Illumiit illumut oqaluussiumanerpat?

„PAAVIP oqaluussisussat Romami aqqusinernut aallartippai.“ Nutaarsiassaq Greg Burkep nalunaarutaa taama qulequtaqarpoq. Ima allappoq: „Paavip Johannes Paulip katuullit Italiamiut kajumissaarsimavai immikkut upperusiortut, soorlu Jehovap nalunaajaasuisa Italiami ilaasortaqarlualeriartortut, maligassiaat malinniaqqullugu illumiit illumut oqaluussillutik.

’Iivangkiiliu kanngusuutigisariaqanngilarput, allaat illut qaannit torlulassutigineqartariaqarpoq,’ paavi ataasinngormat angalallutik oqaluussisartunut upperisamillu ilinniartitsisunut 350-iusunut taama oqarpoq. . . .

’Neriuppunga iivangkiiliup aqqusinerni oqaluussissutigineqarnissaanik pilersaarutersi . . . kinguneqarluassasoq,’ taama oqaluffigai. ’Oqaluusseriaaseq tamanna nassaareqqitarsi atorlugu allaat upperisamit ungasillisimasut angusinnaassavasi.’“

Nutaarsiassalerisoq Burke ima allappoq: „Ukiuni 20-ni kingullerni Italiami ilagiit katuullit naalagiartarnerat annikilliartorsimaqaaq, paavillu illumiit illumut oqaluussisartussanik nuannaarutiginninnera tassaagunarpoq ilagiit katuullit sunniuteqarunnaalernerannut qisuariarneq.“

’Illumit illumut oqaluussisartoqalernissaanut’ ilungersornerit nutaajunngillat. Paviugaluaq Paul VI oqarsimavoq ilagiit katuullit „oqaluussinissaq pillugu piusut“. Maannakkullu paaviusup, Johannes Paul II-p 1991-imi ilagiinnut tamanut nalunaarutini Redemptoris Missio saqqummersippaa ilagiissini Jesusip kikkunnut tamanut oqaluussiartoqqussutaanik naammassinninnissap pisariaqassusianik eqqaasinniarlugit.

Atuakkiortoq katuullinut Romalerisunut ilaasoq Peter Hernon Londonimi aviisimi Catholic Herald-imi ima aperisimavoq: „Iivangkiiliumik oqaluussisarnermi susoqarsimasoruna?“ „Ukiuni qulini iivangkiiliumik oqaluussissutiginninneq“ eqqartorneqartorujussuusimasoq maannalu ukiunik arlalinnik pisoqaassuseqalereersoq eqqarsaatigaa. Biskorpit ilaat aperimmani sooq siumukartoqarneq ajortoq taanna ima akisimavoq: „Erinitsassanngilatit. Oqaluffeqarfik ukiuni 2000-iinnarni atuussimavoq.“

Tupinnanngilaq Hernon ima aperimmat: „Sooq Jesusip nunaqarfinnut eqqaaniittunut ajoqersukkani oqaluussiartoqqullugit aallartikkamigit suliamik tamatuminnga nukinginnartutut isiginninnera malinniarneqarsimanngila? Imaluunniit Paulusip: ’Uannut eqqanaqqajaqaarluunniit iivangkiiliu oqaluutiginngikkukku. (1 Korintumiut 9:16).’?“ Ilumut katuullit kristumiut siulliit inuit tutsaanni illumiillu illumut angalaarlutik ajoqersuisarsimasut malikkumanerpaat? — apustilit suliait 5:42; 20:20, NV.

Hernonip miserratiginngilaa illumiit illumut oqaluussisarneq eqqartorneqaleraangat „qulartut ima oqartartut tusarsinnaallugit: ’Eqqarsarnartoqarpoq, naleqqutinngilaq.’“ Hernonili ima akivoq: „Taamaanngilaq. Tamanna uppernarsarniarlugu oqaaseq tusarninngitsoq eqqaasariaqarpara. Nalunngilara oqaaseq tamanna tusarninngitsuusoq, tassami kingullermik katuullit ilanngutassiaanni atorakku aaqqissuisut immikkoortoq tamanna peersimavaat (sinnerali aaqqissunngivillugu). Oqaaseq tassaavoq Jehovap Nalunaajaasui. . . . Nalunaajaasut tamarmik ilinniartinneqarput nalunaajaasunngoramik pinngitsooratik ajoqersuiartortariaqarlutik.“

Hernonip, naak Jehovap Nalunaajaasuisa upperisaannut isumaqataanngikkaluarluni, akueraa oqaluusseriaasii eqqarsaatigigaanni ’ilagiit siulliit apustilit suliáinik agdlagkat-ni oqaluttuarineqartut eqqaanngitsuugassaanngitsut’.

Jehovap nalunaajaasui eqiasuillutik illumiit illumut oqaluussiuarsinnarput, taamaalillutik ullutsinni Jesusip peqqussutaa manna eqquutillugu: ’Nalunaajaasigiumaarpassi . . . nunap isuanut allaat.’ — apustilit suliait 1:8. (gE 22/2 95)