nalunaiaissûgavit puiornavêruk!
„’nalunaiaissigâvse,’ Jehova oĸarpoĸ, ’uvangalo Gûtiuvunga.’“ — Isaia 43:12, NW.
1. (a) nuname angnerpârtumik sumik inuk ingmíkut pisínautitauvfeĸarsínauva? (b) oĸauseĸ „nalunaiaissoĸ“ ĸanoĸ isumasiordlugo navsuiarneĸarsínauva?
NUNAME angnerussumik ingmíkut pisínautitaunermik navssâgssaĸángilaĸ ilumut Gûtiussumut, Jehovamut, nalunaiaissûnermit. nalunaiaissoĸ „sumik navsuiaissûvoĸ imalũnît ugpernarsaissûvdlune . . . erĸartũssissunut ilisimangnigdlune nalunaiaissoĸ“. (Salmonsens Konversationsleksikon) Jesus Kristus ĸilangme nunamilo pingâruteĸarnerpâmik — Jehova Gûtimut túngassûssumik — nalunaiaissûvoĸ. nalunaiaissutut Jesus „Puntiuse-Pilâtusimut navsuerúmik ajúngitsumik nalunaer“poĸ, bîbilime agdlagsimavoĸ. (1 Timûtiuse 6:13) erĸartũssissunutdlo savssartitaugame romamiut nunamut nâlagautitât táuna ĸanoĸ oĸarfigâ?
2. Jesus Kristusip suna nalunaiautigâ?
2 aperineĸarame aperĸut aperĸutigineĸartoĸ Jesusip imáitumik akíssuteĸarfigâ: „sôrdlo oĸartutit, kúngiuvunga. inúngûtigalugulo nunamut píssutigâra sagdlusuíssut nalunaiautigísavdlugo.“ (Juánase 18:37) âp, Jesusip ersserĸigsarpâ nunamut tikiúsimavdlune sagdlusuíssut Gûtimêrsoĸ nalunaiautigísavdlugo. ilâtigut tássauvoĸ kúngitut Messiasiussutut inigssisimavfine nalunaiautigísagâ. ãmátaoĸ Gûtip arĸa Jehova Jesusip nalunaiautigâ. taimáitumik atâtaminut ĸilangmiussumut ĸinunermine Jesus oĸarsínausimavoĸ: „inuit uvavnut túniússatit silamiunit ĸinigkatit aternik nalujungnaersípáka.“ (Juánase 17:6) inugtut toĸunine tikitdlugo Jehovamut nalunaiaissûssugssáussutse Jesusip sianigiuarpâ. nalunaiaissûgame Jesusip puiorsimángisáinarpâ.
’nalunaiaissup ilumôrtup sagdlusuitsup’ maligagssiâ
3. (a) „nalunaiaissoĸ ilumôrtoĸ sagdlusuitsoĸ“ kinauva? (b) ilagît Laodikeamĩtut suna píssuserilersimavât, Jesusivdlo ĸanoĸ oĸaorĸigsârpai?
3 Jehovamut nalunaiaissutut ingminut suliarerĸussat Jesusip ilumôrtumik ilungersortumigdlo nãmagsivai. tamatumûna kristumiut túniutdluínarsimassut naleĸángitsumik maligagssaĸartípai. malugissariaĸarportaoĸ Jesusip ilagîngnut Laodikeamĩtunut oĸaorĸigsârutâ. nunap pînik pilerigissaĸarnermit avdlanut sâgtíneĸaramik, ilagît táuko Jehovamik Messiasíkutdlo nâlagauvfingmik nalunaiainermingne „akungnag“sisimáput. taimáitumik Jesusip kajumigsârpai ’ilungersorĸuvdlugit avdlamigdlo isumatârĸuvdlugit’. ilagîngnut táukunúnga oĸaorĸigsârivdlune oĸautsit uko autdlarniutigai: „ima oĸarpoĸ táuna ãmeniussoĸ, nalunaiaissoĸ ilumôrtoĸ sagdlusuitsoĸ.“ — sarĸúmersitat 3:14-19.
4. (a) suna pivdlugo Jesus ingminut taiva „ãmen“? (b) kristumiut Laodikeamĩtut suna puiúngisáinásagât Jesusip kigsautigâ?
4 autdlarnerdlune Jesus ingminut taivoĸ „ãmen“. suna pivdlugo? Jehovap autdlartísimangmane neriorssûtiminut tamanut „ãmen“igssautitdlune, „ãmen“ isumaĸarmat „pile“. Jesus Gûtip neriorssûtainik timitalersitsissûvoĸ. (2 Korintumiut 1:20) tugdliutdlugo Jesus ingminut taivoĸ „nalunaiaissoĸ ilumôrtoĸ sagdlusuitsoĸ“. suna pivdlugo? ilagîngnut maligagssarerĸuvdlune kivdlingneĸarĸuvdlugitdlo kúkussôrnitik perĸigsimíssutigísavdlugit avdlamigdlo isumatârnigssamingnut Jehovamigdlo nalunaiainermingne kingumut „ilungersor“nigssamingnut. Gûtip ernerata kristumiut Laodikeamĩtut puiornavêrĸuvai Gûtimik Messiasíkutdlo nâlagauvfingmik nalunaiaissûssariaĸarneránik.
5. Jehovap nalunaiaissuinut uvdlumíkut inûssunut Jesus sutigut maligagssauva?
5 Jesusip ajoĸersugkane tamaisa nalunaiaissôrĸuvai ilumôrtut ilungersortutdlo píssutsit ârĸigssũssaunerata ajortup matuma naggatigssâta tungânut. „nâlagauvfingmigdlo tusagagssaĸ nuánersoĸ tamána oĸalũssíssutigineĸásaoĸ nunarssuarme inuit najugarissãne tamarssuarme inuiaĸatigît tamarmik nalujungnaerutigssãnik,“ Jesus oĸarpoĸ, „tauvalo naggatigssaĸ nagdliúsaoĸ.“ (Matîuse 24:14, NW; apustilit suliait 1:6-8) suliamigut oĸautsimigútaoĸ „nalunaiaissoĸ ilumôrtoĸ sagdlusuitsoĸ“ maligagssauvoĸ kãmagtûtaussoĸ uvdlumíkut Jehovamik nalunaiaissunut kristumiûssunut. pâsivât ingmíkut pisínautitauvfigigitik Gûtip arĸa ivdlerísavdlugo Jehovamutdlo ilumôrtumik kivfáusavdlutik, oĸausê uko pingârtíkamíkik: „nalunaiaissigâvse . . . uvangalo Gûtiuvunga.“ — Isaia 43:10-12, NW.
suna pivdlugo puiortariaĸángíkigput
6. (a) anersãkut ĸáumarĸutauneĸ erĸarsautigalugo, Jehovap nalunaiaissuisa suna ingmíkut pisínautitauvfigât? (b) aperĸutit sût ingmivtínut aperĸutigisínauvavut?
6 Jehovamut nalunaiaissûguvit túniutdluínarsimassoĸ kuisimassordlo, erĸumavfigiuáinaruk ĸilangme nunamilo ĸutsingneruvsârtumik kivfartũssinerup ingmíkut pisínautitauvfigtâ naleĸángitsoĸ. erĸaimásavat ’nalunaiaissoĸ ilumôrtoĸ’ „silamiunut ĸáumarĸutau“ssoĸ. (sarĸúmersitat 1:5; Juánase 8:12) taimaingmat Jehovap nalunaiaissuisa tamarmik Gûtip sujunertaisa ĸáumarĸutât ĸaumatítariaĸarpât. sôrdlo nalerĸutíngitsũsassoĸ ĸutdleĸ errorsivîssap atânîtísavdlugo ĸutdliup aulajangerfianîtínago, taimatútaoĸ nalerĸutíngilaĸ kristumiup ilumôrtup ĸaumassune issertúsagpago. ĸaumassariaĸarpoĸ anersãkut ĸáumarsagauneĸ nangmineĸ iluaĸutigissane tusartiminut takussiminutdlo tamanut iluaĸutigerĸuvdlugo. tamatumúnga nalerĸútumik Jesusip ajoĸersugkane kãmagtôrpai oĸarfigalugit: „ĸaumassorse ĸaumale inungnut, ajúngitsuliase táukunúnga takorĸuvdlugit atâtarsilo ĸilangmiussoĸ únersiutigerĸuvdlugo.“ (Matîuse 5:14-16) peĸatigîgtut issigalugit uvdlumíkut Jehovap nalunaiaissue silarssuarme tamarme nuimáput — tássáuput sôrdlo igdloĸarfik ĸáĸap ĸâvanĩtoĸ ĸaumassortâ ungasigsumut tamanutdlo ĸaumassoĸ. ivdlitdle nangmineĸ ĸaumassut tamatigut ĸaumatítáinarpiuk? Jehovamut nalunaiaissûnerup ingmíkut pisínautitsinera erĸumavfigiuáinarpiuk?
7. pingârnerussumik suna píssutigalugo Jehovamut nalunaiaissûgavta puiortariaĸángilarput?
7 Jehovamut nalunaiaissûnerput suna píssutigalugo puiornavĩsavarput? pingârnerussumik píssutigalugo silarssuarme inûvfigissavtíne uvdluínarne inûniarnerup erdloĸinartortai, inûnerup isumakulûtai alĩkutatdlo amerdlangârnerat avdlamut sangutitserĸajâssarmata, Gûtilo ilumôrtoĸ sujunertailo pivdlugit uvavtínut oĸalugkungnaerĸajânaĸingmat. iluaĸutigssavtínut mianerssorĸujumavdlutalo Jesus oĸaorĸigsârivdlune oĸarpoĸ: „erĸumagitse, . . . piarêrsimaniaritse, inûp ernera ilimasugfigíngisavsigut tikiúsangmat.“ (Matîuse 24:42-44) suna pivdlugo mianerssorĸússut tamána oĸautiginerpâ? avdlamut sangutitauneĸ aserornigssamik kinguneĸarsínaungmat — âp, pilerigissait nunap pînut sangorĸajâssut aserornigssãnik, píssutsit ârĸigssũssauneránut matumúnga erĸartũssut nãmagsiartordlugo Jesus tikiugpat. — sarĸúmersitat 19:11-21.
8, 9. inuit avdlamut sangutitaussut Noap uvdluine inûssut ĸiviaruvtigik suna táukunánga ilíniarsínauvarput?
8 Noap uvdluine suna pisimassoĸ erĸarsautigeriaruk. taimaníkut inuit erĸarsautáinik avdlamut sangutitsissut ássigĩngitsorpagssûngmata, Noap oĸalũssissarnera umiarssualiorneralo inuit iluamik pingâruteĸartíngitsôrpait. sianigíngilât, avdlamut sangutitaugamik ĸaníngagáuput, aserordlutigdlo. — Matîuse 24:36-39.
9 tauva uvagut silarssuarmut sangutitáusanerpugut, silarssûvdlo perpagssue nákáinarfigísanerdlugit? Jesusip ajoĸersugaitut iliortugssáussuserput isumákêrdlugo avdlanut sangutitauvdluínarneĸ aserornigssamik kinguneĸarsínaungmat, erĸumátuínarta. piarêrsimauáinaruvta, pissugssáussuserput isumákĩngisáinardlugo anersãkut sinigtutut iliornata, silamiut avdlamut sangutitaussut peĸatigalugit aserorneĸásángilagut. — Lúkarse 17:26-30; 21:34-36.
10. kristumiut ilumôrtut tamarmik pingâĸissumik sumik nãmagsiniagagssaĸarpat?
10 puiúngisáinásavarput Gûtip nâlagauvfianik tusagagssaĸ nuánersoĸ oĸalũssíssutigísavdlugo pingâĸissumik nãmagsiniagagssaĸartugut. (Mákorse 13:10) kinaugaluaruvtalũnît Jehovavdlo peĸatigîgsortaine sunigdlũnît iliortugssáussuseĸaraluaruvta, tamavta neriugissavtínik avdlanut oĸalûtigingningnigssarput akissugssauvfigârput. (Rûmamiut 10:10; 1 Korintumiut 9:16) nunat ilarpagssuine naĸisimaneĸarata igdlumit igdlumut angalaorsínauvugut nâlagauvfingmik tusardliússaĸ tusardliúkiartordlugo. nunanile taima naĸisimaneĸángitsigissumik oĸalũssivfiussune inuit ugperissarsiornermik ímaĸa soĸutigissaĸarpatdlârtaríngitdlat, inuitdlo igdluine ornigkângagkit ímaĸa oĸaloĸatiginiardlugit ajornaĸaoĸ. taimaigpat, tauva eĸêrsimârtariaĸarputit ĸaumassoĸ ĸaumatíniardlugo avdlanik periarfigssarsiordlutit.
11. Jesusip ajoĸersugai „avĸutíkut“ ingerdlangmata, Jehovamik kivfartũssinerat ĸanoĸ oĸautigineĸarsínauva?
11 nauk aulajangersimassunik pivfigssaĸaraluartoĸ oĸalũssissarnerup ássigĩngitsortainut peĸataussarnigssaminut, Jehovamut kivfaussup túniutdluínarsimassup táuna oĸautsimigut suliamigutdlo únersiutigiuáinásavâ. ivdlíme? Jesusip ajoĸersugai sujugdlît „avĸutíkut“ ingerdlassutut erĸartorneĸarajugput. (apustilit suliait 9:1, 2) ĸáumámut nalunaerĸútap akúnerpâlúnguáinai atordlugit Gûtimik kivfartũssissũngitdlat. kivfartũssinertik inôriauserât! kristumiut ukiune untritilingne sujugdlerne inûssut ássigísanerpavut nâlagauvfingmik oĸalũssissartûjuángíkuvta, nalunaiainermut akugtusûínarmik peĸataussardluta? erĸortumik ingmivtínut Jehovap nalunaiaissuinik taisínaunerpugut neriugissarput inungnut avdlanut akugtusûmik erĸartortaruvtigo, ímaĸalũnît erĸartorneĸ ajuvigkuvtigo?
inuit avdlat ikiorniardlugit pivfigssaĸ atortariaĸarparput
12, 13. anersãkut ítumik ĸanoĸ nakússagtísínauvugut? (b) igdlumit igdlumut angalaordluta oĸalũssiartornivtíne soĸutigingnigtunik nâpitaĸarângavta suna píssutigalugo erĸaimaniardlugit agdlagtásavavut?
12 Gûtip ârĸigssũssinigssâne nutâme nâpertuivdluartume inûnigssamut nâgssáungitsumut inuit avdlat avĸutigssiûtísaguvtigik, pivfigssarput silatûmik atortariaĸarparput. inuitdle avdlat ikiorsínáusaguvtigik nangmineĸ nakússagtítariaĸarĸârpugut. anersãkut inũssutigssat aulajangersimassumik pissariaĸarpavut ugperníkutdlo ineriartordluta. „mêraujungnaerĸuvdluta“ „inersimássúmut ingerdlaniar“tariaĸarpugut. (Evfisumiut 4:14; Eprîarit 6:1) igdlumit igdlumut angalaordluta nalunaiaissarângavta, ãmátaoĸ akissugssáussuseĸ ingmíkut ítoĸ tigussariaĸarparput inuit savatut ítut nâpitavut nákutigiuarniardlugit? inuit tusardliússavtínut bîbilimêrsumut tusarnârusugkângata imalũnît Gûtip oĸausianik nâlagauvfianigdlo soĸutigingnigkângata, uvagut ĸanoĸ iliortarpugut? ima soĸutigitiginerpavut soĸutigingnigtup arĸa najugâlo sunalo oĸalûserissarput agdlagtúsavdlugit, tauvalo soĸutigingnigtoĸ pulaorĸísavdlugo?
13 anersãkut eĸêrsimaguvta Gûtip oĸausia oĸalũssíssutiginiardlugo súkutdlũnît, sumilũnît periarfigssarsiorsínáusaugut. tipaitsugdluta taimailiorta, ũmativut ilitsersuissorssuavtínit, Jehovamit, ilíkagkavtínik imaĸangârmata. — Isaia 30:20, 21, NW.
perssuarsiúngitsumik nalunaiaissarnigssamut piarêrsimagit
14. (a) ĸanoĸ ítumik nalunaiaivfigineĸarnermíkut inuit ilaisa sagdlusuíssut ilínialerĸârpât? (b) perssuarsiúngitsumik nalunaiainigssaĸ igdlumit igdlumut angalaorníkut oĸalũssissarnigssamut taortausínauva?
14 inuit ilaisa sagdlusuíssut Gûtimêrsoĸ ilisarilersimavât erĸardlimik, ikíngutimik, suleĸatimik, sanilimik taimaeĸataisalo oĸalũssineratigut. ássersûtigalugo: nalunaiaissune kuisimassune 238-ussune, ilaisa 40 procentîsa sagdlusuíssut bîbilimĩtoĸ ilínialerĸârpât ilisarisimassamik perssuarsiúngitsumik nalunaiaineratigut. sôruname perssuarsiúngitsumik nalunaiaissarnigssaĸ igdlumit igdlumut angalaorníkut, pulaorĸingniarníkut avdlatigutdlo oĸalũssissarnigssamut taortaussugssáungilaĸ. — apustilit suliait 5:42; 20:20.
15. perssuarsiúngitsumik nalunaiainíkut Jesus ĸanoĸ maligagssiuiva?
15 Jesusile, „nalunaiaissoĸ ilumôrtoĸ sagdlusuitsoĸ“, perssuarsiúngitsumik nalunaiainermigut maligagssiuivdluarpoĸ maligagssavtínik. sôrdlo agdlagsimassoĸ: „autdlarame“ Jesusip „inuk takuvâ ilángauserivfingme igsiassoĸ, Matîusimik taissaĸ“, oĸalugfigilerdlugulo. tamatuma kingunerâ Mattæusip Jesus malilermago. (Matîuse 9:9) ãmalo ardlãne nauk ĸasorĸagaluardlune periarfigssaĸ iluagtitdlugo Jesusip sagdlusuíssut oĸalûtigilerpâ arnamut Sykarime puilassuliamut imertariartortumut. taimane oĸaloĸatigîngnerata kingunerâ samariamiut ardlaligpagssuisa Jesus Messiasiussoĸ ugperfigilermássuk. — Juánase 4:5-30, 39-42.
16. nalunaiainermigut apustile Paulus ĸanoĸ ilivdlune maligagssiuivdluarpa?
16 apustile Paulusivtaoĸ Jehovap oĸausia oĸalûserisínáusavdlugo periarfigssat tamaisa atortarpai. Athenimĩkatdlarame Paulus taimailiortarpoĸ „[niuveriartortarfingme] nâpitane uvdlut tamaisa oĸaloĸatigissardlugit“. (apustilit suliait 17:17) Romamilo igdlumit anêrsugssáungíname apustilip „[ingminut] isertut tamaisa ilagsissarpai Gûtip nâlagauvfia oĸalũssíssutigalugo Nâlagardlo Jîsuse Kristuse sujôrángitdluínardlune pitsailineĸarnanilo ajoĸersûtigalugo“. (apustilit suliait 28:30, 31) maligagssiat tamáko malingniardlugit nalunaiainigssamut periarfigssat iluagtíngitsôrniaĸinatigik!
17. igdlumit igdlumut angalaordlune oĸalũssineĸ táisángíkáine, inungnut avdlanut nalunaiainigssamut sunik avdlanik periarfigssaĸartarpa?
17 igdlumit igdlumut angalaordluta nalunaiaissarneĸ táisángíkáine, nalunaiainigssamut avdlarpagssuarnik periarfigssaĸartarpoĸ. suleĸativut, atuaĸativut, erĸardlivut ilisarisimassavutdlo Jehova pivdlugo sujunertailo pivdlugit tusardlerneĸartariaĸarput. búsimut, umiarssuarmut tingmissartumutdlũnît ilauvdluta autdlarângavta, ímaĸa angalaĸativta ilât oĸaloĸatiginialersínauvarput nâlagauvfik nalunaiautiginiardlugo. ímaĸalo „tusagagssaĸ nuánersoĸ“ tusardliúsínáusavarput akúnigtarfingne, sutorniartarfingne benzinaerniarfingnilo sulissunut taxanigdlo ingerdlatitsissunut. angerdlarsimagângavtalo niuvertut oĸariartortutdlo igdlumut aggersut nalunaiaivfigisínauvavut. náparsímavingmilo uníngagângavta sygeplejerskit, nakorsat náparsimassoĸativutdlo nalunaiaivfigisínauvavut. náparsímavingme unínganermingne Jehovap nalunaiaissuisa ardlaligpagssuit náparsimassoĸatimik ilait ikiorsínausimavait Gûtip ârĸigssũssinigssâ nutâĸ inuit tamarmik perĸigdluínarfigssât pivdlugo ilíniarniarneráne.
18. (a) nalunaiainigssamut periarfigssat iluagtíniardlugit nangâguvit, ĸanoĸ iliornigssamut ináneĸarpit? (b) erĸardlivtínut ilisarisimassavtínutdlo nalunaiaigângavta, ĸanoĸ ítumik píssuseĸarniartásaugut?
18 ila pissariaĸardluínássusia Jehovamut nalunaiaissûgavit nâlagauvfik pivdlugo tusardliússaĸ súkutdlũnît periarfigssaĸarângavit oĸalûserissásagagko! avdlatut oĸautigalugo, puiornavêruk nalunaiaissûgavit! nalunaiainigssamutdle periarfigssaĸaleruvit nangãsaguvit? tauva sagdlusuíssut oĸalûserísavdlugo igtũngínigssamik ĸínuteĸarit. tássûna pivdluarnartumik misigissaĸarumârputit oĸalúngitsôrníkut píngitsûgagssarigaluangnik. (nalerĸiuguk apustilit suliait 4:29-31) sôruname erĸardlinut ilisarisimassanutdlo nalunaiainiarnigssaĸ piuminarnerusínauvoĸ. kisiánile píssusigssaĸ erĸordlugo iliûseĸarfigissákit, inugsiarnerfigalugit kamajuitdlutitdlo, ilisarivdluaragkit piumassarssornavêrdlutit. sujunigssamut ungasingnerussumut anguniagaĸarit sagdlusuíssúmigdlo bîbilimĩtumik pingârtitsinigssât ineriartortíkiartuârdlugo.
ilerĸorigsârneĸ — nalunaiainermut ilauvoĸ
19. nalunaiainerput ilerĸuvutdlo ĸanoĸ ingmingnut atássuteĸarpat?
19 nalunaiaineĸ oĸalungnerínáungilaĸ. Paulusip „ĸáumarĸutaussutut ĸauma“neĸ ilerĸoringnermut atatípâ. kristumiut Filippimĩtut imáitumik oĸaorĸigsârpai: „suliase nungutdlugit oĸalorujungnase nakimanasilo suliarisigik, agssuarnaerĸuvdluse perĸusersuerĸuvdlusilo, Gûtimut ĸitornaujumavdluse agssuarissagssáungitsut erĸardlerît ukua kigdlormôrtut mumingassutdlo akornáne. táukunane silarssuarme ĸáumarĸutaussutut ĸaumavuse.“ (Filípimiut 2:14, 15) silarssuarme târtume ilerĸugssatigutdlo ajortúngorsimassume, Jehovamut nalunaiaissoĸ malungnartumik ĸáumarĸutaussutut ĸaumassariaĸarpoĸ. kristumiup ilumôrtup oĸauseĸ sagdlusuíssutip pia erssersítarpâ oĸalungníkut nalunaiaivdlune ilerĸugssatigutdlo ilerĸorigsârnermigut ĸaumavdlune. Jehovap nalunaiaissue tamarmik ĸáumarĸutaussutut ilumôrdlit inôriautsimíkut oĸautsinigdlo sagdlusuíssutip bîbilimĩtup pînik oĸalungnermíkut!
20. ilerĸorigsârnerput inungnut avdlanut ĸanoĸ súniuteĸarsínauva?
20 pissariaĸartoĸ tamánarpiaĸ ersserĸigsarniardlugo apustile Peter agdlagpoĸ ima: „[iluartumik] saĸigitse Gûtimik nalussune, . . . ajúngitsuliase takuvdlugit uvdlugssame takusarneĸarfigssame Gûtimik únersiutigingnerĸuvdlugit.“ (1 Pîtruse 2:12) sôruname uvdlugssame takusarneĸarfigssame tamákeratik Gûtimik únersiutigingnísáput Jehovamutdlo nalunaiaissúngordlutik. inuit amerdlanerit Gûtip Messiasíkut nâlagauvfianut atásángitdlat ilerĸulersûtitigutdlo najorĸutagssiat eriaginartut malingniarnagit. inoĸarumârpordle najuivdlutik issigingnigtunik savatut ítunik, uvagut kristumiússuseĸ ilumôrtoĸ najorĸutaralugo iliûseĸarnivtínik takungnigtunik. ilerĸoringnerput kivdlíssutigísavât, ’nâlagauvfigdlo pivdlugo tusagagssamik nuánersumik’ oĸalũssíssutigingningnermik peĸatigilísavdluta. (Matîuse 24:14, NW) ila tipaitsússusigssarput Jehova únersiutigilerpássuk ilagaluta táussumúnga nalunaiaissúngordlutik!
21. tauva ĸanoĸ isumaĸardlutik Jehovap nalunaiaissue Gûtip perĸussânik nãmagsingnísápat?
21 taimáitumik ũmatíkut ilũngardlutit Jehovap suliarerĸussânik perĸussânigdlo nãmagsingningniarit. (Matîuse 22:37) pâsissariaĸarparput Jehovap nalunaiaissue tamarmik ingmíkut Gûtimik únersiutigingnigtuáinartariaĸarmata. „Jah únersiutigisiuk! tarniga, Jehova únersiutigiuk. inûnera tamât Jehova únersiutigiuáinásavara.“ (tugsiaut 146:1, 2, NW) âp, ’inûnerit tamât Jehova únersiutigiuk’. inûneritdlo nâgssáungitsûsínauvoĸ, nalunaiaissûgavit puiornavêrugko. (wD 1/9 84)
ivdlit ĸanoƙ akísaviuk?
□ nuname angnerpârtumik sumik inuk ingmíkut pisínautitauvfeĸarsínauva?
□ Jesus Kristus ĸanoĸ ilivdlune Jehovap nalunaiaissuinut uvdlumíkut inûssunut maligagssauva?
□ Jehovap nalunaiaissue tamarmik sumik pingârtumik nãmagsiniagagssaĸarpat?
□ igdlumit igdlumut angalaorníkut oĸalũssissarnermut perssuarsiúngitsumik nalunaiaissarneĸ taortausínauva?
□ ilerĸuvut nalunaiaissarnerputdlo sumik ingmingnut atássuteĸarpat?
[Qupp. 12-mi assiliartaq]
Jehovamut nalunaiaissûnine Jesusip puiúngisáinarpâ
[Qupp. 14-mi assiliartaq]
ilungersorit igdlumit igdlumut angalaorníkut oĸalũssissardlutit perssuarsiúngitsumigdlo nalunaiaissardlutit