Миссионерлер “жердің қиыр шетіне дейін” уағыздауда

Иса шәкірттеріне: “Жердің қиыр шетіне дейін мен жайлы куәлік етесіңдер”,— деген (Елшілердің істері 1:8). Бүгінде Ехоба куәгерлері осы тапсырманы зор ықыласпен атқарып жатыр. Алайда әлі де түбегейлі куәлік етілмеген үлкен елдер бар. Бұған қоса кей жерлерде Куәгерлердің саны аз (Матай 9:37, 38). Осы орайда мүмкіндігінше көп адамға ізгі хабарды жеткізу үшін не істелініп жатыр?

Исаның тапсырмасына сай әрекет ету үшін, Ехоба куәгерлерінің Басқарушы кеңесінің Қызмет комитеті қажеттілік бар жерлерге миссионерлер тағайындайды. Қазіргі уақытта дүниежүзі бойынша 3 090 миссионер барa. Бұл миссионерлердің көбісі “Патшалықты жариялаушыларға арналған мектеп” сияқты Киелі кітап мектептерінде білім алған. Олар үйлерін тастап, басқа елге көшуге дайын. Рухани толысқандарының, тәжірибелерінің, қажетті білім алғандарының арқасында миссионерлер ізгі хабардың таралуына үлкен үлес қосуда. Сондай-ақ олар жаңа шәкірттерге жақсы үлгі көрсетіп жүр.

Миссионерлерді қолдау

Әр филиалдағы Қызмет бөлімінің танаптағы қызметшілер бөлімшесі филиал комитетімен бірге қызметтесіп, миссионерлердің қамын жасайды. Мысалы, оларға тұратын қарапайым үй табуға, медициналық көмек алуға жәрдем береді және басқа да шығындарын өтеу үшін азын-аулақ қаржылай көмек береді. 2020 қызмет жылында Ехоба куәгерлері миссионерлердің қамын жасау үшін 27 миллион АҚШ долларына жуық қаражат жұмсады. Осындай көмектің арқасында миссионерлер еш алаңдамай, бар күштерін уағыз ісіне жұмсай алады, сондай-ақ тағайындалған қауымдарын нығайтады.

Миссионерлер уағыз ісіне қалай үлес қосып жатыр? Малави филиалының комитет мүшесі Фрэнк Мэдсен былай дейді: “Батыл да қабілетті миссионерлер қауымдағы бауырластарға уағыздау қиын аумақтарда, мысалы, күзетілетін үйлер мен шет тілді аумақтарда уағыздауға көп көмектесті. Сонымен қатар олардың жергілікті тіл мен мәдениетті үйрену үшін барын салып жүргендері басқаларға зор жігер береді және олар жастарға толық уақытты қызметті бастауға жақсы әсер етіп жатыр. Миссионерлер үшін Ехобаға үлкен рақмет айтамыз”.

Басқа бір елдегі филиал комитетінің мүшесі былай дейді: “Миссионерлер — Ехобаның халқының арасында бірлік бар екендігінің айқын дәлелі. Әртүрлі мәдениеттен шықсақ та, Киелі кітаптан алған біліміміздің арқасында арамызда бірлік орнағанын тіпті Куәгер емес адамдар да байқайды”.

Миссионерлер қауымдарындағы жариялаушыларға қалай әсер етеді? Тимор-Лестеде тұратын Пауло миссионерлерді қатты бағалайтынын айтып, былай дейді: “Біз жақта күн өте ыстық. Бірақ суық жерден келген миссионерлер ауа райының ыстығына қарамай талмай уағыздайды. Олар күнде таңертең уағызға шығады. Сондай-ақ олардың шаңқай түсте де, кешкісін де, уағыздаған адамдарына қайта баратындарын жиі байқаймын. Олар көп адамға, оның ішінде маған да, шындыққа келуге көмектесті. Олардың бар өмірлерін Ехобаға қызмет етуге арнағандары және қызметтерін бар ынта-жігермен атқарғандары бүкіл қауымды Ехобаға көбірек қызмет етуге талпындырады”.

Ал Малавидегі Кэтти есімді тұрақты ізашар ерлі-зайыпты миссионерлердің оның отбасына қалай көмектескені жайлы былай дейді: “Ерлі-зайыпты миссионер бауырластар біздің қауымға тағайындалғанда мен отбасымда жалғыз Куәгер едім. Олар маған қолдау көрсетіп, отбасыма да жақын болып кетті. Балаларым оларға қарап Ехобаға қызмет ету бақыт пен қанағат сыйлайтынын түсінді. Миссионерлердің көрсеткен үлгілерінің арқасында қазір үш қызым тұрақты ізашар болып қызмет етеді, ал күйеуім қауым кездесулеріне бара бастады”.

Миссионерлердің қажеттілігін өтеу үшін жұмсалатын қаржы қайдан алынады? Бұл қаражаттың бәрі дүниежүзілік іске жасалатын садақадан алынады. Бұл садақа көбінесе donate.jw.org сайты арқылы жасалады. Жомарттықпен берілген садақаларды біз өте жоғары бағалаймыз.