Biibili qanoq oqarpa?

Kikkut qilaliassappat?

PEQQARNIISAARNIAT timmisartorsuaq ilaasartaat qaartartumeerpaat, ilaasut tamaasa toqullugit. Ilaqutaasut ikinngutaasullu oqaluttuunneqarput asasaat maannakkut qilammiilersut, piffissaanngitsukkut peqqarniitsumillu toqutaanerannut taartisiatut.

Erinarsortartoq tusaamasaq toquvoq, oqaatigineqarporlu ’maanna qilammi inngilit qarlortaqatigilerai’, ilaatigut pissutigalugu piginnaanermi Guutimeersup nuannarinnitsiminnut nuannarutissiisarsimanera.

Nappaatit, kaanneq ajunaarnerillu pissutigalugit meerarpassuit toqorarsimapput, palasillu oqartarput meeqqat maanna pilluangaarlutik qilammiittut, immaqa allaat inngiliullutik!

Tassa imaappa naapertuilluanngitsuliornerit inuusuttut utoqqaallu assigiimmik nalaattagaat Guutip aaqqiissutissittarai qilammi imminukartinnerisigut tappavanilu eqqissinermik tuninerisigut? Qilaliarneq tassaannaava Guutip inunnik ajunngitsunik nersortarialinnillu atatitseriaasia? Tamanna pillugu Biibilimi qanoq allassimasoqarpa?

Qilammiinngitsut

Biibilimi toqqaannartumik ima allassimavoq: ’Naluisiluunniit iluaatsut Guutip naalagaaffia kingornussarissanngikkaat?’ (1 Korintumiut 6:9) Aammali Biibilimi oqaatigineqarpoq inuppassuaqartoq naapertuilluartunik naapertuilluanngissutsimillu eqqorneqartunik qilaliartussaanngitsunik.

Johannes Kuisisoq marteerisut toqunngitsiartoq Jesus ima oqarsimavoq: ’Ilumut oqarfigaassi: Arnanit erniusuni Johannesimit Kuisisumit annerusumik saqqummersoqanngilaq; qilammiulli naalagaaffiani minnerusoq taassumannga anneruvoq.’ (Matîuse 11:11) Betlehemimi eqqaanilu nukappiaqqat marlunnik ataallugulu ukiullit kunngimit Herodesimit naakkittaaqisumik toqorartinneqarsimapput, Jesusip naalungiarsuup toqunnissaa siunertaralugu. (Matîuse 2:16) Kingornali Jesus ima oqarsimavoq: ’Allalu [meeraq utoqqarluunnit] qilammut pavunnassanngilaq, qilammit aqqartoq kisimi, tassa Inuup Ernera qilammiusoq [Jesus].’ (Juánase 3:13) Sooq Jesusip naapertuilluanngissutsimik eqqugaasut taakku qilaliarsimaneranngilai?

Jesusip aqqut ammarpaa

Jesus imminut ’aqqutaanerarlunilu sallusuissutaanerarsimavoq’, aammalu apustilip Paulusip tassaanerarsimavaa ’sinippaartunut naaqqaataasoq’. (Juánase 14:6; 1 Korintumiut 15:20) Taamaattumik taanna sioqqullugu qilaliartoqarsimanavianngilaq. Taavami Jesus, makititaanermi kingorna ullut 40-t qaangiuttut, qilaliarami uppertunit isornaatsunit toqoreersimasunit malinneqarpa? Ullut qulit qaangiuttut apustili Peter kunngi David pillugu ima oqarsimavoq: ’Toquvoq ilisaallunilu, ilerfalu suli uatsinniippoq suli tamassa ullumi. . . . Davidimi qilalianngilaq.’ apustilit suliait 2:29, 34.

Tassa qilaliarneq tassaannaanngilaq naapertuilluanngitsuliorfigisaasimanermut taartisiaq imaluunniit aalaajaannermut akissarsiaq. Qilammili inuunermut makititaaneq pisarpoq qilammi naalakkersuisunik pilersitsinissaq siunertaralugu. Naalakkersuisunut taakkununnga ilaassapput inuit assuarnaatsut anersaamik illernartumik tanitaasut Kristusimit siulersorneqartut. — Rûmamiut 8:15-17; sarĸúmersitat 14:1-3.

Naalagaaffik qilammiittoq

Naalagaaffik tamanna, imaluunniit naalakkersuisut taakku, Jesusip taasimavaa ’qilammiup naalagaaffianik’ imaluunniit ’Guutip naalagaaffianik’. (Matîuse 5:3, 20; Lúkarse 7:28) Inuppassuit naalakkersuisunut taakkununnga peqataanissaat siunertaanngilaq. Jesus oqarsimavoq pineqartut tassaasut ’savarpannguit’. (Lúkarse 12:32) Oqaaseq Lúkarse 12:32-mi atorneqartoq ’-pannguit’-nik nutserneqartoq (mi·krosʹ) oqaatsini Biibilip allanneqaqqaataani oqaatsip „angisooq“-p (meʹgas) akerleraa, oqaatsillu tassani atorneqarneratigut erserpoq ikittunnguit pineqartut. Taamaattumik killeqanngitsumik amerlassusillit ’qilammiup naalagaaffianut’ ilaasortanngorsinnaanngillat. Tamanna paasiuminarsarniarlugu assersuutigineqarsinnaavoq immiartorfimmut imermik kuiseqquneqarneq. Utsersortooqqunagu imermik kuisivallaarnissaq sianigineqassannginnerpa? Taamatuttaaq ’savarpannguit’ sinnerlugit inuppassuarnik ilaartorneqarsinnaanngillat. Guutip naalagaaffia aalajangersimasumik amerlassusilinnik (’-pannguanik’) naalakkersuisoqassaaq Kristus peqatigalugu aqutsisussanik.

Naalakkersueqataasussat taakku amerlassusiat apustili Johannesimut saqqummersinneqarsimavoq, tassa 144.000-it. (sarĸúmersitat 14:1, 4) sarĸúmersitat-ni siusinnerusukkut oqaatigineqarpoq naalakkersueqataasussat taakku ’inunnit immikkut naggueqatigiissunit immikkullu oqaasilinnit immikkullu inuiaasunit inuiaqatigiinnillu tamanit’ pisiaasut, aammalu ’kunngiuffinngortinneqarsimasut palasinngortinneqarlutillu Guutitsinnut, nunamullu [qilammit] kunngiussasut’. (sarĸúmersitat 5:9, 10) Naalakkersuisut taakku, Jesus Kristus peqatigalugu, ataatsimut tassaapput naalagaaffik Jesusip ajoqersukkaminut qinnutigisaqqullugu ilinniartitsissutigisimasaa. Aamma naalagaaffik tamanna ikiortigalugu ullumikkut naalakkersueriaatsit atuuttut atorunnaarsinneqassapput, inuit najugaanni, nunarsuarmi, eqqissinerup naapertuilluassutsillu atuutileqqinnissaat aqqutissiuunneqassalluni kiisalu nunarsuup inui ataavartumik inuussuserneqassallutik. — Tussiaat 37:29; Matîuse 6:9, 10.

Naalakkersuisoqatigiit toqqakkat

Inuit naalakkersueriaasii Guutip naalagaaffiata kingoraagassai taama ajortunngorsimatigimmata paasiuminaatsissanngilarput qilammi naalakkersuisunut ilaasussat sooq Guutimit peqqissaartumik toqqarneqarlutilu misilinneqartariaqartut. Pissutsit inuiaat ullumikkut atugaat assersuunneqarsinnaapput pissutsinut timmisartorsuup ajoquserneqarsimasup ilaasuisa silarlussiornerminni atugaannut. Pissutsini nalorninartuni taama ittuni timmisartup inuusuttunik misilittagakitsunillu aquttoqarlunilu sulisoqarnissaa kialuunniit kissaatiginavianngilaa. Aap, piumasaqaatit sukannersut naapertorlugit inuttat peqqissaartumik qinigaasariaqarput. Qilammi Kristus Jesus peqatigalugu kunngiusussat palasiusussallu eqqarsaatigalugit toqqissiallannarpoq ilisimallugu ’Guutip avatit tamaasa immikkut timimi piumasaminik ineqartikkai’. (1 Korintumiut 12:18) Naalagaaffimmi qilammiittumi inissarsiniarluni inuttut anguniakkat suliniutillu aalajangiisuunngillat. (Matîuse 20:20-23) Qinngaqqunnartut naalagaaffimminut isernissaat akornuserniarlugu Jehova Guuti uppernermut ileqqussanullu immikkut aalajangersaasimavoq. (Juánase 6:44; Evfisumiut 5:5) Jesusip qaqqami oqaluusiata aallaqqaataata tungaani erserpoq naalakkersueqataasussat taakku anersaakkut pingaartitsisuusariaqartut, naapertuilluassutsimik nuannarisaqartuullutik, naakkinnittuullutik, uummatimikkut minguitsuullutik eqqissinermillu nuannarisaqartuullutik. Taamatut pissusillit kisimik anersaamik Guutip akuerisaasa pigisaannik pigisaqalersinnaapput, qilammilu inissaqartitaalermata imaanngilaq tarnermik toqujuitsumik taasartagaannik pigisaqartut. — Hesekiel 18:4, 20; Matîuse 5:3-9; aamma takuuk sarĸúmersitat 2:10.

Inuiaalli amerlanersaat neriuutissaqanngivinngillat. Naak ikittuinnaat Naalagaaffimmini naalakkersueqataasussatut Guutip toqqaraluarai inuiaat amerlanersaasa nunarsuatsinni kusanangaartumi najugaqarnissartik Guutillu naalakkersuineranik nuannaarutiginninnissartik qilanaarisinnaavaat. Piffissap ingerlanerani naapertuilluanngissutsimit eqqugaasarsimasut makititaassapput Guutip naalagaaffiata iluamik oqaatigalugu ’tikiunneranik’ aniguillutillu takunnissimasut ilagalugit inuulissallutik. Taamanikkussamut neriorsuut manna eqquussimalissaaq: „Peqqusersuitsut nunami najugaqartuassapput, assuarnaatsut aamma tamaaniissapput.“ — Matîuse 6:9, 10; Ussatit 2:21; apustilit suliait 24:15.