Niviarsiaqqap russip neriuutaa

NIVIARSIARAQ 15-inik ukiulik illoqarfimmi Ruslandimiittumi 100.000-it sinnerlugit inulimmi Moskvamiillu 1200 kilometerisut ungasissulimmiittumi, Ukhtami, najugalik qamannga pisumik neriuppoq nunarsuarmi pissutsit pitsaanerulerumaartut. Tamanna Jehovap Nalunaajaasuisa Ruslandimi immikkoortortaqarfiannut allakkamini ataani issuarneqartuni nassuiarpaa:

„Ikinngutima oqaluttuuppaanga atuakkami Inuk inuit inuusimasut pingaarnerpaat-ni Jesus Kristusip inuunera oqaluttuarineqartoq. Atuagaatisi, atuagassiaatisi atuagassiaaraatisilu assorsuaq soqutigaakka. Qanoq ilillunga soqutiginnilersimaninnik oqaluttuutilaarlassi. Radiomut telefonimullu akiligassakka akileriartorlugit nalunaarasuartaaserivimmiitillunga tamanna pivoq. Tassani natermi naqitaaqqamik nassaarpunga. Naqitaaraq tamanna Sooq inuuneq taama ajornartorsiuteqartigaa?-mik qulequtalik tiguara saniiariarlugulu atualerlugu.

Atuarpara ajornartorsiutit naalliuutillu inuit atortagaat naqitaaqqami eqqartorneqarput, saqqaanilu paratiisimi inuunermik nutaamik neriorsuut assiliartarineqarpoq. Neriuppunga ullut arlaanni tamanna piviusunngorumaartoq. Kissaatigilluinnarpara inuit tamarmik pilluarlutik, nalerisimaarlutik peqqillutillu inuulissasut qanigisakkalu toqusimasut takoqqissallugit. . . . Paaserusuppara nunarsuarmi paratiisiusumi inuusinnaalissaguma qanoq iliortariaqarnerlunga. Ilungersorlunga qinnuigaassi paasissutissanik atuakkanilluunniit nasseqqullunga. Nassiunneri ilanngullugit akilissavakka.“

Illittaaq atuagassianik, nunarsuarmi paratiisiusumi inuulernissamik neriuummik Biibilimik tunngaveqarluinnartumik pigisaqalernissannut iluaqutigisinnaasannik, pissarsisinnaavutit. Atuagassiaaraq Guutip sumik piumaffigaatigut? pissarsiarerusukkukku imaluunniit nammineq angerlarsimaffinni akeqanngitsumik Biibilimik atuaqqissaaqatigineqartalerusukkuit uunga allassinnaavutit: Napasuliaq Alapernaarsuiffik, Postbox 248, 3900 Nuuk. (gE 8/2 98)