“Ауминіміз” Ехоба үшін бағалы

БҮКІЛ ХАЛЫҚ “АУМИН” ДЕЙТІН БОЛАДЫ

“Аумин” деген сөз “солай болсын”, “рас” дегенді білдіреді. Бұл сөз “адал болу”, “сенімді болу” дегенді білдіретін еврей сөзімен түбірлес келеді. Кейде ол сот істерінде де қолданылған. Ант бергенде адам “аумин” деуімен айтқандарының рас екенін дәлелдейтін. Сондай-ақ антының салдары қандай болатынын түсініп, онымен келісетінін көрсететін (Мұс. 4-ж. 5:22). Жұрт алдында “аумин” деп айтқаны адамның өз сөзінде тұруға деген шешімін қатайтатын (Нех. 5:13).

Мұсаның 5-жазбасының 27-тарауында ерекше бір оқиға жазылған. Исраилдіктер Уәде етілген жерге кірген соң, Евал мен Гаризим тауларының арасына жиналды. Олар сол жерде дауыстап оқылған Заңды тыңдау керек еді. Халық жай тыңдау үшін ғана емес, Заңды ұстанатындарын жариялау үшін де жиналды. Заңды орындамаған жағдайда оларды қандай жаза күтіп тұрғаны айтылғанда, жұрт бір ауыздан “аумин” деп жауап берді (Мұс. 5-ж. 27:15—26). Жүз мыңдаған ерлер мен әйелдердің, балалардың бар дауыстарымен “аумин” деп жатқандарын көз алдыңызға елестетіп көріңізші! (Ешуа 8:30—35). Сол күні берген анттарын исраилдіктер еш ұмытпаса керек. Олардың уәделерінде тұрғандары Киелі кітаптағы мына сөздерден көрінеді: “Исраил халқы Ешуаның, сондай-ақ одан ұзағырақ жасаған әрі Ехобаның Исраилдің игілігі үшін жасаған барлық істерін көрген ақсақалдардың көзі тірісінде Ехобаға қызмет етіп жүрді” (Ешуа 24:31).

Иса да айтқан сөзінің растығын дәлелдеу үшін “аумин” деп айтқан. Бірақ ол мұны айрықша жолмен істеген. Иса “аумин” дегенді айтылған сөздерге жауап ретінде емес, керісінше, алғы сөз ретінде қолданған. Осылайша айтқалы жатқандары шындық екеніне назар аударғанa. Кейде ол “аумин, аумин” деп қайталап айтқанb. Осылайша Иса сөздерінің бұлтартпас шындық екеніне тыңдаушыларының көзін жеткізген. Иса зор сенімділікпен сөйлей алған, өйткені ол Құдайдың бар уәделерін жүзеге асырмақ еді (Қор. 2-х. 1:20; Аян 3:14).

ХАЛЫҚ “АУМИН” ДЕП, ЕХОБАНЫ МАДАҚТАДЫ

Исраилдіктер Ехобаны мадақтағанда да, дұға еткенде де “аумин” деп айтатын болған (Нех. 8:6; Зәб. 41:13). Жиналған халық дұғадан кейін “аумин” деуімен айтылған дұғаны өз дұғасындай жолдайтынын көрсеткен. Ехобаға осылай бәрі бірге ғибадат еткенде, рухани шара одан сайын байи түскен. Осындай оқиға Дәуіт патшаның тұсында болды. Ол Ехобаның келісім сандығын Иерусалимге әкеліп, осы қуанышты жайттың арты тойға ұласты. Шежірелер 1-жазба 16:8—36 тармақтардан оқитынымыздай, Дәуіттің өлең жолдарымен жазылған жүрек толқытар дұғасын Асап пен оның бауырлары жырлады. Сол сөздерден кейін толқып кеткен халық “аумин” деді де, Ехобаны мадақтады. Олардың бір ауыздан “аумин” дегені сол күннің қуанышын еселей түсті.

I ғасырдағы мәсіхшілер де Ехобаны мадақтағанда “аумин” дейтін болған. Киелі кітапты жазған адамдар да өз хаттарында бұл сөзді жиі қолданған (Рим. 1:25; 16:27; Пет. 1-х. 4:11). Аян кітабында көктегі рухани жаратылыстардың да: “Аумин! Ехобаны мадақтаңдар!”— деп Құдайды даңқтап жатқаны суреттелген (Аян 19:1, 4). Алғашқы мәсіхшілер жиналыстарында дұға айтылғанда да “аумин” дейтін болған (Қор. 1-х. 14:16). Алайда олар бұл сөзді ойланбастан айта бермеген.

“АУМИН” ДЕУІМІЗДІҢ МАҢЫЗЫ

Жоғарыда “аумин” сөзінің қайдан бастау алғанына үңілген соң, дұғадан кейін “аумин” деудің мәні зор екенін түсіндік. Өз дұғамыздан кейін “аумин” дегенде, айтқандарымыз жүрегімізден шыққанын көрсетеміз. Ал көпшіліктің алдында айтылған дұғадан кейін “аумин” деуімізбен, тіпті іштей айтсақ та, дұғадағы сөздерге қосылатынымызды паш етеміз. “Аумин” дегеніміз тағы қай жағынан маңызды екенін көрейік.

Ғибадатымыз жанданады. Ехобаға ғибадат етуге дұғаның соңында “аумин” дегеніміз ғана емес, дұға айтылып жатқанда өзімізді қалай ұстағанымыз да жатады. Дұғаның маңыздылығын терең түсінсек және дұғада айтылғандарды ден қойып тыңдасақ, “ауминіміз” жан дүниемізден шығатын болады.

Ынтымағымыз нығаяды. Көпшілік алдында айтылатын дұғада қауымдағылардың бәрі бір сөздерді жұмыла тыңдайды (Ел. іс. 1:14; 12:5). Бауырластармен бірге бірауыздан “аумин” дегенде, бірлігіміз беки түседі. Дауыстап айтсақ та, іштей айтсақ та, “ауминімізді” естігенде, Ехоба өтінішімізді орындауға одан бетер асық болады.

Ехобаны мадақтаймыз. Оған ғибадат ету үшін жасап жатқан кішкене істеріміздің өзі Ехобаның көзінен таса қалмайды (Лұқа 21:2, 3). Ол біздің ниетіміз бен жүрегімізді көреді. Кейде қауым кездесуін телефон арқылы тыңдауға тура келсе де, біздің “аумин” деген бірауыз сөзімізді Ехоба елеусіз қалдырмайды. Бұл сөзіміз Ехобаға арналған мадақты үстемелейді.

“Аумин” деген сөзіміздің аса бір салмағы жоқтай көрінгенмен, оның астарында терең мән жатыр екен. Бір энциклопедияда айтылғандай, осы бірауыз сөздің көмегімен Құдайдың қызметшілері жүректерін кернеген сенімдерін, үміттерін, сондай-ақ дұғада айтылғандармен толықтай келісетіндерін паш ете алады. Ендеше, аузымыздан шыққан әрбір “ауминіміз” Ехобаға жағымды болғай! (Зәб. 19:14).