Tusarnaarit Jehovap alapernaarsuisuutitaa oqaluppoq!

’Israelikkunnut alapernaarsuisuutippakkit; . . . inertertassavatit uannit.’ — Hisi̇̃kiale 3:17.

1. Jehovap ’alapernaarsuisuutitaa’ oqalukkaangat suna pillugu tusarnaartariaqarpugut?

JEHOVAP ’alapernaarsuisuutitaata’ Guutip tusarliuteqqusaa maannakkorpiaq oqaluutigaa. Illit tusarnaarpit? Tusarliussaq tamanna pingaartikkukku suliaqarnikkullu ilassigukku aatsaat inuujuarsinnaassaatit. Ungasinngitsukkut ’inuiaqatigiit Jehova ilisarilissavaat’ aaqqissuussaanermik ajortumik suujunnaarsitsinermigut innuttaminillu annaassinermigut aqqi illernartoq illernarsisippagu. Illit annattussanut ilaarusuppit? (Hisĩkiale 36:23; 39:7; 2 Pîtruse 3:8-13) Ilaasinnaavutit, aatsaalli Jehovap ’alapernaarsuisuutitaa’ oqalukkaangat tusarnaartarukku.

2. Guutip pruffiitiinut tusarnaarneq ajoramik Judap naalagaaffiamiut sumik atugaqarpat?

² Innuttai Guutip pruffiitiinut tusarnaarneq ajoramik, Judami naalagaaffik ukiumi 607-imi u.n.a.s. piuneerunneqarpoq. Babylonimiunit piuneerussaanera inuiaqatigiit akeraasut nuannaapiluutigaat. Jehovalli aqqa naalannarsisitaangaarpoq Guutip juutit aalajaatsut ukiumi 537-mi u.n.a.s. nunaviannut utertimmagit!

3. Hisĩkialip agdlagai-sa suut imaraat?

³ Piuneerunneqarneq iluarseqqissinneqarnerlu taama ittut Jehovap alapernaarsuisuutitaanit Ezekielimit siulittuutigineqarsimapput. Bibelip atuagartaasa, Hisĩkialip agdlagai- sa, taassuma Babylonimi ukioq 591 u.n.a.s. naatinnagu allagaasa, uku imaraat: (1) Ezekielip pruffiitinngortitaanera; (2) isiginnaagassiat siulittuutaasut; (3) Israelimut avoqqaarinnissutit; (4) Jerusalemip eqqartuunneqarnissaanut ilimasaarutit; (5) inuiaqatigiinnut allanut siulittuutit; (6) iluarseqqissitaanissamik neriorsuutit; (7) Gogimut Magogimeersumut siulittuut; kiisalu (8) Guutip illernartuutaanik takorruuineq. Allakkanik tamakkuninnga atuaqqissaarnitsinni innersuukkumavassi immikkoortut pineqartut atuartaqqullugit. Taava ullumikkut tamakkua uatsinnut attuumassuteqarneri paasissavatit Jehovallu ’alapernaarsuisuutitaa’ oqalutsillugu tusarnaassallutit.a

Guutip alapernaarsuisuutitaa toqqarneqartoq

4. (a) Takorruuilluni Ezekiel sumik takusaqarpa? (b) ’Uumasut’ kikkuuppat, sunillu pissuseqarlutik?

⁴ Tammuzip ulluisa tallimaanni, 613-imi u.n.a.s. (Judap kunngiata Jojakinip Babylonimi aallarussaaqqanerata ukiuisa tallimaanni), palasi 30-nik ukiulik Ezekiel juutit aallarussaasimasut allat ilagalugit ’kuussuup Kebarip’, Eufratip sulluisa ilaata pingaartup, sinaaniippoq. Takorruuinermigut takuai qamutitut ittut qilammiittut Jehovap pii ’uumasunik sisamanik’ ilaqartut. (Hisĩkiale 1:4-10 atuakkit.) ’Uumasut sisamaasut,’ imaluunniit keerubit sulullit, tamarmik immikkut sisamanik kiinaqarput. (10:1-20; 11:22) Kiinnat taakkua ersersitsiarpaat keerubit pissuserigaat asannissuseq Guutimeersoq (inuk), naapertuilluassuseq (liiveq), nakuussuseq (ussik), ilisimassuserlu (nattoralik). Keerubit tamarmik immikkut ’assakaasup angisoorujussuup assakaasup qeqqaniittup’ eqqaaniipput, Guutillu anersaavata, tassa pissaanerata sulissutiginnittartup, suulluunniit tungaanut ingerlatissinnaasarpai. — Hisĩkiale 1:1-21.

5. Qamutitut ittut qilammiittut sumut assersuutaappat, takorruukkallu tamatuma Jehovap innuttai qanoq isumaqalersissavai?

⁵ Qamutinik ingerlatitsisoq Jehovamut naalannangaarluni ersiutaavoq. (Hisĩkiale 1:22-28 atuakkit.) Qamutit Guutip anersaakkut peqatigiiffianut inngiliinik ilaqartumut assersuutaapput pitsaasut. (Tussiaat 18:11; 103:20, 21; Dâniale 7:9, 10) Jehovap qamuternera ima paasisariaqarpoq uumasut taakku naalakkersorai siunertanilu naapertorlugu kiffarigai. Naak qamutertoq eqqissisimagaluartoq, soorlu neriusaaq malitsigisaa eqqissisimanermut eqqaanartuusoq, Ezekielip takusani sapersissutigai. Jehovap kiffarpassuaminik qilammiusunik Aaqqissuussiffiginnittutut Qutsinnerpaasutut naalannassusianik aammalu pissaaneranik tamatumuuna takusaq eqqarsaatigalugu nunami peqatigiiffianut ilaalluta taassuminnga kiffartuussinitsinnik immikkut pisinnaatitaaffipput maniguulluta qujamasuutigisariaqarparput.

6. (a) Ezekiel sunngortitaava, Guutimullu kiffartorneq qanoq isigalugu? (b) Inuit qanoq ittut akornanni Ezekiel siulittuisariaqarpa, Guutillu taassuminnga qanoq iliorfiginnissimanera ilisimagatsigu uagut qanoq ilillugu iluaqutigisinnaavarput?

⁶ ’Inuup qitornaa’-nik taagorneqarnermigut naak inuunerminik nikanartuunerminillu eqqaasinneqaraluarluni, Ezekiel Jehovamit pruffiitinngortinneqarpoq. (Hisĩkiale 2:1-5 atuakkit.) Ezekiel ’inunnut oqaatseriitsunut’, naalagaaffinnut Israelimut Judamullu, aallartitaavoq. Siullermik, Guutip peqqusineratigut allagaq imusaq aliasunnernik allaffigisimasoq nerivaa, tungusunnipporli Ezekielip Guutimut pruffiitiunini qujamasuutigimmagu. Taamatut, kristumiut tanitaasut kiffaqataasalu Jehovamut nalunaajaasuunertik kajungeraat. Ezekiel inuit killisseriitsut uteriitsullu akornanni siulittueqqusaavoq, Guutilli taassuma kiinaa taakkua kiinaannut manngertigisunngortippaa, qaavalu aligoqqittut manngertigisunngortillugu. Nakimaatsumik siulittuisussaavoq, tusarnaaraluarpata tusarnaanngikkaluarpataluunniit. Kajumissinaqaaq ilisimallugu, soorlu Guutip Ezekiel atugarlioraangat napatittarsimagaa, aammattaaq uagut oqaluussiffigisassavut qanoq ittuugaluarpataluunniit Guutip ikiortassagaatigut ersisuilluta nalunaajaanitsinni. — Hisĩkiale 2:6-imiit 3:11 ilanngullugu.

7. Ezekielip pruffiitinngortitaanera akisussaanermik sumik nassarpa?

⁷ Allagaq imusaq nerigamiuk Ezekiel ’anernermigut assut katsungaarsorpoq’ tusarliussassamut imarisaanut naleqqulluartumik. Ullut arfineq- marluk Tel- abibimiippoq ’isummamigut aserorsimalluni’, tusarliussassaq eqqarsaatigeqqissaarlugu. (Hisĩkiale 3:12-15) Uaguttaaq peqqissaartumik atuaqqissaartariaqarpugut eqqissisimallutalu atuariikkatsinnik eqqarsaatiginneqqissaartariaqarluta anersaamut tunngasut itinerusut paasiniarlugit. Tusarliussassaqarami Ezekiel Guutimit alapernaarsuisuutitanngorpoq. (Hisĩkiale 3: 16-21 atuakkit.) Alapernaarsuisuutitanngoqqammersup Israelikkut mianersoqqusariaqarpai inatsisaanik unioqqutitsigunik Guutimit toqutassaatinneqarnissaannik.

8. Ullumikkut kikkut Jehovap ’alapernaarsuisuutitaatut’ kiffartorpat, kikkullu taakku suleqatigaat?

⁸ Ezekielip alapernaarsuisuutitatut pisussaassutsi asuliinnaraluarpagu, toqutat inuunerannik Jehovap taanna akisussaatissagaluarpaa. Pillagaarusunngitsut naak assersuutikkut allunaasanik qilersussagaluaraanni, taamaakkaluartoq Guutip tusarliuteqqusaa nakimaatsumik tusarliuttuassavaa. (Hisĩkiale 3:22-27) Ullumikkut kristumiuuneraqatigiit tusarnaarumanngillat kristumiullu tanitat killiliiffiginiarsaralugit. 1919-imiilli tanitat taakku Jehovap ’alapernaarsuisuutitaatut’ kiffartorput, aaqqissuussaanerup matuma ’naggatissaata nalaa’ pillugu taassuma tusarliuteqqusaa ersisuitsumik saqqummiuttarlugu. (Dâniale 12:4) Tamatumani Jesusip ’savaatai allat’ ’amerlangaartut’ amerliartuinnartut suleqatigaat. (sarĸúmersitat 7:9, 10; Juánase 10:16) Katersat ’alapernaarsuisuutitat’ Guutip tusarliuteqqusaa nalunaarutigiuaannarmassuk, soorunami tanitat ’amerlangaartunullu’ ilaasut tamarmik immikkut qaammatit tamaasa oqaluussisartutut aamma taamaaliortuarumassapput.

Siulittuutit isiginnaagassiaasut

9. (a) Qanoq ililluni Ezekiel uatsinnut maligassiuiva? (b) Jerusalemip Babylonimiunit ungusaanissaa takutinniarlugu Ezekiel qanoq iliuuseqarpa, ullullu 390-it ullullu 40-t sunut assersuutaappat?

⁹ Tulliullugu Ezekielip isiginnaagassiat siulittuutaasut maniguulluni nakimaallunilu isiginnaartitsissutigai, tassuuna maligassiuilluni uagutsinnut kaammattuutaasumik Guutip suliareqqusaanik maniguulluta tatituullutalu naammassinninniarnitsinni. Babylonimiut illoqarfimmik ungusinissaat takutinniarlugu qarmasissiaq Jerusalemip assinganik kigartuiffigineqarsimasoq saallugu nalasariaqarpoq. Naalagaaffiup Israelip naggueqatigiit qulit piata ajortulinerinut nanertortissalluni ullut 390-it saamiup tungaanut innassaaq, taavalu ullut 40-t talerpiup tungaanut innassalluni naalagaaffiup Judap naggueqatigiit marluk piata ajortulinerinut nanertortissalluni. Ulloq ataaseq ukiumik naleqartitaasaraaq. Ukiut 390-it Israelip 997-imi u.n.a.s. naalagaaffinngorneranit aallartipput Jerusalemip 607-imi u.n.a.s. piuneerussaanerani naallutik. Judamut ukiut 40-t Jeremiasip Guutip pruffiitiatut 647-mi u.n.a.s. atorfinitsitaaneranit aallartipput 607-imi u.n.a.s. Judap piuneerussaanerani naallutik. — Hisĩkiale 4:1-8; Jerimia 1:1-3.

10. Ungusaanissap kinguneri Ezekielip qanoq ilillugit isiginnaartitsissutigai, Guutillu taassuminnga napatitsisimanera uagut qanoq ilinniarfigisinnaavarput?

¹⁰ Tulliullugu Ezekielip ungusaanerup kinguneri isiginnaartitsissutigai. Jerusalemimi inuussutissaaleqineqarnissaq takutinniarlugu ullormut nerisassat 200 grammit missaat imerlu literip affaa taamaallaat inuussutigai. Iffiaataa (qajuusiassanit, suaasiassanit, eertaasanit, qaqquaasanit, torranit iffiassanillu sanaaq, inatsisit naapertorlugit akooqqusaanngitsut, annallu qisugalugit siatassaasoq) mingunnartuuvoq. (3 Môrsase 19:19) Taamaaliornerata ersersippaa Jerusalemimiut annikilliortorujussuussasut. Qiimmassaataassusiali ilisimagatsigu, soorlu Jehovap Ezekiel annikilliornerani napatittaraa, sumilluunniit annikillioraluarutta Guutip ikiorumaaraatigut aalajaattuaqqulluta oqaluussissutigeqqusarlu naammassisinnaaqqullugu! — Hisĩkiale 4:9-17.

11. (a) Hisĩkiale 5:1-4-mi suut oqaluttuarisaappat, qanorlu paasisariaqarlutik? (b) Ezekielip isiginnaartitsissutigisai Guutip eqquutimmagit uagut qanoq isumaqassaagut?

¹¹ Tulliullugu pana (NV) atorlugu Ezekiel nujaajarpoq unngiarlunilu. (Hisĩkiale 5:1-4 atuakkit.) Kaannersuaq nappaalanersuarlu pissutigalugit toqusut assersuunneqarput pruffiitip nujaasa aggornerisa pingajuinut Jerusalemip qeqqani ikuallatsissimasaanut. Sorsunnermi toqutat assersuunneqarput nujaasa aggornerisa pingajuinut panarsimasaanut. Amiakkuullutik inuusut inuiaqatigiit akornannut siammarterneqassapput nujaasa aggornerisa pingajuisut anorimut teqqartitaasutut. Nunaminnilli aallarussaasut ilaasa assigissavaat nujarpaalunnguit siammarterneqartussanit immikkoortitat Ezekielillu atisaanut qilerussat, tamanna assersuutaammat ukiut 70-it piuneerussaaqqaneq naammassippat taakkua Judami eqqortumik pallorfiginninneq nangeqqissagaat. (Hisĩkiale 5:5-17) Jehovap tamanna isiginnaagassiallu siulittuutaasut allat eqquutimmagit taassuminnga siulittuutinik Eqquutitsisutut tatiginnissutigissavarput. — Isaia 42:9; 55:11.

Piuneerussaanissaq nalliutilersoq!

12. (a) Hisĩkiale 6:1-7-imi allassimasup takutitsiarpaa nunamut isaasut qanoq iliorumaarnissaat? (b) Ezekielip siulittuutaa naapertorlugu Jerusalem illua- tungiliuttoq sunaaava, naggataatigullu Jerusalem illua- tungiliuttoq qanoq pineqassava?

¹² 613-imi u.n.a.s. Ezekielip nuna saaffigaa Judamiut guutipilussiortartut atugassaat nalunarunnaarsinniarlugit. (Hisĩkiale 6:1-7 atuakkit.) Pilliisarfiit, tipigissaatilliisarfiit tunisarfiillu eqqunngitsumik pallorfiginninnermi atortagaasut nunamut isaasunit aserorterneqassapput. Kaannersuakkut, nappaalanersuakkut sorsunnikkullu piuneerunneqarnissap eqqarsaatigiinnarlugit oqassapput: ’Eqqanaq!’ tamannalu erseqqissartassavaat assatik ersaartarlugit isikkatillu tukkartarlugit. Anersaakkut kanngunartuliortarsimasut timaat toqungasut pilliisarfinni tamani tamaaniissapput. Kristumiuuneraqatigiit, tassaasoq Jerusalem illua- tungiliuttoq, taamatut piuneerunneqalerunik, ilisimassavaat ajunaartitaanertik Jehovamit nalliutsitaasoq. — Hisĩkiale 6:8-14.

13. ’Unataat’ Jehovap assaaniittoq sunaava, atorneqarnissaatalu suna kingunerissavaa?

¹³ ’Naggatissaq qallilerpoq nunap tungaanut sisamanut,’ tassaavoq Judap ilumuunngitsulilluni upperisarsiornermik aaqqissuussaaneranut. Ajunaarnerit ’kaajallaattutut’ ittut guutipilussiortup niaqua ungussavaat ’unataat’ Guutip assaaniittoq — tassa Nebukadnezar Babylonimiullu sakkutoorpassui — Jehovap innuttaanik naalaffiutaanillu saassussilerpata. Judap ’inuppassuinut’ pisiniartunut tuniniaasunullu ilaasut toqunneqanngikkunik aallarunneqassapput, aniguisoortullu assaat annilaanganermit nakkangassapput. Eqqunngitsumik upperisarsiornermik aaqqissuussaanertik piuneerunneqarpat, aliasunnermit assersuutikkut niaqqutik nujaarutivillugit nujaajaassapput. — Hisĩkiale 7:1-18.

14. Naak akiliilluni isertortukkut ikiortissarsiortoqaraluarpat Jerusalemimut qanoq kinguneqarsinnaasimanngila, tamannalu kristumiuuneraqatigiinnut qanoq isumaqassava?

¹⁴ Jehova eqqartuussutinillu naammassinnitsitai akissarsillutik peqquserluttulisussanngortikkumanngillat. (Hisĩkiale 7:19 atuaruk.) Naak akiliilluni isertortukkut ikiortissarsisoqaraluartoq, ’isertugaq’, tassa naalaffimmi illernarnerpaaq, nalinginnaatinneqarnaveersaarneqarsinnaanngilaq ’ujajaasut’ Kaldæamiut atortunik illernartunik tigusimmata naalaffillu piuneerutimmassuk. ’Pissaasut makitassusiat’ Jehovap ’soraarsippaa’ kunngi Zedekias tigusarineqarmat palaseqatigiillu Levikkuusut pisortaat toqunneqarmata. (kúnginik agdlagkat áipait 25:4-7, 18-21) Aap, ajortulisut Jerusalemimi ungusaasumi ittut akiliillutik isertortukkut ikiortissarsiniaraluarlutik annikilliortitaanermit aniguisinnaanngillat ’angerutsimik unioqqutitsisutut’ Guutimit eqqartuunneqaramik. Aammalu, kristumiuuneraqatigiit illernartuutitai qanittukkut nalinginnaatinneqalerpata, Guutip eqqartuussutaanik naammassinniffigineqarnissartik akiliillutik isertortukkut pinngitsoortinniarsinnaanngilaat. Taamanikkussaq Jehovap ’alapernaarsuisuutitaanut’ tusarnaalernissamut kingusippallaalersimassaaq. — Hisĩkiale 7:20-27.

Narrujuumminartut pillugit aliasunneq

15. Ezekiel Jerusalemimi sunik takusaqarpa, tamakkulu eqqarsaatigalugit uagut qanoq isumaqassaagut?

¹⁵ Ukiumi 612-imi u.n.a.s. elulip tallimaanni Guutip naalannassusianik Ezekiel takorruuimmat, ’assattut asseqartup nujaasigut tiguaa’ isumassarsisitsinerullu anersaavagut Jerusalemimukaallugu. Qamutitut ittut qilammiittut tassunngareersimapput. Ezekielip tassani takusaasa tunussisimasunut tusarnaarnissap eqqarsaatiginissaannaanilluunniit nigorusulersissavaatigut. (ússatit 11:9) Naalaffimmi Israelikkut tunussisimasut guutipiluk (immaqa nappagaq illernartoq) Guutimik ilungersortitsisoq (sinngasaarisoq, NV) pallorfigaat. (2 Môrsase 20:2-6) Kaajaluissamut ilorlermut iserluni Ezekielip takusaasa ila maajunnassusii! (Hisĩkiale 8: 10, 11 atuakkit.) Israelikkut utoqqaanertaasa ilaasa 70-it guutipiluit qarmamut kigartugaasutut maajunnartutut assiliarineqartut tipigissaatilliiffigimmatigik ila kanngunassusia! — Hisĩkiale 8:1-12.

16. Tunussinerup kinguneri pillugit Ezekielip takorruugaata qanoq takutippaa?

¹⁶ Ezekielip takorruugaata takutippaa tunussinerup anersaakkut qanoq toqussutaatigissusia. Israelikkut arnartaat kimigiiserfigineqarsimapput Tammuz, Babylonimiut guutiisa ilaat qitornigajussusermullu guutiutitap Isjtarip asasaa, qiassutigeqqullugu. Angutillu Israelikkut 25-t naalaffiup kaajaluisaani ilorlermiittut seqineq pallorfigigaat takullugit ila maajunnassusia! (5 Môrsase 4: 15-19) Aammalu naarlaaq kanngunartoq, immaqa angutip kinguaassiuutaasut saqqummiussaq, Guutip qingaanut isaappaat. Tupinnanngilaq qinnutaat Jehovap tusarumanngimmagit, soorluttaaq ’annikilliornissami angisuumi’ kristumiuuneraqatigiit Guutimut ikioqqulussinnassasut! — Hisĩkiale 8: 13-18; Matîuse 24:21.

Annaanneqarnissamut nalunaaqutsigaasut

17. Angutit arfineq- marluk kikkut takuneqarpat, qanorlu iliorlutik?

¹⁷ Tulliullugu angutit arfineq- marluk takkupput. Ilaat meqquluaatsumik qaqortumik annoraalik allattup pooqattaanik nassarpoq, ilaalu arfinillit sequmitsimmik tigumiaqarput. (Hisĩkiale 9:1-7 atuakkit.) ’Angutit arfiniliusut’ assersuutaapput Jehovap eqqartuussutiminik naammassinnittuutitaanut qilammiittunut, aammattaarli nunamiusut atorsinnaavai. Inuit angutip ’meqquluaatsumik qaqortumik annoraallip’ qaavisigut nalunaaqutsigai Guutimit qajassuunneqartussaapput narrujuumminartut naalaffimi suliarisaasut iluarinnginnamikkik. ’Angutit arfinillit’ eqqartuussummik naammassinninnertik naalaffimmi aallartippaat utoqqaanertat guutipilussiortut 70-it, arnat Tammuzimut qiasut, kiisalu seqinersiortut 25-t toqoraramikkik. Taakku allallu Guutimut ilumuunngitsulisut 607-imi u.n.a.s. Babylonimiunit toqunneqarput.

18. (a) Angut ’meqquluaatsumik qaqortumik annoraalik’ ullumikkut kikkunnut assersuutaava? (b) Sunaana ’nalunaaqut’, maannakkut kikkut nalunaaqutsigaappat, nalunaaqutsigaanerlu qanoq kinguneqassava?

¹⁸ Angut ’meqquluaatsumik qaqortumik annoraalik’ assersuutaavoq kristumiunut katersanut tanitaasunut. Taakku illumiit illumut angalaartarput Kristusip ’savaataanut allanut’ ’amerlangaartunut’ ilaasortanngortut assersuutikkut nalunaaqutseriartorlugit. ’Nalunaaqut’ savat taakkua tunniulluinnarsimanerannut, kuisimasuunerannut aammalu Kristusitut pissuseqarnerannut takussutaavoq. Narrujuumminartut kristumiuuneraqatigiit iluini suliarisaasut pillugit ’aliasullutillu erloqipput’, aammalu Babylon Angisuumit, eqqunngitsumik upperisarsiornerup silarsuarmi tamarmi naalagaaffissuanit, anisimallutik. (sarĸúmersitat 18:4, 5) ’Nalunaaqutsersimanerat’ takulerunikku Guutip eqqartuussutiminik naammassinnittuutitaasa paasissavaat ’annikilliornartumi angisuumi’ qajassuunneqartussaasut. ’Nalunaaqutsersimanertik’ ataavartissinnaassavaat tanitat suleqatigalugit allanik nalunaaqutsiiartorlutik. Taava, illit ’nalunaaqutsigaaguit’, aallussilluarlutit allanik ’nalunaaqutseeqataagit’. — Hisĩkiale 9:8-11.

Innikkut piuneerussinissaq

19. Angut ’meqquluaatsumik qaqortumik annoraalik’ ullumikkut kristumiuuneraqatigiinni tamani sunik siaruarteriva?

¹⁹ Angut meqquluaatsumik qaqortumik annoraalik qamutitut ittut qilammiittut assakaasuisa akornannukarpoq aamanik ikumasunik tigusiartorluni. Aamat ikumasut Jerusalemimut siaruarterneqarput, siumut ilisimatinniarlugu piuneerunneqarnissaa Guutip kamanneranut katsungaatsumut malunniutaassasoq. (Hisĩkiale 10:1-8; úputit 2:2-4; 4:11) Ezekielip nalaani Jehovap kamannera Babylonimiut sakkugalugit kuerarneqarpoq. (nalunaerssûtigdlit áipait 36:15-21; Jerimia 25:9-11) Ullutsinnimi? Angutip ’meqquluaatsumik qaqortumik annoraallip’ illua- tungiliuttup Guutip tusarliuteqqusaa ikumasoq kristumiuuneraqatigiinnut tamanut siaruartertuarpaa, siumut ilisimatinniarlugit qanittukkut taakku aamma Babylon Angisuumut ilaasut allat tamarmik Guutip kamanneranit eqqorneqarumaartut. Jehovap ’alapernaarsuisuutitaanut’ tusarnaarumanngitsut soorunami annaanneqarnissartik ilimagisinnaanngilaat. — Isaia 61:1, 2; sarĸúmersitat 18:8-10, 20.

20. (a) Qamutitut ittut qilammiittut assakaasuisa keerubillu imminnut aaqqiagiinnerata qanoq kissaateqalissavaatigut? (b) Naalagarsuit ilaat qanoq iliorpat, Jerusalemilu sumut kukkusumik assersuullugu?

²⁰ Qamutitut ittut qilammiittut, tassa Guutip peqatigiiffia qilammiittoq, sammineqaqqilerput. Qamutit assakaasuisa keerubillu imminnut aaqqiagiinnerat malugigatsigu, kissaateqalissaagut Guutip nunami peqatigiiffia suleqatigilluarumallugu. Taassumunnga ilumoornermit aamma angutinut ilumuunngitsunut illersorumassavarput. (Hisĩkiale 10:9-22) Ezekielip nalaani taama ittunik inoqarpoq, taassumami takuai naalagarsuit naalakkersuisuusut 25-t Ægyptenimiut ikiortiginiarlugit Guutip eqqartuussutiminik naammassinnittuutitaanut pikitsitsinissaminnik pilersaarusiortut. Taakkua Jerusalem igamut assersuuppaat, namminnerlu uuigisaallutik, illoqarfiup iluani isumannaatsumiillutik. Ila kukkungaaramik! Babylonimiut ’takornartaapput’ ’pana’ atorlugu peqqusersusaarniaqatigiit ilaannik toqutsisussat, pillarneqartulli ilaat aallarunneqartussaapput juutit Guutip angerusianik unioqqutitsisimanertik pissutigalugu Guutimit nassueqquneqalerunik. (Hisĩkiale 11:1-13; 2 Môrsase 19:1-8; 24:1-7; Jerimia 52:24-27) Kristumiuuneraqatigiit Guuti angerfigeqatigineraramikku taamaattorli silamiunik iligiinnerit tatigisaramikkik, Jehovap eqqartuussutiminik naammassinnittuutitai saassussilerpata piuneerunneqassapput.

21. Judap ukiuni 70-ini piuneerussaaqqanerata kingornagut sumik pisoqarpa, taamatullu ineriartorneq suna tanitaasunut sinneruttunut sunniuteqarpa?

²¹ Naak Israelikkut ’nunanut siammartitaasimagaluarlutik’, soorlu 617-imi u.n.a.s., aallarussaasimasut peqqissimisut Guuti ’illernartuutigaat’, imaluunniit qimarnguffigaat. (Hisĩkiale 11:14-16) Allamilli ilimagisaqarpat? (Hisĩkiale 11:17-21 atuakkit.) Judap ukiuni 70-ini piuneerussaaqqanerata kingornagut, sinneruttut ’Israelip nunaanut’ minguiagaasumut utertinneqarput. Taamatut, Babylonimi tigusaaqqanermik kingorna sinneruttut tanitaasut 1919-imi aniguisitaapput, Guutillu anersaavata siulersuineratigut anersaakkut Israelip ’nunaa’ piuneerussaagaluartoq minguiarneqarpoq. Taamaattumik annaanneqarnissaminnut nalunaaqutsigaasut maannakkut, anersaakkut Israelikkut sinneruttut iluarseqqissitaasut peqatigalugit, Guutimut iluarisaanertik nuannaarutigaat. Aammalu, Guutip ’alapernaarsuisuutitaa’ tusarnaartuarukku, Jehovap pannani amuppagu annatsitaasut immaqa ilagissavaatsit. (wD 15/9 88)

[Quppernerup ataani ilanngussaq]

Uku eqqaamavigit?

□ Suna pillugu tusarnaartariaqarpugut Jehovap ’alapernaarsuisuutitaa’ oqalukkaangat?

□ Qamutitut ittut qilammiittut Jehovap pii sumut assersuutaappat?

□ Ullumikkut kikkut Jehovap ’alapernaarsuisuutitaatut’ kiffartorpat?

□ Tunussisut qanoq iliorneri Ezekielip Jerusalemimi takuai, takorruukkallu tamatuma uagut qanoq sunnissavaatigut?

□ Angut ’meqquluaatsumik qaqortumik annoraalik’ ullumikkut kinaava, inuillu qaavisigut nalunaaqutsiineratigut nalunaaqut sunaava?