Avinneq qinerneqassava?

„Uiusoq toqugaangat inuit paasinnillaqqittaqaat, aamma nuliaalluarsimanngikkaluarluni. Uiminilli qimataasoqaraangat, allat isumaqartarput sapinngisaq tamaat atorlugu aappariinneq ingerlalluartinniarneqarsimanngitsoq. IKIUNNGA!“ — Afrika Kujallermi Iteritsi!-mik atuartartoq.

ALLASIORNEQ avinnerlu misigisaasinnaapput ajoqusiingaartut. Ilaat aapparminnik saammaateqatigiinnissamut aappariinnermillu ataannartitsinissaminnut pissutissarsisimapput, allalli aapparminnit allasiortumit avissinnaatitaanermik Guutimeersumik atuinissaminnut pissutissarsisimapput. (Matîuse 5:32; 19:9) Assersuutigalugu nuliaasup meeqqallu isumannaatsuunerat, anersaakkut peqqissusiat nalinginnaasumillu atugarissaarnerat naviarnartorsiortinneqarsinnaavoq. Nappaatinilluunniit kinguaassiuutitigut tunillaattartunik tunillanneqarnissani immaqa isumaaluutigaa. Aammattaaq imaassinnaavoq uini isumakkeerfigisimagaa, tatigeqqilernissaali tunngavissaqatinnagu, taamaattumillu inooqatigiinnarnissaa kissaatiginagu.

„Aalajangigassarisimasama artornarnerpaartaraat,“ arnaq isumatsassimasoq oqarpoq. Aap, aalajangigassaq artornartoq. Allasiornerup aliasutsitsingaartarnera pissutigiinnarnagu, aammattaarli avinneq kingunertoorujussuusarmat ilumuunngitsuliorfigineqarsimasup inuuneranut sunniuteqangaartussaammat. Aapparmit allasiorsimasumit avissanerluni inuttut nammineq aalajangigassaavoq, allallu aappaasup pisuussuteqanngitsup taamatut aalajangiisinnaanera Biibilimik tunngaveqartoq ataqqisariaqarpaat.

Ajoraluartumilli amerlasuut avinnerup kingunissai eqqarsaatiginagit aalajangiutipallattarpaat. (Naleqqiuguk Lúkarse 14:28) Aappaasup pisuussuteqanngitsup avissanerluni aalajangertinnani suut eqqarsaatigisariaqarpai?

Qitornaqarussi

„Angajoqqaat namminneq ajornartorsiutiminnik eqqarsaateqarpallaartut qitornamik pisariaqartitaat puigortarpaat sumiginnarlugilluunniit,“ atuakkami Couples in Crisis-imi allassimavoq. Aappariit avinnissamik eqqarsaateqartut qitornamik atugarissaarnissaat anersaakkullu peqqissuunissaat aamma eqqarsaatigisariaqarpaat. Ilisimatoorpassuit paasisimavaat avinnerit eqqissisimanerugaangata meeqqat atugarliunnginnerusartut. Allaat pissutsini artornartuni saamanerup aappariit ’assuarisassarsiorajuttuunngitsissinnaavai, ilalaarsinnaatillugillu naalliukkunik’. — 2 Timûtiuse 2:24, 25.a

Aappariit avinniarlutik aalajangertut eqqaamasariaqarpaat imminnit, qitornaminniunngitsoq, avissallutik. Meeqqat anaana ataatalu marluutillugit suli pisariaqartippaat. Pissutsit ilungersunartuunngippata, soorlu meeqqap atornerlunneqarsinnaanera aarlerinarpat, upperisarsiornikkut inuttullu assigiinngissutit atorlugit meeqqat angajoqqaaminnik tamanik najuisinnaanerannik arsaarneqartariaqanngillat.

Aappariit meeqqat misigissutsikkut inuunerat qajannartoq eqqarsaatigisariaqarpaat asanninnermik, isumassorneqarnermik pingaartinneqarnermillu oqaluttuunneqartuarnissamik pisariaqartitaat aamma soqutigisariaqarpaat. „Angajoqqaat asanninnerat soraanngisaannartoq meeqqat pissutsini nutaani iluatsitsinissaannut tunngaviliissaaq,“ tamanna pillugu atuakkami allassimavoq. Meeqqat anersaakkut pisariaqartitaannik matussusiisarneq oqimaaqatigiissaariuarsinnaanerannut aamma ilasaataasinnaavoq. — 5 Moses 6:6, 7; Matîuse 4:4.

Aningaasaqarneq avinniarnerlu

Avinneq pinngitsoorani aappariit marluullutik isertitamik pigisaamillu ilaannik, ilorrisimaarutit ilaannik immaqalu angerlarsimaffimmik nuannaringakkamik annaasaqarfigisinnaavaat. Qularnanngitsumillu akiligassat amerlanerusut aningaasaanik ikinnerusunik akerlertariaqalissammata, silatusaarnerussaaq piviusorsiortumik aningaasartuutissanik tulleriiaarigaanni nammineq pingaarnerutitanut naleqquttumik. Annaasaqarneq ajuallatsinneqarnerlu taarserusunnermik atuinerup annerulersinnissaa taarsigassarsinerlu pinngitsoortinneqartariaqarput.

Aappariillu aappariinnertik kipitinniarlugu aalajangerunik, ataatsimut aningaaserivimmi uninngatitamik qanoq agguarneqarnissaat isumaqatigiissutigisariaqarpaat. Immikkut uninngatitaqalernissap tungaanut, uninngasuutit ataatsimoorussat atornerlunneqannginnissaat pillugu aningaaserivik qinnuineqarsinnaavoq aappariit marluullutik atsiorsimappata aatsaat aningaasanik tigusisoqarsinnaasoq.

Aamma silatusaarnerussaaq isertitat aningaasartuutillu naatsorsoqqissaaraanni akilersuisoqarnissaa isumaqatigiinniutigineqassappat. Aammattaaq nunani amerlasuuni inatsisitigut piumasarineqarpoq pissutsit allanngorpata akileraarnermut oqartussaanut nalunaaruteqarnissaq.

Amerlanertigut silatusaarnerussaaq eqqartuussisuserisumut avittunik suliaqarnermut misilittaqartumut atassuteqarnissaq. Nunat ilaanni aappariit marluullutik akuerisinnaasaminnik angusaqarniarlutik isumaqatigiissitsiniartartoq atorsinnaavaat, atuutinnissaallu eqqartuussivimmi aalajangerneqartillugu. Ingammik meeqqanut tunngasuugaangat angajoqqaat amerlasuut immikkut ilisimasalimmik arlaannaannilluunniit illersuinngitsumik atuerusuttarput. Suna tamaat akigalugu ajugaaniarnatik isumaqatigiinngissutinut isumakuluutinullu angajoqqaat qitornatik sapinngisamik asattuuttariaqarpaat. Timip piisigut pitsaaqutit ilaat misigissutsikkut aningaasallu tungaatigut akigisariaqakkanut naleqqiunneqarsinnaanngillat.

Ikinngutinut attaveqarnerit allanngornerat

„Peqqusiileqineq nalorninerlu amerlasuut ikinngutiminnut avissimasunut misigisartagaat suusupagisariaqanngillat,“ ilisimatuut oqarpoq. Aappaasup pisuussuteqanngitsup avinnera inatsisitigut, ileqqussatigut Biibilimillu tunngaveqaraluartoq, avinnermut pissutaasutut ilaasa isigisinnaavaat. Qisuariarnerat inussiarniinnermiit, ilasseraanngitsumut piaaralunilu nigorsimaniarnermut assigiinngitsuusinnaapput. Ajornerpaavorli pisuussuteqanngitsoq siornatigut ikinngutigisimasaraluaminit akeqqersimaarfigineqaleraangat.

Amerlasuut paasineq ajorpaat avissimasut qanoq annertutigisumik annertoqqusersorneqartariaqarnerat; ilaat isumaqarput allaffiginerat naammattoq. Nalinginnaasumilli ikinnguteqartarpoq „qanoq iliornissaminnik nalorninngitsunik,“ atuakkami Divorce and Separation-mi (Avinneq averusernerlu-mi) allassimavoq. „Sianertarput arlaannut biiliunneqartariaqarnersoq arlannilluunniit suliassaqartinneraatik oqaloqateqarusuinnarnersorluunniit aperalutik.“ Biibilimi allassimaneratut piffissani artornartuni taamaattuni ’ikinngut qatanngutaasunik tatiginarnerusoq’ pisariaqartinneqarpoq. — Ussatit 18:24.

Pitsannguallannissamut aqqut

Ukiut 16-it avinnermi kingorna anaanaq nassuerpoq: „Ilaannikkut suli kiserliortaqaanga, inuppassuilluunniit ilagigaluarlugit.“ Taama pisoqartillugu qanoq iliortarpa? „Suliffiga nakkutigalugu, ernera isumassorlugu angerlarsimaffigalu isumagalugu illersuutitut taaneqarsinnaasoq ineriartortissimavara. Aammattaaq Jehovap Nalunaajaasuisa ataatsimiinnerinut najuuttalerpunga, upperisara allanut oqaluttuarisalerpara inuillu assigiinngitsunik ikiortalerlugit. Assut iluaqutaavoq.“

Ukiup ingerlanerani ullut piffissallu aalajangersimasut eqqaamasanik misigisanillu annernartunik eqqaamasaqarfiusarput: ulloq aappaasup allasiornerata paasineqarnera, ulloq illumit qimagunnera, ulloq eqqartuussivimmiinneq. Pisimasunik nuannersunik soorlu feeriarnerit katiffissiornerillu kingumut eqqaaneri aamma annernartorujussuusinnaapput. Pat oqarpoq: „Ilaquttannik ikinngutinnilluunniit pissutsinnik ilisimannittunik ilagisaqarnissama isumagineratigut ullut taamaattut anigortarpakka. Sammisaqaqatigiittarpugut eqqaamasatoqqanik puiuisitsisunik nutaanillu pilersitsisunik. Iluaqutiginerpaasimavarali Jehovamut attaveqarnera, nalunnginnakku paasigaanga.“

Isumatsaqinak

Aappaasut pisuussuteqanngitsut Biibilip najoqqutassiaanik maleruaasut aapparmillu allasiortumik avissinnaatitaanerminnik Guutimeersumik atuisut, pisuussuteqartutut Jehovamilluunniit ajattorneqartutut misigisariaqanngillat. Guutip uumigisaa tassaavoq aappaasup pisuussuteqartup ilumuunnginnera, ’qianermik anersaarulunnermillu’ kinguneqartoq. (Malaki 2:13-16, NV) Jehovap, ’Guutip nallittuingaartup’, ajattorneqarluni qanoq innersoq nammineq nalunngilaa. (Lúkarse 1:78; Jeremia 3:1; 31:31, 32) Taamaattumik qularinngissinnaavarput ’Jehovap naapertuilluarneq iluarigaa imminullu ilumoortut imminiiginnanngikkai’. — Tussiaat 37:28.

Soorunami pitsaanerungaarsimassagaluarpoq allasiorneq kingunerisaalu alianartut pinngitsoortinneqarsimappata. Ilaqutariittut pilluarneq isertugaateqarpoq-pb, ilaqutariinnut atuakkap atoriaannaasunik siunnersuutillip, nunarsuarmi tamarmi amerlasuut pilluarlutik aappariinnissaannut allasiunnginnissaanillu ikiorsimavai. Allaaserisat taamaattut saniatigut kapitaleqarpoq qitornanik qanoq perorsaasoqarsinnaaneranik aappariinnermilu ajornartorsiutivinnik qanoq aaqqiisoqarsinnaaneranik imalinnik. Najugarisanni Jehovap nalunaajaasuisa atuagassiamilluunniit matuminnga naqiterisut paasissutissanik amerlanerusunik tuninissat nuannaarutigissavaat. (gE 22/4 99)

[Quppernerup ataani ilanngussat]

[Qupp. 10-mi ungalusaq]

AVINNEQ MEEQQANUT PITSAANERUNNGILAQ

1988-imi Diana, Walesip prinsessia, maanna toqoreersoq oqarsimavoq Tuluit Nunaaniinnaq ullut tamarluinnaasa meeqqat 420-t pallillugit angajoqqaamik avinnerat misigisaraat. Meeqqat taakkua pingasorarterutaat tallimat inorlugit ukioqarput. Alianaraluartumik meeqqat taakku 40 procentiinit ikinnerunngitsut avinnerup kingorna angajoqqaamik aappaat atassuteqarfigiunnaartarpaat.

Amerlasuut isumaannut akerliusumik „meeqqat ikittuararsuit angajoqqaamik avinnerat nuannaarutigaat“, peqqinnissamut nakorsaatinullu tunngasunik allaatiginnittartoq ilisimaneqarluartoq allassimavoq. „Angerlarsimaffimmi tujorminartoqarsinnaagaluartoq meeqqat amerlanerit angajoqqaamik najuinnarnissaat kissaatigaat.“ Allasiorneq paasineqarpat angajoqqaat oqqaterujussuartaraluarpataluunniit, isummipallattariaqanngillat aappariinneq kipitinneqarpat meeqqanut pitsaanerusoq. Allamik isiginnittaaseqalernikkut inooriaaseqalernikkullu immaqa ilaqutariinnut pitsaanerpaasumik najuinnartoqarsinnaavoq.

Atuakkiortoq Pamela Winfield oqarpoq: „Uiusut allasiortut silaatsuliorsimanertik pissutigalugu ilaqutariit avissaarpata qitornamik isaanni anniaatit eqqarsaatigisariaqarpaat.“

[Qupp. 11-mi ungalusaq]

AVINNERIT TAMAASA GUUTIP UUMIGAI?

„’Jehovap avinneq uumigigaa’ eqqarsaatiginera isumakuluutigiuaannarsimavara.“ Pat oqarpoq, „Jehovap iliuuserisimasara iluarisinnaanera eqqarsaatigiuaannarpara.“

Apeqqut tamanna akissutissarsiorlugu Malaki 2:16-imi Ny Verden-oversættelsen naapertorlugu oqaatsit takoriartigik. Malakiasip nalaani Israelikkormiorpassuit nuliaminnit avittarsimapput, immaqa arnanik inuusunnerusunik Guutimik nalusunik nuliarniarlutik. Ileqqoq taamaattoq peqquserluttuliortoq ilumuunngitsorlu Guutip avoqqaaraa. (Malaki 2:13-16, NV) Taamatut qalliinnarsiorluni allamik aappartaarniarluni aapparmit avinneq Jehovap uumigaa. Allasiorsimasoq nuliaminillu avittoq averusertinniarluguluunniit tatisisoq ilumut ilumuunngitsuliorpoq peqqusersuumillu ajortuliorluni.

Avinnerilli tamarmik versinit taakkunannga avoqqaarineqanngillat. Jesus oqarsimavoq: ’Nuliaminik uersanngitsumik avittoq allamik nuliaruni arnaaneqarpoq, avitamillu nuliartoq arnaaneqarpoq.’ (Matîuse 19:9) Uani Jesusip allasiorneq avissutaasinnaasutut akuersaarpaa — Biibilimi allamik aappartaarnissamut tungavissatut akuerisaasutuaq. Aappaasup pisuussuteqanngitsup immaqa aappani ilumuunngitsoq isumakkeerfiginiarlugu aalajangerpoq. Aappaasorli pisuussuteqanngitsoq Jesusip oqaasii tunngavigalugit aapparminit ilumuunngitsumit avittoq Jehovap uumigisaanik iliuuseqanngilaq. Aappaasumuna peqquserluttuliortup iliuusia Jehovap uumigigaa.

[Qupp. 10-mi assiliartat]

Aappaasup pisuussuteqanngitsup meeqqallu asannittumik annertoqqusersorneqarneq pisariaqartippaat