„Arfininngornermi misigisara nuannersoq pillugu Jehovap Nalunaajaasuinut qujassut“

ITERITSI!-P NORGEMI ILANNGUTASSIORTUANIT

Eivind Blikstad, Norgemiut aviisianni ullormut saqqummersartumi, Telemark Arbeiderblad-imi, tusagassiortoq allaaserisaminik taama qulequtsiisimavoq. Siullermik ersersippaa allakkatigut, oqarasuaatikkut matukkullu piseqqusaarisarnermik ingammillu arfininngornikkut ullaap tungaani illunut pulaaqattaartunik iluaaginninnini. Taava ima allappoq:

„Iikasik, takkuteriikatapput. Matuma silatinnguani. Jehovap nalunaajaasui. Arninngornermi ullaap tungaani. Atuagassiaatertik Iteritsi! (Norgemiusooq), nr. 17, 8. septembari, 1996-imoortoq, nassarlugu (Amerikami eqqillit siunissaat pillugu allaaserisamik imalik.) Aperaannga atuagassiaq atuarusussinnaaneriga, soqutigigunakkannik imaqarmat. . . . Soqutiginninnanga oqarianngitsungaluunniit aappaa oqarpoq: ’Amerikami eqqillit pillugit allaaserisamik imaqarpoq. Nalunngilarput taakku pillugit assut allaaserisaqartarsimasutit.’

Pisariteriikatappunga. Nersualaarneqallatsiaraannimi aalajangiusimaniaraluakkat tamarmik peeruttarput. Ullaakkorsiortillunga atuagassiaq qimerluualaalerakku alapernaakkaluttuinnarpunga. Jehovap Nalunaajaasui Amerikamilu eqqillit imminnut tulluutinngikkaluaqaat. Isarusserpunga atualerlungalu, misigigaluarlunga tamanna asuli piffissamik atuilussinnarnerussasoq.

Sivisuumik ullaakkorsiornera naatsumik oqaatigissagukku, Amerikami eqqillit pillugit Jehovap nalunaajaasuisa allaaserisaat pitsaaginnarani torrallataaqaaq. Norgemi ilinniartitsisut siunnersorumavakka paqumisuutitik tamaasa ’eeqqullugit’. Atuartitasi tamaasa atuagassiamik taassuminnga pissarsiniunniarsigik! Paasissutissanik maligassaalluartumik atuipput, ilinniutissanillu ersarissumik saqqummiussuillutik. Aammattaaq Jehovap nalunaajaasuisa eqqillillu isumaasa assigiinngissutaat unneqqarilluinnartumik saqqummiuppaat. Aap, toqqortuinngilluinnarput. Eqqilinnut najugaqarfiliani nalornissutaasoq tassaavoq aningaasanoortarfinnik pilersitsiortornissaq. Tamakkua suliffissanik pisariaqartinneqaqisunik pilersitsissagaluarput, ileqqussatigulli aappaatigooqarlutik. Ukiuni hundredelinni inuuffigisatsinni eqqilittut inuuneq pillugu paasissutissiilluartumik tamakkua pitsaasumik allaaserineqarput.“

Blikstad ima naggasiivoq: „Atuakkakka pissarsiaqarfigingaarakkit isummerpunga Iteritsi! naallugu atuaannarniarlugu. Ilaatigut atuarneqarsinnaavoq assaaffimmi Walesimiittumi, Rhonddami, oqaluffiit matoorarneqartut pillugit allaaserisaq attortinnartoq. . . .

Immikkoortitsisinnaajunnaarluinnarsimavunga? Uanga, Guuteqarneranik upperisaqanngitsoq, Jehovap Nalunaajaasuisa ajoqersuutaat akerliliinanga akueraakka? . . . Ullumiunngitsoq. Immitsinnut eqqaasittuartariaqarpugut paqumisunnerup naasupiluinik piiaanissap pingaaruteqassusianik. Tulliani tusarukku Jehovap Nalunaajaasui sallunerarneqartut, nalussanngilara eqqillit pillugit sallusimanngitsut.“

Iteritsi!-p Amerikami eqqillit pillugit allaaserisamik imallip piumaneqarnerujussua pissutigalugu Napasuliaq Alapernaarsuiffiup Peqatigiiffiata naqiterivissuini New Yorkimiittuni 37.000-it immikkut naqiterneqarput. Ilagiit Arizonamiittut ilaat oqaluussiffigisartakkaminni immikkut suliniuteqarnissamut 10.000-inik piniarsimapput.

Paqumisunnak Jehovap nalunaajaasui pillugit paasisaqarnerorusukkuit naalagaaffilersaartarfiannut najukkanniittumut saaffiginnissinnaavutit, imaluunniit uunga allassinnaavutit: Jehovap Nalunaajaasui, Box 248, 3900 Nuuk. Tamanna piumasaqaatitaqanngilluinnarpoq akeqaranilu. Erseqqissumik unneqqarissumillu akineqassaatit. (gE 8/11 97)

[Qupp. 31-mi suminngaanneernera]

Eqqillip kiinaa: D. F. Barry Photograph, Thomas M. Heski Collection; eqqilik tivasoq: Men: A Pictorial Archive from Nineteenth-Century Sources/Dover Publications, Inc.; eqqillit toqqi: Leslie’s; kipparissoq allalik: Decorative Art; ammalortoq allalik: Authentic Indian Designs