Avinneq Bibelimi qanorpiaq oqaatigineqarpa?

’GUUTIP katititai inuup avissaartissanngilai.’ (Matîuse 19:6) Jesus Kristusip oqaasii ilisimaneqarluartut tamakku katititsinermi issuarneqarajupput.

Taama oqarnermigut Jesus isumaqarpa aappariinnerit tamarmik aappariit inuunerat naallugu ataavartussaasut aappariillu suugaluartorluunniit patsisigalugu aveqqusaanngitsut? Oqaatsit tamakku attavigisaannit avissaartillugit atuarneqarunik taama paasineqarsinnaagaluarput. Sunali pissutigalugu Jesus taamatut oqarpa? Taama oqarnermigut nutaamik najoqqutassiorpa?

’Pileqqaarneranit taamaanngilaq’

Farisiiarit aperimmanni: ’Inuup nulii suna nalinginnaq patsisigalugu avikkuniuk iluarpa?’ Jesusip oqaatsit matuma siuliani issuagaasut akissumminut ilaatippai. (Matîuse 19:3-6) Akissutaa naammaginnginnamikku farisiiarit apereqqippaat: ’Soormi taava Moses allakkanik avissutissanik tuniseqqusiva arnaq aveqqullugu?’ Akissummini Jesus oqarpoq: ’Uummatisi manngertorsuummata Mosesip akueraasi nuliasi aveqqullugit; pileqqaarneranilli taamaanngilaq.’ Taava oqaatsini ima ilavai: ’Uanga oqarfigaassi: Nuliaminik uersanngitsumik [patsit alla kanngunartuliornerunngitsoq patsisigalugu, NV] avittoq allamik nuliaruni arnaaneqarpoq [tassa: allasiorpoq].’ — Matîuse 19:7-9.

Malugisariaqarparput oqarami ’pileqqaarneranit taamaanngitsoq’ Jesusip pigaa allakkanik avissutissanik tunisinikkut avittarneq. Allatut oqaatigalugu, Adam Evalu katitillugit Guuti katititseqqaarami ’suna nalinginnaq patsisigalugu’ avissinnaatinngilai. Tamarmik naammalluinnartuugamik pilluarlutik aappariinnissaminnut pissutissaqarluarput. Guutip inatsisai siulersuineralu malillugit inuusimagaluarunik aappariinnerminni pilluarsimassagaluarput.

Inuit ajortuliormata naammalluinnanngitsunngorlutillu, aappariinnertaaq ingerlanerliulerpoq. (Rûmamiut 5:12) Inuit naammalluinnartuujunnaaramik, isumaqatigiikkunnaariataarsinnaalerput imminnullu pissusiisa namminissarsiorneq, piumatuuneq imminullu soqutigivallaarneq ajortunnguutigilerpaat. Tamanna Jesusip taavaa ’uummatit manngertorsuunerat’, tamannalu peqqutigalugu Mosesip inatsisaani avittoqarsinnaavoq. Jesusilli farisiiarit eqqaasippai ’pileqqaarneranit taamaanngitsoq’. Maanna, naammalluinnanngitsuugamik, aappariit pisariaqartumik ilungersortariaqalerput ajornartorsiutit pissutsillu atoruminaatsut anigorniarlugit, aappariikkunnaarniarnissaminnut patsisiginiarnagit utoqqatsissutiginiarnagillu. Kisianni, Jesusip tikkuarpaa avinnissamut ataatsimik patsisissaqarnera, tassa kanngunartuliorneq. Aappaqartup aapparminut ilumuunngitsuliornera avinnissamut patsisaasinnaavoq.

Soqutiginarpoq malugissallugu avinneq pillugu isummat assigiinngitsut tapersersorniarlugit oqaatsit „patsit alla kanngunartuliornerunngitsoq patsisigalugu“ qanoq assigiinngitsunik isumaqartinniarneqartarnerat. Oqaatsit tamakku katuullit akornanni oqartussaasunit amerlanernit ilaasussaanngitsuunerarneqartarput, oqaluttuani assingusuni, Markusip Lukasillu allagaanni, atorneqannginnerat pissutigalugu. Kisianni, Cyclopedia-mi McClintockimit Strongimillu suliarineqarsimasumi ima nassuiarneqarpoq: „Allakkat assigiinngitsut tamakkua imminnut naapertuuttuunerat paasineqarsinnaavoq najoqqutassaq una najoqqutarigaanni: Allakkani naannerusuni allaatigineqanngitsut peqqissaarnerusumik allaatigisami ilanngunneqartarput, taamaaliornikkut allaaserisat isumaviat allanngortinneqassanngippat. Patsisissaq ataaseq tamanna avissutissatut tamanit akuerineqartuummat, taasariaqarnissaanik Markusip Lukasillu pisariaqartitsinnginnerat pissusissamisoornerusinnaavoq.“

Oqartoqarsimavoq Jesusip oqaaseq „kanngunartuliorneq“ (grækerisut: porneiʹa) atoramiuk, „allasiorneq“ (grækerisut: moikheiʹa) atornagu, aappariilernerup siornatigut kanngunartuliorsimaneq aappariinnermik atortuujunnaarutaasoq pisimagunaraa. Taamali isumaqarneq oqaatsip tamatuma qanoq isumaqarsinnaaneranik killiliivallaarneruvoq. Immikkut paasisimasallit arlallit miserratiginngilaat oqaaseq porneiʹa isumaqartoq „mingunnartuliorneq, akilersilluni atortinneq, kanngunartuliorneq“, aammalu Matîuse 19:9-mi atorneqarnera naapertorlugu „tassaasoq, imaluunniit allanut ilanngullugit tassaasoq, allasiorneq“. Aammattaaq isumaqartoqarpoq avinnissamut patsisaasinnaasorpassuarnut ilaattut kanngunartuliorneq Jesusip taaginnaraa, taamatulli isumaqarneq allassimaffimmik tamatuminnga ingasattumik nassuiaaneruvoq.

Soorlu tamatuma siulianiittunit paasineqarsinnaasoq, erseqqippoq Bibelimi allassimanngitsoq aappariinnerit tamarmik inuuneq naallugu atasussaasut aammalu suugaluartorluunniit patsisigalugu avittoqarsinnaanngitsoq. Kisianni, avinnissamut patsisissaq akuerineqarsinnaasoq ataasiinnaq Bibelimi taaneqarpoq, tassa kanngunartuliorneq.

„Aappariinneq tamani ataqqisassaatinneqarli“

Avinnissamut patsisaasinnaasup Bibelimi taaneqarnera avinnissamut kajumissaarisuua? Tassaava aappariinnermik nalikillisitsineq imaluunniit ataqqinaataajaaneq? Imaluunniit avinnissamut Bibelimi ataasiinnarmik patsisissaqartitsisoqarnera aappariinnut ingasattumik artorsaatissiisuua?

Aappariinneq inuit marluk imminnut attaveqarnerisa qaninnerpaat tatigeqatigiinnarnerpaallu ilaattut Bibelimi taaneqarpoq. ’Tamanna pillugu angutip angunnilu arnilu qimassavai, nuliilu attavigalugu, uiniussappullu ataaseq,’ Môrsasip agdlagai sujugdlît 2:24-mi aappariinneq siulleq taama oqaluttuarineqarpoq. Aappariillu qanittumik attaveqarneq tamanna naleqangaartutut erligisariaqarpaat. Bibelimi imaattumik unnersuussuteqarpoq: „Aappariinneq tamani ataqqisassaatinneqarli aappariillu innarfiat minguitsuutinneqarli.“ — Eprîarit 13:4, NV.

Assigiinngitsut oqaaseralugit oqartoqarajuppoq aappariinnermut ataavartumut pilluarnartumullu tunngavissaq tassaanngitsoq angutip arnallu imminnut pileriffiginerat tassaasorli namminissarsiunnginnerat. Tamanna Bibelimissaaq ersersinneqarpoq: ’Angutit nuliatik asasariaqarpaat soorlu timitik. Nuliaminik asannittoq imminik asasaraaq. Inummi uinimminik qinngarsuinngisaannarpoq, nerisittarluguli paaqqisarpaa, soorluttaaq Kristusip ilagiit taamaaliortarai. Arnalli uini mianeriniarliuk.’ (Evfisumiut 5:28-33) Bibelimi isertuanngitsumik imaattumik unnersuussuteqarpoq: „Uiusup nuliani pisariaqarneratut ilassiliuk; aammattaarli nuliaasoq uiminut taamaaliorli.“ (NV) ’Uilik timiminut naalagaanngilaq, kisianni uia; taamattaaq nulialik timiminut naalagaanngilaq, kisianni nulia. Erliguuteqatigiinnasi pigitsi.’ — 1 Korintumiut 7:3-5.

Aappariit marluullutik tamarmik unnersuussutit silatuut tamakku maleruarumappatigik, ilimanassanngilaq aappariinnerminni ajornartorsiutaat ima angitigilissasut aappariit ’uinikkut ataasiujunnaarnerannik’ kinguneqartumik arlaat aapparminut ilumuunngitsuliorluni allasiorluni. Aappaata Bibelimi najoqqutassat maleruartariaqartutut naak isiginngikkaluarai, aappaata uppertuusup Guutip unnersuussutaasa pitsaanerpaanerat qularissanngilaa, taamaammallu aappariinnermi ajornartorsiutit ilarpassui anigorneqarsinnaassapput, imaluunniit ingalanneqarsinnaassallutik.

Aappariinnerup pilluarnanngitsup avinnikkut taamaatitinneqarnissaa Bibelimi inassutigineqanngilaq, kristumiulli kajumissaarneqarput aappariinnermik atatinniarnissaa pilluarnarsarniarnissaalu ilungersuutigeqqullugu. ’Inuusunnerni nuliarilikkat tipaatsuutiguuk,’ Bibelimi taama ittumik ussateqarpoq. ’Asannissusia putussutigittuinnaruk.’ — ússatit 5:18, 19.

Avinneq aaqqiissutissaava?

Aappaami allasiorpat? Soorunami aapparminut ilumuunngitsuliorneq annertuumik ajornartorsiortitsisarpoq. Allasiortoq aapparminik uummatikkut anniartitsingaarlunilu aliasungaartitsisarpoq, ilumuunngitsuliorfigitittorlu Bibeli naapertorlugu allasiortumit avissinnaatitaavoq allamullu kateqqissinnaatitaalluni. Kisianni avinnissaq pisariaqarluinnarpa? Allamik ilioriarfissaqanngila?

Eqqaamasariaqarparput Jehova Guutip avinnissamut patsisissaalluartoq naak aalajangersimagaluaraa, aammattaarli Bibelimi ima oqaatigineqarmat: ’Avinneq maajugaa.’ (Malakia 2:16, NV) Eqqarsaatigilluaqqaarnagu avinnissap aaqqiissutissatuaaneranik aalajangiussinissaraluamut taarsiullugu, ilumuunngitsuliorfigitittup eqqarsaatigisinnaavaa aappani isumakkeerfigisinnaanerlugu naakkinnittuliorfigisinnaanerlugulu. Sooq?

Avinnerup immaqa ajuallatsitaaneq narrujuummisitaanerlu peersissinnaassanngilai. Aappaatigulli naakkinnittuliornerup isumakkeerfiginninnerullu peersissinnaassavaat, ingammik allasiortup kanngunartuliorsimanini peqqusersuitsumik peqqissimissutigippagu. Taamatut ajornartoorfiusumi asanninnermik ersersitsineq aappariinnermut pissatsissutaalluarsinnaavoq. Tamakku eqqarsaatigalugit aalajangigassani eqqarsaatigiguniuk, ilumuunngitsuliorfigitittup iliuusissani pitsaanerpaamik nalilersinnaassavaa, Jesusip oqaasii uku isumaliutigiitigalugit: ’Pilluarput nallittuisut, nallittorneqassagamik.’ — Matîuse 5:7; naleqqiuguk Húsia 3:1-5.

Aammattaaq aappariit qitornaqarpata aappaa kisimiilluni pilersuisunngussappat ajornartorsiutit takkukkumaartussat eqqarsaatigisariaqarput. Aammattaaq eqqarsaatigisariaqarpoq avissimasut ilarpassui kiserliortutut misigisimasarmata. Silarsuup annerpaaffiani arnat angutinit suli akissarsiakinnerunerat arnap avissimasup ajornartorsiutigisaanut allissutaasinnaavoq. Ukiut arlallit illumi ningiuusimareerluni anaanap aappaqanngitsup suliffissarsiornissaa allanullu unammillilernissaa artornartorujussuusarpoq.

Arnat ilaat isumaqarput averiataarnissamut suli aappaqartillutik upalungaarsartariaqarlutik. Ilaat immaqa atuarfinni assigiinngitsunik pikkorissartarput, ilaallu suliffimminni suliuaannarput aningaasatigut namminersortuujuarumallutik. Soorunami tamakku eqqarsaatigalugit inuk nammineq aalajangiisussaavoq. Kisianni piumaartussaasinnaasunut upalungaarsarnermut piffissap nukiillu atornissaannut taarsiullugu silatusaarnerussannginnerpa aappariinnerup pilluarnarsarnissaanut ataavartinniarnissaanullu piffissaq nukiillu atorneqarpata? Guutip anersaavata inerititaanik ilungersorluni ineriartortitsiguni anersaakkullu peqqissumik isiginnittaaseqarniarluni, arnap kristumiuusup uiminit asaneqarnissaa nersualaarneqartarnissaalu ilimanarnerussaaq. Aammattaaq Guutip Naalagaaffimmik salliutitsisut pisariaqartitaannik isumaginnikkumaarluni neriorsuutaa isumalluarfigisinnaavaa. — Matîuse 6:33; ússatit 31:28-30; Galâsiamiut 5:22, 23.

Aaqqiissutissaq inaarutaasoq

Pissutsit aaqqissuussaaneranni naammalluinnanngitsumi inuugallartilluta, aappariit ajornartorsiortarnissaat ilimagisariaqarparput. Kisianni Bibelimi unnersuussutinik silatuunik maleruaanikkut ajornartorsiutit sakkukillisarneqarsinnaapput anigorniarneqarluarsinnaallutillu. Tamatuma saniatigut angutit arnallu aappariinnerminni inuunerullu nalinginnaanerusortaani Jehovap najoqqutassiaanut naalallutik maleruaasut pissutsit aaqqissuussaanerannut nutaassamut naapertuilluassuseqarfiusumut isernissamik neriugisaq pilluaatigisinnaavaat. — 2 Pîtruse 3:13.

Pissutsit aaqqissuussaaneranni nutaassami inuiaat ajortip naammalluinnanngissutsillu naalliunnartuinik kingunerinillu alianangaartunik atugaqaqqissanngillat. Nunarsuarmi maani aappariinneq atuukkallartillugu ’pileqqaarneranit’ pissusiusoq najoqqutassaajuassaaq. Aap, Guutip katititai inuup avissaartissanngilai. (wD 15/5 88)

[Qupp. 4-mi assiliartaq]

Jesusip avinneq qanoq oqaatigaa?

[Qupp. 5-mi assiliartaq]

Silarsuarmi nutaassami aappariit ajornartorsiute- qassanngillat avinnermik kinguneqartumik