Efesossimiunut
1 Paulusimit Guutip piumasaagut Kristusimit Jiisusimit apustilinngortinneqartumit Efesossimi illernartunut Kristusimik Jiisusimik aalajaallutik ataasioqateqartunut:
2 Ajunngisaangaarnermik eqqissinermillu Guutimit Ataatatsinnit Naalakkamillu Jiisusimit Kristusimit pisumik kissaappassi.
3 Guuti, Naalakkatta Jiisusip Kristusip Ataataa, Kristusimik ataasioqateqarnerput pillugu qilammi anersaakkut sutigut tamatigut uagutsinnut ajunngisaartoq unnersiutigineqarli. 4 Saamini asannittuliorniassagatta, illernartuuniassagatta minguitsuuniassagattalu nunarsuarmi meeqqat suli ilumiugineqalinngitsut* Kristusimik ataasioqateqartussatut toqqarpaatigut. 5 Iluarisaminut piumasaminullu naapertuuttumik Jiisusi Kristusi aqqutigalugu qitornavissiartaariniarluta siumut aalajangereerpaa. 6 Taamaaliorpoq Ernini asasani aqqutigalugu asannilluni ajunngisaangaarnini pillugu unnersiutigineqarniassagami. 7 Ernermi aava akiliutigalugu utertippaatigut. Aap, tukkorluni ajunngisaangaarnerminut naapertuuttumik unioqqutitsinitsinnik isumakkeerfigaatigut.
8 Ajunngisaangaarluni suut tamaasa pillugit ilisimassutsimik paasisimasaqassutsimillu* sinnilissuarmik tunivaatigut 9 piumasani pillugu isertugaatiminik ilisimannilersitsinermigut. 10 Tamanna piffissarititaasut naappata qilammi nunarsuarmilu suut tamaasa Kristusimi katersorniarlugit aqutseriaatsimik pilersitsiniarluni iluarisamisut aalajangerneranut naapertuuppoq. 11 Aap, Kristusimi, ataasioqatigisatsinni kingornusseqatigisassatsinnilu, suut tamarmik katersorneqassapput. Guutimmi piumasaminut naapertuuttumik naammassisaqartuaannartup siumut toqqareersimavaatigut 12 siulliulluta Kristusimut neriuttugut unnersiutiginiassagatsinni ataqqinarsisinniassagatsinnilu. 13 Oqaatsit ilumoortut, tassa annaanneqarnissassinnik nutaarsiassat nuannersut, tusareerlugit aamma ilissi Kristusi neriuffigaarsi. Uppertunngoreerassi Guutip Kristusi ikiorsiullugu anersaamik illernartumik neriorsuutigineqartumik naqissuserpaasi. 14 Anersaaq illernartoq kingornussassatsinnut qularnaveeqqutaavoq.* Guutip innuttani* ataqqinaatissaminik unnersiutigineqaatissaminillu naqissuserpai.
15 Taamaattumik tusarakku Naalagaq Jiisusi upperfigalugulu illernartut tamaasa asannittuliorfigisarisi 16 Guuti qutsavigiuarpara. Qinnutinni eqqaajuartarpassi 17 Naalakkatta Jiisusip Kristusip Guutiata, Ataatap ataqqinartup, anersaamik ilisimassuseqalersitsisumik tuniniassammasi namminerlu pilluni eqqoqqissaartumik paasisimasaqarnermik saqqummersitsiviginiassammasi. 18 Uummatisi qaammarsarpai paasiniassagassiuk neriuummut qanoq ittumut qaaqquneqarsimanersi, illernartut pisuussuterpassuarnik kingornussissasut 19 pissaanersuanilu uagutsinnut uppertunut atortaraa. Pissaanersualu tamanna erserpoq 20 Kristusi toqusunit makitikkamiuk qilammilu talerpimmi tungaani ingitsikkamiuk. 21 Naalakkersuisunit, oqartussaasunit, pissaanilinnit, naalakkanit aternillu eqqaaneqartunit tamanit – nalitsinni atuuttunit siunissamilu atuuttussanit – qutsinnerujussuarmut inissippaa. 22 Aamma Guutip suut tamaasa isigaasa ataannut inissippai ilagiinnullu tunngatillugu tamanut niaqunngortillugu. 23 Kristusip ilagiit timerai, ilagiillu pissusiinik ulikkaarneqarput. Taassumalu suni tamani suut tamaasa naammassisarpai.