„Pujortarneq tipippoq“

UKIUNI kingulliunerusuni Californiami peqqinnissaqarfik pujortarnermut akerliusumik paasisitsiniaalluni suliniarluartarsimavoq. Oqariartuut naatsunnguuvoq toqqaannartuullunilu naalagaaffimmilu tamarmi allagartarsuarni atuarneqarsinnaalluni. Oqariartuutit ilaat qanoq nipeqarpat? „Pujortartartut ikiaroortartuupput. Tupamik nioqquteqartut ikiaroornartuerniartuupput. Pujortarneq tipippoq.“ „Putsup atornikup pujortartanngitsut 50.000-it ukioq manna toqussavai. Pujortarneq tipippoq.“ Allagartarsuarmi allami cigarettit poortat assiliartaliunneqarsimapput ataatigut ima allallugu: „Massakkut pisigit. Kingorna akiliiumaarputit.“ Inuuninnik, soorunami. Allagartarsuaq alla Spaniamiutut ima allassimavoq: „Me muero por fumar.“ Oqariaasiuvoq assigiinngitsunik paasineqarsinnaasoq, imatukanneq nutserneqarsinnaasoq: „Inuunera cigarettimut akigissavara.“ Allagartap assiliartaraa kiinaq affaa saanikuinnaq allagartaanut naleqqulluartoq.

Inunnik tupamit nikotinimillu nigorsimatitsiniut alla tassa cigarettit „Death“-imik (Toqu) allagartallit. Puuat qernertoq niaqqumik saanikuinnarmik saanernillu imminnut paarlatsissimasunik assiliartalik ima allagartaqarpoq: „Cigarettit ueripilunnartuupput peqqissutsimullu ulorianartuullutik. Pujortartanngikkuit pujortartalerniaqinak. Pujortartaruit asoorunniakkit.“

Ersisaarilluni paasisitsiniaaneq pujortartareersunut sunniuteqarsimanersoq oqaatigiuminnaappoq. Kisianni The Washington Post National Weekly Edition naapertussagaanni paasinarsisimavoq „[ukiuni kingullerni arfinilinni] tupamik atuineq 27 procentip missaani appariarsimavoq, naalagaaffik ataatsimut isigalugu pingasoriaatip missaani.“ Immaqa allagartarsuartigut paasisitsiniaanerup allaat pujortartalersussaagaluit ueripilunnartumit ulorianartumit tamatumannga qimaatissinnaavai. Kristumiutut imminnut taasut ileqqupilummik minguttuumik namminissarsiortumillu tamatuminnga ingalassimannilluinnartariaqarput. Apustili Paulus ima allassimavoq: ’Taamaattumik unnersuutit tamakku pigigatsigik, asasakka, immitsinnik eqqiarniarta uinngullu anersaallu mingui tamaasa piiarlugit; iluarsinissarlu Guuti mianeralugu naammassiniartigu.’ — 2 Korintumiut 7:1. (wD 8/1 95)