Дүрбелең заманда жаны жай тапқандар
Бұрын әскерде қызмет еткен Гэри есімді кісі былай дейді: “Киелі кітапты зерттемес бұрын, мен “Әділетсіздік пен қатыгездіктен неге көз ашпай кеттік?” деп уайымдайтын едім. Бірақ қазір Ехоба Құдай жер бетіне тыныштық орнататынын білгендіктен көңілім тыныш”.
Гэри сияқты Киелі кітапты оқып, дертіне дауа тапқандар аз емес. Солардың бірер мысалын қарастырайық.
КИЕЛІ КІТАПТА БЫЛАЙ ДЕЛІНГЕН: “Уа, Ехоба, сен ізгі әрі кешіруге дайынсың” (Зәбүр 86:5).
ТИГІЗЕР ПАЙДАСЫ: “Осы тармаққа қарап Ехобаның қаншалықты мейірімді екенін түсіндім. Құдай бұрын соғыста жасаған істерімнің бәрін кешіруге дайын” (Уилмар, Колумбия).
КИЕЛІ КІТАПТА БЫЛАЙ ДЕЛІНГЕН: “Мен жаңа аспан мен жаңа жер жаратып жатырмын, Бұрынғы жайттар еске алынбайды, Жүрекке қаяу да түсірмейді” (Ишая 65:17).
ТИГІЗЕР ПАЙДАСЫ: “Кезінде соғысқа қатысқандықтан, мен травмадан кейінгі стрестік бұзылыс пен депрессияға шалдықтым. Бірақ осы тармақ маған жұбаныш береді, өйткені Ехоба болашақта жанымды жегідей жеген ойлар мен қорқынышты түстерден толықтай арылтады. Санамдағы жағымсыз ойлардан мәңгіге азат боламын. Сол тамаша уақытты асыға күтудемін!” (Зафира, Құрама Штаттар).
КИЕЛІ КІТАПТА БЫЛАЙ ДЕЛІНГЕН: “Оның заманында әділ жан өркендейді, Аспанда ай тұрған кездің бәрінде шартарапта тыныштық болады” (Зәбүр 72:7).
ТИГІЗЕР ПАЙДАСЫ: “Мен осы сөздер жайлы жиі ойланамын. Өте жақында соғыс бізге еш қиянат әкелмейтін болады, жақындарымыздың амандығын ойлап уайымдамаймыз” (Олександра, Украина).
КИЕЛІ КІТАПТА БЫЛАЙ ДЕЛІНГЕН: “Сенің өлген адамдарың өмір сүреді... Ей, қара жердің қойнында жатқандар, Ояныңдар, қуана дауыстаңдар!” (Ишая 26:19).
ТИГІЗЕР ПАЙДАСЫ: “Тутси тайпасына қарсы жасалған геноцидте отбасымның барлығы дерлік өліп кетті. Бірақ осы тармақты оқығанда, оларды қайта көретініме үмітім пайда болды. Олардың жарқын даусын қайта еститін кезді асыға күтіп жүрмін!” (Мэри, Руанда).
КИЕЛІ КІТАПТА БЫЛАЙ ДЕЛІНГЕН: “Көп ұзамай зұлымдар жоқ болады... Ал момындар жерді мұра етеді, Керемет тыныштық орнағанын көріп, шаттыққа кенеледі” (Зәбүр 37:10, 11).
ТИГІЗЕР ПАЙДАСЫ: “Соғыс тоқтағанмен, әділетсіздік пен зұлым адамдар әлі де бар. Сол себепті де осы тармақтар маған қанат бітіреді. Ехоба бәрін де көріп тұр, ол жағдайымды жақсы түсінеді. Жуырда ол қайғы-қасіретті жоямын деп уәде етіп отыр. Оларды тіпті ойға да алмайтын боламыз” (Далер, Тәжікстан).
Осы журналда келтірілген адамдар миллиондаған Ехоба куәгерінің қатарына қосылып, Киелі кітаптан жұбаныш тапты. Олар адамдарды ұлтына, нәсіліне, руына бола не басқа да себептермен жек көрмеуді үйренді (Ефестіктерге 4:31, 32). Ехоба куәгерлері саяси бейтараптық сақтап, ешкімнің жағына шықпайды (Жохан 18:36).
Сондай-ақ Ехоба куәгерлері бір үйдің адамдарындай дүниежүзіндегі бауырластарына қолдау көрсетеді (Жохан 13:35). Басында айтылып кеткен Олександра сіңлісімен бірге соғыстың кесірінен елден қашуға мәжбүр болды. Ол былай дейді: “Шегарадан өте сала, бізді күтіп тұрған жергілікті Куәгерлерді көрдік. Олар бізді қолдап, демеп, жаңа елге сіңісіп кетуге көмектесті”.
Біз сізді шын жүректен қауым кездесулеріне шақырамыз! Ол жерде сіз Киелі кітаптың үміт берер хабары және оның пайдасы жайлы көбірек біле аласыз. Өзіңізге жақын жерде өтетін кездесуді jw.org сайтынан таба аласыз. Сондай-ақ тегін интерактивті Киелі кітап курсына өтініш толтыра аласыз. Бұл курсты Ехоба куәгерлерінің бірі “Мәңгі бақи өмірдің рақатын көріңіз!” кітабының көмегімен өтетін болады.