Jesusip inuunera ajoqersuineralu
Esajasip siulittuutaa Jesusip eqquutippaa
JESUSIP paasigamiuk farisæerit Herodesillu partiianik tapersersuisut toqunnialersaaraanni, ajoqersukkani ilagalugit Galilæap tasersuanukarpoq. Tamaani inuppassuit Palæstinamit tamarmeersut, allaammi Palæstinap killeqarfiata avataaneersut, ussagarfigaat. Amerlasuut ajorunnaarsippai, taamaaliormallu annertuunik anniaateqartut qerlertoruullutik ornigarpaat attorumallugu.
Ussagartut amerlaqimmata Jesusip ajoqersukkani oqarfigai umiatsiaamik piareersimassuttuaqqulluni. Umiatsiaami avalaqqanermigut inuppassuit qerlertoruuppallaalernissaat pinaveersimatissinnaavaa. Umiatsiaamit ajoqersorsinnaavai imaluunniit umiatsiaamik tasersuaq sinersinnaavaa inuillu naapitani ikiortarlugit.
Ajoqersukkap Mattæusip malugisimavaa Jesusip suliamigut „pruffiitikkut Esajasikkut oqaaserisaq“ eqquutikkaa.
„Aajuna kiffara qinigara, asasara tarnima nuannarisaa; Anersaara taassumunnga tunniukkumaarpara, [sunalu eqqortuusoq, NV] inuiaqatigiinnut oqaassutigissavaa. Saqitsaassananilu nilliassanngilaq, nipaalu illut akornanni tusarsaassanngilaq. Sullortooq naffalik nalloqqissanngilaa, iperarlu qamilersoq qamivissanngilaa, eqqartuussisissaq naammassitserlugu ajugaanikkut. Inuiaqatigiillu aqqa neriuffigissavaat.“
Kiffaq asasaasoq Guutip nuannarisaa, imaluunniit iluarisaa, soorunami tassaavoq Jesus. Eqqunngitsumik upperisarsiornermi ileqqulersuutinit matuneqarsimasoq, tassa suna eqqortuusoq, Jesusip qulaarpaa. Farisæerit Guutip inatsisaanik eqqunngitsumik nassuiaanertik pissutigalugu inulluunniit napparsimasoq sabbatimi ikiorumanngilaat! Guutip naapertuilluassusiata erseqqissumik nassuiarneratigut ileqqut naapertuilluanngitsut nammakkersuutaannit Jesusip inuit kiffaajunnaarsippai, tamatumalu kingunerisaanik upperisarsiornikkut siuttunit toqunniarneqarpoq.
Qanoq paasisariaqarpa allassimammat ’saqitsaassananilu nilliassanngitsoq, nipaalu illut akornanni tusarsaassanngitsoq’? Aap, Jesusip inuit ajorunnaarsikkaangamigit ’inertingaartarpai nalunaarutigeqqunani’. Nipiliortunit illut akornanni ussagarfigineqarnissani kissaatiginngilaa, tusakkallu allanngorarlutik qanermit qanermut ingerlaarnissaat kissaatiginagu.
Jesusillu tusarliussassani tuppallernartoq inunnut sullortuutut naffalittut ittunut, inunnut aliasuttunut nanertugaasunullu tusarliuttarpaa. Inuit tamakku ipeqqatut qamilivissutut ipput. Jesusip sullortooq naffalik napivinngilaa iperarlu qamilerluni aamaaginnalersimalluni pujuuinnalersimasoq qamivinnagu. Asannillunili saamallunilu inunnut maniguuttunut qiimmaallannartumik pikkorilluni oqaluttarpoq. Jesus ilumut tassaavoq inuiaqatigiit neriuffigisinnaasaat! Mattæus 12:15-21; Markus 3:7-12; Jesaja 42:1-4. (wD 15/8 86)
◆ Qanoq ililluni Jesusip saqitsaassinngikkaluarluni illullu akornanni nipituumik nillianngikkaluarluni suup eqqortuunera erseqqissumik nassuiarpaa?
◆ Kikkut sullortuutut naffalittut ipeqqatullu qamilersutut ippat, taakkulu Jesusip qanoq pivai?