Sooq amerlasuut aammik perusunngitsut
ONTARIOMI eqqartuussisut aalajangerneranni pingaartumi Sanningasulik Aappaluttoq (Røde Kors) inuit marluk aalersortinnermikkut HIV-imik tunillatsissimanerannut akisussaatinneqarpoq. Inuit taakku marluullutik aammik tunillannartulimmik inuup ataatsip tunissutaanik aalersorneqarsimapput. Eqqartuussisoq Stephen Borins oqarpoq: „Aattut tunillannartulittut ajortigisumit napparsimasut inuunerat navianartorsiortinneqarpat qisuariarasuartariaqarpoq.“
1980-ikkut ingerlaneranni Canadamiut 1200-t HIV-imik tunillatsissimapput, allallu 12.000-it hepatitis C-mik tunillatsissimallutik — tamarmik aak aallu akui tunillannartullit aqqutigalugit. Tunillatsissinnaaneq aarlerinaatikinnerulersinniarlugu maanna aak tunissutigineqartoq misissoqqissaarneqarnerusalerpoq. Aammilli tunissuteqartartut tamakkeratik kinguaassiuutitigut ileqqutik pillugit unneqqarissuupput. Assersuutigalugu, USA-mi misissuinermi paasineqarsimavoq aammik tunissuteqartartut 50-iugaangata ataatsip anguteqatinoortartuunini arnaqatinoortartuuniniluunniit imaluunniit atortittartunik atoqateqartarnini oqaluttuarineq ajoraa.
Nalorninarsisitsisoq tamanna ilallugu aammik misissuineq 100 procentimik qularnaatsuunngilaq. Atuagassiami New Scientist-imi allassimasutut „aammik tunissuteqartoq HIV-imik tunillatsissimanerminit sapaatip-akunnerisa pingasut qaangiutinnginneranni aaversippat aallu misissorneqarpat viruseqarnera takuneqarsinnaanavianngilaq. Hepatitis C-mut atatillugu tunillatsissimanermit aatsaat qaammatit marluk qaangiunneranni paasineqarsinnaavoq.“
Ukiuni kingulliunerusuni Canadamiut aammik tunissuteqarniartut — imaluunniit aalersortinniartut — ikileriarujussuarsimapput. Allaaserisaqartoq Paul Schratz ima allassimavoq: „Aammik tunissuteqarnissap soqutigineerukkiartornera aallu tunissutigineqartup atorsinnaanngitsup annertusiartornera ilutigalugit qujamasuttariaqarpugut Jehovap Nalunaajaasui aammut taartaasinnaasunik misissuineq siuarsarniarlugu aqqutissiuisumik suliniuteqarsimammata.“
Aviisi The Toronto Star soqutiginaqisumik paasissutissiilluni allappoq ’ukiumi qaangiuttumi inuit 40-t Canadami napparsimmavinnut uninnerminni sallullutik Jehovamut nalunaajaasuunerarsimasut, aalersortinnissartik kissaatiginnginnamikku’. Misissuinerni erserpoq Canadamiut 90 procentii aammut taartaasunik piumanerusut. Taamaattumik aammik piumannginneq taamaallaat upperisarsiornermik pissuteqarunnaarsimavoq. (gE 22/9 98)