ugperissamik ilumôrtumik ujardlerpit?

SAGDLUSUÍSSUT naniniarsaraiuk — ujarpiuk? imatut akísagunarputit: „sô, taimailiorpunga!“

kisiáne amerdlasût sagdlusuíssut ujángilât. ímaĸalume agdlât ugpererusutaĸángitdluínardlutik. suna píssutausínauva inuit ilaisa Gûteĸarnera, bîbile naleĸángitsûssunik sujunigssamut neriorssûtitaĸartoĸ oĸauserinerâlo ugperusúngingmássuk?

tamána ugperigáine inuit inûnermingnik avdlánguissariaĸarneránik kinguneĸarsínauvoĸ. inûnertigdlo Gûtip maligagssiainut nalerĸússarusúngíkuníko tauva aperĸusigagssamingnik akerdlilĩssutigssamingnigdlo navssârtariaĸartarput; ingmingnut ĸularungnaersítariaĸartarput bîbile erĸortũngínerardlugo.

agdlât ilagît kristumiut iluáne isuma tamána pigineĸarsínauvoĸ. sagdlusuíssut kajungerât, kisiáne ímaĸa issertorĸigsârtumik ĸanoĸ iliûseĸartarput nalúngitdluínaraluardlugo Gûtip oĸausiane inerterĸutigineĸartut. taimáitumik tunuarsimârtarput imalũnît arrîtsumik ilagîngnit kãngariartuârtardlutik. bîbilime agdlagsimavoĸ: „tarnip nalúngíssusia itigartíkamíko inuit ilait ugperssutsimíkut umîarput.“ — 1 Timûtiuse 1:19, The New English Bible.

Jesus nunamĩkatdlarmat inugpagssuit sagdlusuíssut puvfagsimârutigât. piumassamingnik iliorumagamik pitsaussumik ajoĸersorneĸarumángitdlat. Jesusip sujuligtûtitoĸaĸ íssuardlugo ũmatait kivdligssáungínerarpai. issitik siutitigdlo matusimavait „issimingnik takungningnaviásanatik siutimingnigdlo tusásanasik ũmatimingnigdlo pâsissaĸásanatik avdlamigdlo isumatãsanatik“ anersãkutdlo katsorsartísanatik. — Matîuse 13:14, 15.

inuit taimáitut ímaĸa oĸásagaluarput píssutsit ersserĸigsumik navsuiarneĸángitdluínartut. akerdlilersuissuisa ilaisa Jesus ima aperât: „ĸanoĸ sivisutigissumik tarnivut nakimatísavigit? Kristusiuguvit oĸarfigivdluínartigut.“ kisiáne pâsíngisaĸarnerat Jesusip pissũssutigíngilâ; nangmingnerdle pissũssutigât. Jesus akivoĸ: „oĸarfigigaluaravse ugpíngilase. suliat atâtama arĸane suliarissama nalunaiarpãnga. ugpíngilasile, savautima ilagíngingmase.“ — Juánase 10:24-26.

inuit ilaisa sagdlusuíssut tusarumángigpássuk, pâserusungnago isumatârdlutigdlo ajorungnaersíneĸarusúngigpata, tauva tamána Satan Djævelip iluaĸutiginerdlugsínauvâ. Satanip „ugpíngitsut isumait . . . tagpîtdlisípai, Kristusip tássa Gûtip ássingata nâlangnássusianik îvangkîliup ĸaumangârnera táukunúnga ĸaumarĸunago“. — 2 Korintumiut 4:4; ãma takûk Matîuse 13:10-15.

tamána ima pâsissariaĸarpa tusagagssap nuánersup tusarnigssânut pâsinigssânutdlo neriûtigssaĸángitsoĸ? nâmik, sôruname taimáingilaĸ! kisiánile isumaĸarpoĸ inuk nangmineĸ aperĸutaussorujugssûssoĸ.

bîbilip oĸausertai tatiginardluínartũput ugperissamik ilumôrtumik ilumôrdlune ujardleráine. ugperissarsiornerup tungâtigut pissortat pingârniartut, makitasût tusâjumángitsutdlo Jesus akerdlilerpât. inuínarpagssuitdle ĸanoĸ ĸisuariarpat? táukua „ajoĸersûtait tupigusûtigait“! agdlât pinerdlugtailisitsissut Jesusimik tigussaringnigkiartortitausimassut utersimáput oĸardlutigdlo: „inungmik táussumatut oĸalugtoĸángisáinarpoĸ.“ — Matîuse 7:28, NW; Juánase 7:46.

ivdlit sagdlusuíssut ujarugko, Gûtip avĸutigerĸussai pâsiniarugkit oĸausîlo maleruardlugit inûlerumaguvit, tauva ugperneĸ ilumôrtoĸ naniumârpat. Jesus oĸarpoĸ: „pivdluarput iluarnermut kâgtut imerusugtutdlo, ĸârsitdlásagamik.“ „savautíka ilisarãka, savautimalo ilisarãnga.“ „savautima nipiga tusararât, uvangalo ilisarãka, táukualo maligtarpãnga.“ „sagdlusuíssúmut atassut nipiga tusararât.“ — Matîuse 5:6; Juánase 10:14 (NW), 27; 18:37, NW.

ugperneĸ tássauvoĸ Gûtip anersâvata ivdlernartup inerititaisa ilât. (Galâsiamiut 5:22, 23) erĸordluartumik ilisimássut ugpernerdlo ĸínutigigugkit, nikatdlujuitdlutitdlo tamáko angujumagugkit maligdlugitdlo inûlerumavdlutit, tauva Gûtip ikiúsavâtit. sôrdlo Jesus oĸartoĸ: „ĸinujuáinaritse, tunineĸásause tauva; ujardlertuáinaritse, nanissísause tauva; kasugtortuáinaritse, magpiúneĸásause tauva.“ — Matîuse 7:7, NW.

sulíssutigissariaĸagkangnik ajornartorsiuteĸaruvit tauva Gûtip ikiúsavâtit. agdlagkane isumagssarsiarititaussune atuarpugut: „[Jehova] isumavdluarfigûk ũmatigkut ilũngardlutit, sujuneĸarssutsitdlo tatiginago; súkut ingerdlassarângavit ilisariniaruk, tauva avĸutigissagssatit iluartíkumârpai.“ — ússatit 3:5, 6.

Gûte „ũmámut issigissaraoĸ“. (1 Sâmuale 16:7) Gûtip nalúngilâ sagdlusuíssut nâpertuivdluássuserdlo ujarnerigput ãmalo maleruarĸussai ilumôrtut maleruardlugit inôrusungnersugut. Gûtimut ĸanigdliguvta tauva táussuma ĸanigdlísavâtigut. — Jâko 4:8.

ivdlíme taimáipit? ugperissaĸ ilumôrtoĸ ujarpiuk? atâtap ajoĸersuinera tusarêrpiuk tássungalo isúmat angmarêrsimaviuk? ilisarilerpiuk ilagsivdlugulo? inûnerpit Gûtip ilerĸorerĸussainut tugdlũtúngortíniardlugo ilungersûtiginerane píssutsinik ímaĸa ilingnut ajornartorsiortitsisínaussunik nalâtaĸartarpit?

taimáisimagpat tauva Jesusip oĸausê uko kãmagtûtigísavatit: „pruvfîtit agdlagáine agdlagsimavoĸ: tamarmigdlo Gûtimit ajoĸersorneĸarsimásáput. kíkutdlũnît atâtamit tusardlutik ilíniartut nungutdlutik ornigtarpãnga.“ — Juánase 6:45.

atâtap ĸilangmiussup ajoĸersuinera atuagkame naleĸángitsumĩpoĸ. atago misigssoriartigo ĸanoĸ naleĸartiginersoĸ ĸanordlo ugpernivtínut súniuteĸarsínaunersoĸ.