„Oqaluttuarisaanermute akuliussinnaasimagaluaruma“
ATUARFIMMI Californiamiittumi atuartut ilaat qulaani qulequtarineqartoq tunngavigalu allaaserinneqqullugit pisassinneqarsimapput. Allaaserinninnermi naggasiutaasumik unammeqataasut ilagaat Eric aqqanilinnik ukiulik Jehovap nalunaajaasuisa ilaannit ernerineqartoq. Allaaserisani manna Biibilip oqariartuutaanik imaqartoq nammineq isumassarsiaraa.
„Sorsunnersuup aappaa sorsunneruvoq amiilaarnartoq, inuppassuit pisuussuteqanngitsut toqutaaffigisimasaat. Oqaluttuarisaanerulli ilaanut akuliussinnaasimagaluaruma, atuakkani oqaluttuarisaanermik imalinni tamanna atuarneqarsinnaasimassanngikkaluarpoq. John F. Kennedy toqutaasimavoq. Ajortorujussuarmik toquvoq, oqaluttuarisaanermulli akuliussinnaasimagaluaruma, atuakkani oqaluttuarisaanermik imalinni toqutsineq tamanna aamma allassimassanngikkaluarpoq. Martin Luther King 1968-imi toquvoq silarsuup eqqarsartaasia allanngortinniarsimagamiuk, oqaluttuarisaanermili pisumut ataasiinnarmut akuliussinnaasimagaluaruma, tamanna aamma pisimassanngikkaluarpoq. Silarsuaq allaalluinnassagaluarpoq. Aap, suut tamarmik, inuit pissutsillu, allaalluinnassagaluarput. Pisimasup pinngitsoortikkusussinnaasimasaraluama oqaluttuarisaaneq allanngortissimavaa, silarsuarlu ullumikkut nalunngisatsitut ilisimavoq — toqunarluni, nakuuserneqarfiulluni, nappaalaffiulluni ajortoqaqalunilu.
Immaqa isumaqarputit pisimasoq akuliuffigerusussinnaasimasaraluara nappaammut, politikkimut sorsunnermulluunniit attuumassuteqartoq. Imminulli apereriarit: ’Qanoq ililluni nappaataarutsitsinerup inuit ajortunngornissaannut akornusissagamigit?’ ’Taamaammat politikkimut tunngasoq ajornartorsiutitsinnik tamanik aaqqiisimasinnaagaluarpoq,’ immaqa taama eqqarsarputit. Politikkikkulli tunngasut inunnit aqunneqarmata inuillu tamarmik naammalluinnanngitsuullutillu toqusussaammata ajunngitsuliaasa tappullutik toqoqatigissannginnerpaat? ’Taamaammat sorsunneq sorsunnersuup aappaatut ittoq pineqarsimassaaq.’ Naagga. Taamaattoqarsinnaanngilaq; tassami sorsunneqaraangat arlaat ajugaappat, taava aamma ajorsartoqassaaq. Taaneqareersut arlaannaataluunniit ataasiaataasumik toqu, nakuuserneq, nappaatit ajussuserlu tamaasa peersissinnaanngilai. Immaqa eqqoriaruminaatsippat oqaluttuarisaanermi suna akuliuffigerusussinnaasimagaluariga.
Ajorti toqulu. Pisinnaagaluaruma ajorti toqulu akuliuffigisimassagaluarpakka. Qanoq ilillunga? Ajortimi toqulu atuuttuaannarsimapput. Ulluinnarni inuunitsinnut ilaapput. Qanoq ililluni atuuttuaannarsimasumut akuliuttoqarsinnaagami? Aallartilaaginnartorli akuliuffigineqarsimasussaagaluarpoq. Adam Evalu Guutip aqutsineranut pikitsitsisimapput, tassaavorlu ullumikkut silarsuarmi pissutsinut atukkatsinnut pissutaasoq. Namminneq iliuusererusutartik qinerpaat, taamaattumik ajorteqarpugut toqusarlutalu.
Tassa oqaluttuarisaanermut akuliuttoqartariaqarsimagaluarpoq aqutsineq naammalluinnartoq pillugu sallu siulleq Satan Diaavulup oqaatiginiariaraalu. Sallup tamatuma nassatarisaanik aamma Adamip Evallu iliuuserisimasaasa malitsigisaannik tamatta naalliuuteqarpugut. Taakkua aqutsisumut ilumoortutuamut, Guutimut, ajortuliorsimapput.“
1995-mi aggustip 12-ani arfininngornermi Ericip allaaserisani Jehovap Nalunaajaasuisa Norcomi Californiamiittumi ataatsimeersuarneranni atuffassissutigaa. Tusarnaartut nuannaarutigeqaat tusaramikku meeqqat ilaata kristumiup periarfissaq atorluarlugu inuit naalliuutigisaannut pissutaasoq eqqarsariaallannartumik atuarfimmi nalunaajaassutigisimagaa. Nuannissaqaaq Jehova Guutip ’pulateriaarsutoqaq’ piuneeruppagu naalliuutillu Diaavulup pilersissimasai tamaasa peerpagit! — sarĸúmersitat 12:9; 21:3,4; 1 Moses 3:1-6. (gE 22/2 96)