Anorersuarujussuup ajunaartitsisup kingorna annaassiniarneq

Siorna aseruinerit anorersuarujussuup Mitchip pilersitai silarsuaq tamakkerlugu tusagassiortunit sammineqarsimaqaat. Jehovap nalunaajaasuisali amerlasuut sapiiseqalutik anorersuup ajunaartitsisup eqqugaanik ikiuiniarnerat maluginiarneqarpallaarsimanngilaq. Nalunaarusiap tulliuttup pissanganartumik takutippaa qanoq kristumiussuseq ilumoortoq qatanngutinullu asanninnivik allaat pissutsini ajorluinnaraluartuni ajugaasinnaasoq.

ULLOQ oktobarip 22-at 1998 anorersuup ajunaartitsisup pilerfia Caribiap kujataata kippasinnerusortaani immaamiippoq. Kiattumi naqitsiniisaffioriarluni, nalunaaquttap-akunneri 24-unngitsulluunniit ingerlaneranni kiattumi anorersuannguuppoq atserneqarlunilu Mitch — amerlasuut ersinermik anniaatinillu ukiorpassuit eqqaamasaqarfigisassaat. Anorersuaq sakkortusiartuinnarluni avannamut ingerlaarpoq. Oktobarip 26-ani anorersuarujussuannguussimavoq silasiortut immikkoortumut 5-imut naatsorsuussaat anoraalu nalunaaquttap-akunneranut 290 kilometerinik sukkassuseqarluni anoraasuartarneralu nalunaaquttap-akunneranut 320 kilometerit sinnerlugit sukkassuseqarluni.

Takuneqarsinnaavorlu Jamaica Caymanillu qeqertai anorersuarujussuup aqqusaassagunarai. Kimmulli saqippoq Belize Amerikap qiterliup sineriaaniittoq toraaginnavillugu ingerlalerluni. Belizeli eqqornagu Hondurasip avannarpasissuata sineriaani aarlerinarluni qamasutut ilerpoq. Tassanngaannarlu anorersuarujussuaq pitorarpoq. Oktobarip 30-ani Mitch Hondurasimut appakaappoq toqu aseruinersuarlu malitsigalugit.

Mitchip Honduras eqqorpaa

Mitch pitorarpoq kuuiinnavissumik siallertitilluni. Víctor Avelar, piffissani tamaat oqaluussisartoq Tegucigalpami najugalik oqaluttuarpoq: „Oktobarip 31-ani unnuakkut nalunaaqutaq ataatsip eqqaani nipi kallersorsuartut nipilik tusaavarput. Kuunnguusimagaluartoq maannakkut kuunngorsimavoq sarfartorujussuaq. Illut marluk inuttatik mattussaaqqallutillu nilliasut nassataralugit sarfamit kuugussaapput.“ Illoqarfiup immikkoortuani allami marulluup kuuttup minnerpaamik inuit 32-t ajunaartissimavai, taakkununnga ilaallutik Jehovap nalunaajaasuinit Biibilimik atuaqqissaaqatigineqartartut arfineq-pingasut. Jehovap nalunaajaasui kuisimasut ajunaartortaqanngillat.

Hondurasimi pisortat ajornartorsiulernermut sukkasuumik qisuariarput inissiaagallartunik nappaatiterillutik. Silarsuarmi tamarmi ajunaartoqarnerani ikiuisartut nunanit qulinit amerlanerusunit peqataaffigineqartut aamma iliuuseqarput. Taamatulli Jehovap Nalunaajaasui annertuumik ikiuiniarnermik sulinertik aallartippaat Biibilimi oqaatsit uku eqqaamallugit: ’Taamaattumik piginnaaffissaqartilluta tamanut ajunngitsuliorta, pingaartumilli uppeqatitsinnut.’ (Galâsiamiut 6:10) Ajunaartoqarnerani ikiuinissamut ataatsimiititalianik pilersitsipput, sinerissamilu illoqarfinni atugarliornerujussuaq pissutigalugu annaassiniarneq aallartillugu.

Jehovap nalunaajaasua Edgardo Acostamik atilik oqarpoq: „Arfininngornermi oktobarip 31-ani umiatsiaaqqamik pissarsivugut qarsutsiviusimasumullu avalalluta. Qatanngutivut angutit marluk annaappavut,a paasivarpulli qatanngutit sinneri allamukaatissagutsigik anginerusumik angallatissarsisariaqarluta. Taamaattumik angallat arfanniutaasimasoq pissarsiaraarput aqaguanilu ullaaralaakkut angalanitta tullia aallartipparput. Iluatitsillutalu ilagiinnut ilaasortat tamaasa saniliisalu ilaat annaappavut, katillugit inuit 189-it.“

Juan Alvarado La Juntap eqqaani annaassiniarnermut peqataavoq. Oqaluttuarpoq: „Inuit ima nilliasut tusaasinnaavavut: ’Ikiortigut! Annaatsigut!’ Inuuninni misigisimasama ajornersarivaat. Qatanngutit mattussaalluinnarsimapput. Amerlasuut illut qaaviniipput.“ Annattuusimasoq María Bonilla oqarpoq: „Imeq avatangiiserput imarsuartut ippoq. Tamatta qiavugut.“ Annaassiniarnerli iluatsippoq. Annattut ilaat alla Humberto Alvarado oqaluttuarpoq: „Qatanngutit annaatiinnanngilaatigut inissatsinnilli, nerisassanik atisanillu aamma tunilluta. Annaassiniarnermut isiginnittuusimasup oqaluttuuppaatigut uppeqatiminik ikiorniarluni takkuttoqarsimanngitsoq — Jehovap Nalunaajaasuisa kisimik ikiorniarsimagaanni. Tamatuma qularunnaarsissimavaa Jehovap Nalunaajaasuisa upperisaq ilumoortoq pigigaat.

Illoqarfimmi La Limami Jehovap nalunaajaasuisa ilaat illumi ataatsimoortut anisinnaajunnaarsimapput. Imeq qullaraluttuinnarmat qalia putoriarlugu illup qaliata quassuttuuinut qallorsimapput. Jehovap nalunaajaasua Gabimik atilik oqaluttuarpoq: „Ullualunnguaannarnut nerisassaqarpugut. Nungummata qatanngut angut inuunini navianartorsiortillugu nalulluni qaqqortariarsuarnik aallerpoq. Immitsinnut eqqissisarniarluta Guutip naalagaaffiata erinarsuutaanik erinarsorpugut.“ Juan ilagiinni kiffartortoq oqarpoq: „Annassasorinngikkaluarpugut, isumaqatigiillutalu aalajangerpugut Biibilimut tunngasumik atuagassiaaterput Napasuliaq Alapernaarsuiffik atuarniarlugu. Tamatta qialerpugut isumaqaratta naggataamik ataatsimoorluta atuaqatigiilluta. Atuaqatigiinnitta nikallujuinnissatsinnut ikiorpaatigut.“ Eqimattat ullut arfineq-pingasut nikallujuillutik utaqqipput pisortat aallartitaannit annaassiniaqatigiinnit ikiorneqarnissamik tungaanut.

Naak annattut amerlasuut inuunertik pigiinnaraluarlugu navianartorsiorunnaaraluarlutillu, pissutsit piviusut artornartut atugassarivaat. Jehovap nalunaajaasua Lilianimik atilik oqarpoq: „Nammineq pigisanik annaasaqarneq annernartuuvoq, assersuutigalugu atisat, pequtit ilaqutariillu assingi. Angerlarsimaffiga marullummik, eqqakkanik allaallumi pulateriaarsunnik ulikkaartoq takugakku ajoriaqqiffissaqanngilaq.“ Kisiannili kristumiut qatanngutigiit ikioqatigiinnerat nalissaqanngitsoq uppernarseqqinneqarpoq. „Qatanngutit ikioriartorluta takkupput,“ Lilian oqaluttuarpoq. „Uiga Jehovamut nalunaajaasuunngitsoq aperivoq: ’Qanoq ililluta uagutsinnut iliuuserisaat akiniassavavut?’ Qatanngutit arnat ilaata oqarfigalunga akivoq: ’Qutsavigissanngilarma. Qatanngutigaarmami.’“

El Salvadorip anorersuarujussuup sakkortussusia misigivaa

Mitch kimmut El Salvadorip tungaanut ingerlaarnermini qatsoriartoraluarluni, suli sakkortussusia ajunaartitsisinnaavoq. Taamaalinerani El Salvadorimi Jehovap nalunaajaasui ataatsimeersuarnissamut „Guutip inuunermut aqqutigeqqusaa“-nut piareersarlutik ulapputileruttorput. 40.000-it sinnerlugit ataatsimeersuarnermut najuunnissaat ilimagineqarpoq. Mitch qanilliartortillugu oqaluussisartut tamarmik ataatsimeersuarnermut anngunnissaat ilimanarunnaaraluttuinnarpoq. Kuuit sinitik qarsuppaat naatitat, aqqusernit illullu aqqusaakkatik tamaasa nassataralugit. Qattunernilu orpiit tamarmik killorneqarsimanerat pissutigalugu marrulluk annertoorujussuaq sisoortalerpoq.

Nelson Flores Jehovap Nalunaajaasuisa ilagiivini Chilangueramiittuni nakkutilliisuusimavoq. Arfininngornermi oktobarip 31-ani ullaakkut iterami paasilersimavaa illoqarfik Chilanguera kuup illua tungaaniissimagaluartoq peqanngitsoq. Illut 500-t kuugunneqarsimapput. Anersaakkut qatanngutimi inuunerisa navianartorsiorunarnerat eqqarsaatigalugu, nammineq inuunermi navianartorsiortinnissaa eqqarsaatiginagu, kuummut alligaluttuinnartumut tingivoq. Nelson oqaluttuarpoq: „Illua tungaanut apuukkama nikuippunga sumiinneralu paasiniarniaraluarlugu. Maanimi oqaluussillunga ullut tamaviisa illumit illumut angalaartarsimavunga, maannali ilisarnarsinnaasumik ataatsimilluunniit nassaarsinnaanngilanga.“

Unnuaq taanna Chilanguerami inuit 150-it missaasa inuunertik annaasimavat. Taakkununngalu ilaapput Jehovap nalunaajaasuinit Biibilimik atuaqqissaaqatigineqartartut arlalissuit. Jehovap nalunaajaasuatut kuisissimasunik inuunerminnik annaasaqartoqanngilaq.

Pilertortumik annaassiniarneq aallartinneqarpoq. Arístedes Estrada, annaassiniarnernik tamakkuninnga aaqqissuusseqataasoq oqarpoq: „Chilangueramut iseqqusaasimanngilagut. Imeq suli qaffakkiartorpoq. Inuit ikioqqullutik nilliasut puigunngisaannassavakka, annaassiniartunilli namminneq inuunertik annaanniarlugu qimaannarneqartariaqartut.“ Piffissap ingerlanerani qatanngutit tamarmik annaanneqarput. Naalagaaffilersaarfiit ikiuiniarnermik qitiusutut atorneqarput. Aamma oqaluussisartut ilaat napparsimmavinni, atuarfinni allanilu ajoqusersimasut angerlarsimaffeqanngitsulluunniit allattorsimaffiinut qatanngutit aqqinik ilaasoqarnersoq alapernaarsuisinneqarput. Pisariaqartinneqartut pissarsiarinissaat ilagiinnit isumagineqapallattarpoq.

Ikiuiniarnermili atugassat qitiusunut apuunniarnerat ajornaatsuinnaanngilaq. Qatanngutit angutit illoqarfimmit Corintomeersut namminneq naatitarpassuatitik nassarlugit aallarput, nunalli sisoorneranik aqqusineq asserneqarmat unitsinneqarput. Ajornartorsiut tamanna qanoq anigorpaat? Assaallutik aqqutigaat! Aallaqqaammut isiginnaartut neriuuteqarpasinngivillutik qatanngutit sulisut isigiinnarpaat. Sivitsunngitsorli aqqusinermut assiaqutsiussimasut piiarnerannut ikiuunniarlutik neqeroorput. Qatanngutit Corintominngaaneersut ornitaminnut apuukkamik marulluinnaapput, ikiuisinnaagamilli nuannaarlutik.

Napasuliaq Alapernaarsuiffiup Peqatigiiffiata immikkoortortaqarfia pilersuinermut qitiusutut atorneqarpoq. Gilberto, immikkoortortaqarfimmi sulisoq ikiuutissanik ingerlatseqataasoq oqaluttuarpoq: „Upperiuminaapporluunniit. Angallatit takkuttut amerlangaarmata biilit unittarfianni allaffeqarfiullu sioraani aqqusinermi angallannermik aqutsisussanik toqqaasoqartariaqarsimavoq.“ Naatsorsuutigineqarpoq atisat 25 tonsit missaat nerisassallu 10 tonsit missaat tunniunneqarsimasut. Suleqataasut 15-it sapaatip-akunnera nallugu atisat immikkoortitersimavaat ingerlateqqinnissaannullu piareersarlugit.

Mitchip Nicaragua aqqusaarpaa

Nicaraguap killeqarfianut qanittuararsulluni anorersuarsuaq aqqusaarami nunami sialussuartitsisimavoq. Angerlarsimaffiit tusindelippassuit aserorneqarsimapput aqqusernillu kuugussaallutik. Illoqarfiup Posoltegap eqqaani illoqarfeeqqat tamakkerlutik inuillu 2000-it sinnerlugit marullussuup sisoorneratigut matoorussaasimapput.

Nicaraguami Jehovap nalunaajaasuisa ajunaarneq tusaramikku, ikiuiniarnissamik pilersaarut annertooq sulissutigilersimavaat. Kajumittut qatanngutiminnik ujarlerlutik suliamut qasunarlunilu ulorianartumut aallartinneqarsimapput. Oqaluussisartut immikkooqatigiit marluk, ataatsit Leónimeersut (illoqarfik Posoltegap kujataaniittoq) allallu Chichigalpameersut (illoqarfik avannarpasissumiittoq) Posoltegap tungaanut aallartinneqarput. Qatanngutit angutit tamarmik immikkut poortukkanik oqimaatsunik nassataqarput. Annaassiniarnermi sulisut mianersoqqusisimapput aqqutaa ingerlavigisassaanngingajanneralugu, qatanngutilli angutit aalajangersimapput suliassartik naammassiniarlugu.

Ataasinngornermi novembarip aappaani ullaaralaakkut qatanngutit angutit Leónimeersut biilit usisaatillit ikiuutissanik usilersoriarlugit ikaartarfik kuugussaasimasoq tikillugu ingerlapput. Biili usisaat usingiareeramikku qatanngutit angutit sikkilertut marlunngorlutik avipput: Ataatsimooqatigiit siulliit Posoltegamukartussapput, aappaalu illoqarfimmut qarsutsiviusimasumut Telicamik atilimmut. Avissaartinnatik qinoqatigeeqqaarput. „Qinoreeratta nakussatsinneqangaartutut misigivugut,“ qatanngutit angutit ilaat oqarpoq. Atorfissaqartissavaallumi. Kussinersuit ikaartariaqartarpaat ilaannilu marullukkut sisuungajattarlutik imaluunniit sikkilitik nammallugit ikaaruttariaqarlugit. Aqqusernillu orpinnik uppinnikunik asserneqarsimagajupput. Aammattaaq isigisat amiilaarnartut inuit toqungasut timaat imermi puttasut isigisariaqartarpaat

Tupinnaannartumik sikkilertut Leónimeersut Chichigalpameersullu ataatsikkungajak Posoltegamut apuupput. Nerio López, annaassiniartut ilaat oqaluttuarpoq: „Sikkilima assakaasui nungullarnikuupput isumaqaraluarpungalu kilometerit marluk missaannaanni atasinnaasut.“ Qanoq ilillutik pinerpoq ingerlaarnera tamaat ajunngillat. Uterlunga aatsaat qaartoorput. Annaassiniartunit tamanit siullersaallutik qatanngutit apuussimapput. Ornitaminnilu qatanngutit angutit arnallu nanigamikkik nuannaaqaat. Qatanngut arnaq oqarpoq: „Jehovamut qatanngutitsinnullu ikiuisimammata annertoqqusersuisimammatalu qujamasoqaanga. Sinnattorisimanngilarpulluunniit qatanngutitta ikiorniarluta taama sukkatigisumik takkussinnaanerat.“

Illoqarfinnut qarsutsineqarfiusunut sikkilernerit amerlasuut tamanna siullersariinnarpaat, amerlanertigullu Jehovap nalunaajaasui ajunaarfiusunut annguteqqaartuusarsimapput. Illoqarfimmi Larreynagami takusaq immikkut ittuusimavoq qatanngutit angutit 16-it sikkilerlutik tikimmata. Qatanngutit tikitaasa iliuuserisimasaat killitsissutigisimaqaat. Sikkilertut ilaannikkut nassatatik 20 kilo sinneqartut nammattariaqartarsimavaat. Qatanngutit marluk atortussat 100 kilo sinnerlugu illoqarfimmut El Guayabomut ingerlassimavaat. Qatanngutip angutip sikkilimini nassarsinnaasaminik tamanik nassartup Biibilip oqaasia Jesaja 40:29-mi allassimasoq nakussatsissutigisimavaa: „[Jehovap] qasusoq nakussatsittarpaa, nukillaangasoq pissatsittarpaa.“

Illoqarfimmi Tonalámi oqaluussisartut qatanngutinut angutinut akisussaasunut oqariartortitsisimapput nerisassamaatitik nungulluinnalersut. Oqariartortitaq apuukkami tupaallaatigeqisaminik tusarpaa ikiuutissat aallarunneqareersimasut. Angerlaramilu illuani nerisassaqarpoq. Marlon Chavarría, Chinandegap eqqaani qarsutsiviusimasumi ikiuutissanik angallasseqataasimasoq oqaluttuarpoq: „Illoqarfiit ilaanni ilaqutariit 44-t Jehovamut nalunaajaasuupput. Ilaqutariilli 80-t nerisassanik isumaginnissutit iluaqutigaat qatanngutit allanik aveqateqarnerat pissutigalugu.“

Ikiuiniarneq tamanna pisortanit tusarneqarpoq. Illoqarfimmi Wamblánimi illoqarfiup borgmesteria oqaluussisartunut allakkamini ima allappoq: „Ikiornissatsinnut periarfissaqarnersusi paasiniarlugu allaffigaassi. . . . Takusimavarput Wamblánimi qatanngutisi ikiorsimagisi, paaserusukkaluarparput aamma uagut ikiornissatsinnut periarfissaqarnersusi.“ Jehovap Nalunaajaasui nerisassanik, nakorsaatinik aamma atisanik nassiussipput.

Guatemalami aseruinersuit

Michip Honduras El Salvadorilu qimassimatsiaannarlugit Guatemala eqqorpaa. Sara Agustín, oqaluussisartoq Guatemala Cityp kujataata tungaani najugaqartoq, imerujussuup ittuppalunnersuanit itertinneqarsimavoq. Qaqqap qunnera najugaqarfia kuunngorsimavoq sarfartorujussuaq. Sarap akulikitsumik sanilini pulaartarsimavai sallusuissummik Biibilimeersumik oqaluttuunniarlugit, maannali itersarniaraluarlugit neriuutaaruteqqalluni matumit matumut angalaarpoq. Saniliisa illui amerlasuut marrullummik qaqqamit kuuttumik matoorneqarput. Sarap nivaataq tiguaa allallu inuunerinik annaassiniaqataalerluni, taakkununnga ilaapput meeqqat mikisut arfineq-marluk marullummi assaalluni qaqissimasai. Meeqqat taakkua ilaat ataaseq inunngormat ernisussiortuuffigisimavaa. Alianaraluartumilli niviarsiaraq inuusuttuaraq Vilmamik atilik toqusunut ilaavoq. Tamanna sioqqutitsiarlugu Sarap atuagassianik Biibilimut tunngasunik tunisimavaa.

Naak anorersuarsuaq qatsuumisimagaluartoq sialliinnavinnera inerittussanik, ikaartarfinnik illunillu ajoqusiisimaqaaq. Guatemalami Jehovap nalunaajaasuisa immikkoortortaqarfianut atortussarpassuit nassiunneqarsimapput, aalajangerneqarporlu ikiuutissat tamakkua ilaat qatanngutinut Hondurasimiittunut nassiunneqassasut. Ikaartarfiit amerlasuut aserorneqarsimammata timmisartoqarfillu qarsunneqarsimammat atortussat umiatsiamik angallanneqartariaqarput. Frede Bruun immikkoortortaqarfimmi sulisoq oqaluttuarpoq: „Umiatsiaq glasfiberimit sanaaq 27 fodinik takissusilik attartorparput nakorsaatit nerisassallu tonsip ataatsip missaaniittut usigalugit aallarpugut. Pissanganartorsiornartumillu imaani aalaqisumi angalareerluta masaqaluta illoqarfimmut umiarsualiveqarfiusumut Omoamut apuuppugut.

Mitchip kingunipilui

Mexicop kujataata tunua tungaani Mitch qatsoriartortutut ippoq. Kisianni soorlu kingullermik eqisariarnertut ittumik avannamut tunummut ingerlaarpoq USA-milu Floridap kujasinnerusortaa eqqorlugu. Mitchili qatsuumisimavoq Atlantikullu imartaanut uterluni tassani qatsorpoq. Novembarip tallimaanni kiattup anorersuaannik aarlerisaarutit tamarmik atorunnaarsimapput.

Ilisimatuut ilaasa Mitch taasimavaat „nunarsuup kippasinnerusortaani ukiuni 200-ni kingullerni anorersuarsuit toqutsinerpaartaat“. Kisitsisit kingulliit najoqqutaralugit toqusut immaqa 11.000-iussapput; sulilu tusindellit maqaasineqarput. 3 millionit sinnerlugit angerlarsimaffeerussimapput imaluunniit annertuumik eqqugaallutik. Hondurasip præsidentia, Carlos Flores Facusse oqarsimavoq: ’Ukiut 50-it ingerlaneranni ineriartuaartissimasavut annaavavut.’

Anorersuarujussuup kingunerisaanik Jehovap nalunaajaasuisa amerlasuut angerlarsimaffitik annaasimavaat. Amerlasuutigut nunaminertaq illup inigisimasaraluanut allaat ilanngullugit ajoraluartumik kuugunneqartarsimapput. Taamaakkaluartoq Jehovap nalunaajaasuisa amerlasuut angerlarsimaffiisa iluarsaanneranni sanaqqinneqarneranniluunniit ikiuunnissartik isumagisimavaat.

Ajunaarnerit alianartut anorersuarujussuartut Mitchitut ittut eqqaasippaatigut ’ullussani kingullerni ajornartunik nalliuttoqarfiusartuni’ inuusugut. (2 Timûtiuse 3:1-5) Ajunaarnernut taamaattunut tamakkiisumik illersorneqarneq aatsaat piviusunngussaaq Guutip naalagaaffiata nunami aqutsineq tiguppagu. (Matîuse 6:9, 10; sarĸúmersitat 21:3, 4) Jehovalli nalunaajaasuisa qujamasuutigaat anorersuarujussuarnerani qatanngutiminnik ajunaartoqanngimmat.b Qimaaqqusilluni peqqussutinut naalannerit najugarisamilu ilagiit aaqqissuussilluarsimanerat amerlasuut annannerannik kinguneqarpoq.

Qaammatini tulliuttuni Jehovap nalunaajaasuisa annertuumik suliniutigisimavaat anersaakkut suliniutit aalajangersimasunik ingerlaqqinnissaat. Assersuutigalugu El Salvadorimi anorersuarujussuarmit eqqugaasut ataatsimeersuarnermut Mitchip nunamik aqqusaarinerata kinguninngua ullualuit qaangiunneranni pisussamut peqataajartornissaat sulissutigineqarpoq. Bussinik attartorneqarsimasunik angallanneqarnissaat inisaallu aammalu nakorsanit ikiorneqarnissaat isumagineqarput napparsimasuttaaq ataatsimeersuarnermut najuussinnaaqqullugit. Ataatsimeersuarneq iluatsilluarpoq najuuttullu amerlanerpaagamik 46.855-iusimapput — ilimageeqqaakkamit amerlanerujussuit. „Misigisimasavut pissutaallutik annilaarujussuaqqavugut,“ José Rivera oqarpoq, Jehovamut nalunaajaasoq El Salvadorimeersoq angerlarsimaffimminik niuertarfiutiminillu anorersuarujussuarnerani annaasaqarsimasoq. „Kisianni qatanngutitta inoroorsaartuunerat pissutigalugu ataatsimeersuareerluta angerlaratta allanngorluinnarsimavugut.“ Oqaatigineqarpoq nunani tamakkunani Jehovap nalunaajaasuisa ataatsimiinnerinut najuuttartut amerleriangaarsimasut — tamanna ikiuiniarnitta nalunaajaasuunngitsunit maluginiarneqarsimanerata toqqaannartumik kinguneraa.

Misigisarli oqaluussisartunut misinnarnerpaasimagunarpoq. Carlos Hondurasimi qarsutsineqarmat annattuusimasoq oqarpoq: „Taamaattumik misigisaqarsimanngisaannarpunga. Uanga nammineerlunga qatanngutit asanninnerat isumassuinerallu misigisimavakka.“ Ullut ilaanni anorersuarujussuup Mitchip piliarisimasai aseruinerit oqaluttuaannanngussapput. Asanninnerli Jehovap nalunaajaasuisa takutitaat amerlasuullu inuunertik avatitillu annaariataannaallugit qatanngutiminnik ikiuiniarsimanerat, qaqugumulluunniit puiorneqarnavianngilaq. (gE 8/6 99)

[Quppernerup ataani ilanngussat]

[Qupp. 21-mi ungalusaq/assiliartaq]

Jehovap nalunaajaasui nunanit eqqaamiuneersut ikiuupput

SILASIORTUT Belize anorersuarujussuarmit Mitchimit eqqorneqassasoq siulittuutigimmassuk, takkunnissaa nunami piareersarfigineqalerpoq. Qartussaasut sinerissat tamaasa nunallu pukkinnersaat inuerutiteqqummatsigik, Jehovap nalunaajaasui illoqarfiit pingaarnersaannut Belmopanimut 80 kilometerit missaanni ilorpasinnerusumiittumut illoqarfinnulluunniit qutsinnerusumiittunut qimaapput.

Qujanartumilli Belize anorersuarujussuup sakkortussusianit annerusumik eqqorneqanngilaq. Qatanngutilli Belizemeersut uppeqatimik Hondurasimi, Nicaraguami Guatimalamilu atugarisaat tusaramikku, nerisassanik, atisanik, imermik minguitsumik aningaasanillu tunissuteqarfigaat.

Taamali qisuariarneq qatanngutinut nunani eqqaamiuniittunut nalinginnaavoq. Costa Ricami Jehovap nalunaajaasuisa containerersuit sisamat nerisassanik, atisanik nakorsaatinillu imallit nassiuppaat. Panamami qatanngutit tunissutinut qitiusumik tigooraavigalugit immikkoortiterivigalugillu poortuivissanik pilersitsipput. Ullualunnguit ingerlaneranni ikiuiniarnermi atortussat 20 tonsit sinnerlugit katersorneqarsimapput. Nalunaajaasuunngitsup ima oqaaseqarfigaa: „Isumaqarlunga sakkutuut kisimiunerusoq ajunaartoqartillugu ikiuinissamik aaqqissuussisartut. Maannali takusinnaavara Jehovap nalunaajaasui aamma taama pikkoritsigisut.“ Maanna oqaluussisartut angut taanna Biibilip oqariartuutaanik avitseqatiginiarlugu akuttoqatigiissumik pulaartalersimavaat.

Qatanngutip angutip assartuussinermut tunngasumik niuertup biili kalittagalik aquttussaalu (Jehovamut nalunaajaasuunngitsoq) ikiuiniarnermi atortussanik Nicaraguamukaassisussaq isumagisimavai. Biili usisaat Panamap Costa Ricallu killeqarfiisigoormat naalagaaffimmi atorfillit akileraarutinik akiliisitsinngillat. Benzinamik orsersortarfiup biilip usisaatip tankii marluk ulikkaarlugit tunissutitut immersimavai, aqqutaanut siumut uterlugulu naammarujussuartumik. Aamma Nicaraguap killeqarfiani akileraaruserisut poortukkat misissornissaat pisariaqartissimanngilat. „Jehovap Nalunaajaasuininngaaneerpata misissortariaqanngilavut,“ oqarput. „Inuit taakku ajornartorsiutiginngisaannarpavut.“

Hondurasimi ikiuutissat nunakkut angallannissaat ajornarsimavoq. Kisianni qatanngut arnaq kristumiu Hondurasimiut aallartitaqarfianni sulisoq, aallartitaqarfik aqqutigalugu timmisartukkut ikiuutissat akeqangitsumik nassiunnissaasa isumaginissaannut akuerineqarsimavoq! Taamaalilluni ikiuutissat 10 tonsit sinnerlugit nassiunneqarsimapput.

Soqutiginartumik nalunaajaasut ikiuiniarnerat nalunaajaasuunngitsunit assut maluginiarneqarsimavoq. Suliffeqarfiit ilaasa karsit, nipittartut puui imiisiviillu tunissutigisimavaat. Allat aningaasanik tunissuteqarsimapput akikilliiviginnillutilluunniit. Panamami timmisartoqarfimmi sulisut assut killitsissimapput Jehovap nalunaajaasui 20-t ikiuutissanik Hondurasimut nassiutassanik nammineq piumassutsiminnik usingiaanermut ikiuuttut takullugit. Aqaguani timmisartoqarfimmi sulisut taakkua ilaat takkupput nammineq aningaasaatiminnik katersatik tapiissutitut tunniukkiartorlugit.

[Qupp. 22-mi ungalusaq]

Mexicomi ajunaartoqarnerani assingusumik ikiuiniartoqarpoq

MEXICO anorersuarujussuup Mitchip kingunerisaanik annikitsuinnarmik aseruiffiuvoq. Anorersuarujussuup Amerika Qiterlermi pitoraannissaa sapaatip-​akunnialuinnaanik sioqqullugu, nunap ilaa Chiapas annertuumik qarsutsineqarfiusimavoq. Illoqarfeeqqat 350-it missaanniittut eqqorneqarsimapput. Sumiiffiit ilaanni illoqarfiit nunguvittarsimapput.

Qarsutsinerit soorunami aamma Jehovap nalunaajaasuinut qarsutsineqarfiusuni najugalinnut ajornartorsiuterpassuarnik pilersitsisimapput. Sumiiffinnili utoqqaanertat sukkasuumik iliuuseqartarnerat amerlasuutigut silapiluup sunniutaanut millisaasuusarsimavoq. Nunap ilaani ilagiinni utoqqaanertat oqaluussisartut tamaasa ataasiakkaarlugit pulaarsimavaat kajumissaarlugillu sialliinnassappat naalagaaffilersaarfimmut qimaaqqullugit. Isumaqarput naalagaaffilersaarfik najukkaminni ornissallugu aarlerinaannerpaajusoq. Qaammalernerani illoqarfik imerujussuarmik kuunnit marlunnit siniminnik qarsutsisimasunik pisumik eqqorneqarpoq. Nalunaajaasut saniliisalu ilaat naalagaaffilersaarfiup qalianut qimaanermikkut annapput. Nalunaajaasunik ajunaartoqanngilaq.

Mexicomi Jehovap nalunaajaasui 1000-t missaanniittut pisortat eqqugaasunut inissialiarititaanni najugaqarallartariaqarput. Nalunaajaasut 156-it angerlarsimaffii sequmilluinnarneqarsimapput, 24-lu aseruatiterneqarsimallutik. Tamakkualu saniatigut naalagaaffilersaarfiit arfineq-​marluk sequmilluinnarneqarsimapput.

Jehovap nalunaajaasui eqqugaasunik ikiuiniartussanik arfinilinnik ataatsimiititaliorsimapput uppeqatitik sanilillu ikiorsinnaajumallugit. Nerisassat, atisat, ulissat atortussallu allat agguaanneqapallassimapput. Sumiiffimmi pisortat Jehovap nalunaajaasuisa ajunaarnermi sulinerata annertussusianik paasitinneqaramik oqarsimapput: „Sakkutuulluunniit taama sukkatigisumik iliuuseqarsinnaasimanngillat.“

Qangali Jehovap nalunaajaasui unneqqarissutut tusaamaneqarsimapput, akuttungitsunillu taakkununnga iluaqutaasarsimavoq. Assersuutigalugu inuit ataatsimoortut sumiiffimmi pisortanut ikioqqullutik saaffiginnimmata, aperineqarsimapput najugaqarfiata ilaani Jehovap nalunaajaasuinik najugaqartoqarnersoq. Angerlutik akimmata naalagaaffimmi atorfillit oqarfigaat: „Taava qinnuigissavassi ilaat ataaseq maannarteqqullugu eqqugaasunut ikiuutissat tunniunniassagatsigik.“

Ilagiinni utoqqaanertat ilaata pisimasut oqaatigilluarpai ima allakkami: „Naak ajunaarnersuaq manna pisimagaluartoq qatanngutit ajunngitsumik eqqarsarnissaq pigiinnarsimavaat. Inuunertik akieriaannaallugu qatanngutit eqqaamiuvut amerlasuut aggersimapput nerisassanik Biibilimullu tunngasunik atuagassianik nakussatsissutissatsinnik ikioriartorluta. Jehovamut qujassutissaqaqaagut.“

[Qupp. 16-mi nunap assinga/assiliartaq]

(Allassimasut qanoq inissisimanersut naqitami takuneqarsinnaavoq)

Mexico

Guatemala

El Salvador

Belize

Honduras

Nicaragua

Costa Rica

[Qupp. 17-mi assiliartaq]

HONDURAS

◼ Guaceriquep kuussua

[Qupp. 18-mi assiliartat]

EL SALVADOR

◼ Chilanguerami aqqusernit pingaarnersaat

◼ José Lemus paniilu annapput naalagaaffilersaarfiallu aserorneqanngilaq

◼ José Santos Hernandez illumi sequmissimasup saavani

[Qupp. 19-mi assiliartat]

NICARAGUA

◼ Telicamut sikkileqatigiit siulliit

◼ El Guayabomi Jehovap nalunaajaasuisa ajunaartoqarnerani ikiuutinik isumagineqarnertik qujamasuutigeqaat

[Qupp. 20-mi assiliartat]

NICARAGUA

◼ Kajumillutik sulisut illunik aserorsimasorpassuarnik sanaqqiinerat siulleq

◼ Jehovap nalunaajaasuisa ilagiivineersut nerisassat poortorneqarnerini ikiuupput

[Qupp. 20-mi assiliartaq]

GUATEMALA

◼ Sarap meeqqat arfineq-marluk marullummit annaanneqarnerat peqataaffigaa