Allasiornerup kinguneri alianartut

„Qimappakkit,“ oqarasuaatikkut oqaluttoq oqarpoq — qularnanngitsumik oqaasiuvoq Patipa uiminit tusarsimasaasa alianarnerpaartaat. „Allasiorsimanera paasisinnaanngilluinnarpara,“ oqarpoq. „Annilaangassutiginerpaasimasara — arnaq alla pillugu uinnit qimataasinnaanera — annilaanganartui tamakkerlugit piviusunngorpoq.“

PATIP, 33-nik ukiullip, aappariinnerup ingerlalluarnissaa kissaatigisimavaa, qimanngisaannassallugu uiata neriorsoqqissaarsimavaa. „Qanorluunniit pisoqassagaluarpat najuginnassalluta neriorsoqatigiissimavugut,“ oqarpoq. „Ilumoorukkaa qularutigisimanngilara. Qimappaangali. Maanna sueruppunga. Kisimiivippunga.“

Anaanani aappariinnerup avataatigut atoqateqartartoq paasineqarmat ulloq taanna Hiroshimut puiunaappoq. „Aqqaniliinnarnik ukioqarpunga,“ oqaluttuarpoq. „Anaanaga perpaluginnaq illup iluani ingerlavoq ataatama malikkaani. Ataataga oqarpoq: ’Utaqqilaarit. Oqaloqatigiissutigisariaqarparput.’ Malugisinnaavara ajorluinnartoqartoq. Ataata aliasoqaaq. Qaanginngisaannarpaa. Allamillu oqaloqatissaqannginnami uanga oqaloqatigaanga. Eqqarsaatigeriaruk. Angutip 40-kkunni ukiullip tuppallersaasussarsiorluni misiginneqataasussarsiorlunilu ernini aqqanilinnik ukiulik saaffigaa!“

Assuarnartuliat kunngikkormiunik, politikerinik, isiginnaartitsisartunik upperisarsiornikkulluunniit pisortaasunik aalassatsitsisuugaluarpata namminerluunniit ilaquttatta ilumuunngitsuunermik aliasunnermillu misigisaqartikkaluarpatigut allasiorneq alianartunik kinguneqartuarpoq. The New Encyclopædia Britannica-mi allassimavoq: „Allasiorneq katinnertulli nalinginnaatigigunarpoq.“ Ilisimatuut ilaasa missingersimavaat piffissap ingerlanerani aappariit tamarmik 50 procentiisa 75 procentiisalu akornanniittut aappartik ilumuunngitsuliorfigisimagaat. Aappariinneq pillugu ilisimatooq Zelda West-Meads Tuluit Nunaanni Naalagaaffiup Aappariinnik Siunnersuisartuineersoq oqarpoq allasiortorpassuit paasineqarneq ajoraluartut „allasiortarnerit nalinginnaaleraluttuinnarnerannut takussutissaqartoq“.

Misigissutsit imaaginnavissut

Kisitsisit atorlugit nassuiaanerit tamakku annilaarnartuugaluartut allasiornerup avinnerullu inuit ulluinnarni inuunerannut qanoq annertutigisumik sunniuteqarnersut tamakkiisumik ersersinngilaat. Aningaasat tungaatigut kingunipiluit annertuut saniatigut kisitsisit tamakku tunuanni misigissutsit qullilinerillu qanoq amerlatigisut ilaqutariillu unnuarpassuarni sinissaaruttarnerat, paatsiveerussimaartarnerat, aliasungaartarnerat, annilaangangaartarnerat artorsaateqangaartarnerallu eqqarsaatigeriakkit. Eqqugaasut innermillusooq misilinneqarneq tamanna immaqa anigorpaat, misigissutsikkulli qileroqalerneq imaaliallaannaq peerneq ajorpoq. Aliasunneq ajoqusiinerlu allasiornerup kinguneri qaangeruminaatsorujussuusinnaapput.

Atuakkami How to Survive Divorce-mi (Avinneq qanoq anigorneqarsinnaasoq-mi) allassimavoq: „Aappariinneq aserortoq misigissuserpassuarnik takunnissinnaanermik ajoqusiisinnaasunik pilersitsisarpoq. Qanoq iliortoqassava? Qanoq qisuariartoqassava? Qanoq ililluni anigorneqassava? Qulanngivinnermiit qularnermut, kamannermiit pisuusutut misiginermut tatiginninnermiillu tatiginninnginnermut allanngorartoqarsinnaavoq.“

Nuliani allasiorsimasoq paasigamiuk Pedro taama misigivoq. Oqarpoq: „Aapparmit salloqittagaasimalluni paasillugu misigissuserpassuusarput paatsuunganartut.“ Eqqugaasut pissutsinut alianartunut misigisaminnut qanoq iliussanerlutik nalornissutigereeqaat. Avataaniittunulli, pissutsinik paasinnippianngitsunut, qanoq nalorninarnerutigissava? Pat oqarpoq: „Kialuunniit qanoq misiginersunga paasilluarsimanngilaa. Uima arnaq alla ilagigaa eqqarsaatigigaangakku, timikkut anniartarpunga, tamannalu allanut nassuiarneqarsinnaanngilaq.“ Nangipporlu: „Ilaannikkut silanngajaalersutut misigisarpunga. Ullut ilaanni suut tamaasa aqussinnaallugit misigisarpunga aqaguanili akerlerluinnaanik. Ullut ilaanni maqaasisarpara aqaguanili peqqusersusaarneri, salloqittaaneri uannillu nikanarsaanera eqqaasarpakka.“

Kamanneq isumaalunnerlu

Allasiorsimasumik aappalik oqaluttuarpoq: „Ilaannikkut misigissutsit ilagisarpaat kamannivik.“ Aapparisap ajortuliornera ajoqusiineralu kisimik eqqarsaataanngillat, aammali „aappariinnerup, maanna aserortup, qanoq ingerlalluarsimatigisinnaanerigalua,“ tusagassiortoq oqarpoq.

Aamma nalinginnaavoq aappaasup pisuussuteqanngitsup imminut ataqqinikillisarnera naammannginnermillu misigisarnera. Pedro oqarpoq: „Ima eqqarsarnarpoq: ’Kajungernarnera naammannginnami? Arlaannik ajoquteqarama?’ Imminut kukkunersiorluni misissuinarsisarpoq.“ Atuakkiamini To Love, Honour and Betray-mi (Asanninneq, ataqqinninneq ilumuunnginnerlu-mi) Zelda West-Meads isumaqataalluni allappoq: „Qaangeruminaannerpaat ilagaat . . . imminut ataqqiunnaarneq.“

Pisuusutut misigineq nikallunganerlu

Pisuusutut misigineq aamma qaqutigoortuunngilaq. Arnaq ernumatsassimasoq oqarpoq: „Isumaqarpunga arnat pisuusutut misigingaartartut. Imminut pisuutilluni ima eqqarsarnarpoq: ’Suna kukkussutigisimavara?’

Allasiorsimasumik nuliallip misigissutsit apparlutillu qullartarnerannik taasami illua tungaa oqaatigaa: „Nikallunganeq silarlussatulli aallartittarpoq.“ Arnaq oqaluttuarpoq uimi qimammani ullut tamaasa qialluni. „Qimareeraanga ulloq qulliliffiunngitsoq siulleq eqqaamavara. Tamanna pivoq sapaatip-akunneri arlallit qaangiuttut, sulilu qaammatialuit ingerlareersut aatsaat sapaatip-akunnera naallugu qianngilanga. Ullut sapaatip-akunnerilu qulliliffiunngitsut taakku iluarsiartorninnut ersiutaasutut pisut pingaarnerit ilagilerpaat.“

Marloriaammik ilumuunnginneq

Amerlasuunik arajutsineqartartoq tassaavoq allasiornerup pisuussuteqanngitsoq marlutsigut eqqortarmagu. Qanoq ililluni? Patip tikkuuppaatigut: „Uannut artornaqaaq. Ukiorpassuarni uigiinnanngilara, aammattaarli ikinngutigaara — ikinngutiginerpaasara.“ Ajornartorsiuteqaleraangat amerlanertigut nuliaasoq uiminut ikiortissarsiortarpoq. Uiusoq allasiortoq misigissutsitigut avaanngunartunik ajornartorsiortitsiinnarani, nuliaminulli pisariaqartitaatut ikiortissaajunnaarpoq. Tassanngaannaq nuliani anniaatissingaarpaa ikinngutiginerpaasaanillu tatigisaanik aamma arsaarlugu.

Ilumoorfigineqannginnermik neriorsulussinnarneqarnermillu misigineq aapparmut pisuussuteqanngitsumut anigoruminaannerpaat ilagaat. Aappariinnik siunnersuisartup nassuiarpaa sooq allasiorneq taama aserorsaataatigisoq: „Aappariinnermut imminut tunniuttarpugut neriuutivullu takorluukkavut isumalluarnivullu aamma annertuumik tunniuttarlugit . . ., 100 procentimik tatigisinnaasatsinnik naatsorsuutigisinnaasatsinnillu ujarlertarpugut. Tatiginninneq tamanna tassangaannaq annaaneqarpat nallukattanik illuusaliatut anorimit uppitinneqartutut issaaq.“

Soorlu atuakkami How to Survive Divorce-mi eqqaaneqartoq, ersarippoq allasiornermit eqqugaasut „misigissutsikkut allannguutit anigorniarnissaannut ikiorneqartariaqartut. . . . Sumik iliuuseqarsinnaanerlutik qanorlu iliorsinnaanerlutik ikiorneqarnissartik pisariaqartissinnaavaat.“ Qinigassat suusinnaappat?

’Saammaateqatigiinniassaagut,’ immaqa taama eqqarsartoqarpoq, ’avissaangaluunniit?’ Ajornartorsiutip avinneq aaqqiissutigisariaqaraa isummipallakkusuttoqarsinnaavoq, ingammik aappariinneq tamaviaarnartuusimappat. Immaqa eqqarsartoqarpoq allasiortoqarsimatillugu avinneq Biibilimi akuerineqartoq. (Matîuse 19:9) Aappaatigulli tamanna Biibilimi inassutigineqanngilaq, taamaattumillu misigisoqarsinnaavoq saammaateqatigiikkaanni aappariinnerullu ineriartorteqqinnissaa nakussassaqqinnissaalu misilikkaanni pitsaanerusoq.

Allasiorsimasumit avissanerluni ataasiakkaat namminneq aalajangigassaraat. Qanorli iliussanerluni qanoq nalunnginneqarsinnaava? Saammaateqatigiittoqarsinnaanersoq aalajangerniarlugu ikiuutaasinnaasumik takusaqariarta.

[Quppernerup ataani ilanngussaq]