Pinngoriartuaarsimanermik isumaliuutersuut uppernarsineqarsimanngilaq
Isumasiuinerup takutissimavaa Amerikamiorpassuit upperinngikkaat inuit siulliit uumassusilinnit kinguarsimarpaluttunit ineriartorsimanerat, upperaalli Guutimit toqqaannartumik pinngortinneqarsimanerat. Soormiuna ilinniarfinni annerusuni paasiniaasartorpassuit nalaatsornikkut pinngoriartuaarsimanermik isumaliuutersuut uppernarsineqarsimasutut tapersersoraat? Pissutaasut ilaat tassaavoq „Darwinimut isumaqataasut . . . universitetini amerlasuuni ilisimatuussutsikkut paasiniaanernut amerlanernut siuttuusarnerat,“ Phillip E. Johnson, Berkeleymi University of Californiami pinerluttuliornernut atatillugu inatsisinik professori, oqarpoq.
Phillip Johnsonip manna tikkuarpaa: „Ilaatigut biologiimi professorit ilinniartunut oqaluttuaqqusaasarsimanngillat nalaatsornikkut pisut uumassuseqarnerup tupinnartuinik pilersitsisinnaasimanerarneqarnerat, taamatullu ilumut pinngoriartuaarsimanerarneqarnerat, apeqqusissallugu pissutissaqarluartoq.“
Paasiniaasartoq ingeniørilu Murphy O’Dean oqarpoq: „Isumaliuutersuut piviusunut naapertuutinngitsoq tunuartinnagu ’pinngoriartuaarnermik ilisimatuussutsip’ iluani ’pinngoriartuaarnermik isumaliuutersuut ilumoorsimassasoq’ upperilluinnarneqalersimavoq.“ Nalunaajaatit imminnut naapertuutinngitsut uppernarsaatissaqannginnerallu sumiginnarneqarput allamulluunniit saasaarilluni nassuiarneqarlutik.
Sooq? Michael Behe, biokemiimi ilinniartitsisoq, atuakkiamini Darwin’s Black Box-mi allappoq: „Amerlasuut, ilaatigut paasiniaasartut pingaarutillit ataqqisaalluartullu, pinngortitamit qutsinnerusoqarnera upperissallugu kissaatiginngilaat. Kinaassusillip qutsinnerusup pinngortitaq sunniuteqarfigisaraa eqqarsaatigissallugu nuannarinngilaat.“ Ilisimatuussutsilli ilumoortup isummat iluarinerusat siuarsarniarlugit nalunaajaatit imminnut naapertuutinngitsut sumiginnarneq ajorpai. Paasiniaasartullumi tamakkeratik pinngoriartuaarnermik isumaliuutersuut upperaat.
Brasiliami atuagassiap Veja-p Carlo Rubbia, fysikimi Nobelip nersornaasiuttagaanik nersornaasigaasimasoq, ima aperisimavaa: „Guuti upperaajuk?“ Carlo Rubbiap kinaassusilimmik Guuteqarnera upperinngikkaluarlugu nassuerpoq: „Pinngortitaq misissornerujartortillugu suut tamarmik aaqqissuulluagaalluinnarnerat erseqqissiartuinnartarpoq. Tamanna silassorilluinnartoqarneranut nalunajaataammat pinngortitarsuup qimerloornerinnaani Pinngortitsisoqarsimanissaanik isummertariaqarpunga.“
Taassuma paasisaasa eqqaasippaatigut apustili Paulusip Guuti pillugu oqaasiinik ukuninnga: ’Takussaanngissusiami pissaanera ittuinnartoq Guutiussusialu silarsuup pinngortitaaqqaarneranit malunnarmata suliaanit paasinarpoq.’ — Rûmamiut 1:20. (gE 8/8 98)