Naalagaaffik oqaluussissutigiuaannarsiuk
„Naalagaaffimmillu tusagassaq nuannersoq tamanna oqaluussissutigineqassaaq nunarsuarmi inuit najugarisaanni tamarsuarmi inuiaqatigiit tamarmik nalujunnaarutissaannik; taavalu naggatissaq nalliutissaaq.“ — Matîuse 24:14.
1, 2. (a) Ukiuni hundredilinni maanna atuuttuni suliassat suna pingaarnersaraat, qanorlu annertutigisumik suliarineqartarpa? (b) Suut Jehovap suliassamik tamatuminnga pilluaqqusineranut uppernarsaataappat?
GUUTIP naalagaaffianik oqaluussissutiginninneq ukiuni hundredilinni maanna atuuttuni suliat pingaarnersaraat. Guutip Ajugaqanngitsup kissaatigaa tamatuma maannakkut naammassiniarlugu suliarineqarnissaa, taassumalu oqaasiisa siulittuutaasut eqquunneraat. Oqaluussinermut tamatumunnga qanoq periaaseqarnerput naassaanngitsumik atugassatsinnut aalajangiissaaq. — 1 Korintumiut 9:16, 23.
2 Nuanneqaaq takullugu oqaluussinermut peqataasut amerliartuinnarmata, maannakkut tre millioninit amerlanerusut oqaluusseqataammata. Allamik atorfeqaratik oqaluussisartunngortut aatsaat taama amerlatigilerput. Aammattaaq soqutiginnittorparujussuit Bibelimik atuaqqissaaqatigiittarnissaminnut akuersipput ilungersorlutillu Guutip piumasaa ilinniarlugu.
3. Tusagassamik nuannersumik oqaluussissutiginnittuartariaqarnissaq pillugu inuit ilaasa tamanna immaqa qanoq oqaatigiumassavaat?
3 Aammattaarli inoqarsinnaavoq ’ajunngitsuliornerminni’ taamaatissimasunik, ilaasalu oqaluussineq qatsussimavaat. (Galâsiamiut 6:9; Eprîarit 12:3) Immaqa oqartarput najukkaminni tusagassaq nuannersoq annertuumik oqaluussissutigineqareersimasoq tassanimiullu aalajangerfigisaqalereersimasut illuminnullu aggeraangatta puffaatigisaraat. Najukkani taama ittuni oqaluussisartut angusaqaraluarunik angusaat annikitsuinnaasarput. Taamaattumik isumaqarunarput suliap ilarsua naammassineqareersimasoq, ingerlateqqinnissaalu pisariaqanngitsoq. Taamatulli isumaqarneq sooq kukkua?
Sooq oqaluussiuassaagut?
4. Suna killinneqaatigalugu najukkani akuttusuuinnarmik tusaajumasoqarfiusuni oqaluussiuarumassaagut?
4 Pingaarnerusumik, inuit tusarnaarumanersut tusarnaarumannginnersulluunniit uagut ilumoorluta oqaluussiuarnissatsinnut apeqqutaassanngilaq. Jeremias ukiut 40-t Jerusalemimi oqaluussiuarpoq naak ikittuinnaat tusarnaartaraluartut ilarpassuisalu assortorujussuugaluaraanni. Suna pillugu oqaluussiuarpa? Jehovap suliareqqusaanik suliassaqarami, aammattaaq Jerusalemimut nalliukkumaartussanik siumut ilisimasaqarnermi pinngitsaalimmani oqaluttuarnissaminut. (Jerimia 1:17-19) Oqarpoq: ’Innertut ikumasutut ilerpoq uummatinni, saanima iluannit anniveqanngitsutut, taavalu ilumiugineq qatsuppara sapilerlugulu.’ (Jerimia 20:7-10) Uagut taassumatut pissuseqarpugut. Jehova, Jesus Kristus oqalutsigalugu, peqqusisuuvoq „tusagassaq nuannersoq“ nunarsuarmi inuit najugarisaanni tamarsuarmi oqaluussissutigineqassasoq. (Matîuse 24:14) Inuit tusarnaarumanngikkaangata, periarfissaqalersarpugut Jehovamut asanninnitta tunniulluinnarsimanittalu qanoq itissusiat takutissallugu eqqortumik iliortuaannarnitsigut. (1 Juánase 5:3) Aammattaarli, inuiannut tamanut suut ungasinngitsukkut nalliukkumaartussaasut eqqarsaatigigaangatsigik, qanoq ililluta inoqativut mianersoqqunngitsoorsinnaavavut? — 2 Timûtiuse 4:2.
5. (a) Aamma suna pissutigalugu oqaluussinermi qasusuittariaqarpugut? (b) Oqaluussineq qanoq ililluni inuit eqqartuunneqarnissaannut tunngaviua?
5 Aammattaarli Jeremiasip oqaluussinera eqqartuussinertut ippoq. Ukiumi 607-imi u.n.a.s. Jerusalem piuneerunneqarmat toqutat imaluunniit inussiatut tigusarineqartut arlaannaalluunniit oqarsinnaasimanngillat nalullugu suna pissutigalugu taamatut atugaqarnerlutik. Ukiut 40-t missiliorlugit tamanna nalliutsinnagu, Jeremiasip mianersoqqujuaannarpai tamatuminngarpiaq kinguneqassasoq Jehovamut pikitsitsiuaraluarpata. (Naleqqiuguk Hisĩkiale 2:5.) Aamma ullumikkut, tusagassamik nuannersumik oqaluussissutiginninneq „inuiaqatigiit tamarmik nalujunnaarutissaannik“ eqqartuunneqarnissaannut tunngaviuvoq. Apustili Paulusip tamanna erseqqissarpaa oqarami Kristus Jesusip akiniutissaq aggiutissagaa ’Guutimik ilisimasaqanngitsunut Naalakkattalu Jesusip iivangkiiliuanut naalakkumanngitsunut’. (2 Tásalûníkamiut 1:8, 9) Inuit tusagassamut nuannersumut qanoq periarnertik tunngavigalugu eqqartuunneqarumaarput. Taamaattumik tusarliussaq naggatissap nalliunnissaa tikivillugu nipituumik erseqqarissumillu tutsiuttuartariaqarpoq. (sarĸúmersitat 14:6, 7) Tusarliussaq pingaaruteqarluinnartoq tamanna sapinngisamik akulikitsumik inunnut tusarliunneqartariaqarpoq. Tusarliinitsinni sunaluunniit akornutigisariaqanngilarput. Taamaammat Jehovap kiffai tunniulluinnarsimasut tamarmik annertuumik akisussaaffeqarput.
6. Naak oqariartuuterput nalunnginneqangaaraluartoq, suna pillugu oqaluussiuartariaqarpugut?
6 Immaqa uagut najukkatsinni tusagassaq nuannersoq annertuumik peqqissaartumillu oqaluussissutigineqareersimavoq. Silarsuarmili malunnartumik pisoqartuaannarmat, inuit naak tusarliussarput tusarsimagaluaraat, oqaluussiunnaaraluarutta erniinnaq puiorsimassagaluarpaat. Eqqarsaatigeriakkit mumisitsinerit, peq- qarniisaarnerit, suliumajunnaarnerit, mamianartuliat pisimasullu allat amerlaqisut annertuumik nutaarsiassarineqartartut. Tamakkua saniatigut taaneqarsinnaapput aliikkutat assigiinngitsorpassuit taamaaqataallu allanut saatitsisartut. Taamaattumik tusarliussaq tamanna oqaluussissutigiuaannartariaqarparput, allanut sangutitsisartorpassuit pissutigalugit puiorneqatsaaliorlugu.
7. Ullumikkut inuppassuit qanoq periaaseqarnerata sukkut assigaa Israelikkut Esajasip oqaluussineranut periaaseqarsimanerat, taamaattorli suna pillugu oqaluussinerput uaviuukkunnaassanngilarput?
7 Inuppassuit tusarliussaq soqutiginngimmassuk, eqqaamasariaqarparput inuit qanoq ittut pruffiiti Esajasip oqaluussiffigisariaqagai. Jehovap taanna oqarfigisimavaa: ’Inuiaat tassaammata uteriitsut, qitornat sallusaannartut, qitornat Jehovap inatsisaanik tusaajumanngitsut, takorluuisunut oqartartut: Takorluuissanngilasi, takorluugalinnullu oqartartut: Uatsinnut takorluugaqassanngilasi isertuiuitsumik; oqaluffigisigut piutserlusi, takorluugaqaritsi salloqittaatinik; aqqusinermit saqigitsi, ingerlavimmit sangugitsi; Israelip illernartua kiinnatta saannit peersiuk.’ Taamaattoq Esajasip inuit ilumoortumik oqarfigai: ’Jehova Guutiuvoq [naapertuilluartumik, NW] eqqartuussisoq; pilluarput tamarmik taassuminnga utaqqisut.’ (Isaia 30:9-11, 18) Uaguttaaq taamaaliortariaqarpugut. Taamaatinngikkutta tusarliussarput ilaatigulluunniit sunniuteqartuassaaq. Inuit ilaat tusaajumassapput, ilaallu tusaajumassanngillat. Tamarmilli tusarnissaminnut periarfissaqassapput.
’Qanoq ilillutik tusassappat?’
8. Naak inuit sallusuissut ilassiumanagu aalajangerfigisaqarsimanerat isumaqarnaraluartoq, suut allamik isumaqalersissinnaassavaat?
8 Immaqa isumaqarpugut nunap ilaani aalajangersimasumi inuit aalajaatsumik aalajangerfigisaqartut, aalajangersimasullu tusarliussarput ilassiumanagu, immaqalu assortortassallugu. Eqqaamaniarulli, inuit atugarisaat nikittarmata. Immaqa aqagu, sapaatip akunnerani tullermi, imaluunniit qaammammi tullermi immikkut atugassartik peqqutigalugu sallusuissummik ilassiumalissapput. Immaqa silarsuarmi pisut uissuumminartut tusassavaat, imaluunniit aningaasarsiornerup tungaatigut ajornartoornermit, nappaammit imaluunniit toqusoqarnermit nalaanneqassallutik. Annikilliornerata itersarsinnaavai, naalliunnerminnullu suna pissutaanersoq immaqa paaserusulissavaat. Oqaluussiuaannarutta, nalussanngilaat sumut saaffiginnissinnaallutik.
9. Oqaluussinerput ajunaarnersuaqarfimmi annaassiniartut sulinerannut qanoq naleqqiunneqarsinnaava?
9 Uagut imaappugut soorlu ajunaarnersuaqarfimmi, oqarta nuna sajussimasoqarfimmi, annaassiniartut. Nunap ilaani annattoqanngingajaffimmi annaassiniartut tamaviaarunnaarlutillu taamaatikkumassanngillat pissutigiinnarlugu nunap ilaani allami annassimasut nassaarineqartut amerlanerusarmata. Naagga, annaassiniartut tamarmik qasusuillutik ujaasiuassapput, naak nunap ilaani ujaasiffissarititaminni suli annassimasoqarnissaa ilimanarpallaarunnaarsimagaluartoq. Ilaatigulli immaqa suli annassimasumik nassaartarput. Annassimasunik suli nassaartoqarsinnaanissaanut neriuutissaarulluinnarsimappat aatsaat ujaasineq taamaatinneqartarpoq. Uagut annaassiniarnerput suli taamaatinneqarsimanngikkallarpoq; inuit silarsuarmit pisoqqamit matumannga annakkusuttut ’annikilliornartussamilu angisuumi’ amiakkuullutik inoorusuttut suli tuusintikkuutaat nassaarisarpavut. (sarĸúmersitat 7:9, 14) Najukkani peqqissaartumik oqaluussiffigineqartarsimasuni ikittunnguinnarnillu soqutiginnittoqarfiusuni allaat suli angusaqartarpugut. Tamannali oqaluussiuarnissatsinnut pissutituaanngilaq.
10. Rûmamiut 10:13, 14 naapertorlugu, suna pisariaqarpa inuit nalussanngippassuk sumut saaffiginnissinnaallutik sallusuissummik ujarlilerunik?
10 Inuit suli eqqaasinneqartariaqartarput ’kinaluunniit Jehovap aqqanik torlorfiginnittoq annakkumaartoq’. Imaapporli, soorlu Paulus Romamiunut allakkamini nangilluni allattoq: ’Qanorli ilillutik upperfiginngisartik torlorfigissavaat? Qanorlu ilillutik tusaamanngisartik upperfigissavaat? Qanorlu ilillutik oqaluussisoqanngippat tusassappat?’ (Rûmamiut 10:13, 14) Oqaatsit taakkua tamatta eqqaasittariaqarpaatsigut Guutip naalagaaffia pillugu tusagassamik nuannersumik oqaluussissutiginnittuarnissarput pisariaqarluinnartoq.
11. Kinguaariit nutaat kikkut takkutilersimappat, taakkulu eqqarsaatigalugit sumik akisussaaffeqarpugut?
11 Naggatissap nalaa ingerlatillugu kinguaariit nutaat takkuttarput, tamarmillu immikkut namminneerlutik aalajangerfigisaqartariaqarput. Inuusuttut ilarpassuisa siornatigut sallusuissut tusarsimanngilaat. Immaqa angajoqqaavisa tusarliussaq itigartissimavaat imaluunniit asissorlugu. Inuusuttulli alliartortillugit, silarsuarmi pissusiusut, siunissami piumaartussat aammalu inuunerup suna siunertarineraa ilungersortumik eqqarsaatigilersarpaat. Taakkuattaaq Jehovap aqqa torlorfigisariaqarpaat annassagunik. Kisiannili ’qanoq ilillutik tusaamanngisartik upperfigissavaat?’ (Rûmamiut 10:14) Inuusuttut taakkua ilarpassuisa sallusuissut ilassiumaarpaat — aatsaalli uagut nanisinnaagutsigik oqaluussiffigalugillu.
12. Uagut oqaluussiuarnerput qanoq ililluni Jehovap naakkinninneranut ersiutaava?
12 Oqaluussinerup unitsinneqarsimanngikkallarnera Jehovap naakkinninneranut ersiutaavoq. Apustili Peter ima allappoq: ’Jehovap unnersuutigisani mullutinngilaa, soorlu qassiit mullussisorigaat, kamajuillunili pivaasi tammarsimasoqaqqusinnginnami, tamaasali allamik isumataaqqullugit. Naalakkattalu kamajuissusia annassutissaatissiuk.’ (2 Pîtruse 3:9, 15) Jehovap inuit assigiinngitsut tamarmik annannissaat kissaatigigini ersersiinnanngilaa eqqartuussutissaq suli aalajangernagu kamajuilluni naammattumik piffissaqartitsinermigut, aammattaarli inuit kajumissaartuaannaramigit imminut saaqqullugit annaqqullugillu. (1 Timûtiuse 2:4) Uagut tusagassaq nuannersoq oqaluussissutigiuaratsigu, inuit Guutip naakkinninneranik uparuartuuppavut, tassuunalu taanna unnersiutigaarput.
Toqunissaannut pinngitsuuniarneq
13, 14. (a) Oqaluussinerput alapernaarsuisuunermut qanoq naleqqiunneqarsinnaava, soorlu Ezekielip siulittuutaani eqqartorneqartoq? (b) Suna pillugu Paulus oqarsinnaasimava ’tamarmik aavinut pinngitsuulluni’, ullumikkullu Jehovap Nalunaajaasui qanoq iliorunik aatsaat taamatut oqarsinnaassappat?
13 Jehovap Nalunaajaasuisa tunniulluinnarsimasut Guutip eqqartuussinerata naammassineqarnissaanik inuit mianersoqqussallugit akisussaaffiata assigaa Ezekielip itsarsuaq akisussaaffia. Taanna Israelikkunnut alapernaarsuisuutitaavoq. Israelikkut mianersoqqusussaavai toqussasut ajortuliaminnit saanngikkunik. Alapernaarsuisutut mianersoqqusinngitsooruni, inuit ajortut toqunneqassapput, taakkuali aavat alapernaarsuisup mianersoqqusinngitsoortup pigissavaa. Jehovap eqqartuussutissamik aalajangiinermik qanoq isumaqarnini ersersippaa: ’Iluarinngilara iluaatsoq toquppat, kisianni iluaatsoq ingerlavimminit saappat inuullunilu. Saagitsi, saagitsi ingerlavissinnit ajortunit; sooq toqujumavisi, Israelikkut-aa?’ — Hisĩkiale 33:1-11.
14 Apustili Paulusip alapernaarsuisutut akisussaaffini miserratiginngilaa. Ilagiinni utoqqaanertat Efesusimeersut oqarfigai: ’Taamaattumik ullormi matumani nalunaajaaffigaassi tamarmik aavinut pinngitsuusunga.’ Suna peqqutigalugu taama oqarsinnaasimava? Oqaatsini imatut ilavai: ’Nipangiussaqannginnama Guutilli siunnersuutaa tamaat ilissinnut oqaatigigakku.’ (apustilit suliait 20:26, 27) Ullumikkut katersat alapernaarsuisuusut, tassa Jesus Kristusip ajoqersugai tanitaasut sinneruttut, taama oqarsinnaapput. Taakkua tamarmik, ilagisaasalu tre millioninit amerlanerusut pissutsit aaqqissuussaanerata matuma naggatissaani annakkumaarnissamik nunamilu naassaanngitsumik inuujumaarnissamik neriugisaqartut, Guutip naalagaaffia pillugu tusagassamik nuannersumik oqaluussissutiginninneq taassumalu eqqartuussutaata naammassineqarumaarnissaanik mianersoqqussutiginninneq qaquguluunniit tuaviuukkunnaartariaqanngilaat. Taamaalioraluarunik allat toqunerannut pisooqataassagaluarput.
15. Hisĩkiale kapitali 9 naapertorlugu, kikkuuppat nalunaaqqutsigaasut, kinaanalu nalunaaqqutsersuisoq?
15 Ullumikkut oqaluussineq Hisĩkiale kapitali 9-mi siulittuutigineqarpoq. Taamanikkut Jehovap illoqarfik Jerusalem pillagassanngortissimavaa. Eqqartuussutissaq naammassineqartinnagu angut meqquluaatsumik qaqortumik atisaqartoq, allattup pooqattaanik qiterummiulik, peqquneqarpoq illoqarfik angalaffigeqqullugu qaavisigullu nalunaaqqutsersoqqullugit inuit tamaasa aliasullutik erloqisut narrujuumminartut tassani suliarisaasut tamaasa pillugit. Nalunaaqqutsersuineq tamanna naammasseriarmat, illoqarfimmiut tamarmik, annattussaallutik nalunaaqqutsigaasut kisimik pinnagit, toqunneqartussaapput. Nalunaaqqutsersuinini naammassigamiuk, angut nalunaarpoq: ’Taamaaliorpunga, soorlu inakkimma.’ (Hisĩkiale 9:11) Imminut suliareqqusaq inernissaanut ilumoorluni naammassiniarlugu suliarisimavaa.
16. (a) Angut meqquluaatsumik qaqortumik atisaqartoq kikkunnut assersuutaava? (b) Jehovap kisimi oqartussaanerata qutsissisitaanissaanik akerleriissut eqqarsaatigalugu, sooq pinngitsoorata oqaluussiuartariaqarpugut?
16 Angut meqquluaatsumik qaqortumik atisaqartoq assersuutaavoq Kristusip ajoqersugaasa tanitaasut sinnerinut; taakkua ’savat allat’ ’amerlangaartut’ suleqatigaat. Nalitsinni, soorluttaaq Ezekielip nalaani taamaassimasoq, Jehovap kisimi tamanut oqartussaanerata qutsissisitaanissaa akerleriissutaasorujussuuvoq. Pissutsit aaqqissuussaanerata ajortup maannakkut atuuttup sorsunnissami Guutip Ajugaqanngitsup ullussarsuani naggatissaa pillugu, Jehova oqarsimavoq: „Inuiaqatigiillu misigissapput uanga tassaasunga Jehova.“ (sarĸúmersitat 7:9; Juánase 10:16; Hisĩkiale 39:7, NW) Inuiaqatigiit tamanna nalujunnaassappassuk, Jehovap kiffaasa nunamiittut pinngitsuuillutik taassuma aqqa siunertaalu oqaluussissutigiuartariaqarpaat inuiaqatigiit nalujunnaarutissaannik.
17, 18. (a) Oqaluussiuarnerput eqqumattuinnarniarnitsinnut sukkut iluaqutigisinnaavarput? (b) Jehovap oqaluussineq naggaserpagu, tamatta qanoq oqarfigerusussavarput, qanorlu iliorutta aatsaat taamatut oqarsinnaassaagut?
17 Naalagaaffimmik tusagassaq nuannersoq oqaluussissutigiuarutsigu nammineq eqqumattuinnarniarnitsinnut iluaqutigisinnaavarput. Jehovap aqqata siunertaasalu pingaaruteqassusii puiorneq ajussavavut. Tamaviaarunnaarutta immaqa Naalagaaffimmi inuunissamik takorluuisinnaajunnaalissaagut, ’isumakuluutinillu pisuussutinillu illigussusipilunnillu inuunerup matuma piinit’ tigusaritilluta ’inerilluartitaqarnatalu’. (Lúkarse 8:14) ’Tusagassamik nuannersumik’ aallussilluarluta nalunaarutigiuaannarutsigu, Naalakkatta, Jesus Kristusip, peqqussutai ilumoorluta maleruassavavut: ’Misissoritsi, eqqumaniarlusilu qinugitsi, taamaaffissaa qaqugu nalliussasoq nalugassiuk. Ilissinnulli oqaaserisara tamanut oqaaseraara: Eqqumagitsi.’ — Mákorse 13:10, 33, 37.
18 Taamaattumik tamatta ’erloqisut’ ujartuartigik Jehova piffissaqartitsigallartillugu. Tamatta, tanitaasut sinneruttut aammattaaq ’savat allat’, Naalagaaffimmik tusagassaq nuannersoq nunarsuarmi inuit najugarisaanni tamarsuarmi inuiaqatigiit tamarmik nalujunnaarutissaannik oqaluussissutigeqqullugu suliassarput naammassiniarlugu ilumoortumik suliaritigu. (Matîuse 24:14) Jehovap nammineq annikilliornartussamik angisuumik aallartitsilluni suliassaq tamanna naggaserpagu, tamatta immikkut Jehovamut oqarsinnaasa: ’Taamaaliorpugut, soorlu inakkitsigut.’ (wD 1/1 88)
Uku eqqaamavigit?
□ Oqaluussinitsinni angusat suna ersersippaat?
□ Aamma suut pissutigalugit oqaluussiuartariaqarpugut?
□ Oqaluussinerput qanoq ililluni Jehovap naakkinninneranut ersiutaava?
□ Qanoq ililluta tamarmik aavinut pinngitsuuniarsinnaavugut?
□ Oqaluussinerput eqqumattuinnarniarnitsinnut sukkut iluaqutigisinnaavarput?
[Qupp. 30-mi nalunaarsugaq]
UKIUT 7-IT INGERLANERISIGUT OQALUUSSINERMI ANGUSAT
1981
Kuisittut 119.836
Eqqaaniaanermut najuuttut 5.987.893
Bibelimik atuaqqissaaqatigiinnerit 1.475.177
1982
Kuisittut 138.540
Eqqaaniaanermut najuuttut 6.252.787
Bibelimik atuaqqissaaqatigiinnerit 1.586.293
1983
Kuisittut 161.896
Eqqaaniaanermut najuuttut 6.767.707
Bibelimik atuaqqissaaqatigiinnerit 1.797.112
1984
Kuisittut 179.421
Eqqaaniaanermut najuuttut 7.416.974
Bibelimik atuaqqissaaqatigiinnerit 2.047.113
1985
Kuisittut 189.800
Eqqaaniaanermut najuuttut 7.792.109
Bibelimik atuaqqissaaqatigiinnerit 2.379.146
1986
Kuisittut 225.868
Eqqaaniaanermut najuuttut 8.160.597
Bibelimik atuaqqissaaqatigiinnerit 2.726.252
1987
Kuisittut 230.843
Eqqaaniaanermut najuuttut 8.965.221
Bibelimik atuaqqissaaqatigiinnerit 3.005.048