Inuusuttut aperipput:

Sooruna oqaatissuaaneq taama ajoqusiisinnaatigisoq?

„Ilinniarnertuunngorniarfimmi nappaatitut tunillannartutullusooq ippoq. Ikiaroornartut, sakkuat paanninnerillu ajornartorsiutaanerpaanngillat — tassali oqaatissuaaneq.“ — Michelle,a 16-inik ukiulik.

ILAASA mamartorsuartut isigaat, ilaasali toqunartutut. Atuagassiani, aviisini tv-kkullu aallakaatitassiani amerlasuuni nassaassaavoq. Oqaloqatigiinnernilu amerlasuuni aliikkutatut atorneqartarpoq. Sunaana oqaluuserigipput? Inuit susarneri pillugit oqaloqatigiinneq, aamma oqaatissuaanermik taaneqartartoq.

Soqutiginnilersitsipallattunik allanik oqaaseqarunanngilaq: „Tusarpiuk aatsaannguaq tusagara?“ Oqaatsit tamatuma kingorna oqaatigineqartut pisimasuusinnaapput imaluunniit ilumuunngitsuusinnaallutik — immaqa tamanik akulaakkat. Qanorluunniit ikkaluarpat nammineerluni oqaatissuaanissaq ussernartorsiorfigineqarsinnaavoq. „Ajornartorujussuuvoq allat sulerinerinik soqutiginninnginnissaq“, Lori 17-inik ukiulik oqarpoq. „Ikinngutikkalu isumaqatigiissimavugut arlaannik soqutiginartumik tusagaqaraangatta, ingerlateqqittassallutigu“.

Sooq taamaaliortartugut

Sooruna oqaatissuaasarneq taama pissanganartigisoq? Ilaatigut inoqativut soqutigigatsigik. Taamaattumik oqaloqatigiinnerup ingerlanerani ikinngutitta ilisarisimasattalu qanittukkut sulerisimaneri eqqartussagutsigik pissusissamisuuginnassaaq.

Tamanna ajorpa? Tamatiguunngitsoq. Allanik oqaloqateqarnikkut paasissutissanik iluaqutaasunik taartigeeqatigiittoqarsinnaavoq, assersuutigalugu kikkut katissimanersut, kina meerartaarsimanersoq kinalu napparsimanersoq. Kristumiuttaaq Biibilip nalaani inuusut uppeqatimik inuuneranni qanittukkut qanoq pisoqarsimanersoq eqqartortarpaat. (Evfisumiut 6:21, 22; Kulorsamiut 4:8, 9) Ikinngutit ilisarisimasallu pillugit eqqartuillatsiartarnerit ataqatigiinnermut ilaaginnarpoq ikinngutigiilluarnerlu atatittarlugu.

Peqqusersusaarluni oqaatissuaanermi nakkarfiusinnaasut

Allat pillugit oqaloqatigiittarnerit ilaanni misiginneqataanermik ajunngitsumilluunniit soqutiginninnermik aallaaveqartanngillat. Assersuutigalugu Deidra 18-inik ukiulik oqarpoq: „Inuit oqaatissuaasarput nuannarineqarumallutik. Isumaqartarput oqaatissuaanernik tusarsimasaminnik suli pitsaanerusunik oqaluttuarsinnaagaangamik [nuannarineqarnerulertarlutik]“. Allanik tupigusutsitserusunnerup kinguneranik oqallisiginnittup immaqa pisimasuiit eqqunngitsumik oqaluttuarisinnaavai. „Oqaluttuaq ilisimagaanni, taava nammineq isuma malillugu ingerlateqqinneqarsinnaavoq“, Rachel 17-inik ukiulik nassuiaavoq. „Qanorluunniit iliortoqarsinnaavoq oqaluttuarlu qanorsuaq ilusilersorneqarsinnaalluni.“

Ilaannikkut peqqusersusaarluni oqaatissuaaneq akiniutitut atorneqartarpoq. „Ilaanni ikinngutiga arnaq ilumuunngitsumik oqallisigaara“, Amy 12-inik ukiulik oqarpoq. „Taamaaliorpunga uanga pillunga allanut oqaluttuarsimammat“. Qanoq kinguneqarpa? „Aallaqqaammut eqqarsarpunga: ’Haa, pisassani pivaa.’ Sivitsunngitsorli pisoq aqussinnaajunnaarpara, aallaqqaataaniilli nipangiussisimaannarnermit ajornerujussuarmik nikallortippaanga.“

Ersarippoq oqaatissuaaneq ’ikuallannertut aqussinnaajunnaakkatut issinnaasoq’ tarnip pissusiinik ilisimatuup oqarneratut. (Naleqqiuguk Jâko 3:5, 6.) Taama pisoqaraangat kingunipiloqarsinnaavoq. Assersuutigalugu allanut oqaatigeqqunngisat ingerlateqqikkaanni. Imaluunniit oqaatigisat ilumuunngippata oqaatissuaanertullu siaruarterinikkut inuup allap tusaamasaalluarneranik ajoqusiisinnaapput. „Ikinngutima ilaata ilumuunngitsumik oqallisigaanga ikiaroornerartarlunga, taamaanngivippoq“, Bill 12-inik ukiulik oqarpoq. „Nikallussutigisorujussuuara“.

Peqqusersusaarluni oqaatissuaaneq

Biibilimi pissutissaqartumik allassimavoq ’oqaq inuunermut toqumullu naalagaasoq’. (Ussatit 18:21) Aap, oqalunnerput iluaqutaasinnaavoq imaluunniit ajoqutaasinnaalluni. Ullutsinnili amerlasuut oqartik ajoraluartumik aserorsaatitut atortarpaat. Tussiaasiortup Davidip allaatigisaatut ipput, „taakkua oqqatik panatut silivaat, oqaatsit toqunartullit pisissiminnut qarsuliullugit, eqqorniarlugu pinngitsuusoq isertorfimminnit“. — Tussiaat 64:3-5.

Guutimit iluarisaajumasut paasissutissanik eqqunngitsunik siaruarterinaveersaartariaqarput, Biibilimimi allassimavoq ’sallunermik qanermioqartoq Jehovap maajunnarigaa’. (Ussatit 12:22) Piaaraluni eqqunngitsunik oqallisiginnittarneq peqqusersusaartumillu oqaatissuaanernik ingerlatitseqqittarneq salluliorneruvoq. Biibilimi allassimavoq kristumiut ’sallussaarlutik tamarmik ilumoortumik inoqatiminnut oqalussasut’. — Evfisumiut 4:25.

Allat pillugit allanut oqaluttuannginnerni imminut aperigit: ’Ilumut qanoq pisoqarnersoq ilisimavara? Oqaatsima eqqartorneqartoq allanit ajortumik isummerfigineqartissavaa? Taava suna pissutigalugu oqaatigissavara?’ Aamma eqqaamassavat oqallisaasoq ilumoortuugaluarpalluunniit ingerlatitseqqinneq naapertuilluartuliorninngortissinnaanngikkaa — ingammik paasissutissat allap tusaamasaanerluutigilersinnaappagit.

Aamma imminut ima aperisoqarsinnaavoq: ’Oqaatissuaaguma uanga nammineq tusaamaneqarninnut qanoq sunniuteqassava?’ Allat pillugit oqaatissuaasaraanni, nammineq qanoq ittuunermik takutitsiinnarpoq. Assersuutigalugu Kristen oqarpoq: „Allat eqqartussallugit ima piffissaqartigisimagaanni, taava nammineq inuuneq qasunarsimassaqaaq.“ Lisap paasivaa allanik annertuumik eqqartuisartutut ilisimaneqarnermi kinguneranik ikinngutiginerpaartaata arnap tatigiunnaarsimagaani. „Ima ingasatsigilerpoq allaat tatigisinnaanerlunga qularutigilerlugu“, Lisa oqarpoq. „Assut ajorpoq, uppernarsaaffigisariaqarsimavaralu tatigisinnaagaanga“.

Oqaatissuaatinik ingerlatitseqqittartutut ilisimaneqaraanni, taava immaqa ’ikinngutitut ajortutut’ isigineqalersinnaavoq, qanillinaveersaarneqalerlunilu. Biibilimi ima ussateqarpoq: „Mamarliisoq anngiussaagaluanik tusagaqartitsisarpoq; oqajamaat oqaluffiginngisaannakkit!“ (Ussatit 20:19) Kisianni nalunngiliuk oqaaseqanngikkaluarluni peqqusersusaarluni oqaatissuaanermut peqataasoqarsinnaasoq?

Tusarnaarneq — oqaatissuaanerup illuatungaa

Oqaatissunaanermi minnerpaamik inuit marluusariaqarput — oqaluttuartoq tusarnaartorlu. Tusarnaartoq oqaluttuartumiit pisuunnginnerusutut isikkoqarsinnaagaluartoq, Biibilimi allatut oqaaseqarpoq. Ussatit 17:4-mi allassimavoq: „Pinerluttuliortoq naalaartarpoq piunngitsunik oqaluttunut, sallutuup oqaatsit ajoqusiiginnartussat tusarnaartarpai.“ Taamaattumik oqaatissuaanermut tusarnaartoq akisussaaffimmik annertuumik tigummivoq. „Ilaannikkut oqaatissuaanermut tusarnaarneq oqaatiginninnerminngaanniit ajornerusarpoq“, atuakkiortoq Stephen M. Wylen oqarpoq. Sooq? „Oqaatissuaanermut tusarnaaqqissaarnerup oqaatissuaasup oqaluttuarnermini ingerlaannarnissaanut kajumissaartarmagu“, Wylen oqarpoq.

Ajoqutaasumik oqaatissuaasoq tusaagukku qanoq iliortariaqarpit? Imminut iluartuutinniarpallaannak oqaannarsinnaavutit: ’Allamik oqaluuserisaqaannarta’, imaluunniit: ’Taanna eqqartussallugu eqqortuusorinngilara imminut illersornissaminnut periarfissaqanngimmat.’

Kisiannimi inuit ilinnut qanillinaveersaarpata oqaluttuaasa tusarusunnginnerat pissutigalugu? Ilaatigut ilinnut illersuutaasinnaavoq. Qanoq? Aap, eqqaamajuk allanik ilinnut oqaatissuaasup, qularnanngitsumik aamma illit allanut oqaatissuaatigissavaatit. Aliasuutissarpassuugaluit pinngitsoortissinnaavatit ukioqatinnik inersimasunillu allanik mamarliisanngitsunik qanittumik ikinngutigiinnermik ineriartortitsinikkut. Wylen oqarpoq: „Sivitsunngitsoq paasissavat allanik oqaatissuaannginnikkut annaasatuat tassaasoq imminut aliasuutissarsinnginneq. Naggataatigut tatigineqarsinnaasutut tusaamasaallualissaatit.“

Pingaarnerusorli tassaavoq Guutimit ajunngitsumik tusaamaneqalerneq. Guutip allat qanoq eqqartortarnerigut soqutigaa. Jesus mianersoqqusivoq: ’Eqqartuutiffissami inuit nassueqquneqassapput oqaaserisatik piunngitsut tamaasa pillugit. Oqaatsinnit iluartuutinneqassaatit, aamma oqaatsinnit pillagassaatinneqassaatit.’ — Matîuse 12:36, 37.

Taamaattumik Paulusip inassutaa malissallugu silatusaarnerussaaq: ’Piuaanniaqqissaarlusi namminerlu suliassasi suliarisigik.’ (1 Tásalûníkamiut 4:11) Siunnersuut tamanna malikkukku, allanut Guutimullu ajunngitsumik attaveqalissaatit. (gE 22/2 99)

[Quppernerup ataani ilanngussaq]

[Qupp. 23-mi ungalusaq]

„Silarsuarmi oqaatissuaasartut annersaat“

„Nutaarsiassat kingulliit tusarpigit? “ Elektronikkut allakkerisarfiup, e-mailip, nassaarineqarnerani oqaatissuaasarneq teknologiip qutsissup silarsuaaniilerpoq. Atuakkiortup Seth Godinip e-mail „silarsuarmi oqaatissuaasartut annersaannik“ taasimavaa. Nassuerutigaa elektroniskimik allakkerisarfik pitsaaquteqartoq mianersoqqusillunili: „Immaqa arlaat ilumoortumik ilumuunngitsumilluunniit oqaluttuarluni aallartippoq, tassanngaannarlu tusindilippassuit ilisimalersinnaalerpaat.“

E-mailimik amerlasoorparujussuit anguneqarsinnaapput — assullu sukkasuumik. Godin oqarpoq: „Attaveqaatit nutaat oqaatsit eqqarsaatigilluakkat silassorissumillu eqqarsaatit allatat oqarasuaatikkullu maannakkorpiaq oqarasuapallannerit imminnut kattunnerisa siullersaraat.“ Taamaattumik e-mailikkut nassitsiniaraanni oqariartuutip ersarissuunissaa pitsaassaaq. Pissutsillu qanorluunniit ikkaluarpata paasissutissat uppernarsarneqanngitsut ikinngutinut ingerlateqqittariaqanngillat.

[Qupp. 22-mi assiliartat]

Allanik oqaatissuaasup . . . qularnanngitsumik aamma illit oqaatissuaatigissavaatit