatut ittuusunik asanninneq nittarpaa 537-mi u.n.a.s. Babylonimit aniguisikkamigit, aamma asannissutsi ersersippaa Kyros pingaarneq, Jesus Kristus, kiffaralugu Israelimut anersaakkut ittumut sinneruttut Babylonimit Angisuumit 1919-imi inussiaajunnaarsikkamigit. — Hisĩkiale 34:7-14.
8. ’Sava pualasooq’ savarpannik naqisimannissagaluarpat Jehova qanoq iliussagaluarpa, paarsisullu ikiortaasut kristumiuusut savat qanoq pisariaqarpaat?
8 Guutip savaatini asannittumik isumassorpai. (Hisĩkiale 34:15, 16 atuakkit.) Ullumikkut ’sava pualasooq’ Guutip savaataanik naqisimannissappat, Jehovap ilagiinnut ilaasortaajunnaarsikkumaarpaa kiisalu ’annikilliornartumi angisuumi’ suujunnaarsikkumaarlugu. 1914-imi Jehovap ’paarsisussaq ataasiusoq’, Jesus Kristus, tanitaasunut sinneruttunut qullersanngortippaa. 1935-miilli taassuma ’savanik allanik’ ’amerlangaartunik’ katersuineq nakkutigisaraa, maannalu katersukkat taakkua ’savaatit Jehovap paarisai’ tanitaasut kiffartuusseqatigaat. Guuti Kristusilu assigalugit, kristumiut paarsisutut ikiortaasut savat taakku tamaasa qajassuussisumik pisariaqarpaat. — Hisĩkiale 34:17-31; sarĸúmersitat 7:9; Juánase 10:16; Tussiaat 23:1-4; apustilit suliait 20:28-30.
’Edenip naatsiiviatut’ ittoq!
9. Jehova aalajangersimagami Judap Israelillu nunaat sapaatisiortussaasoq, qanoq iliorpa?
9 Judakkut Israelikkullu nunaat piuneerussaasimasoq eqqarsaatigeqqeriartigu. Aalajangersimagamiuk nuna taanna ukiuni 70-ini inoqannginnermigut sapaatisiussasoq, Guutip isumagaa Edomikkut inuiaqatigiillu allat tassani najugaqannginnissaat. (nalunaerssûtigdlit áipait 36:19-21; Dâniale 9:2) Siulittuutigineqarneratut Edom Seirillu qaqqai aamma piuneerunneqarput 602-601-imi u.n.a.s. Babylonimiunit ajugaaffigineqaramik. — Hisĩkiale 35:1–36:5; Jerimia 25:15-26.
10. Sinneruttut 537-mi u.n.a.s. Judamut utertitaanerat uagut ullutsinni pisunut sunut tikkuartuiva?
10 537-mi u.n.a.s. sinneruttut Judamut uternerat uagut ullutsinni piumaartussanut pissanganartunut tikkuartuivoq. 1919-imi ’Israelip qaqqai’, tassa Jehovap nalunaajaasuisa tanitaasut anersaakkut issusiat, sinneruttunit anersaakkut uummaqqitsitaasunit najugarineqaleqqipput. (Hisĩkiale 36:6-15) Guutip upperisarsiornikkut minguiarpai ’anernerlu [anersaarlu] nutaaq’ iluannut tunniullugu anersaap iluartup inerititaanik inerititaqarsinnaanngortillugit. (Galâsiamiut 5:22, 23) Innuttaminillu sukannernerusumik perorsaasimanera pissutigalugu Jehovap aqqa illernartoq silamiunit illernassusiiarneqassanngimmat, sinneruttut pilluaqqungaarsimavai. — Hisĩkiale 36:16-32.
11. Hisĩkiale 36:33-36 naapertorlugu tanitanut sinneruttut anersaakkut issusiat Guutip qanoq pivaa?
11 Sinneruttut Judamut utereersimammata, nuna inuerussimagaluartoq taanna „Edenip naatsiiviatut“ (NV) ilerpoq. (Hisĩkiale 36:33-36 atuakkit.) Taamatut 1919-imiilli sinneruttut tanitaasut pisussaaffigisaat piuneerussaasimagaluartoq Jehovap anersaakkut paratiisinngortissimavaa inerititaqangaartoq, ’amerlangaartut’ peqataaffigisaat. Anersaakkut paratiisi tamanna inunnit iluartunit inoqalersimammat, kristumiut tunniulluinnarsimasut tamarmik immikkut ilungersortariaqarput minguitsuujuaqqullugu. — Hisĩkiale 36:37, 38.
Ataasiussuseq atulerseqqinneqartoq
12. Itsarsuaq inuiaqatigiit juutit uummarsagaanerat Hisĩkiale 37:1-14-imi assersuutikkut qanoq ersersinneqarpa, tamatumunngalu assingusumik ullumikkut suna pisimava?
12 Babylonimi tigusaaqqanermi juutit inuiattut toqungasutut ipput, saanikutut qoororsuarmiittutut. (Hisĩkiale 37:1-4) Tulliulluguli Ezekiel sumik takusaqarpa? (Hisĩkiale 37:5-10 atuakkit.) Saanikut taakku ujalunik, uinimmik amermillu pilersorneqarput anersaarnermillu uumassutaasumik uummarsarneqarlutik. (Hisĩkiale 37:11-14) Guutip inuiaqatigiit juutit makitippai inuit 42.360-it Israelip naggueqatigiissortaanit tamaneersut Israelikkuunngitsullu 7500-t missaat Judap nunaani najugaqaleqqinnissaminnut, Jerusalemimik tassanilu naalaffimmik qarmaqqiinissaminnut eqqortumillu pallorfiginninnermik nunavimminni pilersitseqqinnissaminnut periarfissaqalermata. (Esra 1:1-4; 2:64, 65) Aamma Israelimut anersaakkut ittumut sinneruttut malersugaasut 1918-imi saanikutut ilersimapput — inuit tutsaanni nalunaajaanertik eqqarsaatigalugu toqutaagamik. 1919-imili Naalagaaffimmik tusarliisutut Jehovap uummarsarpai. (sarĸúmersitat 11:7-12) Itsarsuaq pisimasumut assingusumik ukiuni nutaanerusuni pisimasup tamatuma tatiginninnerulersissavaatigut tanitat taakku ilagisaallu tassaasut nunami peqatigiiffik Jehovap ullumikkut kiffarisaa. — Takuuk 1975 Yearbook of Jehovah’s Witnesses, qupperneq 87-125.
13. Itsarsuaq Jehovap innuttaasa akornanni peqatigiiffikkoortumik ataasiussuseqaleqqinneq Hisĩkiale 37:15-20-mi qanoq assersuusiarineqarpa, tamatumunngalu assingusumik sumik pisoqarsimava?
13 Itsarsuaq Jehovap innuttaasa peqatigiiffikkoortumik ataasiussuseqaleqqinnissaat qanoq assersuunneqarpa? (Hisĩkiale 37:15-20 atuakkit.) Qisuit marluk (aappaa naalagaaffimmik Judamik naggueqatigiit marluk piannik allannilik aappaalu naalagaaffimmik Israelimik naggueqatigiit qulit piannik allannilik) ataasinngortitaanerannut assingusumik ullumikkut pisoqarsimavoq. Sorsunnersuup siulliup nalaani angutit namminissarsiorlutik angusaqarumatuut Guutip kiffaasa ataasiussusiat aserorniarsarivaat, 1919-imili tanitat aalajaatsut Kristusip, ’kunngiata ataatsip’ ’paarsisuatalu ataatsip’, ataani ataasinngortinneqarput. Aamma Israelikkuunngitsut 7500-nit amerlanerusut Judamut utersimasut assigalugit ’amerlangaartunut’ ilaasut maanna tanitanit sinneruttut ataasioqatigaat. Anersaakkut paratiisimiilluta, ’kunngerput ataasiusoq’ kunngigalugu ataasiussuseqarlutalu Jehovamik kiffartuussinerput ila nuanningaarami! — Hisĩkiale 37:21-28.
Gog saassussivoq!
14. Gog Magogimeersoq kinaava, qanorlu iliussava? (Hisĩkiale 38:1-17)
14 Tulliullugu piumaartussaq ilungersornartoq siulittuutigineqarpoq. Guutip aqqa illernartoq illernassusiiarumallugu innuttaalu aserorumallugit Gogip Magogimeersup Israelimut anersaakkut ittumut, ’arnamut’ Jehovap pianut, tassa qilammi peqatigiiffianut, sinniisuusumut sinneruttut saassutissavai. (sarĸúmersitat 12:1-17) Gog tassaavoq ’silarsuup matuma naalagaa’, Satan Diaavulu. Gogimik atserneqarpoq Naalagaaffiup 1914-imi pilersinneqarnerata kingornagut qilammit iginneqareernermigut. (Juánase 12:31) ’Magog’ tassaavoq Gogip inngilipiluisalu killiliiffigisaallutik nunarsuup eqqaani inissisimaffiat. Upperisarsiornermut akerliusut pissaanillit kristumiuuneraqatigiit Babylonillu Angisuup sinnera aseroreerpassuk, Jehovap Gog Israelimut anersaakkut ittumut sinneruttunut akiuussinnaassuseqarunanngitsunut taakkualu ilagisaannut tunniulluinnarsimasunut saatsikkumaarpaa. — Hisĩkiale 38:1-17; sarĸúmersitat 17:12-14.
15. Jehovap Nalunaajaasui Gogip saassutilerpagit qanoq pisoqassava?
15 Jehovap Nalunaajaasui Gogip saassutilerpagit sumik pisoqassava? (Hisĩkiale 38:18-23 atuakkit.) Jehovap innuttani annaakkumaarpai! Sialussuit, qarsutsinerit, nataqqornarnersuit, innersuaq nappaalanersuillu sakkugissavai. Paatsiveerullutik Gogip ilerpassuisa pannatik iliminnut saatsissavaat. Guutimilli suujunnaarsinneqanngikkallarnerminni ’pinngitsoornatik ilisimassavaat taannaasoq Jehova’.
16. (a) ’Magog’ qanoq pineqassava? (b) Gog pillugu piumaartussanik ilisimannikkatta qanoq qisuariassaagut?
16 Satan inngilipiluilu itinersuarmut igitaareerpata ’Magog’, tassa nikanarsagaallutik nunarsuup eqqaani najugaat, peqarunnaassaaq takkuteqqissanani. (sarĸúmersitat 20:1-3) Gogip sorsunnermut sakkussamaatai amerlaqimmata piffissaq sivisooq atortariaqassaaq nungusarnissaannut. Gogip ilerpassuisa timaat toqungasut timmissat uumasullu nerersuataassavaat. Tamakku nalunnginnatsigik qanoq qisuariassaagut? Gogip saassussinissaa qaneqisoq Jehovallu innuttaminik annaassinissaa ilisimagatsigu uppernitta nakussatsissutigisariaqarpaa, piumaartussallu tamakku Guutip aqqata illernartup imungarsuaq illernassusiiagaasimasup illernarsisinneqarnissaanik kinguneqassammata tipaatsuutigissavarput! — Hisĩkiale 39:1-29.
Jehovap naalaffiutaa
17. (a) 593-mi u.n.a.s. Ezekiel sumik takorruuisinneqarpa? (b) Naalaffiup takorruugaasup piunera sumut uppernarsaataava?
17 593-imi u.n.a.s. Jerusalemimi naalaffiup aserornerata kingornagut ukiut 14-issaanni, Jehovamik pallorfiginninnermut naalaffimmik nutaamik Ezekiel takusaqartinneqarpoq. Inngilip Ezekielimik angallassisup naalaffimmik uuttuinera naapertorlugu angisoorujussuuvoq. (Hisĩkiale 40:1–48:35) Naalaffik taanna assersuutaavoq ’tupermut piviusumut Jehovap nappartitaanut’, tassaniippullu ’qilaap pii missingiutaasut’. Ukiumi 33-mi Jesus Kristus illernarnerpaartaanut, ’qilammut’, iserpoq pilliutigisami utertitsissutaasup nalinga Guutimut tunniukkiartorlugu. (Eprîarit 8:2; 9:23, 24) Naalaffimmik taassuminnga takorruuinerup uppernarsarpaa minguitsumik pallorfiginninneq Gogip saassussineranit aniguiumaartoq. Jehovap aqqanik nuannarisaqartunut ila tuppallernassusia!
18. Naalaffik takorruugaq qanoq oqaluttuarineqarpa?
18 Naalaffik assigiinngitsorpassuarnik pisataqarpoq. Assersuutigalugu qarmarsuini avallerni ilorlernilu isaaffiit arfiniliupput. (Hisĩkiale 40:6-35) Silarliani, tassa kaajaluisaani, avallermi nerisarfiit (inuit tunissutinik qujaniutissanik nerrinnerannut atortagaagunartut) 30-upput. (40:17) Tunisivik ikikkaavik kaajaluisami ilorlermiippoq. (43:13-17) Tunisivik qisuusoq, tipigissaatilliisarfiugunartoq, naalaffiup inaani sallermiippoq. (41:21, 22) Illernarnerpaaq tamakkerluni 20 aleniuvoq, naalaffillu avatangerlugu qarmarsuaq tamakkerluni sullortuusut 500-sut (1600 meterit) isorartussuseqarpoq. Illorsuup Guutip naalannassusianik tamakkigaasup ila alutornassusia! — Hisĩkiale 41:4; 42:16-20; 43:1-7.
19. Naalaffiup erseqqilluinnartumik oqaluttuarineqarnera tassanilu kiffartortut Guutip najoqqutassiaanik naammassinnittariaqarnerat uagutsinnut sumut kajumissutaava?
19 Naalaffik, pilliutit nalliussiviillu erseqqilluinnartumik paasissutissiifigineqarnerata puiutsaalissavaatigut Guutip peqatigiiffiata tungaanit unnersuussutinik maleruaaqqissaarnerup qanoq pingaaruteqartigineranik, sapinngisarpullu tamaat Jehova taassuminngalu pallorfiginninneq naalannarsisittariaqarivut. (Hisĩkiale 45:13-25; 46:12-20) Naalaffimmi kiffartortut Guutip najoqqutassiai qutsissut maleruartariaqarpaat, inuillu ajoqersortariaqarlugit ’illernartullu nalinginnaasullu mingunnartullu mingunnaatsullu immikkoorsusiisigut ilisareqqullugit’. (Hisĩkiale 44:15, 16, 23) Tamatuma kajumissaassavaatigut Jehovap innuttaasut illernartuuniarnissatsinnut. — Evfisumiut 1:3, 4.
20. (a) Imeq naalaffimmit takorruugaasumit kuuttoq sumut assersuutaava? (b) Imeq assersuutaasoq tamanna sumik sunniuteqassava?
20 Naalaffimminngaanniit kuuttoqarpoq Immap Uumaatsup ernginik tarajornitsunik peqqinnalersitsisumik, tassa tarajornitsuujunnaarsitsisumik, taamaalillunilu aalisagalissuanngortitsisumik. (Hisĩkiale 47:1-11) Imeq tamanna assersuutaavoq Guutip inuunermut naassaanngitsumut periarfissiaanut, ilaatigut Jesusip pilliutaanut, Gogip saassussineranit aniguiumaartussanut aammattaaq allanut, soorlu makittussanut, naammattorsuarnut. (Juánase 5:28, 29; 1 Juánase 2:2; sarĸúmersitat 22:1, 2) Imaq Uumaatsoq assersuutaavoq pissutsinut inuiaat inuuffigisimasaannut — ajortimik kingornussaqarneq, toqu Satanimillu naalakkersugaaneq. Immap Uumaatsup erngini tarajornitsuujunnaarsitaasuni aalisagarpassuartut, Messiasip naalakkersuinerata ataani pissutsit ajorunnaarsitaasut iluaqutigalugit inuiaat utertitaasut amerliartorlutillu peqqissiartorumaarput.
21. Hisĩkiale 47:12 naapertorlugu inuiaat naalattut silarsuarmi nutaassami suna angussavaat?
21 Aamma orpiit kuussuup takorruugaasup sinaani illuttut naasut ajorunnaarsitsinermut tunngatinneqarput. (Hisĩkiale 47:12 atuaruk.) Silarsuarmi nutaassami inuiaat naalattut timikkut anersaakkullu naammalluinnartumik peqqissuseqassapput. Soorunami taamaassaaq, orpiimmi paarnaqartartut takorruugaasut pilutaat ajorunnaarsitsissutaapput. Jehovamik ilisimannittunut kiffartuussisunullu pilluaqqussutissat ila annertussusii!
Taava ilisimassavaat!
22. Suup takutitsiarpaa Paratiisimi Guutip piumasani naapertorlugu inuit inississagai?
22 Jehovap peqatigiiffia maannakkut suleqatigigutsigu taava Guuti piumasani malillugu nunami paratiisimi inunnik inissiippat suleqatigiuminarnerussaagut. Inunnik inissiisoqarumaarnissaa Ezekielip takorruugaanit paasineqarsinnaavoq: Israelip naggueqatigiissortai aqqaneq- marluusut tamarmik immikkut nakkutilliisoqarfiup avannaata tungaani kujataatalu tungaani nunassinneqarput. ’Tunissummi’ pingasunik immikkoortitalimmi Levikkut palasiunngitsut nunaqarput palasillu immikkut nunaqarput, tassaniipporlu naalaffik Ezekielip takorruugaa. Kujalliup qiterpiaaniippoq illoqarfik, tassanilu sulisartut Israelip naggueqatigiissortaanit aqqaneq- marluusuneerput, siulersuisoraallu ’siulersuisoq’ katitigaasoq. Siulersuisoq assersuutaavoq Messiasip ’nunami nutaami’ naalagarsuanngortitaanut. — Hisĩkiale 47:13–48:34; 2 Pîtruse 3:13; Tussiaat 45:16.
23. Inuiaat utertitaasimasut Paratiisimi inuusut ilagissagutsigik maanna qanoq iliortariaqarpugut?
23 Naalaffimmini qilammiittumi issiavissaarsuarmini issialluni illoqarfik assersuutaasoq Ezekielip takorruugaa Guutip pilluaqqujumaarpaa. (Hisĩkiale 48:35 atuaruk.) Nunami nakkutilliisoqarfik taaneqassaaq Jehova- shammah, isumalik „Jehova nammineq tassaniippoq“ (NV). Guutimik allanit tamanit annerusumik asanninnerit nittartuarukku, taava inuiaat utertitaasut Paratiisimi inuunermik tunineqartut ilagiumaarpatit, taamanikkussami nunami inoqassanngilaq anersaakkut taartumiittumik, tamarmilli ilisimassavaat Jehova tassaasoq Guuti uumasutuaq ilumoortutuarlu. (Hâpakuk 2:14) Guutip aqqanik ilisimannillutit pinngitsaalisaaqinak iluaatsut aserorpata. Uppernermik suliaqarit takutitsillutit aniguisussat ilagiumagitit Jehovap oqaatsit uku eqquutippagit: „Inuiaqatigiit ilisimassavaat uanga tassaasunga Jehova.“ — Hisĩkiale 36:23, NV. (wD 15/9 88)
Qanoq akissavit?
□ Qanoq ilioruni aatsaat anersaakkut alapernaarsuisoq Jehovamit akuerineqassava?
□ Jehovap savaatini qanoq pisarpai, paarsisullu kristumiuusut taakku qanoq pisariaqarpaat?
□ Inuiaqatigiit juutit uummarsagaanerat qanoq assersuusiarineqarpa? (Hisĩkiale 37:1-14) Tamanna ullumikkut pisimasumut sumut assingua?
□ Gog Magogimeersoq kinaava, Jehovap Nalunaajaasuilu saassutilerpagit qanoq pisoqassava?
□ Imeq naalaffimmit takorruugaasumit kuuttoq sumut assersuutaava?
[Qupp. 11-mi assiliartaq]
Itsaq savanik paarsisutut Jehovap savaatini asannittumik isumassorpai. Taamaattumik paarsisut kristumiuusut Guutip savaatai qajassuussisumik pisassavaat
[Qupp. 13-mi assiliartaq]
Tunissut illernartoq naggueqatigiillu aqqaneq- marluusut nunaat