Tessaluunikamiunut allakkat aappaat
3 Kingullertut, qatanngutit: Qinnutigiuarsigit Jehovap oqaasiata uagut aqqutigaluta sukkasuumik siammariartortuarnissaa ilissilu akorngassinni pisimaneratut ataqqinarsisinneqarnissaa 2 inunnillu ajortunit ajoqusiiniartunit aniguisinneqarnissarput, inuimmi ilaannaat uppertuummata. 3 Naalagarli aalajaappoq, aamma nakussatsillusilu Diaavulumut* illersussavaasi. 4 Naalakkamillu malinnittuugatta ilitsersuutitsinnik maleruaasusi maleruaajuassasusilu qularinngilarput. 5 Qanortoq Naalakkap Guutimik asanneqqullusi Kristusilu pillugu pinertusaaqqullusi uummatisi siulersortuariligit.
6 Maanna, qatanngutit, Naalakkatta Jiisusip Kristusip aqqani peqquassi qatanngummit torinngitsumik ilissinnullu* ilitsersuutitsinnut naapertuutinngitsumik inuusumit tunuaqqullusi. 7 Namminermi nalunngilarsi qanoq ilaassanerluta, najorallarassimi torinngitsumik inuunatalu 8 kialuunniit nerisassaataanik akeqanngitsumik* nerineq ajorpugut. Arlassinnulluunniit aningaasartuutaajumanata unnuakkut ullukkullu tamaviaarluta sulisarpugut. 9 Tunineqarnissamut pisinnaatitaagaluarluta ilissinnut maligassaalluarusuppugut. 10 Najorallarassimi ima peqqusarpassi: “Sulerusunngitsoq nerissanngilaq.” 11 Tusarparpummi ilasi torinngitsumik inuusut, sulinngilluinnarlutik susassarinngisaminnut akuliuttartut. 12 Inuit taamaattut eqqissillutik inuunissamik namminerlu aningaasarsiornissamik Naalakkap Jiisusip Kristusip aqqani peqqullugillu kajumissaarpagut.
13 Ilissili, qatanngutit, ajunngitsuliorneq qatsuteqinasiuk. 14 Allakkanili ukunani oqaatsitsinnik maleruaanngitsoq kanngusulerniassammat mianersorfigalugulu* ilagisarunnaassavarsi. 15 Akeqqatulli isigissanngilarsi, kisianni qatanngutitut siunnersortuassavarsi.
16 Qanortoq eqqissinerup Naalagaata sutigut tamatigut eqqissisittuarilisi. Qanortoq Naalakkap tamassi najorilisi.
17 Taama uanga Paulusi nammineq assannik allallunga inuulluaqqusivunga, tassa allakkanni tamani ilisarnaatitut allariaasera.
18 Qanortoq Naalakkatta Jiisusip Kristusip ajunngisaangaarnerata tamassi najorilisi.