Inuusuttut aperipput:

Isiginnaagassiat ersinartulersaarutaasut tassaannaappat aliikkutassiat ajoqutaanngitsut?

ISIGINNAAGASSIANIK nutaanik saqqummertunik nalunaarutiginnittartunit iluarineqanngeqaat, angajoqqaanit akerarineqarluinnarput, tv-llu aallakaatikkusunneq ajorpai — isiginnaagassialli ersinartulersaarutaasut piupput ingerlalluaqalutillu. Aningaasat iluanaarutaasut eqqarsaatigalugit oqassagaanni isiginnaagassiat ersinartulersaarutaasut iluatsittumik ingerlapput, ilaallu amerlaqisunit isiginnaariarneqartarput. Isiginnaagassiortartut noqqaallorissut isiginnaagassiat iluanaaruteqarfitik nanginniliinnartarpaat, isiginnaagassiortartullu allat unammillertuusut ilaarsisarnermikkut iluanaaruteqarniarsarisarput.

Isiginnaagassianik ersinartulersaarutaasunik tamakkuninnga isiginnaarnissamut kikkuunerusut kajumissaarneqartarpat? Akissut tassaavoq: Inuusuttut. Isiginnaagassiamik ersinartulersaarutaasumik nutaamik isiginnaarnissamut isissutissamik pisiniarlutik sila qanoq ikkaluartorluunniit inuusuttuaqqat tulleriiaarpassuanngorlutik utaqqisarnerat qaqutigoortuunngilaq. Suulliuna isiginnaagassiat taama ittut kajungernarsisittarai? Mianersorfigisariaqarnerannullu suna pissutaava?

Isiginnaagassiani ersinartulersaarutaasuni periaaseq nutaaq

Isiginnaagassiat amiilaarnartut ukiualunnguit matuma siorna isiginnaartiminnit amiilaarineqartarsimagaluaqisut isiginnaagassianit ersinartulersaarutaasunit allaanerusunit maanna inangerneqarsimapput. Isiginnaagassiani periaaserineqartut tassaajunnaarsimapput suliarilluakkat isiginnaartunik pissangatitserujussuartartut eqqarsaatersuutaannillu qiillassaarisartut, annerusutigulli tassaalersimapput nakuusernerit peqqarniitsumik amiilaarnarsarluagaaqisut. Soorlu aviisimi New York Post-imi ima allassimasoqartoq: „Ersisaarisartutoqqat inunnit toqutsiumatuunit, silaqarluassaanngitsunit taarserneqarsimapput.“

Assersuutigalugu, isiginnaagassiap „Tallimanngorneq 13-iat“-mik taaguutillip immikkoortuisa sisamaat pillugu ima allaaserisaqartoqarsimavoq: „Isiginnaagassiap minuttinik 91-inik sivisussuseqartup aattaqaqisumik inunnik aqqunartiterinerinnangajannik inuusuttuaqqanillu atisaqanngitsuinnangajannik imaqarpoq . . . ilaatigullu naatsukullannik tulleriiaanik niaquersinernik qimitsinernillu imaqarluni.“ Isiginnaagassiap inuttaasa pingaarnersaat tassaavoq „toqutsisartoq silaqarluassaanngitsoq Jasonimik atilik, ishockeytartut kiinarpaanik kiinarpalik inuusuttuaqqanik nukappiaqqanik niviarsiaqqanillu assigiinngitsunik peqqarniitsumik toqoraasartoq.“

Aap, aammik kuiserujussuarnerit isiginnaagassiani ersinartulersaarutini periaaserineqalersimapput, taamaattumik tupinnarpallaassanngilaq isiginnaagassiat ersinartulersaarutaasut isiginnaartartunut taassaalersimappatalusooq isiginnaagassiami najoqqutassiaq aammik kusersoq.

Isiginnaagassiat ersinartulersaarusiat sooq kajungerineqartut

Qanorluunniit upperiuminaatsigigaluarpat, inuusuttut ersinartulersaarutinut kajungernerinut pissutaasut tassaapput toqoraanersuit aammalu ’aqqunartiterinerit aattaqaqisut’. Melissa 16-inik ukiulik aperineqarami sooq isiginnaagassiat qiiaamminartut isiginnaartarnerini, ammasumik ima nassuerpoq: „Amiilaarnartut nuannareqaakka. Isiginnaagassiat, soorlu Goldilocks-itut ittut [„Kuultinik nujalik“, isiginnaagassiaq meeqqanoortoq], nuannarinngilakka. Isiginnaagassiat, soorlu Elm Street-imi oqimangerneq-tut ittut, nuannareqaakka.“ Oqaatsini ima ilavai: „Aap, inuit pilanneqartut isiginnaarlugit nuannareqaara.“

Isiginnaagassiami toqutsinerit qanoq „suliarilluagaatigineri“ naapertorlugit isiginnaagassiat inuusuttunit nalilerniarneqarajuppoq. Inuusuttuaraq ima allappoq: „Arlaleriarlunga tusarsimavara isiginnaariat isiginnaakkaminni maajunnartumik toqutsinermik ersaartaatiginnillutillu siggartarfiginnittut.“ Sandy 17-inik ukiulik ima ilaliivoq: „Isiginnaagassiap ersitilluinnarsimappanga, taava pitsaasuuvoq. Ersitinngippanga — ’sungiutiinnakkamik’ toqutsinertaqarpat — taava naammaannarpoq.“

Ersinartulersaarutinik isiginnaartarnermut peqqutaasut allat

Ilumoorpoq isiginnaagassianik ersinartulersaarutinik isiginnaartartut tamakkeratik arajutsinianngissuseq imaluunniit nakuusernermik isiginnaarusussuseq pissutigalugu isiginnaartarput. Inuusuttuaqqalli ilaasa isiginnaagassianik ersinartulersaarutinik isiginnaarneq pissutsinit piviusunit qimaaffittut, tassa ulluinnarni isumakuluutinit ’anitsiarfittut’, isigisarpaat. Tarnip pissusiinik ilisimatooq Joyce Brothers misissuisimavoq: „Inuuneq paatsiveerullunilu annilaanganarsigaangat . . . amiilaarnartunik isiginnaagassat qimaaffiginissaat ajornannginnerusarpoq.“

Inuusuttut allat pissangajumatussusertik killissutigisarpaat. Bobby 14-inik ukiulik ima oqarpoq: „Pissanganartangaarmat issiaviup isuatungaannaani issianartarpoq. Soorlulimi rutschebanerluni ersiummisaarluni aqajannguummerujussuartarlunilu sivikitsuinnarmillu uninngasarluni.“

Isiginnaagassiat amiilaarnartut aammillu kuisinertaqaqisut sunnertinngivillutik isiginnaarsinnaagaangamikkik inuusuttuaqqat ilaat misigisimasarput qanoq angutaalluartiginertik takutillugu. Reggie, isiginnaagassianik ersinartulersaarutinik takusaqartarsimaqisoq, ima oqarpoq: „Aak aqqunartiterinerlu isiginnaarsinnaagukkit, taava angutaalluartuussaatit. Taamaanngippat ikinngutinnit qunutuutut isigineqassaatit.“

Inuusuttorpassuilli ilaasa isiginnaagassiat ersinartulersaarutaasut takuniartarpaat ikinngutitik, angutaagunik arnat arnaagunillu angutit, ilagalugit isiginnaarluni ’nuannersumik pissanganartarnera’ pissutigalugu. Quintella 20-nik ukiulik ima eqqaamasaqarpoq: „Ersinartulersaarutinik isiginnaariaraangatta ersinartortaa takkukkaangat ikinngutiga angut taliagut eqittarpara.“ Taassuma oqaatsini ima ilavai: „Isumaqarpunga taamaaliornissara ikinngutima naatsorsuutigigaa aammalu kissaatigigaa.“ Inuusuttuaqqat niviarsissat ilaat ersisuusaartarput ikinngutiminnut angutaasunut attuulluartiternissaminnut patsisissaqarumallutik, taamatuttaaq ikinngutaata angutaasup neriuutigisarpaa taama qisuariarnissaa eqitaarluartiternissaanut piareersimasarluni.a

Inuusuttorpassuit isumaqarput isiginnaagassiat ersinartulersaarutaasut qiiaammisaarnartuullutillu pissanganartuullutillu pissutsinit piviusunit qimaaffissaallutillu ’nuannersumik pissangatitsisarmata’ aliikkutassatsialavissuusut. Taamaappali?

Isiginnaagassianit ersinartulersaarutinit suut ilikkarneqartut

Ilumoorpoq tarnip pissusiinik ilisimatuut ilaat isumaqarmata isiginnaagassiat ersinartulersaarutaasut ajoqutaanngitsut ilaannikkuinnarlu sinissaarutitsisartut. Oqartussaasulli ataqqineqartut arlallit isiginnaagassiat ersinartulersaarutit navianartortaqarnerat tikkuarsimavaat.

Dr. Leonard Berkowitz, ilisimatusarfimmi University of Wisconsin-imi tarnip pissusiinik ilisimatuujusoq, oqarpoq isiginnaagassiap ersinartulersaarutip isiginnaartut pingasutigut sunnertarai: „Siullermik, isiginnaartut nakuusernermut ersiunnaarsittarpai suusupaginnilersittarlugillu. Aappassaanik, isiginnaartut isumaqalersittarpai nakuuserneq ileqquusoq akuerisaasoq.“ Pingajussaattut taavaa isiginnaartut „ilaannik qiimmatsitsisarnera“.

Itinerusumik eqqarsaatigigaanni allat anniarnerannik misiginneqatiginninneq tassaannginnerpa inuit uumasunit allaanerussutigisaat? Isiginnaagassiani ersinartulersaarutini nakuusernernik takutitsisarneq misiginneqatiginnissinnaassutsimut millisaataaginnarsinnaavoq. Eqqaamasariaqarparput apustili Paulusip inuit ’uummatimikkut manngertuunertik [iluamik oqaatigalugu: misigittaatsuunertik]’ pissutigalugu „ileqqorinnissamik misigissuseeruttut“ (NV) avoqqaarimmagit. Kristumiullu kajumissaarpai ’ajunngitsumik iliorfigeqatigiinnissaannik isumassueqatigiinnissaannillu’. (Evfisumiut 4:18, 19, 32, Kingdom Interlinear Translation) Taamatut pissuseqarniarsariitigaluni asuli aammik kuisinersuit isiginnaarumaneqarsinnaanerpat?

Nakuusernermut Guutip isiginnittaasia

Isiginnaagasssiani ersinartulersaarutaasuni navianaataasoq tassaannaagaluarpalluunniit misigittaatsunngornissamut navianaat, isumanerluuteqarnissamut pissutissaalluarpoq. Kristumiulli tamanit pingaarnerpaatitaat tassaavoq Guutimik ikinngutiginnittuaannarnissaq, taamaaliussagaannilu nakuusernermut taassuma isiginnittaasiatut isiginnittaaseqartariaqarpoq. Noap nalaani silarsuaq Guutip suujunnaarsikkamiuk nakuusernermut qanoq isiginnittaaseqarnini ersersilluarpaa. Bibelimi ima oqaluttuarineqarpoq: ’Nuna aserorsimavoq Guutip takkuani, iluaatsuliornernik ulikkaarluni. Guutip taava nuna isigilerpaa aarit aserorsimasoq, uinillit tamarmik aqqutertik aserorsimammassuk nunami. Taava Guutip Noa oqarfigaa: „Uinillit tamarmik naggatissaat nalliuppoq takkunnut, nuna ulikkaarmat iluaatsuliornerinik, tassa aserussavakka nuna tappullugu.“’ — 1 Môrsase 6:11-13.

Taamaattumik tussiaasiortoq Jehova pillugu ima oqarsimavoq: „[Nakuusernermik] nuannarisaqartoq uumigaa.“ (Tussiaat 11:5) Kristumiut apustilit nalaanni inuusut tamannarpiaq pissutigalugu sakkuaallutik isiginnaartitsisunik, angutit anguteqatiminnut uumasunulluunniit toqunissamik tungaannut akiuuffigisaannik, isiginnaarumaneq ajorput. Taamani tamanna aliikkutaagajussimavoq; atuakkiortorli kristumiu, Athenagoras ukiut hundredellit aappaanni inuusimasoq, ima allappoq: „Angummik toqutsinermik isiginnaarneq isiginnaartup toqutsineratut isigigatsigu isiginnaartitsinerit taama ittut isiginnaarumanngilluinnarpavut.“

Arajutsisariaqanngilarlu isiginnaagassiat ersinartulersaarutaasut amerlasuut anersaarsiornermut imaluunniit anersaapilussiornermut attuumassuteqartunik imaqartarmata. Oqartoqarsinnaava kristumiu inuusuttoq ’Diaavulup qoqassiiniarnerinut aalajaassinnaasoq’ isiginnaagassiat anersaarsiornermut attuumassuteqartunik imallit isiginnaartarunigit? — Evfisumiut 6:11; sarĸúmersitat 21:8.

Inuusuttut ilanngutassiami matumani taariikkatta — Reggiep, Quintellap, Sandyp aamma Bobbyp — Guutimik ikinnguteqarnertik attatiinnarumallugu isiginnaagassianik ersinartulersaarutaasunik isiginnaartarunnaarsimapput. Imaanngilaq nuannaarsaatinik imminnut nangartorluinnarlutik imminut naaggaartunngorsimasut; Bibelimilli atuaqqissaarneq iluaqutigalugu paasisimavaat aliikkutassiat ileqqussatigut ajortunnguutaasinnaasut ingalassimasariaqarlugit. Angutaagunik arnap arnaagunillu angutip ileqqorissumik pissusilersorfiginissaata pingaaruteqassusia paasisimavaat taamaattumillu isiginnaagassiat taama ittut atortariaqanngikkitik ikinngutiminnut arnamut imaluunniit angummut nuannarinninnerminnik assuarnartumik ersersitsiniutitut. (1 Tásalûníkamiut 4:3, 4) Nakuuserneq aliikkutariunnaarsimavaat, isiginnaakkaminnilli naliliiniartalersimallutik.

Paasisimavaat isiginnaagassiat ersinartulersaarutit tassaanngitsut aliikkutassiat ajoqutaanngitsut. (gD 8/5 88)

[Quppernerup ataani ilanngussaq]