JOHANNESIMUT SAQQUMMERSITAT

1 Uku tassaapput Jiisusimit Kristusimit saqqummersitat* Guutip inussiaatini qanittukkut pisussanik takutin­niarlugit Jiisusimut tunniussai. Jiisusillu inngilini aallartippaa assersuutit* atorlugit inussiaatiminut Johannesimut taakkuninnga saqqummius­seqqullugu. 2 Johannesi Guutip oqaasia Jiisusillu Kristusip uppernarsaatai, aap, takusani tamaasa pillugit ilisiman­nittutut nassuiaavoq. 3 Pilluarpoq siulittuutit taakkua oqaaser­taannik nipituumik atuaasoq, pilluarpullu taakkunani allassimasunik tusartut maleruaasullu, piffissarititaasormi nalliutingajalerpoq.

4 Johannesimit Aasiami* ilagiinnut arfineq-marlunnut:

Ajunngisaangaarnermik eqqissinermillu “maanna ittumit, siornatigut ittumit tikiuttus­samillu”, anersaanillu arfineq-marlunnit taassuma issiavis­saarsuata saavaniittunit 5 aamma Jiisusimit Kristusimit – “ilisiman­nittumit aalajaatsumit”, “toqusunit makititaasut siullersaannit”* aamma “nunarsuarmi kunngit naalagaannit” – pisumik kissaappassi.

Asannitserput, aanni atorlugu ajortiliunitsinnit aniguisitsiserput, 6 kunngin­ngortitsiserput aamma Guutini Ataatanilu kiffartuun­niassagatsigu palasin­ngortitsiserput qaqugorsuarmut ataqqineqarlunilu pissaaneqarili. Amen.

7 Takuuk! Nuissatigut aggerpoq. Kikkullu tamarmik, aamma taassuminnga kapisisut, takussavaat. Nunarsuarmilu naggueqatigiit tamarmik taanna pissutigalugu aliasullutik sakissamikkut tilluassapput. Aap, amen.

8 “Uanga tassaavunga Alfa aamma Omega,”* oqarpoq Jehova* Guuti, “maanna ittoq, siornatigut ittoq tikiuttussarlu, Killeqan­ngitsumik Pissaanilik.”

9 Uanga Johannesi, qatanngutersi ilissitulli Jiisusimik malinnittutut annikil­liortoq, kunngiusussaq pinertusaartorlu, Guuti pillugu oqalukkama Jiisusilu pillugu ilisiman­nittutut nassuiaagama qeqertami Patmossimik taaneqar­tartumiippunga. 10 Anersaap illernartup sunniineratigut Naalakkap ulluaniilerpunga, tununnilu nipersuaq tusaalerpara qarlortaatitut* nipeqarluni 11 oqartoq: “Takusatit allakkanut imusanut allakkit ilagiinnullu arfineq-marlunnut ukunaniittunut nassiullugit: Efesossi, Smyrna, Pergamonni, Tyatiira, Sardessi, Filadelfia Laodikiialu.”

12 Kia oqaluukkaanga takuniarlugu tunummut qiviarama takulerpakka qullilerfiit kuultiusut arfineq-marluk 13 inuullu erneratut isikkulik qullilerfiit akorngan­niittoq. Taanna isikkaminut anngussimasumik atisaqarpoq sakissamigullu kuultimik qiterum­mioqarluni. 14 Niaqua nujaalu savap meqquisut, aputitut, qaqortigipput isaalu ikualasutut illutik. 15 Niui kanngussattut minguitsutut aatsitsivimmi aamaartutut ipput nipaalu kuussuartut nipeqarluni. 16 Ullorissallu arfineq-marluk talerpimminik tigumiarpai, qarnganillu panaq takisooq illuttut kiinalik ipittoq anillappoq, kiinaalu seqinertut qaammaris­seruttorsimasutut ippoq. 17 Takugakku toqusutut illunga isigaasa saavanni uppippunga.

Talerpim­minillu attoriarlunga oqarfigaanga: “Erseqinak. Uanga tassaavunga Siulleq Kingullerlu, 18 uumassuseqartoq. Toqugaluarlunga qaqugorsuarmut kipisuitsumillu uumavunga, aamma toqumut Ilivermullu* matuersaateqarpunga. 19 Taamaattumik maanna pisut tamatumalu kingorna pisussat takusatit allakkit. 20 Ullorissat arfineq-marluk talerpinnik tigumiakka qullilerfiillu kuultiusut arfineq-marluk takusatit pillugit Guutip isertugaataa imaappoq: Ullorissat arfineq-marluk ilagiit arfineq-marluk inngiliinut assersuutaapput qullilerfiillu arfineq-marluk ilagiinnut arfineq-marlunnut assersuutaallutik.

2 Efesossimi ilagiit inngiliat allaffigissavat: Ullorissanik arfineq-marlunnik talerpimminik tigumiartoq qullilerfiillu kuultiusut arfineq-marluk akornganni pisuttoq ima oqarpoq: 2 ‘Iliuutsitit, tamaviaarnerit, pinertusaarnerit, inunnik ajortunik akuersaan­nginnerit, apustiliun­ngikkaluarlutik apustiliunerartunik misiliinerit sallutuujunerannillu qulaarinerit ilisimavakka. 3 Pinertusaarlutillu atera pillugu tunniutiin­narnallu qasulin­ngilatit. 4 Aallaqqaammulli asannis­simanittut asannik­kunnaarsimagavit oqaaqqis­saarpakkit.

5 Taamaattumik sumit nakkarsimanerlutit eqqaamassavat, aamma peqqissimil­lutillu siullermik iliuuserisatit iliuuseris­savatit. Taamaaliun­ngikkuit ornissavakkit peqqissimin­ngikkuillu qullilerfiit inissisimavianiit piissallugu. 6 Nikkulaalli ilinniar­titsissutaanik malinnittut* iliuusii uumigisakka uumigigakkit nersualaarpakkit. 7 Anersaap ilagiinnut oqaasii siuteqartup tusarligit: Ajugaasup orpimmit inuussutaasumit, Guutip paratiisianiittumit, nerinissaa akuerissavara.’

8 Smyrnamilu ilagiit inngiliat allaffigissavat: ‘Siulleq Kingullerlu’, toqusoq uummaqqittorlu, ima oqarpoq: 9 ‘Annikil­lioraluarlutit piitsuugaluarlutillu pisuujunerit juutiun­ngikkaluarlutillu juutiunerartunit, Saatanip synagogianit, mitaller­neqarnerit ilisimavakka. 10 Naalliuutigisassatit sioorageqinagit. Tamakkiisumik misilin­neqaqqullusi Diaavulup ilasi parnaarus­saatittuassavai, ullunilu qulini annikil­liussaasi. Toqumut allaat aalajaakkuit inuusussatut niaqorusis­savakkit. 11 Anersaap ilagiinnut oqaasii siuteqartup tusarligit: Ajugaasoq toqup aappaanit ajoquser­neqanngil­luinnassaaq.’

12 Pergamonnimi ilagiit inngiliat allaffigissavat: Illugiittut kiinalimmik takisuumik ipittumik panaqartoq ima oqarpoq: 13 ‘Nalunngilara Saatanip issiavis­saarsuata inigisaani najugaqaraluarlutit atera aalajangiusimajuarit. Antipassillu nalaani ilisiman­nitsiga aalajaatsoq illit illoqarfinni, Saatanip najugaqarfiani, toqutaagaluartoq uannut uppernerit aalajangiusimavat.

14 Ilatilli Biilearmip ilinniar­titsissutaanik maleruaammata oqaaqqis­saalaarpakkit. Biilearmip Baalarki Israalip qitornaanik guutilianut pilliutinik nerinissamik atoqatigiin­nikkullu eqqunngitsulior­nissamik* kajumis­saareqqullugu ilitsersorpaa. 15 Tamatuma saniatigut Nikkulaap ilinniar­titsissutaanik* malinnittunik ilaqarputit. 16 Taamaattumik peqqissimigit. Taamaaliun­ngikkuit ornipal­lassavakkit, qaninniillu panaq takisooq anisoq atorlugu saassutis­savakka.

17 Anersaap ilagiinnut oqaasii siuteqartup tusarligit: Ajugaasoq mannat isertor­neqarsimasut ilaannik tunissavara, ujaqqamillu qaqortumik tunissavara, aterlu nutaaq tunineqartup kisimi ilisimasaa ujaqqami allassimassaaq.’

18 Tyatiirami ilagiit inngiliat allaffigissavat: Guutip ernera, ikualasutut ittunik isilik kanngus­sattullu minguitsutut ittunik isigalik, ima oqarpoq: 19 ‘Iliuutsitit, asanninnerit, uppernerit, kiffartornerit, pinertusaarnerit aallaqqaammullu sanilliullugu iliuuseqar­nerunerit ilisimavakka.

20 Arnarli Jeezabeeli, pruffiitiunerartoq inussiaatinnillu atoqatigiinnikkut eqqunngitsulior­nissamik* guutilianullu pilliutinik nerinissamik ilinniar­titsinermigut tammartitsisoq, akuersaarakku oqaaqqis­saarpakkit. 21 Peqqissiminissamut periarfis­sippara, atoqatigiin­nikkulli eqqunngitsulior­tarnini* peqqissimis­sutigiumanngilaa. 22 Napparsimalersissavara nikuissin­naajunnaarsillugu, taassuminngalu allasioqateqartut tammartin­neqarnermikkut iliuutsitik peqqissimis­sutigin­ngippatigit annikil­liortingaas­savakka. 23 Ilagiit tamarmik paasinias­sammassuk eqqarsaatit* ilorlerpaat uummatillu misissuif­figisarikka qitornai perulun­nartumik napparsimalersin­nerisigut toqussavakka, tamassilu immikkut iliuutsisi naapertorlugit akilerumaarpassi.

24 Ilissili allat Tyatiiramiittusi, ilinniar­titsissummik tamatuminnga maleruaanasilu “Saatanip itissusiinik” taaneqar­tartunik ilisiman­ninngitsusi tamassi, oqarfigaassi: Allamik nammagas­sinngilassi. 25 Pigisasili tikiunnissama tungaanut aalajangiusimasigit. 26 Ajugaasoq naggatissarlu tikillugu iliuutsinnik aalajangiusimannittoq inuiaqatigiinnut oqartus­saasunngor­tissavara 27 Ataatannit oqartus­saassusiler­neqarnittut. Taassumalu inuit immersakkatut marraasutut sequmin­niassammata ajaappiaq saviminiusoq atorlugu pillassavai. 28 Qaasiummillu tunissavara. 29 Anersaap ilagiinnut oqaasii siuteqartup tusarligit.’

3 Sardessimi ilagiit inngiliat allaffigissavat: Guutip anersaavinik arfineq-marlunnik ulloris­sanillu arfineq-marlunnik peqartoq ima oqarpoq: ‘Iliuutsitit ilisimavakka nalunagulu inuusutut tusaamaneqaraluarlutit toqungasutit. 2 Iterit, Guutimalu saani iliuutsitit naammas­sisiman­ngikkitit takusin­naagakku toqungajalersut sinneruttut nakussatsikkit. 3 Taamaattumik pissarsiatit tusakkatillu eqqaamajuarlugillu aalajangiusimal­lugillu peqqissimigit. Itinngikkuit tillinniatut tikiutissaanga, qassinullu tikissagikkit ilisiman­ngilluin­nassavat.

4 Sardessimili ilavit* amerlan­ngitsut atisatik mingutsin­ngilaat, piukkun­naramillu qaqortunik atisaqarlutik pisoqatigis­savaannga. 5 Aap, ajugaasoq qaqortunik atisaler­neqassaaq, atialu inuunerup mappersagaanit piinngil­luinnarlugu* Ataatama inngiliisalu saanni ilisimanerassavara. 6 Anersaap ilagiinnut oqaasii siuteqartup tusarligit.’

7 Filadelfiami ilagiit inngiliat allaffigissavat: Illernartoq, ilumoortoq, Daavip matuersaataanik peqartoq, allat matusin­naanngisaannik ammaasoq allallu ammarsin­naanngisaannik matusisoq ima oqarpoq: 8 ‘Iliuutsitit ilisimavakka. Takuuk! Matumik allat matusin­naanngisaannik ammaappakkit. Nalunngilara pissaaneqalaarlutillu oqaasera maleruarlugulu atera naluneran­ngikkit. 9 Saatanip synagogianeersut sallullutik juutiunerartut isikkavit saanni sikitsis­savakka paasitil­lugillu asagikkit. 10 Pinertusaarnera pillugu tusakkatit maleruarakkit* akunnermi inuit nunarsuarmi najugaqartut tamarmik misilin­neqarfissaanni illersus­savakkit. 11 Tikiutipal­lassaanga. Niaqorutinnik arsaarneqaqqunak pigisatit aalajangiusimajuakkit.

12 Ajugaasoq guutisiorfimmi Guutima pigisaani sukanngor­tissavara, tassanngalu aninngil­luinnassaaq. Guutima atia Guutimalu illoqarfiata, Jerusalemmip nutaap qilammit uanga Guutinnit aqqartup, taaguutaa ateralu nutaaq ajugaasumut allassavakka. 13 Anersaap ilagiinnut oqaasii siuteqartup tusarligit.’

14 Laodikiiami ilagiit inngiliat allaffigissavat: Amenimik taaneqartoq, ilisimannittoq aalajaatsoq ilumoortorlu, Guutimit pinngor­tinneqartut siullersaat, ima oqarpoq: 15 ‘Iliuutsitit ilisimavakka nalunagulu nillernallu kissanngitsutit. Kissaatigigaluarpara nillerlutil­luunniit kissassasutit. 16 Akunnat­tuugavit, kissarnallu nillinnginnavit, oriassavakkit. 17 Ima oqaraluarlutit: “Pisuujul­lungalu pisuussutinik katersarpas­suaqarlungalu amigaateqan­ngilluin­narpunga”, naluat atugarliorlutit, naakkinarlutit, piitsuullutit, tappiillutit tamaqarnallu. 18 Taamaattumik siunnersorpakkit pisuunngor­niassagavit, tamaqan­nginnerit kanngunartoq qulaarneqaqqunagu atisaqaler­niassagavit isigisaqarsin­naalernias­sagavillu uku uannit pisiareq­qullugit: Kuulti innermik minguiagaq, atisat qaqortut isinullu tarngut.

19 Asasakka tamaasa oqaaqqis­saartarlugillu perorsaatis­sittarpakka. Taamaattumik ilungersorlutillu peqqissimigit. 20 Takuuk! Matumut kasuttorpunga. Nipinnik tusartoq ammaassisorlu iserfigissavara unnukkorsioqatigis­sallugulu. 21 Uanga ajugaanittut Ataatannillu issiavis­saarsuani issiaqateqarnittut ajugaasup issiavis­saarsuanni uannik issiaqateqarnissaa akuerissavara. 22 Anersaap ilagiinnut oqaasii siuteqartup tusarligit.’ ”

4 Tamatuma kingorna qilammi matu ammasoq takulerpara, nipilu uannut oqaluttoq siulleq qarlortaatitut* nipilik tusaasara oqarpoq: “Maanga qaqigit, taava pisussat ilinnut takutis­savakka.” 2 Tamatuma kingorna anersaap ingerlaannaq sunnermanga takulerpara issiavis­saarsuaq qilammiittoq tassanilu issiasoqartoq. 3 Guutilu tassani issiasoq ujaqqatut jaspisitut karneolitullu* qillaritsigivoq, issiavis­saarsualu kaajallallugu smaragditut qillaritsigisumik neriusaaqarpoq.

4 Issiavis­saarsuaq kaajallallugu 24-nik issiavis­saarsuaqarpoq, issiavis­saarsuarnilu taakkunani utoqqaanertat 24-t qaqortunik atisallit kuultinillu niaqorutillit issiapput. 5 Issiavis­saarsuarmillu innaallannerit, nipit kallerillu anillattarput. Qulliillu innermik ikummatillit arfineq-marluk issiavis­saarsuup saavani ikumapput, taakkulu Guutip anersaavinut arfineq-marlunnut assersuutaapput. 6 Imaq igalaaminiinnartut, aligortut, isikkulik issiavis­saarsuup saavaniippoq.

Pinngortitat uumassuseqartut sisamat saamikkut tunumikkullu isinik ulikkaartut issiavis­saarsuup saneraasa qeqqaniil­lutillu avatangersimavaat. 7 Pinngortitaq uumassuseqartoq siulleq løvitut isikkoqarpoq, pinngortitat uumassuseqartut aappaat nersussuartut angutivissatut* isikkoqarpoq, pinngortitat uumassuseqartut pingajuat inuttut kiinaqarpoq pinngor­titallu uumassuseqartut sisamaat nattoralittut timmisutut isikkoqarluni. 8 Pinngortitat uumassuseqartut sisamat tamarmik immikkut arfinilinnik suloqarput, suluilu kaajallallutik mumingannilu isinik ulikkaarput. Aamma ullukkut unnuakkullu oqartuarput: “Illernarpoq, illernarpoq, illernarpoq Jehova Guuti, Killeqan­ngitsumik Pissaanilik, maanna ittoq, siornatigut ittoq tikiuttussarlu.”

9 Pinngortitat uumassuseqartut Guuti issiavis­saarsuarmiittoq, qaqugorsuarmut kipisuitsumillu uumassuseqartoq, unnersiutigalugu ataqqigaangassuk qutsavigigaangassullu 10 utoqqaanertat 24-t Guutip issiavis­saarsuarmi issiasup saavani pallortarput Guutilu qaqugorsuarmut kipisuitsumillu uumassuseqartoq guutisiorfigalugu. Issiavis­saarsuup saavani niaqorutitik miloriut­tarpaat ima oqarlutik: 11 “Jehova Guuterput pissaasoq, suut tamaasa pinngor­tikkakkit piumasallu pissutigalugu suut tamarmik uumallutillu pinngor­tinneqarmata kisivit unnersiutigineqar­tariaqarlutillu ataqqineqar­tariaqarputit.”

5 Guutip issiavis­saarsuarmi issiasup allakkat imusat mumigiinnik* allanneqarsimasut arfineq-marlunnillu naqissuser­neqarluarsimasut talerpimminik tigumiarai takuakka. 2 Inngililu nukittooq nipituumik ima nalunaartoq takuara: “Kina naqissutit napinis­saannut allakkallu imusat siaarnis­saannut piukkunnarpa?” 3 Kisianni qilammiittup, nunarsuarmiittup nunarsuul­luunniit ataaniittup kialuunniit allakkat imusat siaarsin­naanagillu atuarsin­naanngilai. 4 Allakkat imusat siaarnis­saannut atuarnis­saannul­luunniit piukkun­nartoqan­ngimmat qiangaalerpunga. 5 Utoqqaanertalli ilaata oqarfigaanga: “Qiaqinak. Løveq naggueqatigiinnit Juudakkun­neersoq, Daavip sorlaa, ajugaasimagami naqissutit arfineq-marluk napisin­naallugillu allakkanik imusanik siaarsisinnaavoq.”

6 Issiavis­saarsuup pinngor­titallu uumassuseqartut sisamat akornganni* utoqqaanertallu akornganni savaaraq arfineq-marlunnik nassulik arfineq-marlunnillu isilik toqunneqarsimarpasissoq takuara. Isillu Guutip anersaavinut arfineq-marlunnut nunarsuarmut tamarmut aallartin­neqarsimasunut assersuutaapput. 7 Savaaraq ingerlaannaq sassarpoq allakkallu imusat Guutip issiavis­saarsuarmi issiasup talerpianit tigullugit. 8 Allakkat imusat tigummagit pinngortitat uumassuseqartut sisamat utoqqaanertallu 24-t Savaaqqap saavani pallorput, tamarmillu immikkut kukkilat­tarissamik puuguttanillu itisuunik kuultiusunik tipigis­saatinik ikumatitassanik ulikkaartunik tigumiarput. (Tipigissaatit ikumatitassat illernartut qinnutaannut assersuutaapput). 9 Erinarsuullu nutaaq una atorpaat: “Toqutaagavit inuillu naggueqatigiinnit, qanorluunniit oqaasilinnit, inuiaqatigiinnit inuiannillu tamanit pisut Guutimut kiffartortussat aannik pisiarigakkit allakkat imusat tigunis­saannut naqissutillu napinis­saannut piukkun­narputit. 10 Guutimut kunngisut palasitullu kiffartor­tussanngor­tippatit, kunngisullu nunarsuarmut naalakkersuissapput.”

11 Inngilerpassuit issiavis­saarsuarmik, pinngor­titanik uumassuseqartunik utoqqaaner­tanillu avatangiisut takusama nipaat tusaavara. Inngilerpassuit 10.000-t 10.000-riarlugit* amerlisakkatut, aap, 100 millionilik­kuutaatut amerlatigipput. 12 Nipituumik oqarput: “Savaaraq toqunneqartoq pissaanermik, pisuussutinik, ilisimas­sutsimik, nukimmik, ataqqinaammik, alutornas­sutsimik unnersiutigineqar­nermillu tunineqar­nissamut piukkunnarpoq.”

13 Taava pinngortitat qilammiittut, nunarsuarmiittut, nunarsuup ataaniittut, imaaniittut taakkunaniittullu tamarmik oqartut tusaalerpara: “Guuti issiavis­saarsuarmi issiasoq Savaararlu qaqugorsuarmut kipisuitsumillu unnersiutigineqarlik, pingaar­tinneqarlik, ataqqinarsisin­neqarlik pissaaneqarlutillu.” 14 Pinngortitat uumassuseqartut sisamat oqarput: “Amen!” Utoqqaanertallu pallorlutik guutisiorput.

6 Takuaralu Savaaqqap naqissutit arfineq-marluk ilaat siulleq napigaa, pinngor­titallu uumassuseqartut sisamat ilaat kallertut nipeqarluni oqartoq tusaavara: “Qaagit!” 2 Takuaralu hesti qaqortoq tassanilu issiasoq pisisseqartoq. Taanna niaqoruser­neqarpoq, aallarporlu ajugaalluni ajugaal­luinnar­niarlunilu.

3 Naqissutit aappaat napimmagu pinngortitat uumassuseqartut aappaat oqartoq tusaavara: “Qaagit!” 4 Hestilu alla innertut qalipaatilik anillappoq, tassanilu issiasoq inuit imminnut toqoraateq­qullugit nunarsuarmi eqqissineerutsitsinissamut piginnaatitaallunilu panarujus­suarmik tunineqarpoq.

5 Naqissutit pingajuat napimmagu pinngortitat uumassuseqartut pingajuat oqartoq tusaavara: “Qaagit!” Takuaralu hesti qernertoq tassanilu issiasoq oqimaalutaavimmik tigumiartoq. 6 Pinngortitat uumassuseqartut sisamat akorngannit nipi oqartoq tusaavara: “Qajuusiassat liiterimut ataatsimut denaarimik* akeqarput suaasiassallu liiterinut pingasunut denaarimik akeqarlutik. Oliivenip uuliaa viinnilu ajoquseqinasigit.”

7 Naqissutit sisamaat napimmagu pinngortitat uumassuseqartut sisamaat oqartoq tusaavara: “Qaagit!” 8 Takuaralu hesti qarsungasoq, tassanilu issiasoq Toqumik ateqarpoq. Ilerrullu* kingunin­nguatigut malippaa. Taakkualu panaq takisooq, nerisas­saaleqisitsineq, perulun­nartumik napparsimalersitsineq nunarsuarmilu uumasut nujuartat atorlugit nunarsuup sisamarar­terutaani toqoraanissamut piginnaatin­neqarput.

9 Naqissutit tallimaat napimmagu Guutip oqaasia ilisiman­nittutullu nassuiaanertik pillugit toqutaasimasut tarningi* pilliiviup ataaniittut takuakka. 10 Nipituumik suaarput: “Naalagaq Nallernis­saqanngitsoq, illernartoq ilumoortorlu, nunarsuarmi najugaqartut eqqartuun­nissaannut aappullu pillugu akiniaanissamut qanoq sivisutigisumik utaqqiniarpit?” 11 Tamarmillu immikkut atisanik qaqortunik takisuunik tunineqarput. Sivikitsumillu, inussiaqatimik qatanngutimillu immisut toqutaasussat amerlas­susiisa tamakker­neqarnissaasa tungaanut, qasuersaaq­quneqarput.

12 Takuaralu naqissutit arferngat napigaa. Nunalu sajorujus­suarpoq, seqineq puutut* aliasuutitut qernertun­ngorpoq, qaammat tamarmi aattut aappalut­tunngorpoq, 13 orpiullu fiiginequtip anorersuarmit aalatin­neqarneratigut fiiginit inerinneqan­ngitsut nakkaatin­neqarnerattut ullorissat nunarsuarmut nakkaapput. 14 Qilallu allakkatut imuneqartutut peeruppoq, aamma qaqqat qeqertallu tamarmik inissisimaf­fimminnit nuunneqarput. 15 Taava nunarsuarmi kunngit, atorfilittat qaffasissumik inissisimaffillit, sakkutuut naalagaanersaat, pisuut, nukittuut, inussiat inussiaan­ngitsullu tamarmik qaqqani qaarusunnut qerrullu akorngannut toqqorput. 16 Qaqqanut qerrunullu oqaqattaarput: “Nakkarfigitigut Guutimillu issiavis­saarsuarmi issiasumit Savaaqqallu kamannerannit isertorluta. 17 Ullussarsuarmi kamaffiat nalliummat kina aniguisinnaava?”

7 Tamatuma kingorna inngilit sisamat nunarsuup teqeqquini sisamani nikorfasut aamma nunarsuaq, imaq orpiilluunniit anorlerfigineqaq­qunagit nunarsuup anoraanik sisamanik noqitsisut takuakka. 2 Takuaralu inngili alla seqerngup nuiffianit* Guutip uumassuseqartup naqissutaa tigumiarlugu qangattartoq. Taassuma inngilit sisamat nunarsuarmik immamillu ajoqusiinissamut piginnaatitaasut suaarpai: 3 “Guutitta inussiaataasa qaavinik naqissusiinissatta tungaanut nunarsuaq, imaq orpiillu ajoqusis­sanngilasi.”

4 Tusarparalu 144.000-t naqissuser­neqartut. Israalimi naggueqatigiinnit tamaneersut naqissuser­neqarput:

9 Tamatuma kingorna inupparpassuit inuiaqatigiinnit, naggueqatigiinnit inuiannillu tamaneersut qanorluunniillu oqaasillit kimilluunniit kisinneqarsin­naanngitsut takuakka. Issiavis­saarsuup Savaaqqallu saavanni qaqortunik takisuunik atisaqarlutik palmit avalequtaannik tigumiarput. 10 Nipituumillu suaartar­tuarput: “Aniguisitaaneq Guutitsinnit, issiavis­saarsuarmi issiasumit, Savaaqqamillu pivoq.”

11 Inngilit tamarmik issiavis­saarsuaq, utoqqaanertat pinngor­titallu uumassuseqartut sisamat kaajallallugit nikorfapput, tamarmillu issiavis­saarsuup saavani pallorlutik Guuti guutisiorfigaat 12 ima oqarlutik: “Amen! Guuterput ilisimas­suseqartoq, pissaaneqartoq nukittoorlu qaqugorsuarmut kipisuitsumillu unnersiutigineqarli, pingaar­tinneqarli, qutsavigineqarli aamma ataqqineqarli. Amen.”

13 Taava utoqqaanertat ilaata aperaanga: “Qaqortunik takisuunik atisallit kikkuuppat suminngaan­neerpallu?” 14 Ingerlaannaq akivara: “Naalagara, illit nalunngilat.” Oqarfigaanga: “Taakku tassaapput annikil­liornar­torsuarmit aniguisut. Atisatik takisuut errorsimavaat Savaaqqallu aavanik qaqortitillugit. 15 Tamanna pissutigalugu Guutip issiavis­saarsuata saavaniipput, guutisiorfimmilu Guutip pigisaani ullukkut unnuakkullu kiffartorput. Guutillu issiavis­saarsuarmi issiasup tuperminik qulangerumaarpai. 16 Nerisassanik imermillu amigaateqaq­qissanngillat, aamma seqinermit kiassuarmil­luunniit naalliutsin­neqassan­ngillat 17 Savaaqqap issiavis­saarsuup eqqaaniittup* paarissal­lugillu puilasunut inuussutaasunut siulersus­sammagit. Guutillu qulliit tamaasa isaannit allarterumaarpai.”

8 Savaaqqap naqissutit arfineq-aappaat napimmagu qilammi akunnerup affaata missaani nipaannersuaqarpoq. 2 Inngilillu arfineq-marluk Guutip saavani nikorfasut takuakka, qarlortaatinillu* arfineq-marlunnik tunineqarput.

3 Inngili alla tipigis­saammik pujoortitsivimmik* kuultiusumik tigumiarluni takkuppoq pilliiviullu eqqaanut pilluni. Illernartullu qinnutaat tusarneqarmata tipigis­saatinik ikumatitassanik pilliivimmut issiavis­saarsuup saavaniittumut sassaas­sassaanik amerlasuunik tunineqarpoq. 4 Tipigissaatit ikumatitat pujuat inngilip assaanit illernartullu qinnutaat Guutip saavanut qangattarput. 5 Inngililli tipigis­saammik pujoortitsivik tigupal­lariarlugu pilliivimmi innerup ilaanik immerpaa innerlu nunarsuarmut naloriullugu. Taava kallilerpoq, nipit tutsiupput, innaallannerit takussaalerput nunalu sajulerluni. 6 Inngilillu arfineq-marluk arfineq-marlunnik qarlortaatillit qarlortar­nissaminnut piareersarput.

7 Siulleq qarlortarpoq. Taava nataqqornat innerillu aammik akullit nunarsuarmut naloriun­neqarmata nunarsuup orpiillu pingajorar­terutaat ivikkallu qorsooqqissut tamarmik nungullutik ikuallapput.

8 Inngilit aappaat qarlortarpoq. Taava qaqqarsuartut ikumasutut ittoq imaanut naloriun­neqarpoq. Immallu pingajorar­terutaa aanngorpoq. 9 Immami pinngortitat uumassuseqartut* pingajorar­terutaat toqupput, umiarsuillu pingajorar­terutaat umiupput.

10 Inngilit pingajuat qarlortarpoq. Taava ulloriarujussuaq ikualasoq qilammit nakkarami kuussuit puilasullu pingajorar­terutaannut tuppoq. 11 Ulloriaq Sungarnitsumik* taaguuteqarpoq. Ermit pingajorar­terutaat sungarnitsun­ngorput, inuppassuillu imeq sungarnitsoq toqussutigaat.

12 Inngilit sisamaat qarlortarpoq. Taava seqerngup, qaammatip ullorissallu pingajorar­terutaat taarsipput, aamma ullup unnuallu pingajorar­terutaat qaamajun­naarput.

13 Nattoralillu qutsissumi timmisoq takuara nipituumillu ima oqartoq tusaallugu: “Inngilit pingasut allat qarlortalermata ilissi nunarsuarmi najugaqartusi naakkinaqaasi, naakkinaqaasi, naakkinaqaasi!”

9 Inngilit tallimaat qarlortarpoq. Ulloriarlu qilammiit nunarsuarmut nakkarsimasoq itinersuup sulluata isaariaanut matuersaammik tunineqartoq takuara. 2 Taassuma itinersuup sulluata isaariaa ammarmagu pujoq aatsitsivissuup pujuatut ittoq sulluata isaariaanit anialerpoq. Aamma seqineq silaannarlu sulluata isaariaanit putsumit taarsisin­neqarput. 3 Pillertat putsumit anialerput nunarsuarmullu pillutik. Nunarsuarmilu skorpionit oqartus­saassuseqar­nerisut oqartus­saassusiler­neqarput. 4 Oqarfigineqarput nunarsuarmi ivikkat, naasut qorsooqqissut orpiilluunniit ajoqusernagit qaamikkut Guutip naqissutaanik nalunaaqutser­neqarsiman­ngitsut kisiisa ajoqusissagaat.

5 Pillertat taakkuninnga qaammatini tallimani naalliutsitsinissamut piginnaatin­neqarput, toqutseq­quneqan­ngillalli. Naalliutsitsinerallu skorpionimit kapineqarnertut annernartigaaq. 6 Ulluni taakkunani inuit toqu ujassavaat, naninngil­luinnarluguli. Toqorusuk­kaluarlutik toqumit qimarratigineqassapput.

7 Pillertat hestisut sorsunnissamut piareersar­neqarsimasutut isikkoqarput. Niaqormioraat niaqorutitut ittut kuultiusut, inuttullu kiinaqarput. 8 Arnatut nujaqarlutillu løvitut kiguteqarput. 9 Saviminertut ittumik sakissamikkut saattuaasaqarput. Suluppalunnerat qamutitut hestinik qimuttulittut saassus­siartortutut nipeqarpoq. 10 Aamma pamiui skorpionit kapuutaattut ipput, qaammatinilu tallimani inunnik ajoqusiinissamut piginnaatitaanerat pamiuin­niippoq. 11 Itinersuup inngilianik kunngeqarput. Taanna hebræerisut Abaddonimik* ateqarpoq grækerisullu Apollyonimik* ateqarluni.

12 Naalliuut siulleq qaangiuppoq. Tamatumali kingorna naalliuutit marluk nalliutissapput.

13 Inngilit arferngat qarlortarpoq. Tusarparalu Guutip saavani pilliiviup kuultiusup nassuusartaanit sisamanit nipi 14 inngilit qarlortaateqartut arferngannut oqartoq: “Kuussuarujussuup Eufratip sinaani inngilit sisamat qilersorsimasut qilerus­saakkit.” 15 Inngilillu sisamat akunnermut, ullormut, qaammammut ukiumullu aalajangersimasumut piareersar­neqarsimasut inuit pingajorar­terutaannik toqutseq­qullugit qilerus­saarneqarput.

16 Sakkutoorpassuit hestersut 200 millioniupput.* Qassiunersut tusarpara. 17 Takorluuisitaanermilu hestit taakkunanilu issiasut ima isikkoqartut takuakka: Innertut aappaluttumik, naasutut hyacintitut tungujortumik ikuallas­saatitullu sungaartumik qalipaatilinnik sakissamikkut saattuaasaqarput. Hestit løvitut niaqoqarput. Aamma inneq, pujoq ikuallassaallu qarninit aniapput. 18 Inuillu pingajorar­terutaat erloqinar­torsior­titsinernit taakkunannga pingasunit – innermit, putsumit ikuallas­saammillu qarninit aniasunit – toqunneqarput. 19 Hestit pamiui pulateriaarsuttut ikkamik niaqoqaramillu oqartus­saassuseqarnerat qarniniillunilu pamiuin­niippoq, taakkulu atorlugit ajoqusiisarput.

20 Inuilli erloqinar­torsior­titsinernit taakkunannga pingasunit toqunneqan­ngitsut iliuutsitik* peqqissimis­sutigin­ngilaat. Anersaapiluit guutiliallu kuultimik, sølvimik, kanngussammik, ujaqqamik qisummillu sanaat takusaqarsin­naanatillu tusaasaqarsin­naanatillu pisussin­naanngitsut guutisiorfigiuarpaat. 21 Inunnik toqutsinitik, anersaarsiornitik, atoqatigiinnikkut eqqunngitsuliornitik* tillinnitil­luunniit peqqissimis­sutigin­ngilaat.

10 Takuaralu inngili alla nukittooq nuissanik atisaqarluni* qilammit aqqartoq. Neriusaaq niaquaniippoq, kiinaa seqinertut isikkoqarpoq, niui* sukatut innerusutut ipput 2 allakkanillu mikisunik siaarneqarsimasunik tigumiarluni. Imaq talerperlermik tummarpaa saamerlermillu nunarsuaq tummarlugu. 3 Løvitut qatimaalluni nipituumik suaarpoq. Suaarmallu kallerit arfineq-marluk nipaat oqalupput.

4 Kallerit arfineq-marluk oqalulermata allalerut­torlunga qilammit nipi oqartoq tusaavara: “Kallerit arfineq-marluk oqaasii isertuutikkit* allannagillu.” 5 Inngilip immamut nunarsuarmullu tummarsimasup takusama assani talerperleq qilaap tungaanut isaateriarlugu 6 Guuti qaqugorsuarmut kipisuitsumillu uumassuseqartoq – qilammik, nunarsuarmik, immamik taakkunaniit­tunillu tamanik pinngor­titsisoq – uppernarsaasiullugu neriorsuivoq: “Utaqqiffissaq qaangiuppoq. 7 Inngililli arfineq-aappaata qarlortalerfiata nalaani Guutip isertukkani inussiaatiminut pruffiitinut nutaarsiassatut nuannersutut nalunaarutigisaa piviusun­ngorpoq.”

8 Taava qilammit nipi uannut oqaloqqippoq, imalu oqartoq tusarpara: “Allakkat siaarsimasut inngilip immamut nunarsuarmullu tummarsimasup tigumiai aakkit.” 9 Inngili orneriarlugu oqarfigaara allakkat imusat mikisut uannut tunniuteq­qullugit. Taava oqarfigaanga: “Tigoriarlugit nerikkit. Taakku pissutigalugit naarlulissaatit, qaninnili tungusun­nitsuutitut tungusun­nissapput.” 10 Allakkat imusat mikisut inngilip assaanit tigoriarlugit nerivakka. Qaninni tungusun­nitsuutitut tungusunnipput, nerereerakkilli naarlulerpunga. 11 Oqarfigineqarpungalu: “Inuiaat, inuiaqatigiit, assigiin­ngitsorpas­suarnik oqaasillit kunngerpassuillu pillugit siulittueq­qissaatit.”

11 Taava ima oqarmat sullortooq uuttortaatitut ittoq uannut tunniun­neqarpoq: “Nikueriarlutit guutisiorfik Guutip pigisaa, pilliivik guutisiortullu uuttortakkit. 2 Guutisiorfiulli silarlia ilanngutis­sanngilat. Inuiaqatigiinnut tunniun­neqarsimammat uuttortas­sanngilat, taakkualu qaammatini 42-ni illoqarfik illernartoq tullaarissavaat. 3 Ilisiman­nitsikka marluk puunik aliasuutinik atisaqar­tillugit ulluni 1.260-ini siulittuisis­savakka.”* 4 Taakku tassaapput oliivenequtit marluk qullilerfiillu marluk assersuutaasut, aamma nunarsuup Naalagaata saavani nikorfapput.

5 Taakkununnga akeraasut ajoqusiinias­sagaluarunik innermit qarninit anisumit nungutin­neqassapput. Ajoqusiiniartoq taama toqunneqar­tariaqarpoq. 6 Ilisimannittut siulittuinerminni sialleqqunagu qilammik matusinissamut piginnaatitaapput. Aamma ermit aanngor­tinnissaannut piumalleraangamillu nunarsuarmi qanorluunniit erloqinar­torsior­titsisar­nissamut piginnaatitaapput.

7 Ilisiman­nittutut nassuiaareerpata uumasup nujuartap itinersuarmit qangattartup sorsussal­lugillu ajugaaf­figissal­lugillu toqussavai. 8 Timaallu toqungasut illoqarfissuup, taakkua Naalagaata qisummut naalliutsitsiviliamut* toqutaaffiata, assersuutaasumik Soodomatut Egyptenitullu ittup aqqusinersuiniissapput. 9 Inuillu inuiannit, naggueqatigiinnit inuiaqatigiinnillu assigiin­ngitsunit pisut qanorluunniillu oqaasillit ulluni pingasuni affarmilu timaat toqungasut isiginnaassavaat ilisaanissaallu akuerissanagu. 10 Nunarsuarmilu najugaqartut pruffiitit taakku marluk naalliutsitsisimik toqunerat pissutigalugu nuannaas­sallutillu nallius­sissallutillu tunissutinik imminnut nassittassapput.

11 Ullut pingasut affarlu qaangiummata Guutip anersaavata inuussutaasup pulaffigimmatik ilisimannittut nikuipput, takunnittullu sioorangaalerput. 12 Ilisiman­nittullu qilammit nipimit nipituumit ima oqarfigineqarnertik tusaavaat: “Maanga qaqigitsi.” Nuiamiil­lutillu qilammukarput, akeraasalu takuaat. 13 Taamaalisorlu nuna sajorujus­suarmat illoqarfiup qulerar­terutaa nakkaavoq. Nunalu sajummat inuit 7.000-t ajunaarput, sinnerisalu tupaqqallutik Guuti qilammiittoq ataqqilerpaat.

14 Naalliuutit aappaat qaangiuppoq. Naalliuutilli pingajuat nalliutilertoqaaq.

15 Inngilit arfineq-aappaat qarlortarpoq. Taava qilammi nipit nipituut oqarput: “Maanna Naalagarput tanitaalu* inunnut tamanut kunngisut naalakkersuilerput, Guutilu qaqugorsuarmut kipisuitsumillu kunngisut naalakkersuissaaq.”

16 Utoqqaanertallu 24-t Guutip saavani issiavis­saarsuarminni issiasut Guuti guutisiorfigalugu pallorput 17 imalu oqarlutik: “Jehova Guuti, Killeqan­ngitsumik Pissaaneqartutit, maanna ittutit siornatigullu ittutit, pissaaneqangaarlutit kunngisut naalakkersuileravit qutsavigaatsigit. 18 Nunanilli tamaneersut kamalermata kamalerputit. Toqusut eqqartuun­neqarnis­saannut aamma inussiaativit pruffiitit, illernartut atinnillu mianerinnittut – mikisut angisuullu – akissarsisin­nissaannut nunarsuarmillu aseruisut suujunnaarsin­nissaannut piffissarititaasoq nalliuppoq.”

19 Guutisiorfillu qilammiittoq Guutip pigisaa ammarneqarmat isumaqatigiissummut illerfiusaq takussaalerpoq. Taava innaallannerit takussaalerput, nipit tusarsaalerput, kallilerpoq, nuna sajuppoq nataqqor­narsuillu nakkaalerlutik.

12 Taava qilammi pisoq tupinnartoq assersuutaasoq takuara: Arnaq seqinermik atisaqarpoq,* qaammat isigaasa ataanniippoq, ullorissanik aqqaneq-marlunnik niaqorutaasaqarpoq 2 naartullunilu. Ernisulluni nallisitsinermini anniarluni nilliavoq.

3 Qilammi pisoq alla assersuutaasoq takuara: Pulateriaarsuusarujussuaq innertut qalipaatilik, arfineq-marlunnik niaqulik, qulinik nassulik arfineq-marlunnillu niaqorutaasalik.* 4 Pamiuminik ullorissat pingajorar­terutaat nassatarai nunarsuarmullu nakkaatillugit. Pulateriaarsuusarujussuarlu arnap ernisuttup saavaniit­tuarpoq erniniariarpat meeraa iiumallugu.

5 Arnarlu ernertaarpoq ajaappiaq saviminiusoq atorlugu inuiaqatigiinnut tamanut naalakkersuisussamik. Arnallu ernera ingerlaannaq Guutimut issiavis­saarsuanullu pisinneqarpoq. 6 Arnarlu inoqajuitsumut, Guutip piareersarsimasaanut ullunilu 1.260-ini nerisin­neqarfis­saminut, qimaavoq.

7 Qilammilu sorsuut­toqalerpoq: Mikaalip* inngiliisalu pulateriaarsuusarujussuaq saassuppaat, pulateriaarsuusarujussuaq inngiliilu akiuukkaluarlutik 8 ajugaan­ngillat,* qilammeeq­qusaajun­naarpullu. 9 Taava pulateriaarsuusarujussuaq, itsaq pulateriaarsuk Diaavulumik Saatanimillu taaneqartoq nunarsuarmilu tamarmi najugaqartunik tammartitsisoq, nunarsuarmut iginneqarpoq. Aamma inngilii ilanngullugit iginneqarput. 10 Qilammi nipi nipitooq oqartoq tusarpara:

“Qatanngutitta ulloq unnuarlu Guutip saavani unnerluutigin­nittaat iginneqarmat maanna Guutitta aniguisitsinera, pissaanera, kunngeqarfia tanitaatalu* oqartus­saanera piviusun­ngorput! 11 Savaaqqap aava ilisiman­nittutullu nassuiaanertik pissutigalugit ajugaaffigaat. Aamma allaat toqutaasin­naagaluarlutik tarnertik* asanngilaat. 12 Taamaattumik qilak tassanilu najugaqartusi, nuannaaritsi! Ilissili nunarsuaq imarlu, Diaavulup piffissakinnini nalunagu kamaqaluni aqqarfigimmasi naakkinaqaasi.”

13 Pulateriaarsuusarujussuup nunarsuarmut igitaasimanini paasigamiuk arnaq ernertaartoq malersulerpaa. 14 Arnarli inoqajuitsumut – piffissami ataatsimi, marlunni affarmilu* pulateriaarsuk najornagu nerisin­neqarfis­saminut – timmisin­naaqqullugu nattoralissuup suluinik marlunnik tunineqarpoq.

15 Pulateriaarsuullu arnaq ipitinniarlugu qanerminit imermik kuussuartut ittumik tissaluffigaa. 16 Nunarsuulli arnaq ikiorlugu qarni ammarpaa kuussuarlu pulateriaarsuusarujussuup qanerminit tissalutsitaa iillugu. 17 Taava pulateriaarsuusarujussuup arnaq kamaatingaaleramiuk kinguaavinit sinneruttut, Guutip inassutaanik maleruaasut Jiisusilu pillugu ilisiman­nittutut nassuiaanissamik suliassaqartut, sorsuffigilerpai.

13 Pulateriaarsuusarujussuarlu sissami sioqqanut inissippoq.

Takuaralu uumasoq nujuartaq qulinik nassulik arfineq-marlunnillu niaqulik imaanit qaqisoq. Nassumini qulini niaqorutaasaqarpoq,* niaquiniippullu atit Guutimik mitalliutaasut. 2 Uumasoq nujuartaq takusara milakulaatut isikkoqarpoq, nannutulli isigaqarlunilu løvitut qaneqarpoq. Aamma pissaanermik, issiavis­saarsuarmik oqartus­saassuseqangaar­nermillu pulateriaarsuusarujus­suarmit tunineqarpoq.

3 Niaquisa ilaat toqussutis­saasumik ikeqarpasittoq takuara, ikiali mamissimavoq, nunarsuullu inuisa uumasoq nujuartaq tupigusuutigalugu malippaat. 4 Inuillu pulateriaarsuusarujussuaq uumasumik nujuartamik oqartus­saassusiliimmat pallorfigaat, aamma uumasoq nujuartaq ima oqarlutik pallorfigaat: “Kina uumasutut nujuartatut ippa, kialu saassus­sinnaavaa?” 5 Uumasorlu nujuartaq makitalluni oqalunnissamut Guutimillu mitaatigin­ninnissamut qaammatinilu 42-ni piumasamisut iliuuseqar­nissamut piginnaatin­neqarpoq. 6 Qanini ammaramiuk Guuti, aqqa, ineqarfia allaallu qilammi najugaqartut mitaatigilerpai. 7 Illernartunut sorsunnissamut ajugaanis­samullu piginnaatitaavoq. Aamma naggueqatigiinnut, inuiannut, qanorluunniit oqaasilinnut inuiaqatigiinnullu tamanut oqartus­saassutsimik tunineqarpoq. 8 Nunarsuarmilu najugaqartut pallorfigissavaat. Taakkua atii nunarsuarmi meeqqat ilumiugineqar­talerneranniit* inuunerup mappersagaani, Savaaqqap toqunneqartup pigisaani, allanneqarsiman­ngillat.

9 Siuteqartoq tusarnaarli. 10 Tigusaasariaqartoq tigusaassaaq. Panamik toqutserusuttoq* panamik toqutaassaaq. Tamatumani illernartut pinertusaar­tariaqarlutillu uppertariaqarput.

11 Taava uumasoq nujuartaq alla nunarsuarmit qaqisoq takuara. Savaaqqatut marlunnik nassoqarpoq, pulateriaarsuusarujus­suartulli oqalulerpoq. 12 Uumasup nujuartap siulliup isigigaani oqartus­saaffigisimasaa tamaat oqartus­saaffigaa. Aamma nunarsuaq tassanilu najugaqartut uumasumik nujuartamik siullermik, toqussutis­saasumik mamissimasumilli ikilimmik, pallorfigin­nitsippai. 13 Aamma tupinnangaar­tuliortarpoq, allaat inuit isigitillugit inneq qilammit nunarsuarmut nakkartittarpaa.

14 Uumasoq nujuartaq isigitillugu tupinnar­tuliortar­nermigut nunarsuarmi najugaqartut tammartippai. Nunarsuarmilu najugaqartut oqarfigai uumasoq nujuartaq panamik ikilerneqartoq uummaqqittorli assilillugu assilialiussasut. 15 Uumasup nujuartap aappaa uumasup nujuartap siulliup assinganik anersaar­torsinnaan­ngortitsinissamut* piginnaatin­neqarpoq. Uumasup nujuartap siulliup assinga taamaalilluni oqalussin­naallunilu imminik pallorfigin­nikkuman­ngitsut toqunneqar­nissaannik peqqusisin­naatitaavoq.

16 Inuit tamaasa – mikisut angisuullu, pisuut piitsullu, inussiaataan­ngitsut inussiallu – assammikkut talerperlikkut qaamikkul­luunniit nalunaaqutser­neqaqqullugit pinngitsaalivai. 17 Uumasullu nujuartap atianik kisitsim­milluunniit atianut naapertuuttumik nalunaaqutser­neqarsimasut kisimik pisisin­naallutillu tuniniaasin­naapput. 18 Matumani ilisimas­suseqarnissaq pisariaqarpoq: Uumasup nujuartap kisitsisaa inuup kisitsisigimmagu ilisimas­suseqartup naatsorsorliuk. Kisitsisaalu tassaavoq 666.

14 Taava takulerpara Savaaraq qaqqami Ziionnimi nikorfasoq, ilagaalu 144.000-t Savaaqqap atianik Ataataatalu atianik qaamikkut allassimasullit. 2 Nipi kuussuartut kallerpalus­suartullu nipeqartoq qilammit tutsiuttoq tusaavara. Nipilu kukkilat­tariarsuutigalutik erinarsortutut nipeqarpoq. 3 Issiavis­saarsuup, pinngortitat uumassuseqartut sisamat utoqqaanertallu saavanni erinarsuut nutaajugunartoq atorpaat. 144.000-t, nunarsuarmiut akorngannit pisiarineqarsimasut, kisimik erinarsuut taanna ilinniarsin­naavaat. 4 Taakku tassaapput arnerinikkut mingutsis­simanngitsut, aap, atoqateqarsiman­ngisaannartut. Savaaraq sumukaraluaraangal­luunniit malittuarpaat. Inerittutut siullertut Guutimut Savaaqqamullu sassaas­sassatut inuit akorngannit pisiarineqarput, 5 aamma sallullutik oqalunneq ajorput. Minguitsuupput.

6 Inngililu alla qutsissumi* timmisoq takuara. Nunarsuarmi najugaqartunut, inuiaqatigiinnut, naggueqatigiinnut, qanorluunniit oqaasilinnut inuiannullu tamanut nutaarsiassanik nuannersunik atajuar­tussanik tusarlius­sassaqarpoq. 7 Nipituumik oqarpoq: “Akunneq Guutimit eqqartuun­neqarfissaq nalliummat Guuti mianeralugulu ataqqisiuk. Qilammik, nunarsuarmik, immamik puilasunillu pinngor­titsisoq guutisiorfigisiuk.”

8 Taava inngili alla, aappaat, takkuppoq oqarlunilu: “Arnaq ajorsar­tinneqarpoq! Babylon­nersuaq ajorsar­tinneqarpoq, tassa taanna arnaq viinniutiminik atoqatigiinnikkut eqqunngitsulior­nissamut* pileris­suseqalersitsisumik* inuiaqatigiinnik tamanik imertitsisoq!”

9 Inngili alla, pingajuat, takkuppoq nipituumillu oqarluni: “Uumasumik nujuartamik assinganillu pallorfiginnittoq qaamigullu assammigul­luunniit nalunaaqutser­neqartoq 10 aamma Guutip kamannerata viinnianik, kamannerata viinnisorfianut kimikil­lisaaser­neqarnani kuineqartumik, imissaaq. Aamma inngilit illernartut Savaararlu isigitillugit innermik ikuallas­saammillu naalliutsin­neqassaaq. 11 Naalliutsin­neqarnerisa* pujuat qaqugorsuarmut kipisuitsumillu qangattassaaq. Uumasumik nujuartamik assinganillu pallorfiginnittut taassumalu atianik nalunaaqutser­neqartut tamarmik ulloq unnuarlu qasuersaarfeqas­sanngillat. 12 Tamatumani illernartut, Guutip inassutaanik maleruaasut Jiisusimullu uppertuartut, pinertusaar­tariaqarput.”

13 Tusarparalu nipi qilammit oqartoq: “Allagit: Pilluarput maannamiit Naalakkamik ataasioqateqarlutik toqusut. Aap, anersaaq oqarpoq, iliuutsitik eqqaamaneqarmata* tamaviaarun­naarlutik qasuersaassapput.”

14 Taava nuiaq qaqortoq takulerpara. Inuullu erneratut isikkulik, kuultimik niaqorutilik killuummillu ipittumik tigumialik, nuiami issiavoq.

15 Inngili alla guutisiorfimmit anivoq nuiamilu issiasoq suaarlugu: “Inerittunik katersuif­fissanngormat nunarsuarmilu katersugassat inerimmata inerittunik killuigit.” 16 Nuiamilu issiasup killuutini nunarsuarmi atorpaa, nunarsuarlu katersuif­figineqarpoq.

17 Taava inngili alla guutisiorfimmit qilammiittumit anivoq, aamma taanna ipittumik killuuteqarpoq.

18 Aamma inngili alla innermut oqartussaasoq pilliivimmit anivoq. Ipittumik killuutilimmut suaarpoq: “Viinnissat inerimmata killuutit ipittoq atorlugu nunarsuarmi viinnequtit tigumasui katersukkit.” 19 Inngilip killuut atorlugu nunarsuarmi viinnequtit inerittui katersoreerlugit Guutip kamannerata tunguiaasarfissuanut naloriuppai. 20 Viinnissat illoqarfiup silataani tunguiarlugit tullaarineqarput. Viinnis­sanillu tunguiaaffimmit aak hestit kimmiaasa nalaannut portutigisumut aamma 296 kilometerit missiliorlugit* ungasitsigisumut aniavoq.

15 Taava qilammi pisoq alla assersuutaasoq tupinnartoq immikkuul­larissorlu takuara: Inngilit arfineq-marluk arfineq-marlunnik erloqinar­torsior­titsisut. Erloqinar­torsior­titsinerit taakku aqqutigalugit Guutip kamannera naammas­sineqassammat kingulliupput.

2 Takuaralu imaq igalaaminiinnartut innermik akusatut ittoq. Uumasumut nujuartamut, assinganut kisitsimmullu atianut naapertuuttumut ajugaasimasut immap igalaaminiinnaap eqqaani kukkilat­tarissanik Guutimit pisunik tigumiarlutik nikorfapput. 3 Guutip inussiaataata Moorsisip Savaaqqallu erinarsugassiaat atorpaat:

“Jehova Guuti, Killeqan­ngitsumik Pissaaneqartutit, iliuutsitit angingaarlutillu tupinnangaarput. Kunngiujuartutit, aqqutitit naapertuil­luarlutillu ilumoorput. 4 Kisivit ilumoorfigin­nittuugavit kia mianeris­sanngin­nerpaatit, Jehova, kialu atit ataqqis­sannginnerpaa? Aalajangersakkatit naapertuil­luartut saqqummersin­neqarmata inuiaqatigiit tamarmik illit saanni guutisiorfigis­savaatsit.”

5 Tamatuma kingorna tupeq guutisiorfik* qilammi ammarneqartoq takuara. 6 Inngilit arfineq-marluk arfineq-marlunnik erloqinar­torsior­titsisut guutisiorfimmit anipput. Annoraassianik minguitsunik qillaaris­sunillu atisaqarput sakissamikkullu kuultiusumik qiterum­mioqarlutik. 7 Pinngortitat uumassuseqartut sisamat ilaata inngilit arfineq-marluk puuguttanik itisuunik kuultiusunik arfineq-marlunnik Guutip, qaqugorsuarmut kipisuitsumillu uumassuseqartup, kamanneranik ulikkaartunik tunivai. 8 Guutisiorfillu Guutip alutornassusia pissaaneralu pissutigalugit putsumik ulikkaarpoq. Inngilillu arfineq-marluk arfineq-marlunnik erloqinar­torsior­titsinerisa naammas­sinissaasa tungaanut kinaluunniit guutisiorfimmut isersin­naanngilaq.

16 Nipillu nipituup guutisiorfim­meersup inngilit arfineq-marluk oqarfigigai tusarpara: “Puuguttat itisuut arfineq-marluk Guutip kamanneranik imaqartut nunarsuarmut kuiartorsigit.”

2 Siulliup puuguttani itisooq nunarsuarmut kuiartorpaa. Inuillu uumasup nujuartap nalunaaqutaanik nalunaaqutser­neqarsimasut assinganillu pallorfiginnittut annernartumik ajortumillu ikilerneqarput.

3 Inngilit aappaata puuguttani itisooq imaanut kuivaa. Imarlu inuup toqungasup aavatut ilimmat pinngortitat uumassuseqartut,* aap, imaaniittut, tamarmik toqupput.

4 Inngilit pingajuata puuguttani itisooq kuussuarnut puilasunullu kuivaa. Taakkulu aanngorput. 5 Inngili imermut oqartussaasoq oqartoq tusarpara: “Illit, Guuterput Ilumoorfiginnittoq maanna ittutit siornatigullu ittutit, naapertuil­luartuuvutit taama eqqartuukkakkit 6 illernartut pruffiitillu aavinik kuisisut. Aammik imigassaannik, pisassaattut, tunivatit.” 7 Pilliivillu oqartoq tusarpara: “Aap, Jehova Guuti, Killeqan­ngitsumik Pissaaneqartutit, eqqartuus­sinitit ilumoorlutillu naapertuil­luarput.”

8 Inngilit sisamaata puuguttani itisooq seqinermut kuivaa. Seqinerlu inuit innermik uutiter­nissaannut piginnaatin­neqarpoq. 9 Inuillu kiassuarmit uutiter­neqarput, Guutilli erloqinar­torsior­titsinernut taakkununnga oqartussaasup atia mitaatigaat. Peqqissiminatillu Guuti ataqqin­ngilaat.

10 Inngilit tallimaata puuguttani itisooq uumasup nujuartap issiavis­saarsuanut kuivaa. Kunngeqarfialu taarsivoq, inuillu anniarnermik oqqatik kiivaat. 11 Anniarnertik ikitillu pissutigalugit Guuti qilammiittoq mitaatigaat, iliuutsitillu peqqissimis­sutigin­ngilaat.

12 Inngilit arferngata puuguttani itisooq kuussuarujus­suarmut Eufratimut kuivaa. Kuussuullu ernga paqqerpoq kunngit seqerngup nuisarfianeersut* aqqutis­saqalersillugit.

13 Takuakkalu oqaatsit isumassarsiarititaasut* pingasut minguttuut naratsitut isikkullit pulateriaarsuusarujussuup qarnanit, uumasup nujuartap qarnanit pruffiitillu ilumuun­ngitsup qarnanit aniasut. 14 Taakku tassaapput oqaatsit anersaapilunnit isumassarsiarititaasut tupinnar­tuliortartut. Taakkua nunarsuarmi tamarmi kunngit ornippaat Guutip Killeqan­ngitsumik Pissaanillip ullussarsuani sorsunnissamut katersorumallugit.

15 “Tillinniatut tikiuppunga. Pilluarpoq eqqumasoq qallersaateqartorlu. Atisaqan­ngikkunimi kanngugisai allanit takuneqassapput.”

16 Sumiiffimmullu hebræerisut Harmagedonnimik* taaneqar­tartumut katersorpaat.

17 Inngilit arfineq-aappaata puuguttani itisooq silaannarmut kuivaa. Taamaalisorlu nipi nipitooq guutisiorfimmit, issiavis­saarsuarmit, oqarpoq: “Naammassivoq!” 18 Innaallannerit takussaalerlutillu nipit tutsiul­lutillu kallilerpoq. Nunarsuullu inoqaleq­qaarneraniit aatsaat taama annertutigisumik sakkortutigisumillu nuna sajuppoq. 19 Illoqarfissuaq pingasun­ngorluni avippoq, nunarsuarmilu illoqarfiit suujunnaarput. Guutillu arnaq Babylon­nersuaq eqqaamagamiuk kamangaarnermi viinnisorfianik tunivaa. 20 Aamma qeqertat tamarmik qimaallutillu qaqqat takussaajun­naarput. 21 Taava nataqqor­narujussuit tamarmik immikkut talentip* ataatsip missaanik oqimaas­susillit qilammiit inunnut nakkaapput. Inuillu nataqqornanit angilluin­nartunit erloqisin­neqaramik Guuti mitaatigilerpaat.

17 Inngilit arfineq-marluk arfineq-marlunnik itisuunik puugutaatillit ilaata ornippaanga oqarfigalungalu: “Qaagit, arnap atortit­tartorsuup imerpassuarni issiasup eqqartuun­neqarnera takutissavara. 2 Nunarsuarmi kunngit arnaq taanna atoqatigiinnikkut eqqunngitsulioqatigaat.* Nunarsuarmilu najugaqartut arnap viinniutaanik, atoqatigiinnikkut eqqunngitsulior­tarneranut* assersuutaasumik, aalakuulerput.”*

3 Anersaallu pissaaneratigut inoqajuitsumut pisippaanga. Takuara arnap uumasoq nujuartaq aappallarissoq aternik Guutimik mitalliutaasunik ulikkaartoq arfineq-marlunnik niaqulik qulinillu nassulik issiaffigigaa. 4 Arnaq tunguusamik aappallaris­sumillu atisaqarpoq. Kuultimik, ujaqqanik erlinnartunik sapanngaris­sunillu pinnersaateqarpoq. Imerfimmik kuultiusumik maajunnartunik atoqatigiin­nikkullu eqqunngitsuliornermi* mingunnartuinik ulikkaartumik tigumiarpoq. 5 Qaavani ateq isertugaq allassimavoq: “Babylon­nersuaq, atortittartut nunarsuarmilu maajunnartut anaanaat.” 6 Takuaralu arnaq illernartut aavinik Jiisusillu ilisiman­nittuisa aavinik aalakoortoq.*

Takugakku assut tupigutsappunga. 7 Taava inngilip oqarfigaanga: “Sooq tupigutsappit? Arnaq uumasorlu nujuartaq issiaffigisaa arfineq-marlunnik niaqulik qulinillu nassulik pillugit isertukkamik nassuiaatis­savakkit: 8 Uumasoq nujuartaq takusat maaniis­simagaluarluni maanna maaniin­ngitsoq qanittukkulli itinersuarmit qangattartussaq suujunnaarsitaassaaq. Nunarsuarmi najugaqartut – nunarsuarmi meeqqat ilumiugineqar­talerneranniit* inuunerup mappersagaani allanneqarsiman­ngitsunik atillit – uumasoq nujuartaq maaniis­simagaluarluni maanna maaniin­ngitsoq najuuttussarli takulerunikku tupigusussapput.

9 Tamatumani ilisimas­suseqarnissaq* pisariaqarpoq: Niaqqut arfineq-marluk qaqqanut arfineq-marlunnut, arnap issiaffigisaanut, assersuutaapput. 10 Taakku kunnginut arfineq-marlunnut assersuutaapput: Tallimat pissaaneqarun­naareerput, ataaseq maaniippoq, alla suli tikiutinngilaq. Tikiukkunili sivikitsuinnarmik pissaaneqassaaq. 11 Uumasorlu nujuartaq maaniis­simagaluarluni peerussimasoq kunngit arfineq-pingajoraat. Kunnginit arfineq-marlunnit pisuuvoq suujunnaarsitaasussaq.

12 Nassuit qulit takusatit kunnginut qulinut suli naalakkersuilersiman­ngitsunut assersuutaapput, oqartus­saassuseqalerunilli uumasoq nujuartaq ilagalugu kunngisut sivikitsumik naalakkersuissapput. 13 Taakku assigiimmik eqqarsaateqaramik pissaanertik oqartus­saassusertillu uumasumut nujuartamut tunniuppaat. 14 Savaaraq saassutissavaat, Savaararli tassaagami naalakkat Naalagaat kunngillu Kunngiat taakkununnga ajugaassaaq. Aamma qaaqqusat, toqqakkat aalajaatsullu ilagisai ajugaassapput.”

15 Inngilip oqarfigaanga: “Ermit atortittartup issiaffigisai takusatit inuiannut, inuppas­suarnut, inuiaqatigiinnut qanorluunniillu oqaasilinnut assersuutaapput. 16 Nassuit qulit uumasullu nujuartap takusavit arnaq atortittartoq uumissorlugulu pigisaanik tamanik, allaat atisaanik, arsaassavaat. Neqaa nungullugu nerissallugulu innermik nungutil­luinnassavaat. 17 Guutimmi eqqarsaatimisut ilioqqullutik sunnissammatik assigiimmik eqqarsaateqalissapput – tassa Guutip oqaasiata naammas­sineqar­nissaata tungaanut oqartus­saassusertik uumasumut nujuartamut tunniuk­kallassavaat. 18 Arnarlu takusat illoqarfis­suarmut nunarsuarmi kunnginik naalakkersuisumut assersuutaavoq.”

18 Tamatuma kingorna inngili alla qilammit oqartus­saassuseqangaarluni aqqartoq takuara, nunarsuarlu inngilip alutornas­susianit qaammarsar­neqarpoq. 2 Nipituumillu suaarpoq: “Arnaq ajorsar­tinneqarpoq! Babylon­nersuaq ajorsar­tinneqarpoq! Tassaalerpoq anersaapiluit najugaqarfiat, anersaat* minguttuut tamarmik timmissallu minguttuut uumigisaasullu tamarmik isertorsimaffiat! 3 Arnap viinniutaa, atoqatigiinnikkut eqqunngitsulior­nissamut* pileris­suseqalersitsisoq,* inuiaqatigiit tamarmik aalakoorutigaat.* Nunarsuarmi kunngit arnaq atoqatigiinnikkut eqqunngitsulioqatigaat, piisaapilun­nersualu nunarsuarmi niuertut* pisuunnguutigaat.”

4 Nipilu alla qilammit oqartoq tusaavara: “Innuttakka, arnamit anigitsi. Taamaaliun­ngikkussi ajortulior­nerinut pisooqataas­sallusilu erloqeqatigis­savarsi. 5 Ajortuliaami qaleriiaarlutik qilammut apissis­simapput, eqqunngitsuliornerilu* Guutip eqqaamavai. 6 Allanut iliortarsimanermisut pineqarli, aap, iliuuserisimasai marloriaammik akisigit. Imerfik akuugaa marloriaammik immeriarlugu immissiuk. 7 Piisaapilulluni imminut ataqqinarsisit­tarsimanerata annertoqataanik naalliutsillugulu aliasutsis­savarsi. Imami eqqarsar­tuarpoq: ‘Dronningisut issiavunga, aamma uillarnerun­ngilanga aliasun­ngisaan­nassallungalu.’ 8 Taamaattumik ullormi ataatsimi toqumik, aliasunnermik kaannersuarmillu erloqinar­torsior­tinneqassaaq. Jehova Guuti, eqqartuussisaa, nukittummat arnaq innermik nungutin­neqarluin­nassaaq.

9 Kunngillu taassuminnga atoqatigiinnikkut eqqunngitsulioqateqartut* piisaapilun­neranilu peqataasut ikuallan­neqarluni pujua takulerunikku qiallutillu aliasullutik sakissatik tilluassavaat. 10 Taassumatut naalliutsin­neqarnissartik siooragigamikku ungasillugu nikorfassapput oqassal­lutillu: ‘Illit illoqarfissuaq, illoqarfik Babylonni nukittooq, tassanngaannaq taama eqqartuun­neqarnerit uggornaqaaq!’

11 Nunarsuarmi niuertut nioqqutis­saatitik pisiariumaneerummata arnaq qissatigalugulu aliasuutigaat. 12 Aap, kuultit, sølvit, ujaqqat erlinnartut, sapanngarissut, annoraassiat pitsaasut, annoraamerngit tunguusat, siilikit, annoraamerngit aappallarissut, qisuit tipigissut atorlugit sanaat suulluunniit, nagguaatsup tuugaavinik, qisunnik erlinnartunik, kanngussammik, saviminermik maarmorimillu sanaat tamarmik pisiarinis­saqanngillat. 13 Aamma kaniilit, Indiamiut akuutis­saataat, tipigissaatit ikumatitassat, uuliat tipigissut, tarngutit tipigissut, viinnit, oliivenip uuliai, qajuusat aseqqorissut, qajuusiassat, nersussuit, savat, hestit, qamutit, inussiaatit inuillu pisiarinis­saqanngillat. 14 Aap, inerittoq mamarunartoq perusutat annaavat. Mamartuliat alutornartullu peqqinngisaan­nassavatit.

15 Tamakkuninnga nioqquteqartartut arnaq pissutigalugu pisuunngortut taassumatut naalliutsin­neqarnissartik siooragigamikku ungasillugu nikorfassapput. Qiallutik aliasul­lutillu 16 oqassapput: ‘Illoqarfissuup taama pineqarnera uggornaqaaq! Annoraassiamik pitsaasumik, tunguusamik aappallaris­sumillu atisaqarpoq. Kuultinik, ujaqqanik erlinnartunik sapanngaris­sunillu pinnersaateqarpoq. 17 Imaalial­laannarli pisuussuterpas­suarminik arsaarneqarpoq!’

Aamma umiarsuarni naalakkat, umiartortut, imarsiortut imaanilu pisarineqartunik nioqquteqartartut tamarmik ungasillutik nikorfapput, 18 arnallu ikuallannerata pujua takuleramikku suaarput: ‘Illoqarfik suna illoqarfis­suartut ippa?’ 19 Qiallutik aliasul­lutillu niaqqutik pujoralatserpaat imalu oqarlutik: ‘Illoqarfissuup tassanngaannaq suujunnaarsitaanera uggornaqaaq! Pigissaarnerami pissutigalugu umiarsuaatillit tamarmik pisuunngorput.’

20 Illit qilak, ilissilu illernartut, apustilit pruffiitillu, Guutip ilissi pillusi arnaq eqqartuummagu nuannaaritsi!”

21 Inngilillu nukittuup ujarak aserorteriviup ujarattarsuatut angitigisoq kiveriarlugu imaanut naloriuppaa oqarlunilu: “Illoqarfissuaq Babylonni periarfeerutitillugu taama sukkatigisumik naloriun­neqassaaq. 22 Kukkilat­tariarsuutigalutik erinarsortut, nipilersortartut aamma fløjtimik trompetimillu qarlortartartut nipaat ilinni tusaaneqaq­qinngisaan­nassapput. Aamma ilinni assammik sulisar­tuerulluin­nassallunilu aserorteriviup ujarattaa tusaaneqaq­qinngisaan­nassaaq. 23 Ilinni qulliup qaamarnga qaamaqqin­ngisaan­nassallunilu katittorsiortut tusaaneqaq­qinngisaan­nassapput. Niuertutimmi nunarsuarmi nuimasuusimagaluarput, anersaarsior­tarnitillu pissutigalugit inuiaqatigiit tamarmik tammartin­neqarsimapput. 24 Aap, pruffiitit, illernartut nunarsuarmilu toqunneqartut tamarmik aavisa kuineqar­nerannut pisuuvoq.”

19 Tamatuma kingorna nipi qilammiorparpassuit nipituumik nipilior­nerattut ittoq tusaavara. Oqarput: “Jah* unnersiutigineqarli! Guuti aniguisitsiserput alutornarlunilu pissaaneqarpoq 2 ilumoortumik naapertuil­luartumillu eqqartuus­sisarami. Arnaq atortit­tartorsuaq atoqatigiinnikkut eqqunngitsulior­nermigut* nunarsuarmik mingutsitsimmat pillarpaa, aamma inussiaatimi aavat arnap assaaniittoq* akiniuppaa.” 3 Ingerlaannarlu oqaqqipput: “Jah* unnersiutigineqarli! Arnamillu pujoq qaqugorsuarmut kipisuitsumillu qangattassaaq.”

4 Taava utoqqaanertat 24-t pinngor­titallu uumassuseqartut sisamat pallorput Guutilu issiavis­saarsuarmi issiasoq ima oqarlutik guutisiorfigalugu: “Amen! Jah* unnersiutigineqarli!”

5 Aamma nipi issiavis­saarsuarmit tutsiuppoq oqarlunilu: “Guutimut inussiaataasusi tamassi, mianerinnittut mikisut angisuullu, Guuterput unnersiutigisiuk.”

6 Aamma nipi qilammiorparpas­suartut, kuussuartut kallerpalun­nersuartullu nipeqartoq tusaavara. Oqarput: “Jehova Guuterput, Killeqan­ngitsumik Pissaaneqartoq, kunngisut naalakkersuilerami Jah* unnersiutigineqarli! 7 Savaaraq katittus­sanngormat nuliassaalu piareersarmat nuannaarlutalu qiimmat­tarlutalu Guuti ataqqinarsisitsigu. 8 Aap, nuliassaa annoraassiamik qaallorissumik, minguitsumik pitsaasumillu atisalersor­nissamut akuerineqarpoq – annoraassiaq pitsaasoq illernartut eqqortulior­tarnerannut assersuutaavoq.”

9 Inngilillu oqarfigaanga: “Allagit: Pilluarput Savaaqqap katinnerani unnukkorsiornermut qaaqqusaasut.” Nangilluni oqarfigaanga: “Oqaatsit taakku ilumoortut Guutimeersuupput.” 10 Taamaalisorlu guutisiorfiginiarlugu isigaasa saavanni pallorpunga. Oqarfigaangali: “Taamaalioqinak! Ilittulli qatanngutittullu inussiaan­naavunga Jiisusi pillugu ilisiman­nittutut nassuiaanermik suliassin­neqarsimasoq. Guuti guutisiorfigiuk! Jiisusimi pillugu ilisiman­nittutut nassuiaanissaq siulittuutit tamarmik siunertaraat.”

11 Qilak ammartoq takugakku hesti qaqortoq nuivoq. Tassanilu issiasoq Aalajaatsumik Ilumoor­tumillu taaneqartarpoq, aamma naapertuil­luartumik eqqartuus­sisarlunilu sorsuttarpoq. 12 Isai ikualapput amerlasuunillu niaqorutaasaqarluni.* Allassimasoqarporlu atermik nammineq kisimi ilisimasaanik. 13 Aammik serpartar­neqarsimasumik qallersaateqarlunilu Guutip Oqaasianik taaneqartarpoq. 14 Aamma qilammi sakkutoorpassuit qaqortunik hesterlutik malippaat, taakkulu annoraassianik qaqortunik, minguitsunik pitsaasunillu atisaqarput. 15 Qarnanit panaq takisooq ipittorlu, inuiaqatigiinnik tamanik panarsinissamut atugassaa, anillas­simavoq. Aamma ajaappissamik saviminiusumik pillaassaaq. Tamatumalu saniatigut Guutip Killeqan­ngitsumik Pissaanillip kamangaarnerata viinnissanik tunguiaaffiani tullaarin­nissaaq. 16 Qallersaataani, aap, siffiaani, ateq allassimavoq: Kunngit Kunngiat naalakkallu Naalagaat.

17 Aamma inngili seqinermiittoq takuara, timmissanullu qutsissumi* timmisunut tamanut nipituumik suaarpoq: “Qaagitsi, Guutip unnukkorsior­titsinis­sarsuanut katersuugitsi 18 nerinias­sagassigit kunngit, sakkutuut naalagaanersaat, angutit nukittuut, hestit taakkunanilu issiasut neqaat aamma kikkut tamarmik – inussiaataan­ngitsut inussiaatillu, mikisut angisuullu – neqaat.”

19 Takuaralu hestimi issiasoq sakkutoorpassuilu sorsukkumallugit uumasoq nujuartaq, nunarsuarmi kunngit sakkutoorpassuilu katersuuttut. 20 Uumasorli nujuartaq pruffiitilu ilumuun­ngitsoq, uumasup nujuartap saavani tupinnar­tuliortar­nermigut uumasup nujuartap nalunaaqutaanik nalunaaqutser­neqarsimasunik assinganillu pallorfigin­nittunik tammartitsisoq, tigusaapput. Taakku marluk tatsimut ikuallas­saammik ikumasumut uumatillugit naloriun­neqarput. 21 Sinneri panamit takisuumit hestersup qarnanit anillas­simasumit toqunneqarput. Timmissallu tamarmik neqaannik qaarsil­larlutik neripput.

20 Takuaralu inngili itinersuarmut matuersaammik kalunnersuarnillu tigumiarluni qilammit aqqartoq. 2 Pulateriaarsuusarujussuaq, itsaq pulateriaarsuk tassaasoq Diaavulu Saatanilu, tigusareriarlugu ukiuni 1.000-ni atasussamik qilersorpaa. 3 Ukiunilu 1.000-ni inuiaqatigiinnik tamanik tammartitsis­saaqqullugu itinersuarmut naloriuteriarlugu itinersuaq matuaa parnaarlugulu. Ukiut 1.000-t kingorna sivikitsun­nguamik iperagaassaaq.

4 Aamma issiavis­saarsuit eqqartuus­sinissamullu piginnaatitaasut taakkunani issiasut takuakka. Aap, Jiisusi pillugu ilisiman­nittutut nassuiaanertik Guutilu pillugu oqalunnertik pissutigalugit toqutaasimasut,* uumasumik nujuartamik assinganillu pallorfigin­nissiman­ngitsut aamma qaamikkut assammikkullu nalunaaqutser­neqarsiman­ngitsut, tarningi* takuakka. Uummarput Kristusilu ilagalugu ukiuni 1.000-ni kunngisut naalakkersuillutik. 5 Tamanna tassaavoq toqusunik makititsineq siulleq. (Toqusimasut sinneri aatsaat ukiut 1.000-t naammata uummarput). 6 Pilluarput illernarlutillu toqusunik makititsinermi siullermi makititaasut. Taakku toqup aappaata pissaaneqarfiginngilai. Palasitulli Guutimut Kristusimullu kiffartussapput ukiunilu 1.000-ni Kristusi kunngisut naalakkersueqatigis­sallugu.

7 Ukiut 1.000-t naaniariarpata Saatani parnaarus­saaffimminit iperagaassaaq. 8 Nunarsuup teqeqquini sisamani inuiaqatigiit, Gorgi Maagokkilu, tammartik­kiartus­sallugillu sorsunnissamut katersoriar­tussavai. Taakku sissap sioraasut amerlatigipput. 9 Nunarsuarmut tamarmut siaruaateriarlutik illernartut tammaarfiat illoqarfillu asasaq unguaat. Innerli qilammit nakkarpoq nungutil­lugillu. 10 Diaavululu tammartitsisaat tatsimut innerusumut ikuallas­saataasumullu, uumasup nujuartap pruffiitillu ilumuun­ngitsup naloriun­neqarfiannut, naloriun­neqarpoq. Ullukkut unnuakkullu qaqugorsuarmut kipisuitsumillu naalliutsin­neqassapput.*

11 Issiavis­saarsuarujussuaq qaqortoq Guutilu tassani issiasoq takuakka. Nunarsuaq qilallu taassumannga qimaapput periarfeerul­lutillu. 12 Toqusimasut, angisuut mikisullu, issiavis­saarsuup saavani nikorfasut takuakka, allakkallu imusat siaarneqarput. Allakkalli imusat allat, inuunerup mappersagaa, siaarneqarput. Toqusimasullu allakkani imusani allassimasut tunngavigalugit, iliuutsitik naapertorlugit, eqqartuun­neqarput. 13 Immallu toqusimasut imminiittut utertippai, aamma toqup Ilerrullu* toqusimasut imminniittut utertippaat, tamarmillu immikkut iliuutsitik naapertorlugit eqqartuun­neqarput. 14 Taava toqu Iliverlu* tatsimut innerusumut naloriun­neqarput. Taseq innerusoq toqup aappaanut assersuutaavoq. 15 Aamma inuunerup mappersagaani allassiman­ngitsut tatsimut innerusumut naloriun­neqarput.

21 Aamma qilak nutaaq nunarsuarlu nutaaq takuakka. Qilak siulleq nunarsuarlu siulleq peerupput, aamma imaq peeruppoq. 2 Aamma takuara illoqarfik illernartoq, Jerusalemmi nutaaq, Guutimit qilammit aqqartoq nuliassatullu uissani pillugu pinnersar­neqarsimalluni piareersimasoq. 3 Taamaalisorlu nipi nipitooq issiavis­saarsuarmit oqartoq tusaavara: “Takuuk! Guutip toqqa inunniippoq, najugaqatigis­sallugillu innuttarissavai. Guutillu najussavai. 4 Qulliillu tamaasa isaannit allartissavai. Aamma toqu, aliasunneq, nillianeq anniarnerlu atuukkun­naassapput. Pissutsit ajortut peerupput.”

5 Guuti issiavis­saarsuarmi issiasoq oqarpoq: “Takuat! Suut tamaasa nutaanngor­tippakka.” Nangipporlu: “Oqaatsit taakku tutsuiginarlutillu ilumoormata allakkit.” 6 Oqarfigaangalu: “Oqaatsit eqquupput! Uanga tassaavunga Alfa aamma Omega,* aallaqqaataal­lungalu naggataavunga. Imerusuttoq kinaluunniit puilasumit inuussutaasumit akeqanngitsumik* immisissavara. 7 Ajugaasoq kinaluunniit tamakkuninnga kingornus­sissaaq. Guutigis­savaanga qitornaris­savaralu. 8 Kisianni qunutuut, uppersuseqan­ngitsut, minguttuus­sutsiminni maajunnartut, inunnik toqutsisut, atoqatigiinnikkut eqqunngitsuliortartut,* anersaarsiortartut, guutilianik pallorfiginnittut sallutuullu tamarmik tatsimut innermik ikuallas­saammillu ikumasumut naloriun­neqassapput. Tamanna toqup aappaanut assersuutaavoq.”

9 Inngilit arfineq-marluk – puuguttanik arfineq-marlunnik itisuunik erloqinar­torsior­titsinernik arfineq-marlunnik kingullernik ulikkaartunik tigumiartut – ilaata ornippaanga oqarfigalungalu: “Qaagit, Savaaqqap arnaq katitaa, nulia, ilinnut takutissavara.” 10 Taava anersaap pissaaneratigut qaqqarsuarmut portusuumut piseriarlunga illoqarfik illernartoq Jerusalemmi qilammit Guutimit aqqartoq takutippaa. 11 Illoqarfik Guutisut alutornas­suseqarlunilu ujaqqatut erlinnar­nerpaatut, ujaqqatut jaspisitut akisuttutut, qillaarippoq. 12 Portusuumik qarmarsuaqarpoq, aqqaneq-marlunnik isaaffeqarpoq, inngilit aqqaneq-marluk isaaffiit killinginiipput Israalillu naggueqatigiivisa aqqaneq-marluusut atii isaaffiini allassimallutik. 13 Kangiatungaa pingasunik isaaffeqarpoq, avannaatungaa pingasunik isaaffeqarpoq, kujataatungaa pingasunik isaaffeqarpoq kitaatungaalu pingasunik isaaffeqarluni. 14 Illoqarfiup qarmarsua ujaqqanik aqqaneq-marlunnik tunngaveqarpoq, taakkunanilu atit aqqaneq-marluk, Savaaqqap apustiliisa aqqaneq-marluk atii, allassimapput.

15 Inngili uannut oqaluttoq illoqarfik, isaaffii qarmarsualu uuttortarumallugit uuttuummik kuultiusumik tigumiarpoq. 16 Illoqarfik kipparissutut qarmarneqarsimavoq, aamma takissusia silissusialu angeqqatigiipput. Uuttuummillu uuttorpaa: Staadiat 12.000-t.* Takissusia, silissusia portussusialu angeqqatigiipput. 17 Inuit uuttuutaat, aamma inngilit uuttuutitut atortagaat, malillugu qarmarsuata portussusia uuttortarmagu 144 aalenniuvoq.* 18 Qarmarsua jaspisimik sanaajuvoq, illoqarfillu kuultiuvoq pitsaasoq igalaaminertut minguitsutut ittoq. 19 Illoqarfiup qarmarsuata tunngavii ujaqqanik erlinnartunik tamalaanik pinnersagaapput: Tunngavik siulleq jaspisiuvoq, aappaat safiriuvoq, pingajuat kalcedoniuvoq, sisamaat smaragdiuvoq, 20 tallimaat sardonyxiuvoq, arferngat karneoliuvoq, arfineq-aappaat krysolitiuvoq, arfineq-pingajuat beryliuvoq, qulingiluaat topasiuvoq, qulingat krysoprasiuvoq, aqqarnat hyacintiuvoq aqqaneq-aappaallu ametystiulluni. 21 Aamma isaaffiit aqqaneq-marluk sapanngaris­suupput aqqaneq-marluk. Isaaffiit tamarmik immikkut sapanngarissumik ataatsimik sanaajupput. Illoqarfiullu aqqusinersua kuultimik pitsaasumik, igalaaminertut akimut ersittumik, sanaajuvoq.

22 Jehova Guuti Killeqan­ngitsumik Pissaanilik aamma Savaaraq tassaammata illoqarfiup guutisiorfia illoqarfimmi guutisiorfik takunngilara. 23 Illoqarfik Guutip alutornas­susianit qaammarsar­neqarami Savaaqqamillu qulleqarami seqinermit qaammammillu qinngor­neqarnis­saminik pisariaqar­titsinngilaq. 24 Inuiaqatigiit tamarmik illoqarfiup qaamanera iluaqutigalugu inuussapput, nunarsuullu kunngiisa alutornas­susertik tassunga pisissavaat. 25 Isaaffii ulluunerani matunngisaan­nassapput, tassanilu unnuaqan­ngisaan­nassaaq. 26 Inuiaqatigiit alutornassusiat ataqqinaataallu tassunga pisinneqassapput. 27 Minguttuulli suulluunniit aamma maajunnar­tuliortut peqquserluttullu kikkulluunniit tassunga isinngisaan­nassapput. Inuunerup mappersagaani, Savaaqqap pigisaani, allanneqarsimasut kisimik isissapput.

22 Taava inngilip kuussuaq, aligortut qillaaritsigisoq, Guutip Savaaqqallu issiavis­saarsuannit imermik inuussutaasumik kuuttoq takutippaa. 2 Kuussuaq illoqarfiup aqqusinersuata qeqqanut kuuppoq, sinaaniippullu orpiit inuussutaasut ukiumut aqqaneq-marloriarlutik, qaammammut ataasiarlutik, inerititaqartartut. Orpiillu pilutaat inuiaqatigiinnut tamanut peqqissinar­tuupput.

3 Perloqqus­suteqarun­naassaaq. Guutilli Savaaqqallu issiavis­saarsuat illoqarfim­miissaaq, Guutilu inussiaatiminit kiffartuun­neqassaaq. 4 Kiinaa takussavaat, atialu qaavini allassimassaaq. 5 Unnuaqarun­naassaaq, Jehovallu Guutip qinngorsimas­sammatik qulliit seqerngul­luunniit qaamarngannik pisariaqar­titsissan­ngillat. Qaqugorsuarmut kipisuitsumillu kunngisut naalakkersuissapput.

6 Inngilip oqarfigaanga: “Oqaatsit taakku tutsuiginarlutillu ilumoorput. Aap, Jehovap, Guutip pruffiitinik isumassarsisitsisup, inussiaatini qanittukkut pisussanik takutin­niarlugit inngilini aallartippaa. 7 Tikiutipal­lassaanga. Pilluarput allakkani imusani ukunani siulittuutit oqaaser­taannik maleruaasut.”

8 Uanga, Johannesi, tamakku tusarlugillu takuakka. Tamakku tusarlugillu takugakkit inngili, tamakkuninnga uannut takutitsisoq, guutisiorfiginiarlugu isigaasa saavanni pallorpunga. 9 Oqarfigaangali: “Taamaalioqinak! Ilittulli qatanngutittullu pruffiitisut allakkallu imusat ukua oqaaser­taannik maleruaasutut inussiaan­naavunga. Guuti guutisiorfigiuk.”

10 Aamma oqarfigaanga: “Piffissarititaasoq nalliutingajalermat allakkani imusani ukunani siulittuutit oqaasertaat isertuutis­sanngilatit.* 11 Eqqunngitsuliortoq eqqunngitsuliortuarli, minguttoorlu minguttuujuarli. Eqqortuliortorli eqqortuliortuarli, illernartorlu illernar­tuujuarli.

12 ‘Tikiutipal­lassaanga, akissarsiassarlu tunnius­sassara nassarpara. Kinaluunniit iliuusii naapertorlugit akilissavara. 13 Uanga tassaavunga Alfa aamma Omega,* siulliul­lungalu kingulliuvunga, aallaqqaataal­lungalu naggataavunga. 14 Pilluarput atisaminnik takisuunik errorsisimasut. Taakku orpinnit inuussutaasunit nerisin­naatitaas­sallutillu isaaffikkut illoqarfimmut isersin­naatitaassapput. 15 Qimmit,* anersaarsiortartut, atoqatigiinnikkut eqqunngitsuliortartut,* inunnik toqutsisut, guutilianik pallorfiginnittut, salluliornermik nuannarisaqartut* sallutuullu tamarmik illoqarfiup silataaniipput.’

16 ‘Uanga, Jiisusi, inngiliga ilagiit iluaqutis­saannik ilisiman­nittutut nassuiaasussatut ilissinnut aallartippara. Uanga tassaavunga Daavip sorlaa kinguaavalu qaasiullu qaammarissoq.’ ”

17 Anersaaq nuliassarlu oqartuarput: “Qaagitsi!” Tusartullu tamarmik oqarlik: “Qaagitsi!” Imerusuttullu tamarmik aggerlik. Piumasut tamarmik imermik inuussutaasumik akeqanngitsumik imerlik.

18 “Allakkani imusani ukunani siulittuutit oqaaser­taannik tusartut tamaasa uppernarsaavigaakka: Taakkununnga ilassuteqartoq Guutip erloqinartunik allakkani imusani ukunani allaatigineqartunik eqqussavaa. 19 Allakkanilu imusani ukunani siulittuutit oqaaser­taannik ilanngaasoq Guutip orpinnit inuussutaasunit illoqarfimmillu illernartumit pissaanik, allakkani imusani ukunani allaatigineqartunik, arsaassavaa.

20 Tamakku pillugit uppernarsaasoq oqarpoq: ‘Aap, tikiutipal­lassaanga.’ ”

“Amen! Naalagaq Jiisusi, tikiugit.”

21 Qanortoq Naalakkap Jiisusip ajunngisaangaarnerata illernartut najoriligit.