Қалай бастауға болады?

Киелі кітапты оқуға деген тәбетіңізді ашып, ондағы сөздерді нәрлі тағамдай қабылдауға не көмектеседі? Көп адам тиімді деп тапқан келесідей бес кеңеске назар аударайық.

Оқуға ыңғайлы жер табыңыз. Киелі кітапты тыныш жерде оқыған дұрыс. Бар назарыңызды оқып жатқан мәліметке аудара алуыңыз үшін алаңдататын нәрселерді мүмкіндігінше азайтыңыз. Бұл ретте ауасы таза, жарық жердің де қосар үлесі зор.

Дұрыс көзқарас сақтаңыз. Киелі кітапты бізге көктегі Жаратушы Әкеміз беріп отыр. Сондықтан оны оқығанда өзін жақсы көретін әкесінен үйренуге дайын кішкентай бала сияқты болсақ, ақылымызға ақыл қосамыз. Киелі кітапқа қатысты қандай да бір күмәнді ойларыңыз болса, оларды ысыра тұрыңыз. Сонда Құдайдың сізге үйретері көп болады (Зәбүр 25:4).

Оқымас бұрын, Құдайға дұға етіңіз. Киелі кітапта Құдайдың ойлары жазылған. Сондықтан оны түсіну үшін Құдайдың көмегі қажет-ақ. Ол “өзінен сұрағандарға киелі рухын беруді” уәде етеді (Лұқа 11:13). Киелі рухтың әсерімен сіз Құдайдың ойларын түсіне аласыз. Уақыт өте келе, киелі рух ой-санаңызды ашып, “Құдайдың терең даналығын” түсінуге көмектеседі (Қорынттықтарға 1-хат 2:10).

Оқығанды түсінуге тырысыңыз. Жай бастан-аяқ оқып шықпай, оқығанды әрдайым ой елегінен өткізуге тырысыңыз. Мысалы, “Осы кейіпкердің қандай қасиеттері бар? Бұл мәліметті қалай қолдансам болады?” деп ойланып көріңіз.

Нақты мақсаттар қойыңыз. Киелі кітапты оқудан рақат алу үшін өміріңізді жақсарта түсетін бір нәрсеге үйренуді мақсат етіңіз. Мысалы, Құдайды жақыннан танып білу, жақсы азамат, күйеу я әйел болу сияқты мақсаттар қоюға болады. Сосын, осы мақсаттарға жетуге көмектесетін Киелі кітап үзінділерін таңдап оқыңызa.

Осы бес кеңес сізге жолашар болмақ. Киелі кітапты әрі қарай да қызығып оқуға көмектесетін басқа да кеңестер бар ма екен? Бұл жайлы келесі мақалада сөз қозғалады.