Alliartorneq — Meeqqat ’ilusilersorneqarfiat’ angajoqqaaminnillu pisariaqartitsinerpaaffiat

MEEQQAT Biibili naapertussagaanni tassaapput ’Jehovap tunissutai’. ’Orpiit olivenillit naallualersut’ nerrivigisamik kaajallaasimasut’ assigaat. (Tussiaat 127:3; 128:3) Angajoqqaat kajumissaarneqarput meeqqatik ’perorsaqqullugit inertertaqqullugillu Jehovamit’. — Evfisumiut 6:4.

Orpiit olivenillit inerititaqarluarsinnaaqqullugit ’nerrivik kaajallallugu’ ikkunneqaqqammerneranni ilusilersorneqartariaqarput. Piluttat naarlaat ilusilersorneqarnerat ilutigalugu orpik alliartuaartarpoq. Meeqqat Guutip aqqutigeqqusaasigut ingerlanissaat kissaatigigaanni mikisunnguuneranniilli ilinniartilernissaat pitsaanerussaaq. „Inuusuttoq [meerarluunniit] ingerlavissaanik ajoqersuuguk, taava utoqqaliguni tamanna nigussanngilaa.“ (Ussatit 22:6; 2 Timûtiuse 3:15) Meeqqap qarasaata paasissutissarpassuit tigooqqartarpai, kingorna nallerneqanngisaannartussamik amerlassusillit. Taamaattumik meeqqat ingammik suli mikisunnguuneranni piffissaqarfigilluarnissaat pingaartorujussuuvoq.

Masaru Ibuka, Sony Corporationimik pilersitsisimasoq, atuakkiorsimavoq ima qulequtalimmik: Kindergarden Is Too Late! (Meeqqerivimmi kingusinaareerpoq!) Atuakkap ungaluani ima allassimasoqarpoq: „Meeqqavit ilikkagaqarnissaminut periarfissai ukiuini siullerni marlunni pingasunilu pitsaanerpaapput . . . meeqqerivimmi kingusinaareerpoq!“

Atuakkap siulequtaani Glenn Doman, Inuit Pisinnaasaannik Ilisimatusarfiit-ni qullersaasoq, oqarpoq: „Hr. Ibukap atuakkiaani torrallataagaluaqisumi pinartunik nutaarsiassaqanngilaq. Uppernarsaqqiinnarpaa meeqqat mikisuunerminni sunilluunniit ilikkagaqarnissamut piginnaaneqartut. Meeraaqqat marlunnik-pingasunik sisamanilluunniit ukioqarnerminni ilungersunngivillutik ilikkarsinnaasaat, kingusinnerusukkut ilungersorujussuarluni aatsaat ilikkarneqarsinnaasartut — kingusinnerusukkut ilikkarneqarsinnaagunik. Inersimasut ilungersoqalutik ilikkagaqarniartartut, meeqqat pinnguarnertut oqitsitsigalugu ilikkartartut. Inersimasut saaniluttut arriitsigalutik ilikkagaqarniartartut, meeraaqqalli innaallannertut sukkatigisumik sunik tamanik ilikkapallattartut. Inersimasut ilaannikkut ilikkagaqarniarnissaminnut tunuarsimaartartut, meeraaqqalli ilikkagaqarnissartik nerinissaminnilluunniit piumanerusaraat.“

Soorli Masuru Ibuka oqarpa meeqqivimmi kingusinaareersoq? Taamaalinerani ukiut meeqqap poqernerpaaffii qaangiutereertarmata. Aammali allamik pissuteqarpoq. Nalitsinni ileqqussatigut nakkaassimaneq aamma meeqqerivinnut anngutereersimavoq, taamaattumillu meeraq meeqqerivimmiileruni ajortup tungaanut sunnertinnissamut akiuussutissaqartikkumagunikku meeqqerivimmiilinnginnerani ileqqussatigut pitsaasunik angajoqqaavisa puiguikkiussitereersimasariaqarpaat.

Nukappiaqqamut arfinilinnik ukiulimmut angajoqqaajusut tamanna uppernarsarsinnaavaat: „Ernerput meeqqerivimmiilerami sapaatip-akunnera siulleq atuarfiup bussianik ingerlatillutik nukappiaqqamit allamit kinguaassiuutitigut pinerlineqariaraluarsimavoq, aali 15 minuttiinnarni ingerlallutik. Arlaleriarluni tamanna pisarsimavoq pinnguarnerunani paatsuugassaanngitsumilli tassaalluni ileqqoq pissusissamisuunngitsoq.

Ernitta atuaqatai angajoqqaaminnit filmeriaqatigineqartarput nakuusernertalimmik atoqatigiinnertalimmillu isiginnaartarlutik. Immaqa angajoqqaavi isumaqartarput nalusaminnut paaritinnissaaninngarnit filmeriaqatigiinnarnissaat isumannaannerusoq. Meeqqat ilaat kabel-tv-kkut meeqqanut inerteqqutinik isiginnaartarput imaluunniit angajoqqaamik video-taannik ’atortarlutik’.

Ullut ilaanni uagutsinni tupannaqisumik pisoqarpoq. Pisup tamatuma paasitippaatigut meeqqat alliartorneranni — aap, naalungiarsunnguuneranniilli — ileqqussatigut peqqinnartunik puiguikkiussitinniarnissaat qanoq naleqartigisoq. Ikinngutitta inersimasut ilaat niviarsiararlu sisamanik ukiulik pulaartoraavut. Niviarsiaraq taanna ernerpullu, kinguaassiuutitigut atoqatigiinnerup inersimasut katissimasut akornanni taamaallaat pisussaaneranik paasitilluareersimasarput, ernitta inaani pinnguarput. Niviarsiaraq pinnguarusulersimavoq peerariittuusaassallutik ernerpullu oqarfigalugu innassasoq. Meeqqatut uppialluni innartorlu niviarsiaqqap qallersimavaa. Ernerput tupalluni nillersimavoq: ’Suit, katissimasuinnaat taamaalioqqusaapput!’ Qimaalluni iniminit aniartulersorlu niviarsiaqqap suaarpaa: ’Allanut oqassanngilatit!’“ — Naleqqiuguk 1 Moses 39:12.

Tulliuttuni sammissavavut illoqarfissuarni pisartut — tamarmik meeqqat mikisunnguunerminniilli ingalassimasariaqagaat.

Nukappiaraq arfineq-marlunnik ukiulik niviarsiaqqamik arfinilinnik ukiulimmik pinngitsaaliilluni anartarfimmi arneriffiginnissimasutut unnerluutigisaasimavoq. Nukappiaqqat pingasut, arfinilinnik, arfineq-marlunnik qulingiluanillu ukiullit, niviarsiaqqamik arfinilinnik ukiulimmik kinguaassiuutitigut pinerliisimapput. Nukappiaraq arfineq-pingasunik ukiulik meeqqerivimmi ilinniartitsisuminit angummit atoqatigineqarsimavoq. Nukappiaraq 11-nik ukiulik niviarsiaqqamik marlunnik ukiulimmik pinngitsaaliilluni arnerisimasutut eqqartuunneqartussanngortitaasimavoq. Katsorsaasartut ilaat isumaqarput taamatut inatsisinik unioqqutitsisut namminneq mikinerugallaramik kinguaassiuutitigut atornerlugaasarsimasut.

Sunaaffami nukappiaraq ataaseq taamatut misigisaqarsimavoq. Mikisuararsuusorli ajaata 20-nik ukiullip qanikkut pinnguaqatigisarsimavaa (oral sex). Tiinganikkut atornerluineq tamanna ukiumi ataatsimi ingerlasimavoq, affarmik ukioqarneraniit marlunnik affarmillu ukioqalernissaata tungaanut. Ukiut marluk pingasullu akornanni qaangiummata niviarsiaqqanut mikisunut anneriniartalerpoq. Taamaaliortarnera atualernissaata tungaanut ingerlaannarpoq, 1. aamma 2. klassimi atuarfimmit anisitaavoq.

Siusissukkut ilinniartilernissaat pisariaqarpoq

Angajoqqaat meeqqamik alliartorneranni eqqortumik ilinniartinnissaat sumiginnartarpassuk pinerluttuliullattaalersinnaapput, tamannalu annerusunik pinerluttuliortalernermik kinguneqarsinnaavoq, soorlu aserorterisarnermik, tillinniartarnermik allaallu inuarnermik. Tamatumunnga assersuutissaqalaarpugut:

Nukappiaqqat arfinilinnik ukiullit pingasut pinnguaqatigisartakkamik angerlarsimaffianut innimiillisaarfiginnissimapput inillu tamangajaasa perulluliorfigalugit. Aserorterigajooq qulingiluanik ukiulik aserorterisimasutut, tillinniarsimasutut, meeraqamminik savimmik qunusiarinnissimasutut niviarsiaqqallu nujaanik ikuallatsitsisimasutut unnerluutigisaavoq. Nukappiaqqat marluk aqqanilinnik ukiullit illuinnarsuut ilumoortoq qulinik ukiullip qarnanut mangoriarlugu nalunaaqutaaraa tillissimavaat. Nukappiaqqap qulinik ukiullip niviarsiaraq arfineq-marlunnik ukiulik aallaasimavaa toqullugu videomik isiginnaagassiaq pinnaassutigereerlugulu. Qulinik ukiullip pinnguaqatigisartakkani aallaariarlugu illup ataanut matoorussimavaa. Meeraaraq tallimanik ukiulimmit init quleriit tallimaannit tummeqqakkut ajanneqarami toqusimavoq. 13-inik ukiulik inuusuttuaqqat allat marluk ilagalugit nukappiaqqamik arfineq-marlunnik ukiulimmik qimarnussisimavoq ilaqutaanit aningaasanik pissarsiniaraluarluni. Suliluunniilli nukappiaqqap ilaqutaanut aningaasanik utertitsissutissanik piumasaqarniarlutik sianernatik nukappiaraq uumatillugu nunamut matoorussimavaat.

Minnerunngitsumilli: Inuusuttorpassuit avatangiisiminnik ersiortitsisarput. Inuusuttuaqqat pinerlunniaqatigiikkuutaat sumi tamaani angalaartarput. Assigiinngitsunik aallaaseqarlutik imminnut akersuuttarput, eqqarnerannilu taakkuinnaanngitsut aammali meeqqat inersimasullu pisuussuteqanngitsut toqutaasarput. Aammalu illoqarfissuarni inissiat akornanni naakkittaatsuliorlutik qunusiarinnittarput. Los Angelesimiinnaq ’pinerlunniaqatigiikkuutaat 800-nit amerlanerusut 100.000-it sinnerlugit inuttaqarput’. (Atuagassiaq Seventeen augusti 1991) Tamakku ilarpassui angerlarsimaffinnit avissaartuussimasuneersuupput, pinerlunniaqatigisartakkatillu ilaquttamittut isigilersarlugit. Ilarpassui parnaarussaasarput inuunertilluunniit annaallugu. Allakkat parnaarussivimmeersut pingasut tulliuttut nalinginnaasorujussuarmut takussutissaapput:

Allakkat siulliit: ’Ujajaariaraluarsimasutut inuusuttunut parnaarussivimmiippunga. Sisamaalluta ujajaanialeruttortugut politiinit qaninngartikkatta. Avissaartuulluta qimaavugut, ataaseq allamut uangalu alla ilagalugu allamut. Angumerisaavugulli. Takorloortarpara parnaarussaajunnaaruma arlaannik qaffasissumik angusaqarnissara. Atuarfimmi ajornartorsiortuaannarsimavunga karakterigissaarsimanngisaannarlungalu. Allatulli oqarsinnaanngilanga, parnaarussivimmiinnertut allamik ajortigisoqanngilaq!’

Allakkat tullii: ’Mexicomit maanga pigama arfineq-pingasuinnarnik ukioqarpunga. Aqqaneq-marlunnik ukioqarlunga pinerlunniaqatigiinnut ilannguppunga. 15-inik ukioqalerama aatsaat iluamik ilaalerpunga. Biiliminngaanniit inuit eqqarfigisarpakka. Aallaaseqartuaannartarpunga. 16-inik ukioqarlunga aallaarsaritippunga toqungajavillungalu. Guuterput qutsavigaara suli piumanngimmanga, sulimi tappavunngarnissannut piariinnginnama. Maannakkorpiaq niunni aallaatinninnik ikeqarpunga. Kikkut tamaasa pinerlunniaqatigiinnut ilanngutinnginnissaannik siunnersorumavakka, uattummi kinguneqartitseqinapput: kiserliorlunga, susinnaananga parnaarussaaqqallungalu!’

Allakkat pingajui: ’Aqqanilinnilli ukioqangajalerlunga pinerlunniaqatigiinnut ilaasutut nalunngisaavunga. Sisamariarlunga savimmik kapineqarnikuuvunga, pingasoriarlunga aallaatinnikkuullunga, unatartinnikka parnaarussaanikkalu amerlangaarmata kisitsiseqartinngilakkaluunniit. Allamik suutaaruppunga taamaallaat toqu. 13-inilli ukioqalernerma kingorna ullut tamaasa kissaatigisarpara peerunnissara. Maannakkut 16-inik ukioqarpunga. Qaammatini arfineq-pingasuni massakkut parnaarussaaqqavunga, naatsorsuutigaaralu ukiut marlussuit ingerlaneranni naassaanngitsussamut sinilereersimalernissara. Illilli tamanna pinngitsoorsinnaavat pinerlunniaqatigiinnut ilanngutinnginnikkut.’

Piffissaagallartillugu iliuuseqarit

Assersuutit avaanngunartut tamakku saqqummiukkatsigik imaanngilaq oqarniartugut meeqqat alliartorneranni ajoqersornerat eqqarsaatigalugu kukkuluttooraanni pinngitsoorani taamatut kinguneqassasoq. Taamaakkaluartorli angajoqqaat perorsaanerminnik sumiginnaappata nuanniitsunik kinguneqarsinnaavoq, unioqqutitsinerillu iliuuseqarfigineqartanngippata meeraq pinerlunniartarnermut pulasinnaavoq parnaarussaanermik kingunilimmik, allaallumi toqumik.

Meeqqat periaasiisa kukkusuusut nakkutiginissaat inuusuttuaranngornissaannut utaqqisinneqassanngilaq. Taamaaliortariaqarpoq ukiut ajornakusoortut tamakkua nalliutinnginneranni, siusissukkummi ileqqut kukkusut aaqqikkuminarnerusarmata. Aap, tassami meeqqanut allanut akulerutinnginneranni, meeqqerivimmiilinnginneranni, meeqqat ilinniartinneqartariaqarput, ajunngitsup tungaanut sunnernissaat taamaalinerani ajornannginnerusarmat. Meeqqat mikineranni qanimut attaveqarfigisimanngikkaanni immaqa inuusuttuaranngorunik angajoqqaatik qanimut aataveqarfigerusunnavianngilaat. Immaqa angajoqqaat inissaraluat meeqqat kammalaataasa tigussavaat. Taamaattumik angajoqqaat ima kajumissaarneqarput: Meeqqat alliartorneranni sumiginnarnaveersigik; sapinngisassannik taakku iluaqutissaannut iliuuseqarniartaritsi, taava ajunngitsumik kinguneqassaaq, ilissinnut meeqqassinnullu nuannaarutaasumik. — Matîuse 7:16-20. (gD 22/9 92)