Naalagaaffimmik oqaluussissutiginninnermit nutaarsiassat

Bibelimi najoqqutassiat ilaqutariinni ataasiussuseqarnarlutillu pilluarnarput

AAPPARIIT Indiami najugallit ilagiinnut kristumiuunerartunut ilaasortaasut oqqatigajupput. Uiusup nuliani unatartarpaa. Allaallu imminnut toqunniaraluarput! Ilaanni nuliaasoq ghee-liorpoq (punneq aatsitaq) tiillertuusaarlunilu uiminut sassaallugu, kisiannili kiinaagut kuillugu. Kiisa nuliaasoq aalajangerpoq imminuussalluni.

Suulluunniit aappariit taakku ataasiussuseqartillugillu pilluartissinnaavai? ’Tassaqa,’ amerlasuut oqarumassapput. Imminulli toqunniartinnani, nuliaasup panini ningaanilu pulaarpai. Taakkua Jehovap Nalunaajaasui ilagalugit Bibeli atuaqqissaarpaat. Isersimaarpoq tusarnaarumalluni, tusakkanilu uummatimigut assut killinneqaatigai. Atuaqqissaaqatigiissinnarlutik, Nalunaajaasut ajornartorsiutiminik oqaluttuuppai. Bibelimit nassuiaappaat nuliatut akisussaaffigisaanik. Aamma uia pulaarneqarpoq Bibelimillu atuaqqissaaqatigineqartalerluni. Tamanna qanoq kinguneqarpa? Uiusoq nuliaasorlu tamarmik Bibelimi najoqqutassiat maleruarlugit inuuleramik, ilaqutariinni ajornartorsiutitik anigorpaat. Aappariit ima siumukarsimatigigamik Jehovamut tunniulluinnarsimapput kuisissimallutillu.

Aappariit kisissaanngitsut allat paasisimavaat ilaqutariinni ajornartorsiutit aaqqiissutissaat Guutip oqaasiani Guutip sunniineratigut isumassarsiarititaasuni nassaassaasut. Unnersuussutinik soorlu Kulorsamiunut agdlagkat 3:12-14-imi aamma Evfisumiunut agdlagkane kapitali 5-imi allassimasunik maleruaanermikkut ajornartorsiutitik anigorsinnaasimavaat aamma ataasiussuseq pilluarnerlu angusimallugit.

□ Sallusuissutip Bibelimiittup ilaqutariinnik ataasinngortitsisinnaanera aammattaaq Libanonimi pisimasumit takutinneqarpoq. 1973-imi Jehovap Nalunaajaasuisa ilaata ilaqutariit nunaqarfeeqqami najugaqartut Bibelimik atuaqqissaaqatigisalerpai. Niviarsiaqqat nukariit eqqaamiui atuaqataasarput. Kisianni palasip atuaqqissaaqatigiinnerat akerlerimmagu, ilaqutariit taamaatsipput. Nukariit allakkatigut atuaqqissaartuarput, allagarsiaat ukuaata najugaanut nassiunneqartarmata. Nalunaajaasut allagaat atuaqqissaareeraangamikkik, ukuaminnut tunniuttarpaat atuaqqullugu, naak uia assortuisunngorsimagaluartoq. Apeqqutissaqaraangamik Nalunaajaasut allakkatigut apersortarpaat.

Qatanngutaalli angut assortuiuarpoq. Najami nuliamilu atuagaataat Bibelilersaarutaasut sissortarpai bibeliilu ikuallallugit. Kisianni naak palasimit, ilaquttaminnit asimioqarfimmioqatiminnillu asissorneqaraluarlutik, niviarsiaqqat atuaqqissaartuarput. Kiisa kuisipput. Eqqarliisa ilaat atuaqqissaartalerput kuisillutillu. Nukariit qatanngutaat assortuisuugaluartoq sallusuissut ilikkarpaa kuisillunilu. Maanna ilagiinni kiffartortuuvoq, pioneriullunilu ikiortaasoq. 1985 naalersoq eqqarleriit 23-it sallusuissummik ilisarsipput kuisissimallutillu!

Nukariit taakkua pilluassusiat naak assortorneqaraluarlutik sallusuissut iperannginnamikku! Nuannaassusiat takullugu ilaquttamik ataasiussusiat pilluassusiallu Bibelimi sallusuissummik ilassinninnermik kingunerisaa! Tassuuna tussiaasiortup oqaasii aalajangiunneqarput: „Pilluassapput inuiaat [Jehovamik] guuteqartut!“ — Tussiaat 144:15.

□ Misigisaq alla New Yorkimi pisimavoq. Inuusuttoq 13-inik ukioqarlunili ikiaroornartutortarpoq, imalu uerisimatigaluni marihuanatoreeraangami aatsaat nerisinnaalluni! Kokainitortarnini ullormut koruunit 800 sinnerlugit aningaasartuutigisarpaa, ikiaroornartunillu nuisitsigaangami illuinnarsuutinik marlunnik nassartaannarluni. Nuliarpoq sisamanillu qitornaqalerluni. Nulia Jehovamut Nalunaajaasunngormat, assortorpaa. Kiisali inooriaatsini, tassa ikiaroortarnini allasiortarninilu, qatsuppaa.

Nuliaminit kajumissaarneqartuaannarami ilagiinnilu utoqqaanertanit asannittumik ikiorneqartarami, ukioq ataaseq nuliami kuisinnerata kingornagut Bibelimik atuaqqissaaqatigiinnermut akuersivoq. Tamanna pissatsissutigalugu pinngernaveersaarnerup kinguneri sakkortuut, soorlu takorruuinerit tusarruuinerillu, atorsinnaavai. Siumukartuarpoq kuisillunilu, maannalu ilaquttani pilluarlutillu aaqqiagiissut qitornanilu sisamaasut sallusuissummi siumukarluartut takullugit pilluaatigeqai. Aalajaatsumik suliffeqarami akissarsiaqarluarlunilu, nuliamilu ikiortaallutik pionerinngornissaminnik pilersaaruteqarput. (wD 1/8 86)