Saarulliinuku sumut pisut?
IMAQ saarulleqangaarmat ’umiatsiarluunniit ingerlasinnaanngingajappoq’. Taama oqarsimavoq ilisimasassarsiortoq John Cabot 1497-imi immat nunarsuarmi aalisagaqarnerpaat ilaat, Grand Banks Newfoundlandimiittoq, pillugu. 1600-kkut naalerneranni Newfoundlandimi ukiumut saarullittarineqartartut 100.000 tonsit angungajassimavaat. Ukiuni hundredelinni tulliuttuni pisarineqartartut marloriaatinngorput.
Ullumikkulli pissutsit allanngorluinnarsimapput. Saarulliit ima ikilisimatigipput Canadami naalakkersuisut 1992-imi aalajangerlutik Atlantikorsuarmi saarullinniarneq inerteqqutaalissasoq. Tamatuma kingunerisaanik inuit 35.000-it missaanniittut allamik suliffissarsiortariaqalerput. Saarullinniaqqusinnginneq suli 1997-imi atuuppoq. Saarulliilliukua sumut pisimasut?
1960-ikkunni nunat tamat aalisariutaat Newfoundlandip aalisagaqarfiinut katersuupput amerlasoorsuakkuutaanik saarullinniarniarlutik. 1968-imi kilisaatit nunanit qulinit amerlanerusuneersut aalisagaqarfinni tamakkunani ukiumut 800.000 tonsinik saarullissimapput, ukiuni hundredelinni siuliini ukiumut agguaqatigiissillugu pisarineqarsimasut pingasoriaataannik.
Immap nillernerulernera, puiseqarnerulernera saarulliillu nuttarnerat saarullikinnerulerneranut pissutaaqataasinnaapput, aammali inuit piumatussusiat pisooqataasorujussuuvoq. „Aalisapiluttoqarpoq,“ immami uumassusilinnik ilisimatooq oqarpoq.
Saarulliit Atlantikorsuarmi siunissaqarpat? Kinguaassiorsinnaalersussanik, suffisinnaalersussanik taamaalillutillu saarulleqartuaannarnissaanik qulakkeerisinnaasunik naammattunik piaqqiortoqarsimanersoq amerlasuut assut qularutigaat. The Evening Telegram-imi, St. John’simeersumi, ima allassimasoqarpoq: „Canadami inuussutissarsiorfiit annersaat, Atlantikorsuarmi saarullinniarneq, oqaluttuaannanngulerpoq.“ Neriuutissaqarporli!
Biibilimi neriorsoqqissaarneqarpugut qanittukkut, silarsuassami nutaami naapertuilluassuseqarfiusumi Guutip neriorsuutigisimasaani, piumatussuseq atuunnavianngitsut. (2 Pîtruse 3:13) Jehovap ’nunamik aseruisut aserussavai’ nunarsuarlu imarlu uumassusilinnik ulikkaartissallugit imminut kiffartorusuttunut iluarisaminillu iliorusuttunut nuannaarutaasumik. — sarĸúmersitat 11:18. (gE 22/11 97)
[Qupp. 30-mi suminngaanneernera]
© Tom McHugh, The National Audubon Society Collection/PR
Mountain High Maps ® Copyright © 1995 Digital Wisdom, Inc.